ᒫᑎᔪ 21

ᒋᓴᔅ ᐁᑮᐊᓂ ᑕᑯᔑᕽ ᒉᕒᐆᓴᓬᐊᒥᕽ

(Mark 11.1-11; Luke 19.28-40; John 12.12-19)

1ᐊᐲ ᑕᔥ ᑫᑳ ᐁᐊᓂ ᑕᑯᔑᓄᐙᒡ ᒉᕒᐆᓴᓬᐊᒥᕽ Jerusalem, ᐅᑮᐊᓂ ᐅᑎᑖᓈᐙ ᐯᐸᒋ Bethphage ᑳᑮᐃᔑᓂᑳᑌᓂᒃ ᑳᑮᐃᔑᑖᓂᐗᓂᓂᒃ᙮ ᐃᐃ ᓴ ᐯᐸᒋ ᑮᐃᔒᐊᔮᒪᑲᓐ ᐃᐃᒫ ᑳᑮᐃᔑ ᐱᑾᑎᓈᒃ ᐋᓬᐃᑉ Olive ᑭᑎᑳᓈᑎᑯᑳᕽ ᑳᑮᐃᔑᓂᑳᑌᓂᒃ᙮ ᒋᓴᔅ ᑕᔥ ᐅᑮᓃᑳᓂᓂᔕᐙᐞ ᓃᔑᓐ 2 ᐅᑭᑭᓄᐊᒪᐙᑲᓇᐞ, 2ᐅᐅ ᐁᑮᐃᓈᒡ: ᐊᓂ ᓃᑳᓂ ᐃᔖᒃ ᑳᒪᑗᐊᔮᒃ ᑳᐃᔑᑖᓂᐗᕽ, ᑭᑲ ᐙᐸᒫᐙ ᑕᔥ ᒫᔑᒥᑕᑎᒻ ᒋᐐᒋᓴᑳᑯᐱᓲᒫᒡ ᐃᓂ ᒫᔑᒥᑕᑎᒨᓴᓐ᙮ ᐋᐸᐅᑾᒃ ᑕᔥ ᐲᓈᑫᒀᓂᒃ᙮ 3ᑮᔥᐱᓐ ᑕᔥ ᐊᐎᔭ ᑫᑰᓂᓂ ᐃᓂᓀᒃ, ᒦᓴ ᑫᐃᓀᒃ: ᓂᑑᑭᒫᒥᓈᓐ ᐅᔕ ᐅᐐᐋᐸᒋᐋᐞ, ᔐᒫᒃ ᑕᔥ ᐅᑲ ᐲᒋᓂᔕᐙᐞ, ᐅᑮᐃᓈᐞ᙮

4ᒦᑕᔥ ᐅᐅ ᑳᐅᒋ ᐃᔑᓭᒃ, ᒋᐃᔑᓭᓂᒃ ᑳᑮᐃᑭᑐᓂᑯᐸᓀᓐ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ:

5 # Zech 9.9. ᐐᑕᒪᐎᑾᒃ ᐃᑭ ᓵᔭᓐ Zion ᐆᑌᓈᕽ#21.5 ᓵᔭᓐ ᐆᑌᓈᕽ: ᒦ ᐃᐌ ᐯᔑᑾᓐ ᑳᐃᒋᑳᑌᒃ, ᒉᕒᐆᓴᓬᐊᒻ Jerusalem ᐆᑌᓈᕽ᙮ ᑳᐊᔮᐙᒡ,

ᐃᓇᔥᑫ ᐙᐸᒥᒃ ᑭᑭᒋᐅᑭᒫᒥᐙ, ᑭᐱᓈᓯᑳᑯᐙ!

