ᓭᐸᓈᔭ 1
1
1 # 2Ki 22.1—23.30; 2Ch 34.1—35.27. ᓭᐸᓈᔭ Zephaniah ᐅᑮ ᑲᓅᓂᑰᓐ ᑳᑎᐯᒋᑫᓂᒡ ᐊᐲ ᒎᓵᔭ Josiah ᐌᑌᑌᒡ ᐁᒪᓐ Amon ᑮᑭᒋᐅᑭᒫᐎᒡ ᐃᐃᒫ ᒎᑕ Judah ᐊᑮᕽ᙮ ᓭᐸᓈᔭ ᓴ ᑮᐅᑌᑌ ᑰᔖᐃ Cushi ᑳᑮ ᐃᔑᓂᑳᓱᓂᒡ ᑳᐊᓂ ᐅᑌᑌᓂᒡ ᑫᑕᓬᐋᔭ Gedaliah ᑳᑮ ᐃᔑᓂᑳᓱᓂᒡ ᑳᐊᓂ ᐅᑌᑌᓂᒡ ᐋᒪᕒᐋᔭ Amariah ᑳᑮ ᐃᔑᓂᑳᓱᓂᒡ ᑳᐊᓂ ᐅᑌᑌᓂᒡ ᐁᓯᑳᔭ Hezekiah ᑳᑮ ᐃᔑᓂᑳᓱᓂᒡ᙮
ᑳᑎᐯᒋᑫᒡ ᑮᐲᑖᑐᑌᓂᒃ ᐅᑑᓈᑯᓂᐌᐎᓐ
2ᒦᔥ ᑳᑎᐯᒋᑫᒡ ᑳᐃᑭᑐᒡ, ᑲᑭᓇ ᑫᑰᓐ ᓂᑲ ᓂᔑᐗᓈᒋᑑᓐ ᐅᐅᒫ ᐊᑮᕽ᙮ 3ᓂᑲ ᓂᔑᐗᓈᒋᐋᒃ ᑲᑭᓇ ᐯᒫᑎᓯᐙᒡ ᐊᔭᐋᐎᔕᒃ ᑲᔦ᙮ ᐱᓀᔒᔕᒃ ᐯᐹᒥᓭᐙᒡ ᐃᔥᐱᒥᕽ, ᑮᑰᔭᒃ ᑲᔦ ᐁᔮᐙᒡ ᓂᐲᕽ᙮ ᓃᓐ ᓴ ᑯ ᓂᑲ ᑑᑕᐙ ᑳᒪᒋᐃᔑᐌᐱᓯᒡ ᒋᐸᑭᔑᕽ᙮ ᑲᑭᓇ ᓴ ᑯ ᐊᐎᔭ ᐯᒫᑎᓯᒡ ᓂᑲ ᓂᔑᐗᓈᒋᐋ, ᑳᐐᓐ ᐃᑕᔥ ᐊᐎᔭ ᑕᐱᒫᑎᓯᓰ, ᓃᓐ ᑌᐯᒋᑫᔮᓐ ᐅᐅ ᓂᑎᑭᑦ᙮
4ᓂᑲ ᓇᓇᐊᓵᒃ ᐃᓴ ᐃᑭ ᐯᒫᑎᓯᐙᒡ ᐁᔮᐙᒡ ᐃᐃᒫ ᒉᕒᐆᓴᓬᐊᒥᕽ Jerusalem, ᐃᐃᒫ ᑲᔦ ᒎᑕ ᐊᑮᕽ ᐁᔮᐙᒡ᙮ ᓂᑲ ᓂᔑᐗᓈᒋᑑᓐ ᓴ ᐃᐃ ᑲᔦ ᑫᔮᐱ ᐸᑮ ᐁᔑ ᐊᓇᒥᐁᑕᐎᓐᒡ ᐊᐊ ᒪᓂᑑᑳᓐ ᐯᓬ Baal ᐁᒋᑲᓂᐎᒡ᙮ ᓂᑲ ᒑᑭᐋᒃ ᑲᔦ ᐃᑭ ᑳᐊᓇᒥᐁᐎᓂᓃᑳᓱᐙᒡ ᑳᒪᓂᑑᑫᐙᒡ ᑫᔮᐱ ᒋᒫᒥᑲᐎᓄᑕᐙᓯᐎᑣ᙮ 5ᓂᑲ ᓂᔑᐗᓈᒋᐋᒃ ᑲᔦ ᐃᑭ ᐗᑭᒋ ᐙᑳᐃᑲᓐ ᐁᔖᐙᒡ ᐁᓇᒥᐁᑕᐙᐙᒡ ᑮᓯᓲᓐ, ᑎᐱᑭᑮᓯᓲᓐ, ᐗᓇᑯᔕᐞ ᑲᔦ᙮ ᐃᑭ ᑕᔥ ᑲᔦ ᑳᓇᐃᑕᐎᐙᒡ, ᑳᐊᐱᒧᐙᒡ ᐁᐐᒌᐎᐙᒡ ᑲᔦ, ᔖᑰᒡ ᐃᑕᔥ ᐃᔑ ᐊᐱᒧᐙᒡ ᒪᓂᑑᑳᓇᓐ ᒨᓬᐁᒃ Molech ᐁᓂᒥᓐᒡ ᐅᑎᔑᓂᑳᓱᐎᓂᓂ᙮ 6ᓂᑲ ᓂᔑᐗᓈᒋᐋᒃ ᑲᔦ ᐃᑭ ᑳᓇᑲᔑᐙᒡ ᐯᒥᓂᔕᐅᐙᐸᓐ᙮ ᐃᑭ ᑲᔦ ᑳᑲᑴ ᒥᑲᐎᓯᒀ, ᐃᑭ ᑲᔦ ᑳᑲᑴᒋᒥᓯᒀ ᒋᑭᑭᓄᐎᓇᒀ, ᐃᑭᑐ ᑳᑎᐯᒋᑫᒡ᙮
7ᑫᑯ ᓅᑖᑎᑫᒃ ᐁᓈᓴᒦᒡ ᑳᑎᐯᒋᑫᒡ ᑭᔐᒪᓂᑑ, ᐋᔕ ᐄᑐᒃ ᑫᑳ ᑕᐃᔑᑮᔑᑲᓂᓂ ᐁᐐ ᐅᓈᑯᓂᐌᒡ᙮ ᑳᑎᐯᒋᑫᒡ ᐄᑐᒃ ᑮᑾᔮᒌ ᐁᐐ ᐸᑭᑎᓈᓱᒡ, ᒦᔥ ᑳᑮ ᐅᓀᓂᒫᒡ ᑫᐱ ᐊᑕ ᐐᓯᓂᓂᒡ᙮ 8ᐊᐲ ᐃᔑ ᑮᔑᑲᒃ ᒋᐸᑭᑎᓈᓱᔮᓐ, ᓂᑲ ᓇᓇᐊᓵᒃ ᐃᓴ ᐌᑭᒫᐗᑭᓱᐙᒡ, ᑭᒋᐅᑭᒫ ᐅᑯᓯᓴᐞ ᑲᔦ, ᐃᑭ ᑲᔦ ᑲᑭᓇ ᑳᑭᑭᔥᑲᒧᐙᒡ ᒪᔭᑭ ᑭᑭᔥᑭᑲᓇᓐ᙮ 9ᓂᑲ ᓇᓇᐊᓵᒃ ᑲᔦ ᐃᑭ ᐁᓇᒥᐁᑳᓱᐙᒡ, ᑳᑭᒨᑎᐙᒡ, ᑳᓂᔑᐌᐙᒡ ᑲᔦ ᑫᐅᒋ ᒪᑲᑗᐙᒡ ᒋᒨᔥᑭᓇᑑᐙᒡ ᐅᒪᑲᑗᐎᓂᐙᓐ ᐅᑑᑭᒫᒥᐙᓐ ᐅᐙᑳᐃᑲᓂᓂ᙮
