Roma 10
10
1Ɔ̀dkudvɛɛ̀l mə́ í'sɛ̀lbə̀ bərá, in aa mə́ í' kə̀ tɛ́m mə́ tə́ kóólé, bít mə́ nyɛ̀m Vɛnɛ́b naà Yahudu bəd yílə́ rə, boò súú kúnú. 2Kàandə, in aa máá báàn baànmbə̀ boò yílə́ rə, bə̀ vé' tɛ́m tə́ kə̀ in aa ɛ̀g Vɛnɛ́b doó. Zá tɛ́m vé'ǹmbə̀ aa boò naà yérə, nyɛd kə̀ in gabm̀bə̀ vɛ́nà bə̀ sé. 3Kə̀ aakíin də, bə̀ gàb nɛɛ̀n aa Vɛnɛ́b bí' nɛ́b bəd dú wɔ̀ɔ̀lə̀ oò númú rə sé. Bít sàà bə̀ zíg sə̀ní kə̀ yíl boò ra, nɛɛ̀n aa bə̀ dá kuùm dú wɔ̀ɔ̀lə̀ roó. Bə̀ ləə Vɛnɛ́b kìínmbə̀ nɛɛ̀n aa bí' nɛ́b bəd dú wɔ̀ɔ̀lə̀ oò númú rə kíin sé. 4Kə̀ aakíin də, Krístù mà' yaà zə́' Musa indaŋ̀mbə̀ yàá, bɔbm̀ i'ǹmbə̀ gə́, nɛ́ŋə̀ aa bàgə̀ rə gə́ kóólé, Vɛnɛ́b oò ɛ̀gə̀ kə̀ nɛ́ŋə̀ wɔ̀ɔ̀lə̀ kíin.
Nɛ́ŋə̀ aa tə́ Báátììkpɛ̀ŋ bagǹ də gə́ kóólé, dá súúke kíìn bɔbàá
5Aa yée, nwɔŋ aa Musa bád, nɛɛ̀n aa nɛ́ŋə̀ dá kuùm wɔ̀ɔ̀lə̀ Vɛnɛ́b númú, kə̀ ləə̀nmbə̀ indaŋ̀mbə̀ roó: «Nɛ́ŋə̀ aa mà' in bəraa indaŋ̀mbə̀ nwɔŋ bəd bàà rəì kə̀ tù' rə, dá gɔ̀ŋsə́ bɔbm̀ kə̀ boò ra.» 6Zá aa yée nɛɛ̀n aa Núúboòd Gìdń gám nwɔŋ dú, bɔbm̀ kuùmbə̀ nɛ́ŋə̀ wɔ̀ɔ̀lə̀ Vɛnɛ́b númú kə̀ tɛ́mbagké roó: «Ǹ bàà ám tɛ́mú ní' Nɛ́ɛ̀réè dá sə̀n na'ǹ lɛgə́ paàì!» sí. Taà kùmsə̀n baànmbə̀' sí'ǹmbə̀ Krístù yɛ́b ba. 7Sínkɔ̀ m̀ bàà: «Nɛ́ɛ̀réè dá sə̀n síìm zɔ̀ŋə yɛ́b bə díi gú» sí. Taà kùmsə̀n baànmbə̀' pa'ǹ ná'ǹmbə̀ Krístù val bəd tə́ŋú. 8Aa yée kùmsə̀n nwɔŋ aa Vɛnɛ́b nwɔŋ bàà roó: «Nwɔŋ kùm tə́ ám sunú, tə́ ám gú' ba, bít tə́ ám tɛ́mú.» Nwɔŋ aarə, kùmsə̀n nwɔŋ aa bə́ tə́ ii udǹ tɛ́mbagké yílə́ roó. 9Dáà ḿ bààì nyɛdkè dág, kə̀ gú' ń da, nɛ́b bəd kóólé númú, «Yéésù kùmsə̀n Báátììkpɛ̀ŋá,» bít ń kè'ùwì ám tɛ́mú, «Vɛnɛ́b díímə̀wàì valú» gə́, Vɛnɛ́b dá n kíìn súúnàá. 10Kə̀ aakíin də, nɛ́ŋə̀ kè'ì oò tɛ́mú gə́, Vɛnɛ́b dáù baàn oò tə́ wɔ̀ɔ̀lə̀ obəǹ númú. Nɛ́ŋə̀ aa bàà nyɛ́' kə̀ gú' oòrə kɔ̀, Vɛnɛ́b dáù kíìn súúnàá. 11Kə̀ aakíin də, Núúboòd Gìdń bàà: «Kóó nɛ́ɛ̀réè, bàgə̀ùwì gə́, dàà sə́ə́mnúù gá.» 12Kə̀ aakíin də, in nə́ŋ̀má pɛ̀d Yahudu bəd kə̀ nɛ́b aa bə̀ bàg Vɛnɛ́b síndə sé. Boò kóólé, bə̀ tə́ kə̀ Báátììkpɛ̀ŋ nə́ŋ̀ní. Oòra pii sáá sə̀n nɛ́b aa kpə̀ə̀ bə̀ tə́ù dɛdǹ də gbaŋə̀ oò bərá. 13Kàandə, kìínmbə̀ Núúboòd Gìdń bàà dàà rə kíni: «Kóó nɛ́ɛ̀réè, kpə̀ə̀ dɛ̀d Báátììkpɛ̀ŋ nə́gə́lì gə́, Vɛnɛ́b dáù kíìn súúnàá.»
