Ekihsatahs 7

1Miitahsh Moosihs kaa'ikotc kaaTipencikenitc, “Inashke kiwii ishi'in taapishkoo eh⁠Kishemanitoowiwatc ci⁠naasihkawatc kihciokimaa. A'a tahsh kihsayenhs Eran (Aaron) kika kiikitoohtamaak. 2Kahkina tahsh kekoon kika'ihkit kaa⁠ishi anooninaan, a'a hsa kihsayenhs Eran oka kanoonaan Peroon ci⁠pakitinaanitc Isriyala' (Israel) ci⁠onci maacaanitc otahkiimink. 3Niwiih tootawaa hsa Peroo ci⁠shashiipihtank. Maano hsa ini ninkihkinawaacihcikanan, nimashkawisiiwinan kaye ci⁠waapancikaatekin i'imaa Iicipahkiink. 4Ahpii tahsh pisintawihsinok, miitahsh i'i kaawiih kihci sanakaahkonimak opimaatisiima' Iicipahkiink eyaanitc. Niwiih saakiciwinaak Isriyalak kaa⁠tipenimakwaa i'imaa Iicipahkiink. 5Miitahsh Iicipahkiink eyaawaatc ci⁠kihkenimiwaatc niin eh⁠Tipencikewak ahpii kihci sanakaahkonakwaa wiih⁠saakiciwinimak Isriyala' eyaanitc otahkiiwaank,” okii'ikoon. 6Miihsh Moosihs, Eran kaye kaakii ishihcikewaatc kaakii ishi anoonikowaatc kaaTipencikenitc. 7Moosihs ihsa nihshwaahsimitana (80) kiih⁠tahso pipoonwe. Eran tahsh nihshwaahsimitanashinihsin (83) kiih⁠tahso pipoonwe ahpii kaakiih kanoonaawaatc Peroon.

Eran Osahka'onaahk Ehtashintenik

8Miitahsh Moosihs (Moses), a'a kaye Eran (Aaron) kaa⁠ikowaatc kaaTipencikenitc, 9“Ahpii hsa Peroo (Pharaoh) o'o ininek, ‘Maamahkaacihcikek’, o'o hsa tahsh inaahkan Eran, ‘I'i kaa⁠tahkonaman kisahka'onaahk, ahpakitoon enaahsamiayaatc Peroo,’ miitahsh ci⁠kinepikohsenik,” okii'ikowaan. 10Miitahsh kaakii anta waapamaawaatc Peroon, ekii ishihcikewaatc kaakii'ikowaatc kaaTipencikenitc. Miihsh Eran kaakii ahpakitootc osahka'onaahk enaahsamiayaanitc Peroon, i'i kaye otaanihkewikimaamini, miihsh kaa⁠ishi kinepikohsenik. 11Miitahsh Peroo kewiin kaakii antomaatc kekiihtaawakinsonitc ininiwa', memaantaawisinitc kaye. Miihsh peshikwan kaa⁠ishi mamaantaawihcikenitc i'i Iicipahkiink (Egypt) wenciinitc. 12Entahshinitc hsa okii ahpakitooni osahka'onaahkoni, miihsh kaa⁠ishi kinepikohsenikin. Eran itahsh osahka'onaahk kaakiih kinepikohsenik, okiih kontamiini ini osahka'onaahkoni kaakiih kinepikohsenikin. 13Miitahsh Peroo aanciihke kaakii ani shashiipihtank ekiih pisintawaahsik, ekii ishihsenik mayaa kaakii ihkitonitc kaaTipencikenitc.

