Gbantumsə̀ bəd Tùsá 20
20
Pol ɛ̀m sɛ̀ɛ́n Makedoniya yɛ́b ba, kə̀ Akaya yɛ́b ba
1Zɔ̀ŋ aa álsɛ̀l gbà'á bɛ́d gə́, Pol wál nɛ́b bagké bərá, ùd bə̀ nwɔŋá, gáŋ bə̀ tɛ́má, dɔ̀m bə̀ kúnú, bàà boò kùm sɔ̀ɔ̀ní, bít zá' ɛ̀m Makedoniya yɛ́b ba. 2Gəə̀l taà yɛ́b aarə ba, gáŋ nɛ́b bagké bəd tɛ́má, bít zá' ɛ̀m Akaya yɛ́b ba. 3Dáá kùm wərə̀ sòò toora. Kùd si' zá'ǹ ɛɛ̀mbə̀ Siriya yɛ́b ba. Zɔ̀ŋ aa kìì gə́, Yahudu bəd wúú nwɔŋ tə́ kə̀ oò yée gə́, sèl kidǹ bídǹmbə̀ Makedoniya yɛ́b ba. 4Sopata rə, nɛ́ŋə̀ aa vúgà Bereya bìlə́ roó, Pirus wàá, ɛ̀m kə̀ oò tá. Aristarkus kə̀ Sekundus nɛ́b Tesalonika bìlə́ bə̀ tá, Gayus nɛ́d Derbe bìlú bìá, Timote ra, bít kə̀ nɛ́b vɔ̀ɔ̀m bəraa iirə bə̀ vúgə́là Aziya yɛ́b bəroó (Tikikus kə̀ Torofimus da), bə̀ ɛ̀m kə̀ oò tá. 5Nɛ́b aa yée ìì ɛ̀m númú, bít dá ìì nwán bə́ Torowas bìlú. 6Bòórú wálke aa bə̀ líí bə̀rɛ́d aa inváàndo rú gá rə taà gə́, bə́ pìì kə̀ə̀d gbà'á rú, Filipiya bìlú. Sɛŋ taà núnə̀ gə́, dá bə̀ wə́ə́ Torowas bìlú, dá bə́ bɔ̀b nɛ́b aa bə̀ ɛ̀m númú rə wərà, bít bə́ kùm wərə̀ sɛŋ nə́ŋsínà.
Pol ɛ̀m Torowas bìlú
7Kojoli ba, wál bə́ tə́ Báátììkpɛ̀ŋ gbèd Gìdń líínàá, Pol bàà nɛ́b bəd Vɛnɛ́b nwɔŋá. Zɔ̀ŋ aa nwúndù kə̀ limtá dá kíìn ɛ̀m yée gə́, Pol dìì nɛ́b bəd Vɛnɛ́b nwɔŋ ní udǹmbìá, sibə̀wà yaà kàà zé. 8Wúl bàgə̀l aa bə̀ wál lú, wúl ɔ̀d yílə́ rə, lampə̀ bəd dú wərə̀ zùúm. 9Wàà váàndo nə́ŋ̀ nə́gə́l oò Eutikus, kùm wúl lib aa bə̀ dàà rə ba, yid ləə ləəmì gbàákù, sɛŋ aa Pol ùd Vɛnɛ́b nwɔŋ náŋ gbàákù roó. Kàanyée gə́, wəd yi'à wúl toorúb lib ba, yaà pí' yɛ́b ba. Pà' bə̀ zá'ù lɛgú, zá bə̀ bɔ̀b val kò'ù yàá. 10Pol símà kə̀ báŋ, yaà kùm kə̀ dun lígə̀d oò númú, pà'ù nɛɛ̀n tɛ́mú, kú'ù naú, bít bàà: «Ìì lɔ̀b tɛ́m sí, tə́ kə̀ gɔ̀ŋsá.» 11Bít na' bíd kíìn wúuú, dáá wèè bə̀rɛ́d, bít líí kə̀ nɛ́b bagké bəd tá. Bòórú gə́, gám nwɔŋ sɛŋ bùúrá, nyàm go' zé, bít zá' ɛ̀m kúnú. 12Pà' bə̀ ɛ̀m wàà váàndo rə kə̀ yiilú, galə̀ní. Bít in aarə kpɛ́ŋ nɛ́b bagké bəd kóólé tɛ́m yàá.
