Ekihsatahs 2

Moosihs Onihtaawikiwin Ehtashintenik

1I'i tahsh ahpii kii⁠ayaa inini Liipaaink (Levi) ekii ontahkaanesitc, ekii wiiwitc ihkwewan kaakii wiici ontahkaanesiimaatc. 2#Act 7.20; Heb 11.23. Miitahsh a'a ihkwe kaakii ani kikishkawaawahsotc ekii ayaawaatc kwiiwisenhsan. Ekii waapamaatc itahsh e⁠minonaakosinitc, okiih kaanaan nihsokiisihs (3) minihk. 3Ahpii tahsh kaa⁠kashkihtoohsik awahshime ci⁠kaanaatc ini apinoonciishan, mii hsa mashkohsii mahkahkonk kaa⁠ishi piina'waatc. Okii ishihtoon i'i mahkahkoni ci⁠onsihkaahsininik, pikiwan ekii aapaci'aatc. Miitahsh kaa⁠ishi pahkopii'ank ciikew kaakii ishi mashkohsiihkaanik i'imaa Naayal (Nile) siipink. 4Otawemaan itahsh a'a kwiiwisenhs waahsa kii⁠onsaapiwan ewii waapamikotc aaniin ke⁠ishihsetc.

5Kihciokimaa tahsh otaanihsan kii⁠naasipiiwan i'imaa siipink ewiih kisiihsipasonitc. Mekwaa tahsh a'a otaanihsimaa eh⁠pimaashakaametc kaa⁠wiiciiwikotc oshkiniikihkwewa' kaakiih pamiihtaakotc, okii onci waapantaan mashkohsii mahkahkoni e⁠akwantenik eshi mashkohsiihkaanik. Miihsh kaakii anoonaatc peshik kaa⁠pamiihtaakotc ci⁠naasihkaminitc. 6Ahpii tahsh eh⁠paahkinank i'i mahkahk, apinoonciishan okii waapamaan e⁠mawinitc. Miihsh kaa⁠ishi koohpaatenimaatc ekii ihkitotc, “Mii hsa wa'a peshik Hiiparoowi apinoonciish,” kii‑ihkito.

7A'a tahsh kwiiwisenhs kaakii otawemaatc okii'inaani kihciokimaan otaanihsini, “Nintaa ishaa na ci⁠awi kanoonak Hiiparoowihkwe ke⁠nooni'aahtamawihk ini apinoonciishan,” okii'inaan.

8Miihsh kihciokimaahkwenhs kaa'inaatc ini ihkwesenhsan, “Haw, maacaan.” A'a tahsh ihkwesenhs okii awi kanoonaan omaamaani ini apinoonciishan. 9Kihciokimaahkwenhs hsa okii'inaan ini ihkwewan kaakii antomimintc, “Maaciish a'a apinoonciish ci⁠nooni'aahtamawiyan, kika tipa'amawin itahsh kaye,” okii'inaan. Miitahsh ini ihkwewan kaa⁠ishi otaahpinaanitc ini apinoonciishan ekii nooni'aahtamaakotc. 10#Act 7.21. Ahpii tahsh kaah⁠te'ahpiihtaatisinitc ini apinoonciishan, a'a hsa ihkwe okii ishiwinaan kaakii ishi'ayaanitc kihciokimaa otaanihsan. Miitahsh a'a otaanihsimaa kaa⁠ishi inakimaatc ini kwiiwisenhsan wiin iko ekii okosihsitc. Miitahsh kaa⁠ihkitotc, “Nipiink itahsh ekii onci akwaasipinak, Moosihs (Moses)#2.10 Moosihs (Moses): I'iwe ishinihkaasowin Moosihs kaa'icikaatek, ekii onci wiihkopinaakaniwitc, mii 'iwe enihtaakwaninik kaa⁠ishikiishwewaatc Hiiparoowak. hsa ninka ishinihkaanaa,” kii‑ihkito.

Moosihs Kii'ahpa'iwetc Mitiyan (Midian) Ahkiink

11 # Act 7.23-28. Ahpii hsa Moosihs (Moses) kii⁠kiishaapewitc, kii‑ishaa ekii anta waapamaatc owiici ontaatisiimaakana' Isriyala' (Israel). Miihsh kaakii waapantank aaniin kaa‑ahpiihci kakwaataki'imintc. Okii waapamaan itahsh Iicipiiwininiwan (Egyptian) eh⁠pahpahkihte'waanitc peshik Hiiparoowininiwan (Hebrew) kaakii wiici ontaatisiimaatc. #Heb 11.24. 12Misiwe hsa tahsh kii⁠ayinaapi, e⁠kihkentank itahsh awiyan i'imaa e⁠ayaahsinik, mii hsa kaa⁠ishi nihsaatc ini Iicipiiwininiwan. Miihsh kaa⁠ishi ninkwaawanka'waatc ekiih kaanaatc. 13Miinawaa tahsh e⁠ani waapaninik kii‑ishaa weti. Okii waapamaa' niishin Hiiparoowininiwa' (Hebrews) e⁠miikaatinitc. Miitahsh kaakii'inaatc ini mayaa kaa⁠mamaashiinitc, “Wekonen wenci miikaanatc a'a kiwiici ontaatisiimaakan?” okii'inaan.

