Akintaahsonan 22
22
Moowap Kihciokimaa Kii'antomaatc Pelamoon
1Isriyalak (Israel) itahsh kiihpimi ayaawak. I'imaa tahsh eshi pashkwaanik Moowap (Moab) ahkiink kii‑ishi kapehshiwak waapanonk inahke Cwaartan (Jordan) siipink, akaamisiipi Cerahko (Jericho) ekii ayaanik.
2A'a tahsh Pelak (Balak) oteten Sihpor (Zippor) eshinihkaasonitc kiinoontam aaniin Isriyala' kaahtootawaanitc Emorii (Amorite) kaatinowinitc. 3Iki tahsh Moowap ahkiink eyaawaatc wiinke kiihsekisiwak, aaniihsh Isriyala' wiinke kiihpaahtiinowa'. Iki tahsh Moowap eyaawaatc wiinke okii kohsaawaa' Isriyala'. 4Moowap itahsh eyaawaatc o'o okii'inaawaa' kaaniikaanisinitc Mitiyan (Midian) ahkiink wenciinitc, “Inashke hsa iki kaapaahtiinowaatc kahkina kekoon oka ayotaahpinaanaawaa misiwe waahkaaya'ii eyaanik, taapishkoo pishihki kaakitaatc mashkohsiin waahkaaya'ii eshi'ayaatc mihshawahkamik,” okii'inaawaa'. A'a hsa Pelak kaakii otetetc Sihporan kiikihci okimaawi i'imaa Moowap ahkiink. 5#2Pe 2.15,16. Miihsh kaakii ishinisha'waatc ininiwa' cianta waapamaanitc Pelamoon (Balaam) wetetenitc Pii'or (Beor) kaakii ayaanitc Piihtar (Pethor) ecikaatenik ootena ciiki siipink Iiyoohparetiis (Euphrates) ecikaatenik. Mii iitok weti inahke ahkiink kaaonci tipentaakosinitc. Miitahsh kaa'inaatc, “Etatawe hsanaa onsaamiinowak pemaatisiwaatc Iicipahkiink (Egypt) kaakiih pi'onci saaka'amowaatc. Wiinke hsa ko otaa kawishkaanaawaa ahki ehpiihci paahtiinowaatc, ciikaya'ii hsa ko o'omaa pi‑ishi kapehshiwak. 6Etatawe ohsha paahtiinowak, kaawiin kehcinaac nintaa shaakooci'aahsiik ninkoci cionci inaamohkiiyaampaan o'omaa ahkiink. Taka tahsh piishaan cipi macakimatwaa, onsaam aaniihsh onsaamiinowak. Ninkihkentaan hsa awenen iko enatc ciminohsetc eminohsetc, awiya kaye ko kiimacakimatc. Mii ko'i eshi macihsetc,” okii'inaan.
7Oniikaanisiik itahsh Moowap ahkiink wenciiwaatc, oniikaanisiik kaye Mitiyan wenciiwaatc okii maaciitoonaawaan waahtipa'ikaakewaatc ahpii mamaantaawi anta kihkencikenaaniwaninik kaakii ishi anoohkiiwaatc. Ahpii hsa eotihsaawaatc Pelamoon, okii wiintamawaawaan aaniin Pelakoon kaaihkitonitc. 8Miihsh kaaikowaatc Pelamoon, “Mii hsa o'omaa ayaak kapetipihk, kika wiintamawininim itahsh aaniin kaaTipenciketc keishikwen,” okii'ikowaan. Miitahsh i'imaa kaa‑ayaawaatc i'i ehtipihkaninik iki oniikaanisiik Moowap wenciiwaatc. 9Miitahsh Pelam kaakiih pi naasihkaakotc Kishemanitoon ekii'ikotc, “Awenenak iki tino ininiwak kaawiiciiwihkwaa?” okii'ikoon.
10O'ohsh okii ishi nahkwehtawaan Kishemanitoon, “Pelak kaakihci okimaawitc Moowap ahkiink wetetetc Sihporan ohsha okiih piicinisha'waa' o'o cipi wiintamawimitc. Miihsh o'o kaaishimitc, 11‘Inashke hsanaa etatawe onsaamiinowak pemaatisiwaatc Iicipahkiink kaakiih pi'onci saaka'amowaatc, otaakawishkaanaawaa hsa ahkiini ehpiihci paahtiinowaatc. Taka tahsh piishaan cimacakimatwaa niin onci; maakishaa tahsh mii 'i cishaakooci'akwaa, ninkoci tahsh ci‑inaamohkiiyaan,’ ” okii'inaan.
12Miitahsh o'o kaa'ikotc Kishemanitoon, “Keko maacii wiiciiwaahken oko ininiwak, kaawiin hsa kika macakimaahsiik Isriyalak, aaniihsh aasha ninkii'inaak ciminohsewaatc,” okii'ikoon.
