Roma 9
9
Vɛnɛ́b kə̀ nɛ́b oò bəraa sààvúŋà roó
1Mə́ tə́ vɛ́nà baanàá, kàandə, mə́ kùm tə́ Krístù rú, mə́ dùg gúsuúm gá. Inselké mə́ aa Nwul Gìdń nwán də, bàà nyɛ́' mə́ sə̀ní kɔ̀, bə̀ aarə vɛ́nà. 2Tɛ́m nyágə́l mə́ tə́ gbàákù, bít nwuukè aa máá tɛ́mú rə kɔ̀, bɛ́d bə gá. 3Èè, mə́ pà' pɔ̀bsə́ kə̀ yíl máá bìá. Mə́ bàà Vɛnɛ́b oò yɛ̀l mə́ nwɔŋyɛɛ̀lá, bít máà pɛ̀d kíìn kə̀ Krístù ra, bɔ̀b máà súú ɔ̀dkudvɛɛ̀l mə́ bəraa bə̀ kun mə́ bəd doó. 4Boò ra bə̀ kùmsə̀n nɛ́b Israila bə̀ kun bərá. Vɛnɛ́b mà' bə̀, boò kùm yɛb bəǹ bərá, bít ì' bà nɛɛ̀n aa kùmà rú, kə̀ kaŋsɛ́l oò roó. Vɛnɛ́b gám dúgà gú' kə̀ boò, bɔ̀b boò bə̀ pə̀dkè ma'ǹmbìá. Bít pii bà indaŋ̀mbìá, Vɛnɛ́b pɔ̀bm̀bìá, nwɔŋ baàn daànmbə̀ bərá. 5Bə̀ kùmsə̀n nɛ́b Israila bə̀ bəd doo boò gbà'á. Bít Krístù kɔ̀ kə̀ nɛ́ŋə̀ sisá, kùmsə̀n kun boò ra. Oòra kùmsə̀n in bəd kóólé yílú. Káŋke oò kùm Vɛnɛ́b naú, zèd kə̀ zèrá. Oò kùm kàani.
6Mə́ í' baànmbə̀, Vɛnɛ́b nwɔŋ aa bàà dàà rə, taà dùgì tɛdńní gá. Kə̀ aakíin də, Israila yɛb kàásá, íí kùm sə̀ní nɛ́b Israila bə̀ vɛ́nà bə̀ bəraa Vɛnɛ́b sààvúŋà rə ní gá. 7Kàandə sɔ̀ŋ, Abraham yɛb kàá bəd ìì kùmsə̀ní yɛb vɛ́nà bə̀ oò bəd gá. Kə̀ aakíin də, Vɛnɛ́b bàà dàà Abraham: «Zá kə̀ Isiyaku ní, ń dá taà yɛb kàá bəraa bàà mə́ dàà n də bɔbàá.» 8Taà kùmsə̀n baànmbə̀' yɛb aa bə̀ lɛ̀b kə̀ nɛ́ŋə̀ si', kə̀ nɛɛ̀n aa lɛ̀b bə̀ sáá rə kíin də, bə̀ kùmsə̀n Vɛnɛ́b yɛb gá. Zá yɛb aa bə̀ lɛ̀b bə̀ kə̀ nwɔŋ aa Vɛnɛ́b bàà dàà gú' bərə, bə̀ kùmsə̀n Vɛnɛ́b yɛb vɛ́nà. 9Kàandə, Vɛnɛ́b bàà dàà nwɔŋ kə̀ aakíin: «Kéén zèd kiin kə̀ sɛŋ aa yée kíin sɔ̀ŋ, kid máà bídǹnà gə́, bɔ̀b Saratu lɛ̀b wàà yàá.»
10Bít aarə ní gá. Rebeka bàgə̀l aa bɔ̀b də, lɛ̀b yɛb bàrə̀bá, ìì báá nə́ŋ̀ní. Báá boò rə, báá bə́n Isiyaku ra. 11-12Zá Vɛnɛ́b gə́, tə́ kə̀ pìrə̀ oò bìá, nɛ́b bəd bə̀ saàn vú'ǹná. Saàn vú'ǹmbə̀ oò bə̀, dáá tə́ kə̀ nɛɛ̀n aa dɛ̀d bə̀ rú roó, zá kə̀ tù' boò bəd gá. Vɛnɛ́b í' i'ǹmbə̀ gə́, bəǹ pɛ́n tɛ́m kɔ̀ gá, bəǹ dìì tə́ pìrə̀ bəǹ aa bəǹ páá rə bəní. Bàà Rebeka kə̀ aakíin, bɔ̀b bə́ŋ̀ lɛ̀b yɛb bàrə̀b oò bəd sé. Bít mà' zə́' insɔ̀ɔ̀n, sínkɔ̀ invaksə́ nə́ŋ̀má sé. Bàà: «Wàà gbàáro dá kudvɛɛ̀l tù' ma'nàá.» 13Kìínmbə̀ Núúboòd Gìdń bàà rə kíin:
«Mə́ í' Yakubu ra, zá məə mə́ dàà Isuwa ra.»