ᐋᐱᒋ ᓅᑳᑎᓯ, ᐁᐱᒥᐗᓈᓱᒡ ᐃᐃᒫ ᒫᔑᒥᑕᑎᒧᕽ,

ᐁᐱᒥᐗᓈᓱᒡ ᐃᐃᒫ ᒫᔑᒥᑕᑎᒨᓯᕽ,

ᒫᔑᒥᑕᑎᒻ ᐅᑑᔥᑲᔭᐋᓯᒪᓐ᙮

6ᒦᑕᔥ ᐃᑭ ᑭᑭᓄᐊᒪᐙᑲᓇᒃ ᑳᐊᐎ ᐃᔑ ᐃᔑᒋᑫᐙᒡ ᐋᓃᓐ ᑳᐃᑯᐙᒡ ᒋᓴᓲᓐ᙮ 7ᐅᑮ ᐲᓈᐙᓐ ᑕᔥ ᒫᔑᒥᑕᑎᒨᓐ, ᐃᓂ ᑲᔦ ᒫᔑᒥᑕᑎᒨᓴᓐ᙮ ᒦᑕᔥ ᑳᐃᔑ ᐗᑭᑕᑑᐙᒡ ᐅᑲᔥᑮᑮᐎᓂᐙᓐ; ᒦᑕᔥ ᐃᐃ ᑳᐃᔑ ᐊᐸᐱᓂᒡ ᒋᓴᓲᓐ᙮ 8ᐯᒫᑎᓯᐙᒡ ᐁᑮ ᐹᑏᓄᐙᒡ ᐅᑮ ᑕᔗᑭᓯᑑᓈᐙᓐ ᐅᑲᔥᑮᑮᐎᓂᐙᓐ ᐃᐃᒫ ᒦᑲᓈᕽ᙮ ᐋᓂᑕ ᑕᔥ ᐅᑮ ᑮᔥᑭᑲᐋᓈᐙᓐ ᐗᑎᑾᓇᓐ ᐁᑮᐊᐸᑭᑑᐙᒡ ᒦᑲᓈᕽ ᑳᐐᐱ ᐃᔖᓂᒡ ᒋᓴᓲᓐ᙮ 9#Psa 118.26. ᑳᐹᑏᓄᐙᒡ ᑕᔥ ᑳᑮᓃᑳᓂᔥᑲᐙᐙᒡ, ᐅᑖᓈᕽ ᑲᔦ ᑳᑮ ᐱᒧᓭᐙᒡ ᑮᐃᔑ ᔖᔖᑯᐌᐗᒃ: ᐅᓵᓇ! ᑮᐃᑭᑐᐗᒃ᙮ ᑕᓇᓈᑯᒫ ᐊᐊ ᑌᐱᑎᕽ ᑳᐅᑕᑳᓀᓯᒡ᙮ ᔕᐌᑖᑯᓯ ᓴ ᐊᐊ ᑳᐱ ᑕᑯᔑᕽ ᐅᑎᔑᓂᑳᓱᐎᓂᓃᕽ ᐃᓂ ᑌᐯᒋᑫᓂᒡ᙮ ᑕᓇᓈᑯᒫ ᑭᔐᒪᓂᑑ!

10ᐊᐲ ᑕᔥ ᐁᑮᐊᓂ ᑕᑯᔑᕽ ᐃᐃᒫ ᒉᕒᐆᓴᓬᐊᒥᕽ, ᑲᑭᓇ ᓴ ᐊᐎᔭᒃ ᑮᑭᒋ ᐃᓉᐎᐃᑎᐗᒃ ᐁᑮᐃᑭᑐᐙᒡ: ᐊᐌᓀᓐ ᑕᔥ ᐊᐊ?

11ᑳᐹᑏᓄᐙᒡ ᑕᔥ ᑳᑮᐱ ᐐᒌᐙᐙᒡ ᒋᓴᓲᓐ ᑮᓇᑴᔖᑯᐌᐗᒃ: ᒦᓴ ᐗᐊ ᑭᔐᒪᓂᑑᓐ ᑳᑲᓅᒋᑫᑕᒪᐙᒡ, ᒋᓴᔅ ᑳᐃᔑᓂᑳᓱᒡ, ᓈᓴᕒᐃᑦ Nazareth ᐆᑌᓈᕽ, ᑳᓬᐊᓬᐄ Galilee ᐊᑮᕽ ᑳᐅᒌᒡ, ᑮᐃᑭᑐᐗᒃ᙮