Pol zá' sɛ̀ɛ́n kpaŋ̀ Torowas bìlú, ɛ̀m Miletus bìlú
13Éèn bə́ ɛ̀m sə̀n kə̀ Pol la, dá bə́ pìì kə̀ə̀rú, ɛ̀m dá bə́ wə́ə́ Assos bìlə́ gə́, dá bə́ pà' Pol kə̀ kə̀ə̀d wərà. Bàà bə́ gə́, báà ɛ̀m númú, kə̀ yíl obəǹ bə̀ gə́, bəǹ dá ɛɛ̀m kə̀ duná. 14Zɔ̀ŋ aa ɛ̀m dá bə́ sáŋ kə̀ oò Assos bìlə́ gə́, bə́ pà'ù wərə̀ kə̀ kə̀ə̀d gbà'á, ɛ̀m dá bə́ wə́ə́ Mitilene bìlú. 15Bə́ pìì kə̀ə̀rú wərà, bít nwúndù oòrə, ɛ̀m dá bə́ wə́ə́ Kiyos bìl kàd ba. Kéén oòrə, bə́ taà wərə̀ gə́, dá bə́ wə́ə́ Samos bìlú. Bít kéén nə́ŋ̀ ɔ̀d oòrə, ɛ̀m dá bə́ wə́ə́ taà Miletus bìlú. 16Pol sèl taà bəǹ dá Efesus bìl daanàá, dìì bəǹ tá' sɛŋ wərə̀ Aziya yɛ́b bə gá. Niŋsíìn ɛ̀m kə̀ báŋ, wálke gbà'á aa bə̀ dɛ̀d Pentekosta rə dá wə́ə̀n gə́, bɔ̀b bəǹ wə́ə́ kíìn Urusalima bìlú, dákíìn ma'míìn gə́ roó.
Pol tə́ dam bəraa Efesus bìlə́ rə Vɛnɛ́b nwɔŋ uràá
17Miletus bìlú, Pol tùm nwɔŋ Efesus bìlú, boò dɛ̀rà nɛ́b bagké dam bəraa wərə̀ roó. 18Zɔ̀ŋ aa yaà bə̀ wə́ə́ gə́, bàà bə̀: «Íí gàb nɛɛ̀n aa mə́ kùm dú kə̀ aí tə́, sɛŋ aa sɔ̀d yaà mə́ wə́ə́ kə̀ Aziya yɛ́b bərə yàá. 19Mə́ mà' Báátììkpɛ̀ŋ tù' kə̀ tɛ́m lə́ə́keá, kə̀ kpə̀ə́ǹá. Íí gàb nɛɛ̀n aa Yahudu bəd wúú nwɔŋ máá yílə́ rə yàá, bít íí gàb nɛɛ̀n aa pii mə́ nwuukè rú rə yàá. 20Íí gàb yàá, mə́ bàà ii Vɛnɛ́b nwɔŋ mə́ mə́' ii in aa dá ii gbá'ǹ də kóó nə́ŋ̀má sé. Bàà mə́ ì' ii in gə́ kóólé nɛ́b zùúm tə́ŋú, kə̀ aí kàrú. 21Mə́ bàà Yahudu bəd, kə̀ Grɛg bəd tə́ kóólé, boò sɔ̀g kúnú, lìb boò bí'à núù Vɛnɛ́b naú. Bít mə́ bàà bə̀ gə́, boò kóólé, boò bàg Báá bə́n Tììkpɛ̀ŋ Yéésù ra.
22«Zá bə́ŋyée gə́, má ɛɛ̀m Urusalima bìlú, kə̀ nɛɛ̀n aa Nwul Gìdń pè' mə́ máà mà' rə kíin. Mə́ gàb in aa nɛ́b bəd dá mə́ ráàn ma'ǹ wərə̀ rə sé. 23Zá mə́ gàb in nə́ŋ̀, bìl aa mə́ kùmà rú rə gə́ kóólé, Nwul Gìdń bàà dàà mə́ gə́, nɛ́b bəd kò' bə̀ dá mə́ páàn wúltígə́l bə̀ rú, bít búúd zùúm nwán mə́ tə́ kúnú. 24Zá mə́ kə̀ yíl máá bə̀ gə́, gɔ̀ŋsə́ máá bə̀ kə̀ pɛ̀sə́ sé. Kóó val oò kò' mə́ kúnú, kóó val oò kò' mə́ sí, də́ŋ mə́ tə́ nə́ŋ̀ní. Aa dá sɔɔ̀n də gə́, mà' máà bɛ́' in aa bə̀ tùm máà, yaà máà mà' roó. Bít máà mà' tùsaa Báátììkpɛ̀ŋ Yéésù pii mə́ naà roó' baànmbə̀ nɛ́b bəd Nwɔŋ Puu Sɔ̀ɔ̀nkèá. Nwɔŋ Puu Sɔ̀ɔ̀nkè aarə, pə̀dkè Vɛnɛ́b bìá.
