Ekihsatahs 19
19
Isriyalak Kii'ayaawaatc Kihciwaciink Saainai Ecikaatenik
1Nihsokiisihs itahsh eani ishihsenik ahpii Isriyalak (Israel) kii‑ishkwaa nakatamowaatc i'i Iicipahkiini (Egypt), i'ihsh ehkiishikaninik kiihkapehshiwak i'imaa pikwatahkamik Saainai (Sinai) eshinihkaatenik. 2Ahpii tahsh Orehpitim (Rephidim) kaahpi'onci kosiwaatc, i'imaa hsa kiihpishi takohshinook pikwatahkamik Saainai. Miitahsh i'imaa kaaishi kapehshiwaatc, ekii ishitaawaatc ehkwatinaanik i'i kihci waciw Saainai. 3Moosihs (Moses) tahsh kiiahkwaamaciwe ekii anta waapamaatc Kishemanitoon.
Miihsh o'o kaa'ikotc, “Mii hsa 'oweni ke'inatwaa Isriyalak Cekaponk (Jacob) wentahkaanesiwaatc. 4‘Kiinawaa iitok kikii waapantaam aaniin kaahtootawakwaa Iicip kaatinowiwaatc, aaniin kaye kaakii ishi pimiwininakook taapishkoo mikisi kaatootawaatc omikisiihsenhsima', niin ihsa piko ekiih piininakook eshi'ayaayaan. 5#1Pe 2.9. Kiishpin itahsh wiinke na'ihtawiyek, kanawentamek kaye kaakii onahtooyaan nintahshotamaakewin, kiinawaa hsako, niin nimpimaatisiimak kika'inininim aanawiin ehpaahtiinwewaanakisiwaatc kahkina pemaatisiwaatc. Aana kota misiwe ahki ehtipentamaan. #Deu 4.20; 7.6; 26.18; Titus 2.14. 6#Rev 1.6; 5.10. Kiinawaa hsa kika tinowim ketipenimakwaa anami'ewikimaak, pemaatisiwaatc ketipinawewisiiminakook,’ mii hsa 'oweni ke'inatwaa Isriyalak,” okii'ikoon. 7Miitahsh Moosihs kaakii niihsaciwetc ekii antomaatc kaaniikaanisinitc pemaatisinitc. Miihsh kaaishi wiintamawaatc kahkina kaakii'ikotc kaaTipencikenitc ci‑ihkitotc. 8Kahkina tahsh pemaatisinitc o'o okii ishi maamawi nahkwehtaakoo', “Kahkina hsa kekoon ninka ishihcikewaamin kaaihkitotc kaaTipenciketc,” okii'ikoo'. Miihsh Moosihs kaaishi wiintamawaatc kaaTipencikenitc aaniin kaakii ihkitonitc pemaatisinitc.
9KaaTipencikenitc itahsh Moosihs okii'ikoon, “Kihpaki wahkwiink hsa ninka pi ayaa ewiih pi anta waapaminaan, pemaatisiwaatc cinoontawiwaatc kakanooninaan, mooshak itahsh iko ciani tepweyenimihkwaa,” okii'ikoon.
Miitahsh kaaishi wiintamawaatc kaaTipencikenitc aaniin kaa'ikotc pemaatisinitc. 10Miihsh kaaTipencikenitc kaa'ikotc, “Maacaan anta waapam pemaatisiwaatc cipehki'atwaa noonkom kaakiishikaninik, waapaninik kaye. Oka kisiihsipatoonaawaan okikishkikaniwaan, 11cikwayaanciiwaatc itahsh nihsokiishik ishihsenik, aaniihsh i'i ahpii kiishikahk Niin Tepencikeyaan niwiih pi naashii i'imaa waciink Saainai ecikaatek kahkina pemaatisiwaatc ciwaapantamowaatc kaapi'ishi takohshinaan. 12#Heb 12.18-20. Misiwe tahsh waahkaaya'ii waciink kika ishi kihkinawaacihtamawaak pemaatisiwaatc o'o ci‑inatwaa, ‘Ayaankwaamisik ciahkwaamaciwehsiwek waciw, manaa paashicishkaak i'i kaakii kihkinawaacihtooyaan. Awenen hsa ko kesaamishkank i'i waciini, kehcinaac hsa tanihcikaniwi.’ 13Ahsinii' ihsa ta‑aapatisiwa', komaa kaye pihkwahkoon ta‑aapataniniwan ahpii nihsintc, keahpiihci manaa saaminintc. Awiyak hsa o'o kaa'inintwaa, iki kaye aya'aawihshak, kaawiin hsa tapakitinaahsii cipimaatisitc. Paanimaa tahsh pootaacikaatek i'i maanahcaanihshiwi eshkani pootaacikan, mii hsa 'i payesh pehsho cipi naasihkamowaatc i'i waciini,” okii inaa'.