14Kàandə, báan baàn leè gú? In aa wɔ̀ɔ̀lə̀ síndə, dá bée kùm Vɛnɛ́b tɛ́múì? Vɛ́nà, ma'míìn gá! 15Vɛnɛ́b bàà Musa kə̀ aakíin:
«Nɛ́ŋə̀ aa mə́ í'ù búúd ɛgǹ bé'ǹ bə̀ rə, ɛ̀g máù búúd kíìn bé'nàá,
bít nɛ́ŋə̀ aa mə́ í'ù pə̀dkè ma'ǹbə̀ rə kɔ̀, máù pə̀dkè rə kíìn ma'nàá.»
16In aarə, bàg kə̀ nɛɛ̀n aa nɛ́ŋə̀ í' rə kíin gá, sínkɔ̀ kə̀ nɛ́ŋə̀ kpɛŋsɛ́l gá; zá kə̀ búúd ɛgǹ bé'ǹmbə̀ aa Vɛnɛ́b mà' roó. 17Vɛnɛ́b bàà dàà Firaona nwɔŋ aa yée Núúboòd Gìdńnú: «Mə́ lə́ə́ n gààd gbà'á nyɛdkè rə, bɔ̀b má kpɛŋsɛ́l mə́ i'ǹ ám yílú, bít má nə́gə́l mə́ sa'ǹ zɔ̀ŋə yɛ́b bə kóólé.» 18Kə̀ aakíin, Vɛnɛ́b ɛ̀g bé' nɛ́b kambəd búúrá, bít kpɛ́ŋ nɛ́b kambəd tɛ́má, kə̀ nɛɛ̀n aa í' rú rə kíin.
Vɛnɛ́b nɔ̀má, kə̀ búúd ɛgǹ bé'ǹmbə̀ oòra
19Kamgə́, nɛ́ŋə̀ nə́ŋ̀ dá mə́ dɛdǹ: «Tə́ kàangə́, kə̀ níìbə̀ Vɛnɛ́b ál taà nɛ́b bəd sɔ̀ŋ gú? Kàandə, nɛ́ɛ̀réè dá sə̀n báàn in aa Vɛnɛ́b í' rə məə̀nmbə̀ gú?» 20Zá ám gə́, ń nɛ́ɛ̀réè gú, nɛ́ŋə̀ aa ń tə́ nwɔŋ vaksə́ gáàm kə̀ Vɛnɛ́b yéroó? Nyiŋə̀ aa bə̀ wə̀ə̀ kə̀ bun də, dá béení màn aa wə̀ə̀ù rə dɛdǹ: «Kə̀ níìbə̀ ń wə̀ə̀ mə́ taà kə̀ aakíin gúì?» 21Nɛ́d bun bə̀ wəə̀n dákíìn báàn in aa í' rə ma'ǹmbə̀ kə̀ buná' kə̀ bun bəə luùm nə́ŋ̀ní aarə ní, dákíìn báàn kɛ̀ɛ̀l pɛ̀sə́ bə̀ bídǹ wəə̀nmbə̀ kə̀ kɛ̀ɛ̀l kambəd tá.
22Kə̀ aakíin də, Vɛnɛ́b í' ii nɔ̀m oò i'ǹmbìá, bít ma'ǹmbə̀, bɔ̀b nɛ́b bəd boò gàb kpɛŋsɛ́l bəǹ da. Zá Vɛnɛ́b sìd kə̀ tɛ́m sidké gbà'á, nɛ́b aa bə̀ də́ŋì nɔ̀m oò bɔbm̀bìá, bít boò kóólé sɛŋ boò wə́ə́ì kə́d bə bɔ̀bə̀l bə̀ roó. 23Nɛ́b aa ɛ̀g bé' bə́nnà búúd də kɔ̀, í' bə́nnà kaŋsɛ́l laa nyɛdkè gbà'á i'ǹmbìá, bɔ̀b nɛ́b aa sàà zíg bə́nnà nyàamdoorú rə, báà bɔbm̀ kaŋsɛ́l laa nyɛdkè aa roó. 24Kàandə, bə́n kuùm sə̀n nɛ́b aa dɛ̀rà roó. Yahudu bəd tə́ŋə́ ní gá, zá nɛ́b aa bə̀ bàg Vɛnɛ́b síndə tə́ŋə́ kɔ̀. 25Aa yée kùmsə̀n nwɔŋ aa Vɛnɛ́b bàà dàà Hoseya núúboòrú roó:
«Nɛ́b bəraa nyàam ìì kùm nɛ́b mə́ bəd síndə, má bə̀ dɛdǹ nɛ́b mə́ bərá.