13Eani waapaninik itahsh Pelam okii anta waapamaa' Pelakoon otooshkiniikiimini ekii'inaatc, “Maacaak kitahkiiwaank anishi kiiwek, kaaTipenciketc ohsha kaawiin inentansii ciani wiiciiwinakook,” okii inaa'. 14Miitahsh i'i oniikaanisii' Moowap wenciinitc kaa‑aniishi kiiwenitc ekii anta waapamaanitc Pelakoon o'o ekii'inaanitc, “Pelam kaawiin tepwehtansii cipi wiiciiwiyamintc,” okii'inaawaan.
15Miinawaa tahsh Pelak okii ishinisha'waa' oniikaanisii' nawac ekiih paahtiinonitc, nawac kehci inentaakosinitc ahpiihc wiin i'i nihtam kaakii ishinisha'waahpan. 16Ahpii tahsh wetihsaanitc eshi'ayaanitc Pelamoon o'o okii'inaani, “O'o hsa kitik Pelak wetetetc Sihporan, ‘Taka keko kekoon kika ontamii'ikohsiin cipi'anta waapamiyan; 17weweni iitok kiwii kihci tipa'amawin, ninka ishihcike kaye aaniin iko ke'ishiyan. Taka hsa piishaahkan, cimacakimatwaa iki Pemaatisiwaatc Isriyalak niin onci,’ ” kitikoo okii'inaani.
18Miihsh o'o Pelam kaaishi nahkwehtank, “Mihsawaa ko Pelak miishitc osaawi shooniyaa waapihkoon, waapaapihko shooniyaa waapihkoon kaye minihk citepashkinenihpan owaahkaa'ikanink, kaawiin hsa kekoon nintaa ishihcikewaahsiin, mihsawaa ko ekaasininik, komaa kihci kekoon. Kaawiin hsa nintaa ishihcikewaahsiin nahpaac enaahkoniketc kaaTipenciketc ninKishemanitoom. 19Taka tahsh o'omaa ayaahkek noonkom kaatipihkahk, ninka anta kihkentamowaan itahsh kaaTipenciketc aaniin miinawaa keishikwen,” okii inaa'. 20Miihsh ehtipihkaninik Pelam kaakiih pi'anta waapamikotc Kishemanitoon ekii'ikotc, “Kiishpin hsa iki ininiwak kaapi naasihkawihkwaa kakwecimihkwaa ciwiiciiwatwaa, pisaan hsa pasikwiin ciwiiciiwatwaa; ke'ininaan itahsh ehta kika ishihcike,” okii'ikoon. 21Eani waapaninik itahsh Pelam kiiwanishkaa ekii onahpinaatc omaanshi mihtatimooman. Miihsh kaaishi maacii wiiciiwaatc oniikaanisii' Moowap ahkiink wenciinitc.
Pelam Kiihkanoonikotc Omaanshimihtatimooman
22Kishemanitoon okii nishki'aan i'i ekii maacinisha'iketc. KaaTipencikenitc itahsh otencalimini kiihkipikaapawiwan miihkanaank ewii nakaashkaakotc. Pelam (Balaam) kiihpimiwanaaso omaanshimihtatimoomink, niishin itahsh pemiihtaakotc okiih tako wiiciiwaa'. 23Ahpii tahsh a'a maanshimihtatim ewaapamaatc encalan ehkipikaapawinitc waa‑ani ishaatc, pashipa'ikewihkomaan kaye ehtahkonaminitc, mii hsa kaaishi pahketc eshi pashkwaanik inahke ekii ishaatc. Miihsh Pelam kaakiih pahkihte'waatc omaanshimihtatimooman, miihkanaank ekii ishinisha'waatc. 24Ini tahsh encalan kii‑ishi niipawiwan eshi akaahsatemoninik miihkana eshi'ayaanikin kwehkwehk eshi kihtikaasonitc shoomina', kwehkwehk itahsh kaye kiiayaahsami ayaani. 25Ahpii tahsh omaanshimihtatimooman ewaapamaanitc ini encalan, mii hsa 'i eshi aahsami'ayaanik kaaishi ahshicihtaanitc. Miihsh Pelam kaakii maakositeshkaakotc omaanshimihtatimooman aahsamaya'ii. Miitahsh miinawaa kaaishi pahpahkihte'waatc. 26Miinawaa itahsh ini encalan kiiani ishaawan aanciihke eshi akaahsateyaanik, kaawiin inkoci kiihtawaahsinini cikwehkiinaaniwaninink. Kwehkwehk itahsh kii‑ishi'ayaahsami ayaani, kaawiin inkoci cishi wemaashkaank. 27Ahpii tahsh omaanshimihtatimooman ewaapamaanitc kaaTipencikenitc otencalimini, mii hsa 'i kaaishi oshihshininitc mekwaa Pelam ehpimiwanaasotc. Enishki'ikotc itahsh, mii 'i kaaishi pahpahkihte'waatc mihtik ekii aapacihtootc. 28Miitahsh kaaTipencikenitc kaakii ishi'ikonitc omaanshimihtatimooman cikiikitonitc. Miitahsh o'o kaa'ikotc, “Aaniin itahsh kaahtootawinaan, o'o aasha nihsink kaapahpahkihte'oyan?” okii'ikoon.