14Miitahsh Moosihs kaakiih pi niihsaamaciwetc ekii anta waapamaatc pemaatisinitc ekiih pehki'aatc. Miihsh kaaishi kisiihsipatoonitc okikishkikanini. 15Miihsh kaa'inaatc, “Ahshwiihkek itahsh nihsokiishik ishihsek, keko pehsho naasihkawaahkekwaanik ihkwewak ciminwenintiyek,” okii inaa'. 16#Rev 4.5. Nihsokon itahsh eani ishihsek ehkishepaawakahk, mii 'i kaakii kihci pinehsiiwank, wawiinke kaye ekii kihci ayinaahtehsek. Miitahsh wahkwi wiinke kehpakaanahkwahk kaakii naakwahk i'imaa kihci waciink. Kihci pootaacikan kaye kiihkishiiwe enoontaakwahk. Kahkina hsa tahsh pemaatisiwaatc i'imaa eyaawaatc kaakii ishi kapehshinaaniwaninik kiinininkaanimisiwak. #Deu 4.11,12. 17Miihsh Moosihs kaakiih saakiciwinaatc pemaatisinitc i'imaa eshi kapehshiwintc cinakishkawaanitc Kishemanitoon. I'imaa tahsh kaakii ahkwatinaanik kii‑ishi oshikaapawiwa'. 18I'i tahsh kihci waciini Saainai (Sinai) misiwe kiiaakwaapahteni aaniihsh kaaTipencikenitc kiihpi naashiiwan ishkotenk ekiih pi ayaanitc. Wiinke kaye kiikihci ompaapahte taapishkoo kihci pootawaanaapihk kaashi ompaapahsikemakahk. Wiinke tahsh kaye kiikihci wahkawihse i'i misiwe kihci waciw. 19Wawiinke hsa ko kihci pootaacikan kiiani kihci aahkohtaakwan. Miitahsh Moosihs ehkiikitotc, Kishemanitoon okii nahkwehtaakoon ekiih pinehsiiwihtaakosinitc. 20KaaTipencikenitc tahsh kiihpi naashiiwan i'imaa wakici kihci waciink Saainai, ekiih kanoonikotc Moosihs ciahkwaamaciwetc. Miihsh Moosihs kaaishi ahkwaamaciwetc. 21Miitahsh kaaTipenciketc kaa'ikotc, “Niihsaamaciwen, ciawi kanoonatwaa pemaatisiwaatc cinaniisaanentamowaatc cimanaa onsaamishkaawaatc i'imaa kaakii onahtamawakwaa. Kaawiin kaye ninantawenimaahsiik cikanawaapamiwaatc, mii hsa 'i niipiwa' cinipowaatc. 22Iki hsa ko kaye kaa‑anami'ewikimaawiwaatc pehsho kaapiishaawaatc oncitako ishinaakwanini kewiinawaa cipehki'itisowaahpan cinana'ahsaahsiwakwaa,” okii'ikoon. 23Miitahsh Moosihs kaa'inaatc kaaTipencikenitc, “Pemaatisiwaatc iitok kaawiin tapi ahkwaamaciwehsiiwak o'o waciini Saainai ecikaatenik aaniihsh kiin iko kikii ayaankwaamiminaam o'o ekii'ishiyaankipan, ‘Waahkaa kihkinawaacihtook i'i waciw, ci‑inakintamek ekihtentaakwahk,’ ” okii'inaan. 24Miihsh o'o kaaTipencikenitc kaa'ikotc, “Maacaan, niihsaamaciwen, Eran itahsh piahkwaamaciwe wiiciiwaahkan. Iki tahsh wiin anami'ewikimaak, pemaatisiwaatc kaye keko kakaancihc tapi ahkwaamaciwehsiiwak, cinana'ahsaahsiwakwaa,” okii'ikoon. 25Miitahsh Moosihs kaakii niihsaamaciwetc eshi'ayaanitc pemaatisinitc, ekii wiintamawaatc aaniin kaa'ikotc kaaTipencikenitc.
