Popular Bible Verses from Ekihsatahs 2

Share

Miitahsh Kishemanitoon kaakii noontaakowaatc eshi moohkonewaatc, ekii maamihkawinitc kaye kaakii ishi ahshotamawaanikopanen Eparahaaman (Abraham) , Aaisikoon (Isaac) , ini kaye Cekapoon (Jacob) . Kishemanitoo okii waapamaa' Isriyala' aaniin eshi kakwaatakihtoonitc, miihsh kaakiih koohpaatenimaatc.

Naanaake tahsh ekii ani ishihsenik kihciokimaa Iicipahkiink (Egypt) kii⁠nipo. Miitahsh Isriyalak (Israel) kaakii moohkonewaatc onsaam ekiih kakwaataki mihtanohkii'intwaa ekiih pamiihtaakewaatc. Okiih shaakowaanaawaan, ekii mawiwaatc Kishemanitoon ci⁠naatamaakowaatc. Onsaam iitok kii⁠tahkonikaasowak.

Ahpii tahsh kaah⁠te'ahpiihtaatisinitc ini apinoonciishan, a'a hsa ihkwe okii ishiwinaan kaakii ishi'ayaanitc kihciokimaa otaanihsan. Miitahsh a'a otaanihsimaa kaa⁠ishi inakimaatc ini kwiiwisenhsan wiin iko ekii okosihsitc. Miitahsh kaa⁠ihkitotc, “Nipiink itahsh ekii onci akwaasipinak, Moosihs (Moses) hsa ninka ishinihkaanaa,” kii‑ihkito.

Kihciokimaahkwenhs hsa okii'inaan ini ihkwewan kaakii antomimintc, “Maaciish a'a apinoonciish ci⁠nooni'aahtamawiyan, kika tipa'amawin itahsh kaye,” okii'inaan. Miitahsh ini ihkwewan kaa⁠ishi otaahpinaanitc ini apinoonciishan ekii nooni'aahtamaakotc.

Kihciokimaa tahsh otaanihsan kii⁠naasipiiwan i'imaa siipink ewiih kisiihsipasonitc. Mekwaa tahsh a'a otaanihsimaa eh⁠pimaashakaametc kaa⁠wiiciiwikotc oshkiniikihkwewa' kaakiih pamiihtaakotc, okii onci waapantaan mashkohsii mahkahkoni e⁠akwantenik eshi mashkohsiihkaanik. Miihsh kaakii anoonaatc peshik kaa⁠pamiihtaakotc ci⁠naasihkaminitc.

Ahpii hsa Moosihs (Moses) kii⁠kiishaapewitc, kii‑ishaa ekii anta waapamaatc owiici ontaatisiimaakana' Isriyala' (Israel) . Miihsh kaakii waapantank aaniin kaa‑ahpiihci kakwaataki'imintc. Okii waapamaan itahsh Iicipiiwininiwan (Egyptian) eh⁠pahpahkihte'waanitc peshik Hiiparoowininiwan (Hebrew) kaakii wiici ontaatisiimaatc. Misiwe hsa tahsh kii⁠ayinaapi, e⁠kihkentank itahsh awiyan i'imaa e⁠ayaahsinik, mii hsa kaa⁠ishi nihsaatc ini Iicipiiwininiwan. Miihsh kaa⁠ishi ninkwaawanka'waatc ekiih kaanaatc.