Akintaahsonan 20
20
Moosihs Kii'ontinamaaketc Nipi Keminihkwewintc
1Peshiko kiisihsoon ehpimakinsonitc, kahkina kaakiih tahshiwaatc Isriyalak (Israel) kiihpi takohshinook i'imaa pikwatahkamik Sin (Zin) ecikaatenik. I'imaa hsa Kateshink (Kadesh) kii‑ishi kapehshiwak. Mii hsa i'imaa Miriyam (Miriam) kaakiih tashi ishkwaa pimaatisitc, miikaye i'imaa kaaishi na'inintc.
2 #
Exo 17.1-7. Kaawiin tahsh nipiini kiiayaahsinini keminihkwaatamowaatc Isriyalak. Kahkina tahsh okii maamawi naasihkawaawaan Moosihsoon (Moses) ini kaye Eranoon (Aaron). 3Miihsh kaakii maanshi kakanoonaawaatc Moosihsoon ekii ihkitowaatc, “Nawac iitok taakii onishihshin keniinawint nipoyaankipan ahpii kiinipowaatc niicihkiweyinaanik enaahsamiinitc kaaTipencikenitc! 4Wekonen tahsh kaaonci piishiyaank o'omaa pikwatahkamik? O'omaa na citashi nipoyaank, iki kaye nintawahkaaninaanik? 5Wekonen tahsh kaaonci saakiciwishiyaank weti Iicipahkiink, o'omaa tahsh kaashi wiinaahpakentaakwahsinok ekii ishi piishiyaank? Inashke o'omaa kaawiin kanake pahkweshikan nihtaawikihsii, kaawiin kaye pik (fig) tinowaahtikook, shoominaahtikook kaye, shiiwimihtikook kaye. Kaawiin kaye kekoon nipi keminihkweyaank ayaahsinoon,” okii'inaawaan. 6Miitahsh Moosihs a'a kaye Eran kaakii nakanaawaatc pemaatisinitc, ekii ishaawaatc eshi ishkwaantemiwaninik maawaci'itiwi pakwaanekamikoni. Miihsh i'imaa kaaishi animihkohtaawaatc mihtahkamik. Miihsh kaaTipenciketc okihci inentaakosiwin kaakii naakwaninik i'imaa.
7Miitahsh o'o kaaTipencikenitc kaa'ikotc Moosihs, 8“Maaciitoon i'i kisahka'oonaahk, ciwiiciiwatc a'a kihsayenhs Eran cimaawantoonekwaa kahkina pemaatisiwaatc. Miitahsh ishi kanoonaahkan a'a ahsin maanoko ciwaapamihkwaa, nipi i'imaa cionciciwank. Mii hsa tahsh i'imaa ahsiniink keonci piitamawatwaa i'i nipiini. Mii hsa i'iweni keminihkwewaatc kahkina pemaatisiwaatc, i'i kaye otawahkaaniwaa',” okii'ikoon. 9Miihsh Moosihs kaakii ishaatc ekii maaciitootc sahka'onaahk, ekii ishihciketc kaakii'ikotc kaaTipencikenitc.
10Miihsh Moosihs, a'a kaye Eran kaaishi maawantoonaawaatc kahkina Isriyala' eshi'ayaanitc ahsiniin, Moosihs o'o ekii ihkitotc, “Pisintawihshik kiinawaa kaashashiipihtamek, nipi na o'omaa ahsiniink kika onci piitamaakoom?” 11Miitahsh Moosihs kaakii ishpinihkenitc ekiih pahkihte'waatc ahsiniin niishwaa, sahka'onaahk ekii aapacihtootc. Niipiwa' itahsh nipiini i'imaa kiionciciwanini. Kahkina tahsh Isriyalak kiiminihkwewak, i'i kaye otawahkaaniwaa'.
12Miitahsh Moosihs, a'a kaye Eran kaakiih kishii kanoonikowaatc ekii'ikowaatc kaaTipencikenitc, “Kiinawaa tahsh kaashi niishiyek ekiih tepwehtawihsiwek cikii naakohtooyekipan ninkihci inentaakosiwin cikii waapantamowaahpan pemaatisiwaatc Isriyalak, kaawiin hsa kiinawaa kika ishiwinaahsiwaawaak oko Isriyalak weti ahkiink kaakii ahshotamawakwaa ewii miinakwaa,” okii'ikowaan.
13Mii hsa o'o kaaishihsek i'imaa Meripa#20.13 Meripa: I'iwe Meripa kaa'icikaatek, taapishkoo awiya kaamaanshi kanoonintc, mii 'iwe enihtaakwaninik kaaishikiishwewaatc Hiiparoowak. (Meribah) ayaawinink. Mii 'i aaniihsh i'imaa pemaatisiwaatc Isriyalak kaakii ishi maanshi kanoonaawaatc kaaTipencikenitc. Miitahsh i'imaa kaaTipenciketc kaakii ishi waapanta'aatc ekihci inentaakositc.