Currently Selected:
Ekihsatahs 19: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
Ekihsatahs 19
19
Isriyalak Kii'ayaawaatc Kihciwaciink Saainai Ecikaatenik
1Nihsokiisihs itahsh eani ishihsenik ahpii Isriyalak (Israel) kii‑ishkwaa nakatamowaatc i'i Iicipahkiini (Egypt), i'ihsh ehkiishikaninik kiihkapehshiwak i'imaa pikwatahkamik Saainai (Sinai) eshinihkaatenik. 2Ahpii tahsh Orehpitim (Rephidim) kaahpi'onci kosiwaatc, i'imaa hsa kiihpishi takohshinook pikwatahkamik Saainai. Miitahsh i'imaa kaaishi kapehshiwaatc, ekii ishitaawaatc ehkwatinaanik i'i kihci waciw Saainai. 3Moosihs (Moses) tahsh kiiahkwaamaciwe ekii anta waapamaatc Kishemanitoon.
Miihsh o'o kaa'ikotc, “Mii hsa 'oweni ke'inatwaa Isriyalak Cekaponk (Jacob) wentahkaanesiwaatc. 4‘Kiinawaa iitok kikii waapantaam aaniin kaahtootawakwaa Iicip kaatinowiwaatc, aaniin kaye kaakii ishi pimiwininakook taapishkoo mikisi kaatootawaatc omikisiihsenhsima', niin ihsa piko ekiih piininakook eshi'ayaayaan. 5#1Pe 2.9. Kiishpin itahsh wiinke na'ihtawiyek, kanawentamek kaye kaakii onahtooyaan nintahshotamaakewin, kiinawaa hsako, niin nimpimaatisiimak kika'inininim aanawiin ehpaahtiinwewaanakisiwaatc kahkina pemaatisiwaatc. Aana kota misiwe ahki ehtipentamaan. #Deu 4.20; 7.6; 26.18; Titus 2.14. 6#Rev 1.6; 5.10. Kiinawaa hsa kika tinowim ketipenimakwaa anami'ewikimaak, pemaatisiwaatc ketipinawewisiiminakook,’ mii hsa 'oweni ke'inatwaa Isriyalak,” okii'ikoon. 7Miitahsh Moosihs kaakii niihsaciwetc ekii antomaatc kaaniikaanisinitc pemaatisinitc. Miihsh kaaishi wiintamawaatc kahkina kaakii'ikotc kaaTipencikenitc ci‑ihkitotc. 8Kahkina tahsh pemaatisinitc o'o okii ishi maamawi nahkwehtaakoo', “Kahkina hsa kekoon ninka ishihcikewaamin kaaihkitotc kaaTipenciketc,” okii'ikoo'. Miihsh Moosihs kaaishi wiintamawaatc kaaTipencikenitc aaniin kaakii ihkitonitc pemaatisinitc.
9KaaTipencikenitc itahsh Moosihs okii'ikoon, “Kihpaki wahkwiink hsa ninka pi ayaa ewiih pi anta waapaminaan, pemaatisiwaatc cinoontawiwaatc kakanooninaan, mooshak itahsh iko ciani tepweyenimihkwaa,” okii'ikoon.
Miitahsh kaaishi wiintamawaatc kaaTipencikenitc aaniin kaa'ikotc pemaatisinitc. 10Miihsh kaaTipencikenitc kaa'ikotc, “Maacaan anta waapam pemaatisiwaatc cipehki'atwaa noonkom kaakiishikaninik, waapaninik kaye. Oka kisiihsipatoonaawaan okikishkikaniwaan, 11cikwayaanciiwaatc itahsh nihsokiishik ishihsenik, aaniihsh i'i ahpii kiishikahk Niin Tepencikeyaan niwiih pi naashii i'imaa waciink Saainai ecikaatek kahkina pemaatisiwaatc ciwaapantamowaatc kaapi'ishi takohshinaan. 12#Heb 12.18-20. Misiwe tahsh waahkaaya'ii waciink kika ishi kihkinawaacihtamawaak pemaatisiwaatc o'o ci‑inatwaa, ‘Ayaankwaamisik ciahkwaamaciwehsiwek waciw, manaa paashicishkaak i'i kaakii kihkinawaacihtooyaan. Awenen hsa ko kesaamishkank i'i waciini, kehcinaac hsa tanihcikaniwi.’ 13Ahsinii' ihsa ta‑aapatisiwa', komaa kaye pihkwahkoon ta‑aapataniniwan ahpii nihsintc, keahpiihci manaa saaminintc. Awiyak hsa o'o kaa'inintwaa, iki kaye aya'aawihshak, kaawiin hsa tapakitinaahsii cipimaatisitc. Paanimaa tahsh pootaacikaatek i'i maanahcaanihshiwi eshkani pootaacikan, mii hsa 'i payesh pehsho cipi naasihkamowaatc i'i waciini,” okii inaa'.