ᒋᓴᔅ ᐁᑮ ᐲᑎᑫᒡ ᑭᒋᐊᓇᒥᐁᐎᑲᒥᑯᕽ

(Mark 11.15-19; Luke 19.45-48; John 2.13-22)

12ᒋᓴᔅ ᑮᐲᑎᑫ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᑮ ᓵᓵᑭᒋᓂᔕᐙᒡ ᑲᑭᓇ ᐃᐃ ᑳᑮᐊᑖᐌᐎᑲᒥᑯᑫᓂᒡ ᑲᔦ ᑳᑮᐊᑖᐌᓂᒡ#21.12 ᑳᑮᐊᑖᐌᐎᑲᒥᑯᑫᓂᒡ ᑲᔦ ᑳᑮᐊᑖᐌᓂᒡ: ᒦ ᓴ ᐃ ᑳᑮᐅᒋ ᐃᔑᒋᑳᓂᐗᕽ, ᒋᐌᑎᓯᐙᒡ ᐊᐐᔭᒃ ᐙᓴ ᑳᑮ ᐱᐅᒌᓂᒡ, ᒋᐅᑎᓈᓂᒡ ᐊᔭᐋᐎᔕᐞ, ᐱᓀᔒᔕᐞ ᑲᔦ ᑳᐐ ᐸᑭᑎᓈᓱᐙᑫᓂᒡ᙮ ᐃᐃᒫ ᐲᒋ ᑭᒋᐊᓇᒥᐁᐎᑲᒥᑯᕽ, ᐁᑮᐅᐱᒣᐌᐱᓇᕽ ᑑᐳᐎᓈᑰᓐ ᑳᑮᐃᔑ ᐊᔮᓂᒡ ᐃᐃ ᑳᒣᔥᑯᑑᓂᑫᓂᒡ, ᐁᑮᐅᐱᒣᐌᐱᓇᕽ ᑲᔦ ᑌᓴᐱᐎᓇᓐ ᑳᑮᐃᔑ ᐊᔮᓂᒡ ᐃᐃ ᑳᑮᐊᑖᐙᑫᓂᒡ ᐅᒦᒦᐞ᙮ 13#Isa 56.7; Jer 7.11. ᐅᑮᐃᓈᐞ ᐃᑕᔥ: ᒦᓴ ᐁᔑᐲᐃᑳᑌᒃ ᑭᒋᒪᓯᓇᐃᑲᓐ ᑭᔐᒪᓂᑑ ᐁᑮᐃᑭᑐᒡ: ᓂᐙᑳᐃᑲᓐ ᓴ ᑕᐃᔑᓂᑳᑌ ᐊᓇᒥᐁᐙᑳᐃᑲᓐ, ᑮᓇᐙ ᑕᔥ ᐁᐃᔑᓈᑯᑑᔦᒃ ᑖᐱᔥᑰ ᒋᐅᑳᓱᐎᑲᒥᑯᐙᒡ ᐅᒪᑲᒒᔥᑲᒃ!

14ᑳᐙᐱᓯᓂᒃ ᐃᐃ ᑲᔦ ᑳᒫᑭᓯᓂᒡ ᐅᑮ ᐱᓈᓯᑳᑰᐞ ᐃᐃᒫ ᐲᒋ ᐊᓇᒥᐁᐎᑲᒥᑯᕽ, ᒦᑕᔥ ᑳᐃᔑ ᒥᓄᐊᔮᐋᒡ᙮ 15ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᓂᔥᑳᑎᓯᐗᒃ ᐁᐙᐸᑕᒧᐙᒡ ᐋᓃᓐ ᒋᓴᓲᓐ ᑳᑮᐃᔑ ᒫᒪᑳᒋᒋᑫᓂᒡ, ᐃᐃ ᑲᔦ ᐊᐱᓅᒌᔕᐞ ᐁᑮ ᔖᑯᐌᓂᒡ ᐃᐃᒫ ᐲᒋ ᑭᒋᐊᓇᒥᐁᐎᑲᒥᑯᕽ: ᑕᓇᓈᑯᒫ ᐊᐊ ᑌᐱᑎᕽ ᑳᐅᑕᑳᓀᓯᒡ!#21.15 ᑌᐱᑎᕽ ᑳᐅᑕᑳᓀᓯᒡ: ᐙᐸᑕᓐ 9.27᙮ 16#Psa 8.3. ᒦᑕᔥ ᑳᐃᓈᐙᒡ ᒋᓴᓲᓐ: ᑭᓅᑕᐙᒃ ᐃᓇ ᐁᑭᑐᐙᒡ?

ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᒦᓇᑫ ᓂᓅᑕᐙᒃ᙮ ᑳᐐᓐ ᐃᓇ ᑭᑑᒋ ᐊᓇᒥᑑᓰᒻ ᐅᐅ ᐁᔑᐲᐃᑳᑌᒃ: ᑭᑮᐃᔑ ᑭᑭᓄᐊᒪᐙᒃ ᐃᓴ ᐃᑭ ᐊᐱᓅᒌᔕᒃ, ᐴᔥᑫ ᑲᔦ ᑳᓅᓂᐙᒡ, ᒋᓂᑖᑾᔭᒃ ᓇᓈᑯᒥᐌᐙᒡ, ᐅᑮᐃᓈᐞ᙮

17ᒦᑕᔥ ᐃᐃ ᑳᐃᔑ ᓇᑲᓈᒡ, ᐃᐃᒫ ᐆᑌᓈᕽ ᐁᑮᐅᒋ ᒫᒑᒡ᙮ ᐌᑎ ᑕᔥ ᐯᑕᓃᕽ Bethany ᑮᐃᔖ ᐁᑮᐊᑕ ᓂᐹᒡ᙮

ᒋᓴᔅ ᐁᑮᐃᓈᒡ ᒋᓂᐳᓂᒡ ᑭᑎᑳᓈᑎᑰᓐ

(Mark 11.12-14, 20-24)

18ᐁᐊᓂ ᐙᐸᓂᓂᒃ ᑕᔥ ᒋᓴᔅ ᑮᑮᐌᐃᔖ ᐌᑎ ᑭᒋᐆᑌᓈᕽ᙮ ᐁᓂᐱᒥ ᐊᔮᒡ ᑕᔥ ᑮᓅᑌᐐᐐᓯᓂ᙮ 19ᐁᐙᐸᒫᒡ ᐃᑕᔥ ᔔᒥᓂ ᑭᑎᑳᓈᑎᑰᓐ ᐱᒃ fig ᐁᑎᓄᐙᑎᑯᐎᓂᒡ, ᐁᑮᒥᑲᓯᒃ ᑕᔥ ᑫᑰᓂᓂ, ᐊᓃᐲᔕᓐ ᐁᑕ, ᒦᑕᔥ ᑳᑮᐃᓈᒡ ᐃᓂ ᒥᑎᑰᓐ: ᑳᐐᓐ ᐃᓴ ᒦᓇᐙ ᐐᑳ ᑭᑲ ᔔᒥᓂᐎᓰ᙮ ᒦᑕᔥ ᐃᐃ ᔐᒫᒃ ᐊᐊ ᒥᑎᒃ ᑳᐃᔑ ᐹᓱᒡ᙮

20 ᑭᑭᓄᐊᒪᐙᑲᓇᒃ ᑕᔥ ᑮᒫᒪᑳᑌᑕᒨᒃ ᐁᐙᐸᒫᐙᒡ ᒥᑎᑰᓐ ᑳᐃᔑᓭᓂᒡ, ᐁᑮᐃᑭᑐᐙᒡ: ᐌᑯᓀᓐ ᐌᒋᑭᔒᐹᓱᒡ ᐊᐊ ᒥᑎᒃ?