Bít nɛ́b aa ìì kùmà nɛ́b í'sɛ̀lbə̀ mə́ bəd síndə, má bə̀ dɛdǹ nɛ́b
í'sɛ̀lbə̀ mə́ bərá.
26Bít zɔ̀ŋ aa ìì bàà bə̀ bə:
‹Íí nɛ́b mə́ bəd gá rə,›
bə̀ dá bə̀ dɛdǹ ‹Vɛnɛ́b galə̀ yɛb bərá.› »
27Esaya kɔ̀ bàà nɛ́b Israila bə̀ bəd yílú kə̀ aakíin:
«Kóó dáà nɛ́b Israila bə̀ bəd ká'ì taà nɛɛ̀n, ìì kùm kìínmbə̀ nyìŋsə́
aa nwuu gbà'á kàd bərə kíin máá, nɛ́b aa nyɛ́d boò tə́ŋə́ rə, ìì dá sə̀ní súúnàá.
28Kàandə, Báátììkpɛ̀ŋ dá in aa í' rə ma'ǹ bɛ́'ǹ kə̀ nwɔŋ oò bə́ŋyée ní, kə̀ báŋ, zɔ̀ŋə yɛ́b ba.»
29Bít Esaya aarə ní sɔ̀ŋ, bàà nyàamdoorú kə̀ aakíin:
«Dáà Báátììkpɛ̀ŋ yɛ́b gə́ kóólé bə̀, nyɛ́d bə́n kun síngə́,
Vɛnɛ́b lòd dá bə́n kíìn bɛ́'ǹ kìínmbə̀ nɛ́b Sodoma bìlə́ bə̀ bəd kíin, bít
kə̀ nɛ́b Gomora bìlə́ bə̀ bəd kíin.»
Nɛ́b Israila bə̀ bəd bə̀ bàg Yéésù sé
30Kàandə, báan baàn leè bə́ŋyée gú? Nɛ́b aa bə̀ bàg Vɛnɛ́b sé, bít bə̀ sàà kuùmbə̀ wɔ̀ɔ̀lə̀ Vɛnɛ́b númú síndə, Vɛnɛ́b mà' bí' bə̀ì nɛ́b wɔ̀ɔ̀lə̀ bərá, tɛ́mbagké boò bòórú. 31Zá nɛ́b Israila bə̀ bəraa ìì sàà kuùmbə̀ nɛ́b wɔ̀ɔ̀lə̀ bəd Vɛnɛ́b númú kə̀ indaŋ̀mbə̀ bagǹmbə̀ rə, mà' bə̀ bɛ́' in aa indaŋ̀mbə̀ í' rə sé. 32Kə̀ níìbə̀ gú? Kə̀ aakíin də, bə̀ sàà kuùmbə̀ wɔ̀ɔ̀lə̀ Vɛnɛ́b númú kə̀ tɛ́mbagké sé, zá bə̀ sèl gə́, bə̀ bàà bənə́ dáánnə́ kuùm kə̀ tù' bəraa bənə́ tə́ənnə́ ma'ǹ doó. Bə̀ tàà dunwà yílì «bəŋ aa lɛ́' nɛ́ŋə̀ rə ba.» 33Bəŋ aarə, Yéésù ra. Núúboòd Gìdń gám nwɔŋ oò yílú, bàà:
«Ìì ɛ̀ga, mə́ zíg bəŋ dunwà yíl bə̀ ta'ǹ tə́ nɛ́b Siyona bìlə́ bə̀ bəd tə́ŋú.
Bəŋ aa dá nɛ́b bəd lɛ́'ǹ doó.
Zá nɛ́ŋə̀ aa bàgə̀ùwì rə, dàà sə́ə́mnúù gá.»
Nouveau Testament en Samba Leko © Alliance Biblique du Cameroun, 1998.