14Miitahsh Moosihs kaakiih pi niihsaamaciwetc ekii anta waapamaatc pemaatisinitc ekiih pehki'aatc. Miihsh kaaishi kisiihsipatoonitc okikishkikanini. 15Miihsh kaa'inaatc, “Ahshwiihkek itahsh nihsokiishik ishihsek, keko pehsho naasihkawaahkekwaanik ihkwewak ciminwenintiyek,” okii inaa'. 16#Rev 4.5. Nihsokon itahsh eani ishihsek ehkishepaawakahk, mii 'i kaakii kihci pinehsiiwank, wawiinke kaye ekii kihci ayinaahtehsek. Miitahsh wahkwi wiinke kehpakaanahkwahk kaakii naakwahk i'imaa kihci waciink. Kihci pootaacikan kaye kiihkishiiwe enoontaakwahk. Kahkina hsa tahsh pemaatisiwaatc i'imaa eyaawaatc kaakii ishi kapehshinaaniwaninik kiinininkaanimisiwak. #Deu 4.11,12. 17Miihsh Moosihs kaakiih saakiciwinaatc pemaatisinitc i'imaa eshi kapehshiwintc cinakishkawaanitc Kishemanitoon. I'imaa tahsh kaakii ahkwatinaanik kii‑ishi oshikaapawiwa'. 18I'i tahsh kihci waciini Saainai (Sinai) misiwe kiiaakwaapahteni aaniihsh kaaTipencikenitc kiihpi naashiiwan ishkotenk ekiih pi ayaanitc. Wiinke kaye kiikihci ompaapahte taapishkoo kihci pootawaanaapihk kaashi ompaapahsikemakahk. Wiinke tahsh kaye kiikihci wahkawihse i'i misiwe kihci waciw. 19Wawiinke hsa ko kihci pootaacikan kiiani kihci aahkohtaakwan. Miitahsh Moosihs ehkiikitotc, Kishemanitoon okii nahkwehtaakoon ekiih pinehsiiwihtaakosinitc. 20KaaTipencikenitc tahsh kiihpi naashiiwan i'imaa wakici kihci waciink Saainai, ekiih kanoonikotc Moosihs ciahkwaamaciwetc. Miihsh Moosihs kaaishi ahkwaamaciwetc. 21Miitahsh kaaTipenciketc kaa'ikotc, “Niihsaamaciwen, ciawi kanoonatwaa pemaatisiwaatc cinaniisaanentamowaatc cimanaa onsaamishkaawaatc i'imaa kaakii onahtamawakwaa. Kaawiin kaye ninantawenimaahsiik cikanawaapamiwaatc, mii hsa 'i niipiwa' cinipowaatc. 22Iki hsa ko kaye kaa‑anami'ewikimaawiwaatc pehsho kaapiishaawaatc oncitako ishinaakwanini kewiinawaa cipehki'itisowaahpan cinana'ahsaahsiwakwaa,” okii'ikoon. 23Miitahsh Moosihs kaa'inaatc kaaTipencikenitc, “Pemaatisiwaatc iitok kaawiin tapi ahkwaamaciwehsiiwak o'o waciini Saainai ecikaatenik aaniihsh kiin iko kikii ayaankwaamiminaam o'o ekii'ishiyaankipan, ‘Waahkaa kihkinawaacihtook i'i waciw, ci‑inakintamek ekihtentaakwahk,’ ” okii'inaan. 24Miihsh o'o kaaTipencikenitc kaa'ikotc, “Maacaan, niihsaamaciwen, Eran itahsh piahkwaamaciwe wiiciiwaahkan. Iki tahsh wiin anami'ewikimaak, pemaatisiwaatc kaye keko kakaancihc tapi ahkwaamaciwehsiiwak, cinana'ahsaahsiwakwaa,” okii'ikoon. 25Miitahsh Moosihs kaakii niihsaamaciwetc eshi'ayaanitc pemaatisinitc, ekii wiintamawaatc aaniin kaa'ikotc kaaTipencikenitc.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society