21 # Mat 17.20; 1 Cor 13.2. ᒋᓴᔅ ᑕᔥ ᐅᑮᐃᓈᐞ: ᒦ ᓴ ᐱᑯ ᐁᔑ ᑌᐺᔮᓐ ᐅᐅ ᑳᐃᓂᓇᑰᒃ, ᑮᔥᐱᓐ ᑌᐺᔦᑕᒣᒃ, ᐋᓉᑕᓯᐌᒃ ᑲᔦ, ᑭᑖ ᑲᔥᑭᑑᒻ ᒋᐃᔑᒋᑫᔦᒃ ᑖᐱᔥᑰ ᑳᑮ ᑑᑕᐗᒃ ᐊᐊ ᔔᒥᓂᑭᑎᑳᓈᑎᒃ᙮ ᑳᐐᓐ ᐁᑕ ᐃᐃ ᑭᑖᐃᔑ ᑲᔥᑭᑑᓰᒻ᙮ ᑮᔥᐱᓐ ᓴ ᐃᑕᒣᒃ ᐃᐃ ᐱᑾᑎᓈ: ᒪᔮᐐᓐ, ᐊᑕᐸᑯᐲᒀᔥᑾᓂᓐ ᑭᒋᑲᒦᕽ, ᒦᓴᐃ ᑫᐃᔑᓭᑭᐸᓐ᙮ 22ᑮᔥᐱᓐ ᑌᐺᑕᒣᒃ, ᑭᑲ ᒦᓂᑰᐎᓯᒻ ᐌᑯᓀᓂᑯ ᑫᑲᑴᑗᔦᒃ ᐊᐲ ᐊᓇᒥᐋᔦᒃ, ᐅᑮᐃᓈᐞ᙮

ᒋᓴᔅ ᐁᑮ ᑲᑴᒋᒥᓐᒡ ᐋᑎ ᑳᐅᒌᓂᒃ ᐅᑲᔥᑭᐁᐎᓯᐎᓐ

(Mark 11.27-33; Luke 20.1-8)

23ᒦᓇᐙ ᑕᔥ ᒋᓴᔅ ᐅᑮ ᐱᑮᐌ ᓈᓯᑳᓐ ᐃᐃ ᑭᒋᐊᓇᒥᐁᐎᑲᒥᒃ᙮ ᒣᒀ ᑕᔥ ᐁᑭᑭᓄᐊᒫᑫᒡ, ᑭᒋᐊᓇᒥᐁᐎᑭᒫᐞ ᐃᐃ ᑲᔦ ᑳᓃᑳᓂᓯᓂᒡ ᒎᐗᐞ, ᐅᑮ ᐱᓈᓯᑳᑰᐞ ᐁᑮᐃᔑ ᑲᑴᒋᒥᑯᒡ: ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐋᐸᒋᑑᔭᓐ ᐅᓄ ᑳᐃᔑᒋᑫᔭᓐ? ᐊᐌᓀᓐ ᑲᔦ ᑳᒦᓂᒃ ᐃᐃ ᑲᔥᑭᐁᐎᓯᐎᓐ?

24ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᐯᔑᒃ ᑕᔥ ᑫᑰᓐ ᑫᓃᓐ ᑭᐐ ᑲᑴᒋᒥᓂᓂᒻ᙮ ᑮᔥᐱᓐ ᓇᑴᑕᐎᔦᒃ, ᑭᑲ ᐐᑕᒪᐎᓂᓂᒻ ᑕᔥ ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐅᒋ ᐃᔑᒋᑫᔮᓐ ᐅᐅ ᑳᐃᔑᒋᑫᔮᓐ᙮ 25ᐋᑎ ᑳᐅᒌᓂᒃ ᐊᐊ ᒞᓐ John ᐅᓰᑲᐊᑖᑫᐎᓐ? ᑭᔐᒪᓂᑑᕽ ᐃᓇ ᑯᒫ ᑲᔦ ᐃᓂᓃᑳᕽ? ᐅᑮᐃᓈᐞ᙮