Isriyalak Kiihpakitinaahsiwintwaa Cishaaposhkaawaatc Iitam Ahkiink
14Moosihs (Moses) itahsh i'imaa Katesh (Kadesh) okii onci maacinisha'waa' awiya' ciawi kanoonaanitc Iitam (Edom) kihciokimaan. Miihsh o'o kaa'inaanitc, “Niinawint hsa Isriyalak kiicihkiwensiwak einaankoomikooyek, o'o hsa kitikoom; kikihkentaam iitok aaniin kahkina kaahpishi kakwaatakihseyaank. 15Ninkehteya'aaminaapaniik hsa kii‑ishaawaakopan Iicipahkiink (Egypt), kinwesh weti kiiayaawaakopan. Iicip kaatinowiwaatc itahsh kaawiin kwayahk ninkiih tootaakohsiinaanik, ninkehteya'aaminaapanii' kaye kaawiin kwayahk okiih tootawaahsiwaawaa'. 16Ahpii tahsh kaahshaakowaanankitc kaaTipenciketc, ninkii noontaakonaan. Miihsh kaakiih piicinisha'waatc otencaliman ekiih saakiciwishiyamintc weti Iicipahkiink. Inashke tahsh noonkom o'omaa Ketesh ootenaank nintayaamin, saakicaya'ii kitahkiimiwaank. 17Taka tahsh pisaan pakitinihshinaam cishaaposhkaayaank kitahkiimiwaa. Kaawiin ninka ishaahsiimin kikihtikewahkamikowaank, shoominak kaye eshi kihtikaanekwaa, kaawiin kaye kitoonta'ipaaniwaank ninka onci minihkwehsiimin nipi. Weti kihci okimaa omiihkanaamink ninkashi pimi ayaamin, kaawiin awaac ninamantinihkinaanink, ninkihcinihkinaanink kaye inahke ninkashi pahkehsiimin, piinihsh ciani otihtamaank eshi poonihsek kitahkiimiwaa,” kii‑ihkitowa'.
18O'o tahsh Iitam wenciinitc okii'ikowaa', “Kaawiin kika shaaposhkaahsiim nintahkiiminaan; kiishpin itahsh wiihkocihtooyek, kika anta nakishkaakoom cimiikaanikooyek, pashipa'ikewihkomaanan ciaapacihtooyaank,” okii'ikowaa'.
19Miihsh o'o Isriyalak kaakii'inaawaatc, “Weti hsa ehta kihci miihkanaank ninka ishi pimi ayaamin. Kiishpin itahsh minihkweyaank nipi, komaa kaye nintaya'aawihshiminaanik minihkwewaatc, kika tipa'amaakoom itahsh. Ewiih shaapo pimohseyaank ohshehta nintishi antawentaamin, kaawiin wiin kekoon pahkaan,” kii‑ihkitowak.
20O'o tahsh okiih pi'ikowaa', “Kaawiin hsa kika shaaposhkaahsiim!” Miitahsh kaakiih pi'anta nakishkaakowaatc Iitamiwi shimaakanihsha' ekiih paahtiinonitc, wiinke kaye ekii mashkawentaakosinitc. 21Ekiih pakitinikohsikwaa tahsh Iitam kaatinowinitc cishaaposhkaawaatc otahkiiminiink, Isriyalak hsa pahkaan inahke okii ishi wemaashkawaawaa'.
Eran Kii'ishkwaapimaatisitc
22Kahkina tahsh kaakiih tahshiwaatc Isriyalak Ketesh (Kedash) kiionci maacaawak, weti tahsh waciink Hor (Hor) ecikaatenik kii‑ishi takohshinook. 23I'i waciw Hor eshinihkaatek kii‑ishi'ayaa i'imaa ciikaya'ii Iitam (Edom) ahki. Miitahsh i'imaa Moosihs (Moses) kaakiih kanoonikotc kaaTipencikenitc ekii'ikotc, 24“Eran (Aaron) hsa aasha kekaa taishkwaa pimaatisi, kaawiin itahsh tapiintikeshkaahsii i'i ahkiini kaakii ahshotamawimak Isriyala' (Israel) ewii miinimak. Onsaam aaniihsh eshi niishiyek kaawiin kikii na'ihtawihsiim kaa'ininakookipan weti Meripa ayaawinink nipi kaashi ayaak. 25Piahkwaamaciwewish itahsh Eran, ini kaye okosihsan Eli'esar (Eleazar) kaaishinihkaasonitc o'omaa waciink Hor. 26Kika kiihcikoshkamo'aa tahsh Eran otanami'e kikishkikanan, okosihsan itahsh Eli'esaroon kika pihsihkamoo'imaan. Miitahsh weti Eran ketashi ishkwaa pimaatisitc,” okii'ikoon. 27Moosihs itahsh kii‑ishihcike kaakii'ikotc kaaTipencikenitc, ekii ahkwaamaciwewinaatc waciink Hor, kahkina Isriyala' keshi kanawaapamikowaatc. 28#Exo 29.29; Deu 10.6. Miihsh Moosihs kaakiih kiihcikoshkamo'aatc Eranoon okikishkikanini, okosihsini tahsh Eli'esaroon okiih pihsihkamoonaan. Miitahsh weti Eranoon wakici waciw kaahtashi ishkwaa pimaatisinitc. Moosihs, a'a tahsh kaye Eli'esar kiihpionci niihsaciwewak i'imaa waciink. 29Ahpii tahsh kahkina Isriyalak ekihkentamowaatc Eranoon ekii ishkwaa pimaatisinitc, kahkina hsa ko kaakiih tahshiwaatc okii mawimaawaan nihsimitana (30) tahso kiishik minihk.
Currently Selected:
Akintaahsonan 20: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