10ᐃᐃ ᑕᔥ ᐊᐲ ᐃᔑ ᑮᔑᑲᒃ ᐃᑭᑐ ᑳᑎᐯᒋᑫᒡ, ᑭᑲ ᓅᑖᒻ ᐃᓴ ᒋᒪᐎᓈᓂᐗᕽ ᐃᐃᒫ ᑭᓅᔐᐎ ᐃᔥᒀᑌᒻ ᐁᔑᓂᑳᑌᒃ᙮ ᑭᑲ ᓅᑖᒻ ᑲᔦ ᒋᒪᐎᑖᑾᒃ ᐁᔑ ᐅᔥᑭ ᐅᔑᒋᑳᑌᒃ ᑭᒋ ᐆᑌᓇ, ᑕᑭᒋ ᑳᐱᑖᑾᓐ ᑲᔦ ᐌᑎ ᐁᔑ ᐸᐲᑾᑎᓈᒃ᙮ 11ᓅᑖᑯᓯᒃ ᒋᒪᐎᔦᒃ ᐊᐲ ᓅᑕᒣᒃ ᐅᐅ ᐃᓂᑖᑾᒃ ᑮᓇᐙ ᐁᔑᑖᔦᒃ ᑳᔑ ᓂᑖ ᐊᑖᐌᓈᓂᐗᕽ, ᐋᓃᔥ ᑲᑭᓇ ᐊᑖᐌᐎᓂᓂᐗᒃ ᑳᐐᓐ ᑕᐱᒫᑎᓯᓰᐗᒃ ᐃᑭ ᑲᔦ ᑳᒣᔥᑯᑑᓈᐙᒡ ᐙᐹᐱᑯ ᔔᓂᔮᓐ᙮
12ᒦᔥ ᐃᐃ ᐊᐲ ᑫᐋᐸᒋᑑᔮᓐ ᐙᓴᑯᓀᒋᑲᓐ ᒋᓇᓈᑐᓂᑫᔮᓐ ᐃᐃᒫ ᒉᕒᐆᓴᓬᐊᒥᕽ᙮ ᓂᐐ ᓇᓇᐊᓵᒃ ᐃᑭ ᐐᓇᐙ ᐱᑯ ᑳᑌᐸᑫᓂᒧᐙᒡ, ᑲᔦ ᑕᔥ ᑳᑌᐺᔦᓂᑎᓱᐙᒡ, ᐃᑭ ᑳᐃᑭᑐᐙᒡ, ᑳᐐᓐ ᐄᑐᒃ ᐐᑳ ᑫᑰᓐ ᑭᑲ ᑑᑖᑯᓰᓈᓐ ᑳᑎᐯᒋᑫᒡ᙮ 13ᐅᐌᓅᑎᓯᐎᓂᐙᓐ ᐃᓴ ᑕᐅᑖᐱᓂᑳᑌᓂᐗᓐ, ᐅᐙᑳᐃᑲᓂᐙᓐ ᑲᔦ ᑕᓂᔑᐗᓈᒋᒋᑳᑌᓂᐗᓐ᙮ ᑳᐐᓐ ᐃᑕᔥ ᑲᔦ ᐐᑳ ᑕᐃᔑᑖᓰᐗᒃ ᐙᑳᐃᑲᓇᓐ ᑳᐅᔑᑑᐙᒡ, ᑳᐐᓐ ᑲᔦ ᐐᑳ ᑕᐅᒋ ᒥᓂᑴᓰᐗᒃ ᔔᒥᓈᐳ ᑳᔑ ᑭᑎᑳᓈᐙᒡ ᔔᒥᓇᐞ᙮
14ᐃᐃᐌ ᑕᔥ ᐊᐲ ᐃᔑ ᑮᔑᑲᓂᓂᒃ ᑳᑎᐯᒋᑫᒡ ᑳᐐ ᐅᓈᑯᓂᐌᒡ, ᐋᐱᒋ ᐐᐸ ᑕᐃᔑᓭ, ᐐᐸ ᐱᑯ᙮ ᐐᑫ ᓴ ᑕᑭᒋ ᐃᔑᐌᐸᓐ ᐃᐃ ᐊᐲ, ᒥᓴᐙ ᒫᐗᒡ ᐁᓲᑫᑖᑯᓯᒡ ᔑᒫᑲᓂᔥ ᑕᒨᒀᓂᒥᓯ᙮ 15ᒦᑕᔥ ᐃᐃ ᐊᐲ ᑮᔑᑲᓂᓂᒃ ᑕᑯᑖᓀᑖᑾᓂᓂ᙮ ᑕᐃᔑ ᑮᔑᑲᓐ ᒋᒫᓀᑕᒧᓈᓂᐗᕽ, ᒋᑲᒀᑕᑫᑕᒧᓈᓂᐗᕽ ᑲᔦ᙮ ᑕᐃᔑ ᑮᔑᑲᓐ ᒋᒫᔑᓭᓈᓂᐗᕽ ᑲᔦ ᒋᐗᓯᑖᐎᓭᓈᓂᐗᕽ᙮ ᑕᐃᔑ ᑮᔑᑲᓐ ᑲᔦ ᒋᑲᔥᑮᑎᐱᑲᒃ, ᑳᐐᓐ ᑕᓵᐱ ᑮᔑᑲᓯᓅᓐ ᒋᑲᔥᑮᑎᐱᑳᓇᑾᒃ᙮ 16ᑕᐃᔑ ᑮᔑᑲᓐ ᒋᓅᑖᑾᒃ ᐴᑖᒋᑲᓐ, ᑕᐃᓂᑖᑾᓐ ᑲᔦ ᑳᔑ ᔖᑯᐌᐙᒡ ᔑᒫᑲᓂᔕᒃ ᑮᒦᑳᑕᒧᐙᒡ ᑳᐙᑳᔮᐱᑭᓂᑳᑌᓂᑭᓐ ᑭᒋ ᐆᑌᓇᐗᓐ, ᐁᔥᐹᓂᑭᓐ ᑲᔦ ᐅᓵᐱᐎᓇᓐ᙮
17ᒦ ᓴ ᐁᑭᑐᒡ ᑳᑎᐯᒋᑫᒡ, ᓂᑲ ᑑᑕᐙᒃ ᐃᓴ ᐯᒫᑎᓯᐙᒡ ᒋᑭᒋ ᐗᓯᑖᐎᓭᐙᒡ ᑕᐃᔑᓈᑯᓯᐗᒃ ᑖᐱᔥᑰ ᑳᐙᐱᓯᒀ ᑳᐱᒧᓭᐙᒡ᙮ ᓃᓐ ᐃᓴ ᐱᑯ ᓂᒪᒋᑑᑖᑰᒃ, ᐅᒥᔅᑸᒥᐙ ᑕᔥ ᑕᓰᑭᓂᑳᑌᓂ ᑖᐱᔥᑰ ᓂᐱ᙮ ᐅᐐᔭᐎᐙᓐ ᒥᔕᐗᑲᒥᒃ ᑕᐗᓇᑌᓂᐗᓐ ᒋᐗᓈᑕᓂᓂᑭᓐ, ᐃᑭᑐ ᑳᑎᐯᒋᑫᒡ᙮
18ᐃᐃ ᑕᔥ ᐊᐲ ᑳᑎᐯᒋᑫᒡ ᓈᑯᑑᒡ ᐅᓂᔥᑳᑎᓯᐎᓐ, ᑳᐐᓐ ᓴ ᑲᓇᑫ ᐙᐹᐱᑯ ᔔᓂᔮ ᐙᐱᑰᓐ, ᐅᓵᐎ ᔔᓂᔮ ᐙᐱᑰᓐ ᑲᔦ ᐅᑲ ᓈᑕᒫᑯᓰᐙᓐ᙮ ᐃᔥᑯᑌᕽ ᐁᓀᑖᑾᓂᓂᒃ ᐅᓂᔥᑳᑎᓯᐎᓐ ᐃᓴ ᐅᑲ ᐅᒋ ᓂᔑᐗᓈᒋᑑᓐ ᐃᐃ ᒥᓯᐌ ᐊᑮᓂ᙮ ᑲᑭᓇ ᐊᐎᔭᐞ ᐯᒫᑎᓯᓂᒡ ᐅᐅᒫ ᐊᑮᕽ ᐅᑲ ᑴᑕᑐ ᐃᔥᒀᐋᐞ᙮
Currently Selected:
ᓭᐸᓈᔭ 1: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