ᒦᑕᔥ ᑳᐃᔑ ᒫᒌ ᑲᑲᓅᓂᑎᓂᒡ ᐁᑮᐗᐙᓀᑕᒥᓂᒡ᙮ ᒦᑕᔥ ᑳᐃᑭᑐᓂᒡ: ᑮᔥᐱᓐ ᐃᑭᑐᔭᕽ ᑭᔐᒪᓂᑑᕽ, ᑭᑲ ᐃᑯᓈᓐ ᑕᔥ ᐌᑯᓀᓐ ᑕᔥ ᑳᐅᒋ ᑌᐺᑕᐙᓯᐌᒃ ᐊᐊ ᒞᓐ? 26ᑮᔥᐱᓐ ᑲᔦ ᐃᑭᑐᔭᕽ ᐃᓂᓃᑳᕽ, ᑭᑯᓵᓈᓂᒃ ᐃᓴ ᐃᑭ ᑳᐹᑏᓄᐙᒡ, ᐋᓃᔥ ᑲᑭᓇ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐅᑎᓇᑭᒫᐙᓐ ᐃᓂ ᒞᓇᓐ, ᑮᐃᑭᑐᐗᐞ᙮ 27ᒦᑕᔥ ᑳᐃᑯᒡ ᒋᓴᔅ: ᑳᐐᓐ ᓂᑭᑫᑕᓰᒥᓐ᙮

ᒦᑕᔥ ᑳᐃᓈᒡ: ᑳᐐᓐ ᑕᔥ ᑫᓃᓐ ᑭᑲ ᐐᑕᒪᐎᓯᓅᓂᓂᒻ ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐋᐸᒋᑑᔮᓐ ᐅᐅ ᑳᐃᔑᒋᑫᔮᓐ᙮

ᐁᐋᐌᒋᑳᑳᓂᐎᐙᒡ ᐃᑭ ᓃᔑᓐ ᐅᑯᓯᓯᒫᒃ

28ᐋᓃᓐ ᐁᓀᑕᒣᒃ? ᑮᐊᔮ ᓴ ᐃᓂᓂ ᐁᑮᓃᔑᓂᒡ 2 ᐅᑯᓯᓴᐞ᙮ ᐅᑮᐃᓈᓐ ᑕᔥ ᐃᓂ ᑳᑮ ᓴᓰᑭᓯᓂᒡ: ᓂᑯᓯᔅ, ᑕᑲ ᐊᑕᐗᓄᑮᓐ ᔔᒥᓈᑎᑯᐎᑭᑎᑳᓂᕽ ᓅᑯᒻ ᑳᑮᔑᑲᒃ᙮ 29ᒦᑕᔥ ᑳᐃᑯᒡ: ᑕᑲ ᒦᐃ᙮ ᓈᓈᑫ ᑕᔥ ᑮᐋᑌᑕᒨᓐ, ᐁᑮᐊᑕ ᐗᓄᑮᓂᒡ᙮ 30ᐅᑌᑌᒫ ᑕᔥ ᐅᑮᓈᓯᑲᐙᓐ ᐃᓂ ᑯᑕᒃ ᐅᑯᓯᓴᓐ ᐁᑮᐃᓈᒡ ᒋᐊᑕᐗᓄᑮᓂᒡ᙮ ᒦᑕᔥ ᑳᐃᑯᒡ: ᐊᐤ, ᓂᑲ ᐃᔖ᙮ ᑳᐐᓐ ᑕᔥ ᑮᐃᔖᓰᐗᓐ᙮ 31ᐋᓐ ᐁᓀᑕᒣᒃ ᐊᐊᐌᑎ ᐅᑯᓯᓯᒫ ᑳᐃᔑᒋᑫᒡ ᑳᑮᐃᔑ ᒥᓴᐌᑕᒥᓂᒡ ᐅᑌᑌᓐ?