14Miihsh o'o kaa⁠ishi nahkwehtaakotc, “Awenen kaa⁠inakimihk ci⁠tipenimiyaank, ci⁠onaahkoniyaank kaye? Kiwii nihshish ina taapishkoo kaakii ishi nihsatc a'a Iicipiiwinini,” okii'ikoon. Miitahsh Moosihs kaa⁠ishi sekisitc ekii ihkitotc, “Tepwe iinsan kihkencikaate aaniin kaa⁠ishihcikeyaan.” 15Ahpii tahsh kihciokimaa Peroo (Pharaoh) kaa⁠noontank aaniin kaa⁠inahkamikaninik, miitahsh ekii nanaantone'ank aanti ke⁠onci nihsimintc. Miitahsh Moosihs kaakii onci maaciipa'iwetc eshi'ayaanitc kihciokimaan. Weti tahsh Mitiyan (Midian) ahkiink kii‑ishi anta kapehshi.

Miitahsh i'imaa onta'ipaanink kaakii ishi onapitc. 16Kii⁠ayaa tahsh anami'ewikimaa i'imaa Mitiyan ahkiink, ekii niishwaahcinitc (7) otaanihsa'. Moosihs itahsh i'imaa e⁠namatapitc, kiihpi takohshinoo' i'i otaanihsimaa' ekiih pi mooshkinepatoonitc ahtoopaanan kaa⁠onci minihkwenitc oteteni omaanahcaanihshimini, omaanatihkomini kaye. 17Kiihpi takohshinook tahsh kotak okanawi maanahcaanihshiwek inkoci ekii inaamwa'waanitc i'i ihkwewa'. Miihsh Moosihs kaakii naatamawaatc i'i ihkwewa', okii wiici'aa' kaye e⁠mina'aanitc oteteni omaanahcaanihshimini, omaanatihkomini kaye. 18Ahpii tahsh iki ihkwewak ekiih takohshinowaatc otetewaan Cehtaroon (Jethro) eshi'ayaanitc o'o okii'ikowaan, “Wekonen tahsh noonkom kaa⁠kiishikahk wenci kitaahtapiiyek?” okii'ikowaan.

19Miihsh o'o kaa⁠ishi nahkwehtawaawaatc, “Iicipiiwinini hsa ninkii naatamaakonaan okanawi maanahcaanihshiwek inkoci ekiih kakwe inaamo'onankitwaa. Wiin tahsh iko kaye ninkiih kwaapa'ipiihtamaakonaan ekii mina'aatc maanahcaanihsha'.”

20Miitahsh o'o kaa'inaatc otaanihsa', “Aaniinti tahsh eyaatc? Wekonen tahsh weti kaa⁠onci nakanek? Antomihk ci⁠wiici wiihsiniiminank,” okii inaa'.

21Moosihs hsa kii‑inentam i'imaa ci‑ishi kapehshitc. Miihsh Cehtaroon kaakii miinikotc otaanihsini Sihpoorawan (Zipporah) ci⁠wiiwitc. 22Miiwan itahsh ini ihkwewan kaakii ayaawaanitc kwiiwisenhsan. Moosihs hsa tahsh Kersham#2.22 Kersham: I'iwe ishinihkaasowin Kersham kaa'icikaatek, awiya kaa⁠piiwitewitc, mii 'iwe enihtaakwaninik kaa⁠ishikiishwewaatc Hiiparoowak. (Gershom) okii ishinihkaanaan ini okosihsan. Miihsh o'o kaa⁠ihkitotc, “Aaniihsh eh⁠piiwitewiyaan o'omaa ahkiink i'i kaa⁠onci ishinihkaanak,” kii‑ihkito.

23Naanaake tahsh ekii ani ishihsenik kihciokimaa Iicipahkiink (Egypt) kii⁠nipo. Miitahsh Isriyalak (Israel) kaakii moohkonewaatc onsaam ekiih kakwaataki mihtanohkii'intwaa ekiih pamiihtaakewaatc. Okiih shaakowaanaawaan, ekii mawiwaatc Kishemanitoon ci⁠naatamaakowaatc. Onsaam iitok kii⁠tahkonikaasowak. 24#Gen 15.13,14. Miitahsh Kishemanitoon kaakii noontaakowaatc eshi moohkonewaatc, ekii maamihkawinitc kaye kaakii ishi ahshotamawaanikopanen Eparahaaman (Abraham), Aaisikoon (Isaac), ini kaye Cekapoon (Jacob). 25Kishemanitoo okii waapamaa' Isriyala' aaniin eshi kakwaatakihtoonitc, miihsh kaakiih koohpaatenimaatc.

Currently Selected:

Ekihsatahs 2: OJBR

Highlight

Copy