Gbantumsə̀ bəd Tùsá 26
26
Pol tág yíl oò gààd Agripa númú
1 Agripa bàà Pol: «Ń tə́ kə̀ kpaŋ̀ naà nwɔŋ bə̀ gáàmmá, bɔ̀b yíl ámbə̀ tágǹmbìá.» Pol zá' nɛɛ̀n lɛgú, bàà sáad oò kə̀ aakíin:
2«Gààd gbà'á Agripa, mə́ kìì tɛ́m làmkèì nyà'aa yóo, yíl máá bə̀ tágǹmbə̀ ám númú, kə̀ nwɔŋ bəraa Yahudu bəd luu mə́ kə̀ kùrú rə tə́ kóólé. 3Ám gə́, ń gàb Yahudu bəd láŋsə́ì sɔ̀ɔ̀nkè, kə̀ nwɔŋ boò bəraa tó' ìì sáá rə tə́ kóólé. Kə̀ taàbìá, mə́ nyɛ̀m m taá, ǹ sìd mə́ kíìn kə̀ máá bə̀ zɛŋ̀mbìá.
4«Yahudu bəd kóólé, bə̀ gàb nɛɛ̀n aa mə́ kùm bɛ̀ŋ́sə̀ rú, yaà wə́ə́ kə̀ bə́ŋyée kíin zé rə yàá. Bə̀ gàb nɛɛ̀n aa mə́ kùm nɛ́b mə́ bəd tə́ŋú, kə̀ Urusalima bìlə́ rə yàá. 5Yahudu bəd bə̀ gàb mə́ nyàam kpɔ̀ɔ̀m yée gə́, dáà bə̀ í'iyì in aa bə̀ gàb də baànmbə̀ gə́, bə̀ dá ii baàn gə́, mə́ kùmà kìínmbə̀ nɛ́ŋə̀ nə́ŋ̀ Farisa bəd gə̀bú bə̀ kíin. Bít Farisa bəd də, gə̀b boò gbò' kànsə̀n nɛɛ̀ná, nɛɛ̀n aa nɛ́ŋə̀ dá Vɛnɛ́b bagǹ dú roó. 6Bít bə́ŋyée kɔ̀ mə́ tə́ fágə́nú, tɛ́m aa mə́ zíg nwɔŋ aa Vɛnɛ́b bàà dàà doo bə́ bəd bərə bòórú. 7Kun bə́ bəraa boò kób zè iirə rə, boò kóólé bə̀ zíg tɛ́m in aarə bé'ǹmbə̀ oò ma'míìn kúnú. Kə̀ taàbìá, bə̀ tə́ taà Vɛnɛ́b káŋ̀ tígə́l kə̀ nyàámbərə̀ tá. Tɛ́m zígǹmbə̀ aarə bòórú, gààd Agripa, Yahudu bəd luu mə́ taá! 8Kə̀ níìbə̀ íí məə taà ke'ǹmbə̀ Vɛnɛ́b dáàn báàn val bəd díìmbə̀ gú?
9«Máá kə̀ yíl máá bə̀ kɔ̀, mə́ nɔ̀ŋ Yéésù Nazaratu bə̀ nə́gə́l yɛɛ̀lǹmbə̀ kə̀ kpaŋ̀ luùm gɔ̀ŋ gɔ̀ŋ. 10Mə́ mà' in aarə Urusalima bìlú. Láŋsə́ gààd bəd ìì pii mə́ kpɛŋsɛ́l, Vɛnɛ́b nɛ́b gìdń bəd páànmbə̀ wúltígə́l bə̀ rú. Sɛŋ aa bə̀ mà' bə̀ fágə́n lo'ké bə̀ rə, máá kɔ̀ mə́ kè' yàá, boò lòd bə̀ kúnú. 11Sɛŋ zùúm, mə́ í' bə̀ búúd Yahudu bəd wúlwáàlbə̀ bərú. Mə́ pè' bə̀ boò dàà tɛ́mbagké boò ra. Nɔ̀m kèéd bə̀ mà' mə́ kə̀ boò, mə́ bàg bə̀, dá mə́ í' bə̀ búúd sɛ̀ɛ́n bəd bìlú.»