14Zá ééleè bə̀ dáù taà kpəə̀n dɛ̀rì, bə̀ bàgə̀ síngə́ roó? Bít ééleè bə̀ dáù taà bagǹ gú, bə̀ kìì nwɔŋ oò bə̀ síngə́ roó? Bít ééleè bə̀ dá taà nwɔŋ kiinì, nɛ́ŋə̀ yaà ùd bə̀ síngə́ roó? 15Bít ééleè bə̀ dá taà nwɔŋ aarə baàn gú, Eklisiya tùmà nɛ́b bəd nwɔŋ aarə bə̀ yaàn udǹ síngə́ roó? Kìínmbə̀ bád bə̀ dàà tə́ Núúboòd Gìdńnú kíni: «Nɛ́b aa tə́ Nwɔŋ Puu Sɔ̀ɔ̀nkè aàn də, bə̀ tóò yaàn gə́, in nə́ŋ̀ sɔ̀ɔ̀n bé'ǹmbə̀ kə̀ taà kíin sé!» 16Zá nɛ́b bəd kóólé, bə̀ kè' sə̀n Nwɔŋ Puu sɔ̀ɔ̀nkè aarə gá. Kə̀ aakíin də, Esaya bàà: «Báátììkpɛ̀ŋá, nɛ́ɛ̀réè kè' sə̀n Nwɔŋ aa bə́n tə́ən baàn də gú?» 17Kə̀ aakíin, tɛ́mbagké vúgà nwɔŋ aa nɛ́ŋə̀ zɛ̀ŋ də rú. Bít nwɔŋ aarə kɔ̀, kùmsə̀n nwɔŋ aa bə́ gám Yéésù yílə́ roó.
18Zá má dɛdǹ sɔ̀ŋ' Nɛ́b Israila bə̀ bəd bə̀ kìì nwɔŋ aarə sínì? Zá vɛ́nà, ìì kìì yàá! Núúboòd Gìdń bàà yàá:
«Nɛ́b aa bə̀ ùd nwɔŋ aarə, bə̀ ɛ̀m zɔ̀ŋ gə́ kóólé.
Bít nwɔŋ boò bəd kɔ̀ dáá wə́ə́ì zɔ̀ŋ aa yɛ́b dùg bəroó.»
19Má dɛdǹ sɔ̀ŋ: «Nɛ́b Israila bə̀ bəd bə̀ kìì nwɔŋ aarə sínì?» Kìínmbə̀ nwɔŋ ke'ǹ í'ìnmbə̀ kíin gə́, aa yée nwɔŋ aa éèn Musa bàà dàà Vɛnɛ́b zɔ̀ŋ bəroó:
«Má ii ma'ǹ bí'ǹ, ìì kùm nɛ́b kisɛ̀l bə̀ bərá,
nɛ́b aa bə̀ nɛ́b kun vɛ́nà bə̀ bəd gá roó. Má ii nɔ̀m tóòn,
kə̀ nɛ́b kun bəraa ìì kùm zɔ̀ŋə yɛ́b ba, ìì
kə̀ ingabké naà kìínmbə̀ aí kíin síndoó.»
20Esaya máá, nùù də́dǹ nwɔŋ aa Vɛnɛ́b bààù rə baànmbə̀ sé:
«Nɛ́b aa sàà mə́ síndə, ìì bɔ̀b mə́ sùnú.
Mə́ ì' yíl mə́ nɛ́b aa ìì dɛ̀d nwɔŋ máá bə̀ nə́ŋ̀má síndə núùrú.»
21Zá nɛ́b Israila bə̀ bəd yílə́ gə́, Vɛnɛ́b bàà:
«Mə́ ì' nɛ́b aa ləə mə́ sé, bít bə̀ nɛ́b yíl kpɛŋké bə̀ bəd də nɛɛ̀n kə̀
limtá, nyàm yaà pìì zé, bɔbm̀ yíl wáàlǹmbə̀ kə̀ boò ra, zá bə̀ məə kúnú.»
Nouveau Testament en Samba Leko © Alliance Biblique du Cameroun, 1998.