25«Mə́ gəə̀l aí tə́ŋú, íí kóólé, mə́ bàà ii Vɛnɛ́b gààd nwɔŋá. Zá bə́ŋyée gə́, mə́ gàb yàá, nɛ́ŋə̀ nə́ŋ̀má bɔ̀b núù mə́ bé'ǹmbə̀ sɔ̀ŋ gá. 26Kə̀ taàbìá, mə́ bàà ii taà vɛ́nà nyà'aa yóo. Nɛ́ŋə̀ nə́ŋ̀ bɔ̀bì aí tə́ŋə́ gə́, nwɔŋ máá bə̀ sɔ̀ŋ gá. 27Kàandə, mə́ bàà ii in aa Vɛnɛ́b í' ma'ǹmbə̀ rəì kóólé, mə́ mə́' ii in nə́ŋ̀má sé. 28Ìì nwán yíl íí ra, bít ìì nwán nɛ́b gə̀b aa Nwul Gìdń pii ii nɛɛ̀n tɛ́mú roó. Ìì nwán Eklisiya aa Vɛnɛ́b káákè'à kə̀ Wàà oò val loó. 29Mə́ gàb yàá, mə́ ɛ̀mì gə́, zɔ̀ŋə máá bòórú gə́, nɛ́b kam dáà vúgǹnà kìínmbə̀ gbàál lɛ̀gsɛ́rə̀ bəd kíin. Ìì dáà yaànà aí tə́ŋú, bə̀ dàà ii íí nɛ́b bagké bəraa gá, nìŋ bə̀ dá ii kíìn sa'nàá. 30Bít zɔ̀ŋə aí tə́ŋú, nɛ́b kam dá piìn gúsuúm gáàmbìá, bə̀ dá nɛ́b bagké bəd diŋ̀ aàn zùúm, bɔ̀b boò bàg bənə́ kúnú. 31Ìì gú' yíl íí ra, bít sèl ìì zá' kúnú, bə́ŋyée mà'ì zèd toora, tígə́l kə̀ nyàámbərə̀ tá, kə̀ nyímwəl núùrú, mə́ dàà kóó nɛ́ɛ̀réè tɔ̀gǹmbə̀ sé.
32«Bít bə́ŋyée, mə́ pii ii tə́ Vɛnɛ́b nɛɛ̀n tɛ́mú, kə̀ pə̀dkè nwɔŋ oò nɛɛ̀n tɛ́mú. Nwɔŋ aarə, dá ii sə̀n báàn və́'ǹmbìá, bít nwɔŋ aarə, dá ii pə̀dkè aa Vɛnɛ́b kə̀ naà kìínmbə̀ valligə̀ kíin, nɛ́b aa bí' ii kóólé Gìdń də bə̀ rə ma'nàá. 33Mə́ ɔ̀d basá, bəŋzɔsá, sínkɔ̀ gɔ̀' nɛ́ŋə̀ nə́ŋ̀má naà sé. 34Íí gàb yàá, kə̀ yíl aí bìá, mə́ mà' tù' kə̀ nɛɛ̀n mə́ra, mə́ bɔ̀b taà in aa mə́ ɔ̀d doó, bít kə̀ nɛ́b mə́ bəd bìá. 35Kə̀ aakíin də, mə́ sáni nɛɛ̀n aa íí dá tù' ma'ǹ dú roó, bɔ̀b aí kɔ̀ ìì láŋ kə̀ nɛ́b vɛɛmké bərá. Sèl ìì zá' nwɔŋ aa Báátììkpɛ̀ŋ Yéésù kə̀ yíl oò bìá, bàà roó: ‹Vɛnɛ́b zíg nɛ́ŋə̀ aa tə́ in piìn də nɛɛ̀n yílú, kànsə̀n nɛ́ŋə̀ aa tə́ ke'ǹ doó.› »
36Bòórú Pol gám bɛ́' nwɔŋ aa kàangə́, kùm kə̀ dunlígə̀d kə̀ boò tə́ kóólé, bít nyɛ̀m Vɛnɛ́bá. 37Boò kóólé, ìì kpə̀ə̀ kúnú, bít ìì kpə́n Pol naú, ìì kò'ù nɛɛ̀ná, ìì zígə̀ sɛ̀ɛ́n duná, oò ɛ̀m sɔ̀ɔ̀ní. 38Nwɔŋ aa Pol bàà bə̀ boò bé' bəǹ sɔ̀ŋ gá rə, boò kóólé, nwuu bə̀ tɛ́m yàá. Bít àà dá bə̀ zígə̀ kə̀ə̀d gbà'á ba.
Nouveau Testament en Samba Leko © Alliance Biblique du Cameroun, 1998.