Pol ùd nɛɛ̀n aa bíl nɛ́d bagké Yéésù bə̀ rú roó
(Gbantumsə̀ bəd Tù' 9.1-19; 22.6-16)
12«Kə̀ aakíin, láŋsə́ gààd bəd ìì pii mə́ taà kpɛŋsɛ́lá, bít ìì tùm mə́ taà Damas bìlú, bɔ̀b tù' dáàn ma'ǹmbìá. 13Gàd Agripa, mə́ tə́ ɛɛ̀m kpaŋú, nyàm yíl tə́ŋə́ yée gə́, mə́ bé'à laa nyɛdkèá, nyɛd kàn nyàm naú, vúgà lɛgú, nyɛd yaà páá mə́ tə́ŋú, kə̀ nɛ́b aa mə́ ɛ̀m kə̀ boò tə́ rə tə́ kóólé. 14Bə́ kóólé, bə́ yi' yɛ́b ba, bít mə́ kìì pə̀gə̀lib nwɔŋ bàà kə̀ Aramiya nwɔŋú: ‹Sol, Sol, kə̀ níìbə̀ ń í' mə́ taà búúd gú? Ń kpɛ́ŋ yíl ń nɔ̀ŋ ń tə́ si' ń sabm̀ kə̀ yíl n ní, kìínmbə̀ nàà tə́ yibə̀ gbà' ta'ǹ kíin.›
15«Mə́ dɛ̀d: ‹Ám gə́, ń nɛ́ɛ̀réè, Báátììkpɛ̀ŋá?›
«Bít Báátììkpɛ̀ŋ kè' í': ‹Máá gə́, mə́ kùmsə̀n Yéésù aa ń tə́ù búúd í'ǹ doó.› 16‹Zá zá' ǹ dìì lɛgú; yaà mə́ vúŋ yíl mə́ ám səǹ də, sàà mə́ vúŋŋà, mə́ í' ǹ kùm nɛ́d tù' bə̀ ma'ǹ mə́ra, bít ń dá kuùm sedako mə́ra. Ń dáráàn nɛ́b bəd baàn nɛɛ̀n aa yaà mə́ ì' yíl mə́ ám səǹ nyà'aa yéroó. Bít ń dá bə̀ ráàn in bəraa máá n i'ǹ númú rə baanàá. 17Máá n súùn lɛ́'ǹ Yahudu bəd nɛɛ̀n tɛ́mú, kə̀ nɛ́b bəraa bə̀ gàb Vɛnɛ́b sə́ndə nɛɛ̀n tɛ́mú. 18Máá n tuùm, bɔ̀b ǹ kèd bə̀ núùá, ǹ pà' bà zɔ̀ŋ tígə́l bə̀ rú, ǹ àà bà laa nyɛdkè ba, nyá' ǹ kè' bà Satan nɛɛ̀n tɛ́mú, ǹ àà bà Vɛnɛ́b nɛɛ̀n tɛ́mú, bə̀ bàg mə́ì gə́, boò bɔ̀b daaké invaksə́ boò bəd bìá, boò bɔ̀b zɔ̀ŋ sɔ̀ɔ̀n nɛ́b bagké bəraa Vɛnɛ́b sààvúŋà rə tə́ŋú, bít boò bɔ̀b tɛ́mbagké máá naú.› »
Pol bàà tə́ tù' nwɔŋ oò i'nàá
19«Kə̀ taàbìá, gààd Agripa, mə́ məə taà in aa Vɛnɛ́b ì' máà lɛgə́ paà rə sé. 20Éèn mə́ ùd Vɛnɛ́b nwɔŋ Damas bìlú, kə̀ Urusalima bìlú; bít bòórú oòrə, Yahudu bəd yɛ́b bə kóólé, bítsɔ̀ŋ, nɛ́b kun gɔ̀ŋ bəd yɛ́b bə kóólé; bàà boò nyɛ́' invaksə́ boò ra, boò sɔ̀g kúnú, boò bí'à tɛ́m boò Vɛnɛ́b naú, boò mà' tù' sɔ̀ɔ̀n bəraa dá i'ǹ gə́, boò sɔ̀gì roó. 21Kə̀ taàbìá, Yahudu bəd bə̀ kò' máà taà láŋsə́ wúuú, bə̀ í' mə́ taà lo'ǹmbìá. 