Kiikihciwahsitaawihsenk Iicipahkiink

14Miitahsh Moosihs kaa'ikotc kaaTipencikenitc, “Peroo hsa aanciihke ani shashiipihtam, miihsh kaa⁠onci inentansik ci⁠pakitinaatc pemaatisinitc ci⁠maacaanitc. 15Kishepaawakaninik itahsh anta mekwaashkawaahkan Peroo ahpii naasipiitc Naayal (Nile) siipink. Miitahsh weti keshi pii'atc piinihsh ci⁠takohshink. Maaciitoohkan itahsh i'i sahka'onaahk kaakiih kinepikohsek. 16Miitahsh ke'inatc, ‘KaaTipenciketc, Hiiparoowak (Hebrews) weKishemanitoomiwaatc, ninkiih piicinisha'ok o'o ci'ininaan, “Taka pakitin nimpimaatisiimak ci⁠maacaawaatc ci⁠anta anami'ehtawiwaatc weti pikwatahkamik. O'o tahsh ishi ahpii kaawiin mahshi kipisitansii.” 17#Rev 16.4. Mii hsa tahsh o'o kaaTipenciketc ehkitotc: Miitahsh o'o ke⁠onci kihkentaman niin eh⁠tinowiyaan kaaTipenciketc. Inashke niwii aapacihtoon o'o sahka'onaahk kaa⁠tahkonamaan ewiih pahkihte'amaan o'o Naayal siipi, miihsh keshi aantaakamihsek ci⁠miskwiiwaakamik. 18Kiikooyak hsa ta⁠nipowak i'imaa Naayal siipink, wiinke ta⁠wiinciikaakamin i'i siipi; Iicipahkiink (Egypt) kaa‑ayaawaatc itahsh kaawiin oka kashkihtoohsiinaawaa ci⁠minihkwewaatc i'i nipiini,’ ” okii'ikoon ci‑ihkitotc.

19Miihsh kaa'ikotc kaaTipencikenitc, “Kanoosh Eran ci⁠otaahpinank i'i osahka'onaahk ci‑ishi niiminank inahke eshi nipiihkaanik Iicipahkiink, eshi sasiipiihkaanik kaye, eshi ayayaanikin kaye siipiinhsihkaanan, saaka'ikaniinhsihkaanan kaye, misiwe kaye nipi eshi kanawencikaatenik, miihsh ci⁠ani miskwiiwaakamihsenikin. Misiwe hsa miskwi ta‑ayaa Iicipahkiink, mihsawaa ko mihtikowi ahtoopaanink, ahsiniiwi ahtoopaanink kaye,” okii'ikoon.

20Mii hsa Moosihs, Eran kaye mayaa kaa⁠ishihcikewaatc kaaTipencikenitc kaakii ishi anoonikowaatc. Eran okii ompaahkonaan osahka'onaahk ekiih pahkihte'ank nipi i'imaa Naayal (Nile) siipiink, keshi waapantaminitc Peroon, i'i kaye kahkina otaanihkewikimaamini. Misiwe tahsh nipiini kii⁠aantaakamihseni ekii miskwiiwaakamininik. 21Miitahsh kahkina kiikooyak i'imaa Naayal siipiink kaakii nipowaatc. Miihsh wiinke i'i siipi kaakii maanshi maakwahk. Iicip kaa‑ayaawaatc itahsh kaawiin okii kashkihtoohsiinaawaa ci⁠onci minihkwewaatc i'imaa siipiink. Misiwe hsa Iicipahkiink kii⁠ayaa miskwi. 22Miitahsh peshikwan i'i nahke kaa⁠ishi maamahkaacihcikenitc memaantaawisinitc i'imaa Iicipahkiink wenciinitc. Miihsh Peroon aanciihke kaakii ani shashiipihtaminitc, ekiih pisintawaahsinik Moosihsoon, Eranoon kaye, mayaa ekii ishihsenik kaaTipencikenitc ehkitonitc. 23Aanciko tahsh kii⁠ani kwehkikaapawiwan ekii ani kiiwenitc e⁠ishaanitc otookimaawikamikoniink, kaawiin awaac okiih papaapisiskentansiini o'o kaakii inahkamikaninik. 24Kahkina hsa Iicipahkiink kaa‑ayaawaatc kii⁠waanihkewa' e⁠naanewe ayaanik Naayal siipink, e⁠antwaanihkaataminitc ke⁠minihkwaataminitc nipi, aaniihsh kaawiin okii kashkihtoohsiini ci⁠minihkwenitc i'i nipiini siipink eyaanik.

25Niishwaahsokiishik (7) itahsh kii⁠ani ishihseni ahpii kaaTipenciketc kekoon kaakiih tootank nipiini.

Currently Selected:

Ekihsatahs 7: OJBR

Highlight

Copy