29Miihsh Pelam kaa'inaatc omaanshimihtatimooman, “Onsaam aaniihsh kikakiipaasinaako'ish! Kiishpin hsa pashipa'ikewihkomaan eyaayaampaan, aasha kitaakii nihsin,” okii'inaan.
30O'o tahsh okii'ikoon, “Kaawiin ina niin a'a peshikwan kimaanshimihtatimoom minihk kaapi pimaatisiyan kaapipimiwanaaninaan? Wiihkaa na o'o kipi tootawin otaanaank?” okii'ikoon. “Kaawiin,” itahsh okii'inaan.
31Miitahsh Pelam kaaishi ishi'ikotc kaaTipencikenitc ciwaapitc, miihsh kaakii waapamaatc kaaTipencikenitc otencalimini eniipawinitc miihkanaank etahkonaminitc pashipa'ikewihkomaan. Miitahsh kaaishi animihkohtaatc mihtahkamik. 32Miitahsh kaa'ikotc ini encalan, “Wekonenini tahsh nihswaa kaaonci pahkihte'watc kimaanshimihtatimoom. Mii osha'i wenci piishaayaan ewii nakaashkawinaan, aaniihsh kaawiin sesik kitishaahsii o'o kaapimi ayaayan. 33A'a hsa maanshimihtatim ninkii waapamik, nihsink itahsh ninkii miitaakwenotaak. Kiishpin itahsh i'i ishihcikehsikipan, kehcinaac maawiin aasha noonkom kitaakii nihsin, kimaanshimihtatimoom itahsh wiin pisaan nintaakiih pakitinaa cipimaatisihpan,” okii'ikoon.
34Miihsh o'o Pelam kaaihkitotc, “Mii hsa 'i kiimacitootamaan. Kaawiin hsa ninkii kihkentansiin ekiih kipikaapawiyan waaishaayaan cinakaashkawiyan. Kiishpin itahsh noonkom minwaapantansiwan o'o, intawaa hsa ninka kiiwe,” okii'inaan.
35KaaTipencikenitc itahsh otencalimini okii'ikoon, “Maacaan pisaan ani wiiciw iki ininiwak, ke'ininaan itahsh ehta kika'ihkit,” okii'ikoon. Miihsh Pelam kaakii ani wiiciiwaatc oniikaanisii' Pelakoon kaakiih piicinisha'waanitc.
Pelam Kiinakishkawaatc Pelakoon
36Pelakoon (Balak) itahsh enoontaminitc Pelam (Balaam) ehpi takohshink, okiih pi'anta nakishkaakoon i'imaa eshi'ayaanik Moowap ootena. Mii hsa i'imaa kaakii ahkohsenik Ernan (Arnon) tipa'ahkaan, ehko waahkaahsenik i'i ahkiini. 37Miihsh o'o kaa'ikotc Pelakoon, “Kaawiin ina kihci weweni kitaanakii antomihsinoon? Wekonen itahsh kaaonci piishaahsiwan. Kaawiin ina nintaa kashkihtoosiin citipa'amawinaan,” okii'ikoon. 38Miitahsh o'o Pelam kaaishi nahkwehtank, “Inashke hsa ninkiih piishaa! Waaihkitoyaan itahsh iko na ninka'ihkit? Kishemanitoo hsa ehta ko kaashi miishitc nintoonink ninka ihkitowaan,” okii'inaan. 39Okii ishi wiiciiwaan ihsa tahsh Pelakoon weti ootenaank Kiriaht Iyoosaht (Kiriath Huzoth) ecikaatenik. 40Miitahsh i'imaa Pelakoon kaakii ishi pakitinaahswaakenitc pishihkiwa', maanahcaanihsha' kaye. Miihsh Pelam kaaishi ahshamikotc, okii ahshamaani kaye kaaniikaanisinitc kaakii wiiciiwikotc.
Pelam Nihtam Kaakii'ihkitotc
41Eani waapaninik itahsh Pelakoon (Balak) okii ishiwinikoon weti kaatashi nihtaa anami'ehtawimintc manitoohkaanan Peyal (Bamoth Baal) kaaishinihkaacikaniwinitc, miitahsh kaaishi waapamaatc aaninta entahshinitc Isriyala'.
Currently Selected:
Akintaahsonan 22: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