22Zá Vɛnɛ́b láŋ mə́ì ba, yaà wə́ə́ nyà'aa zé, mə́ dìì taà nwɔŋ sɔ̀ɔ̀n vɛ́nà baàn vú'ǹmbə̀ nɛ́b bəd númú kóólé, sɔ̀d nɛ́b gbàád ba, yaà wə́ə́ yɛb bɛ̀ŋ́sə̀ ba, mə́ bàà nwɔŋ nə́ŋ̀má sé. Nwɔŋ aa mə́ bàà rə, aa Musa indaŋ̀mbə̀ kə̀ Vɛnɛ́b gbantumsə̀ bəd tá, bə̀ bàà dá wə́ə̀n doó. Bə̀ bàà' 23Krístù dá búúd kíìn bé'nàá, gbád dá sə̀n zá'ǹ valú, dáà súúke laa aànnà Yahudu bəd sunú, kə̀ nɛ́b kun bəraa bàg Vɛnɛ́b sə́ndə sunú!»
Pol bàà Agripa gə́, oò bàg Yéésù ra
24Zɔ̀ŋ aa Pol gám tə́ sáad oò daŋ̀ kàanyée gə́, Festus kpàm nwɔŋ bààù: «Pol, ám gə́, ń kèérá! Ingabké zùúm ḿ aarə, bít bí' n tə́ kèérá!»
25Pol kè' í'ù: «Máá gə́, mə́ kèéd gá; aarə nwɔŋ sɔ̀ɔ̀n aa nɛ́b bəd kóólé dá ke'ǹ də, mə́ gám taá. 26Gààd Agripa dɛ̀d kìì nwɔŋ aarə yàá, bít má ǹ báàn nwɔŋ gámm̀bə̀ kə̀ váàndo oò númú. Mə́ gàb yàá, ń gàb in nì kóólé; kàandə, in aarə, taà wúl bòórú zɔ̀ŋ mə́'ke rú sé. 27Ń kè' Vɛnɛ́b gbantumsə̀ bəd nwɔŋ yèè, gààd Agripa? Mə́ gàb yàá, ń bàg yàá!»
28 Agripa bàà Pol: «Sɛŋ wàà aa zɔ̀gɔ̀ yée, ń zíg tɛ́m, ḿ bəǹ dá mə́ bí'ǹ nɛ́d bagké kə̀ báŋ kàan wa!»
29Pol kè' í': «Kóó kə̀ báŋ, kóó kə̀ báŋ sé, mə́ tə́ Vɛnɛ́b nyɛɛ̀m kə̀ ám da, kə̀ nɛ́b aa íí kìì mə́ yée kóólé, bɔ̀b ìì kùm kə̀ máá kíin, zá kə̀ sɛ̀gsɛ́g bəd naà gá!»
30Kàanyée gə́, gààrá, gɔ̀mnà kə̀ Berenika tá, wál bə̀ zá' lɛgə́ boò kóólé. 31Nɛ́ɛ̀m bə̀ tə́ ɛɛ̀m gə́, bə̀ bàà boò dun ba: «Nɛ́ŋ váàndo aa yée, mà' in nə́ŋ̀ aa dá də́ŋ̀ oò bə̀ lo'ǹmbìá, sínkɔ̀ oò bə̀ páànmbə̀ wúltígə́l bə̀ rú rə sé.»
32Bít Agripa bàà Festus: «Báá n nɛ́ŋ váàndo aa kíìn laàn lɛ́'nàá, dáà dɛ̀d boò mà' bəǹ fágə́n, Roma bəd gààd gbà'á númú síngə́ roó.»
Nouveau Testament en Samba Leko © Alliance Biblique du Cameroun, 1998.