ᒦᑕᔥ ᑳᐃᑯᒡ: ᑳᓴᓰᑭᓯᒡ ᒫᐐᓐ᙮

ᒋᓴᔅ ᑕᔥ ᐅᑮᐊᓂ ᐃᓈᐞ: ᑌᐺ ᑭᐐᑕᒪᐎᓂᓂᒻ, ᑳᑎᐸᐃᑫᐃᐌᐙᒡ, ᐱᔑᒀᒋᑴᒃ ᑲᔦ ᑭᑖᒋᓇᐃᑯᐙᒃ ᐁᐅᑑᑭᒫᑲᑖᑯᐙᒡ ᑭᔐᒪᓂᑑᓐ᙮ 32#Luke 3.12; 7.29-30. ᒞᓐ John ᓰᑲᐊᑖᑫᐎᓂᓂ ᐅᔕ ᑮᐲᔖ ᐁᑮᐙᐸᑕᐃᓀᒃ ᐃᐃ ᑫᑮᐃᔑᑾᔭᒀᑎᓯᔦᑭᐸᓐ᙮ ᑳᐐᓐ ᑕᔥ ᑭᑮ ᑌᐺᑕᐙᓯᐙᐙ᙮ ᐃᑭ ᑕᔥ ᐐᓐ ᑳᑎᐸᐃᑫᐃᐌᐙᒡ ᐃᑭ ᑲᔦ ᐱᔑᒀᒋᑴᒃ ᐅᑮ ᑌᐺᑕᐙᐙᓐ᙮ ᑮᓇᐙ ᑕᔥ ᐐᓐ ᒥᓴᐙ ᑯ ᐁᑮᐙᐸᒣᒀ ᑳᐐᓐ ᑭᑮᐋᑌᑕᓰᒻ, ᐴᔥᑫ ᓈᑫ ᐱᑯ ᒋᑮ ᑌᐺᑕᒣᑭᐸᓐ᙮

ᐁᐋᐌᒋᑳᑳᓂᐎᐙᒡ ᑳᑮᐊᓄᑮᐙᒡ

ᐃᐃᒫ ᔔᒥᓈᑎᑯᐎ ᑭᑎᑫᐎᓂᕽ

(Mark 12.1-12; Luke 20.9-19)

33 # Isa 5.1-2. ᒋᓴᔅ ᑕᔥ ᑮᐃᑭᑐ: ᐱᓯᑕᐎᔑᒃ ᒦᓇᐙ ᐁᐐᐋᐌᒋᑫᔮᓐ᙮ ᑮᐊᔮ ᓴ ᑭᑎᑫᐎᑭᒫ ᐁᑮ ᑭᑎᑳᓈᒡ ᔔᒥᓇᐞ ᑳᐃᔑ ᑭᑎᑳᓱᓂᒡ ᐅᔔᒥᓂᑭᑎᑳᓂᕽ᙮ ᐊᓯᓃᐞ ᐃᑕᔥ ᑲᔦ ᐅᑮᐙᑳᔮᐱᑭᔑᒫᐞ ᐅᑭᑎᑳᓂᕽ ᐁᑮᒣᓂᑲᓂᑫᒡ᙮ ᑮᐙᓂᑫ ᑲᔦ ᑫᑕᔑᓰᔅᑯᐲᑭᔥᑲᐎᒥᓐᒡ ᐃᐃ ᔔᒥᓇᐞ, ᐅᓵᐱᐎᓐ ᑲᔦ ᐅᑮᐅᔑᑑᓐ᙮ ᒦᑕᔥ ᑳᐃᔑ ᐊᐎᐋᒡ ᐅᑭᑎᑫᐞ ᒋᓈᑲᒋᑕᒫᑯᒡ, ᐹᓂᒫ ᑫᐐᓐ ᐃᐃᒫ ᒣᔥᑾᒡ ᒋᐅᒋ ᐅᑎᓯᒡ᙮ ᒦᑕᔥ ᑳᐃᔑ ᒫᒑᒡ᙮ 34ᐊᐲ ᑕᔥ ᐁᐅᒋᒋᓭᓂᒃ ᒋᒪᐎᔂᓱᓂᒡ ᐃᐃ ᔔᒥᓇᐞ, ᐅᑮᐃᔑᓂᔕᐙᐞ ᐃᓴ ᐅᑕᓄᑮᐋᑲᓇᐞ ᐃᐃᒫ ᑳᐃᔑ ᑭᑎᑳᓱᓂᒡ ᔔᒥᓇᐞ ᑫᐐᓐ ᐃᐃᒫ ᐁᐐᐅᑎᓯᒡ ᒥᓂᒃ ᑫᑮᐅᑎᓯᐸᓐ᙮ 35ᑳᑮᐊᐎᐃᑣ ᑕᔥ ᐅᑮᐅᑎᑎᓈᐙᐞ ᐃᐃ ᐊᓄᑮᐋᑲᓇᐞ, ᐁᑮ ᑭᒋᓃᐗᓇᐙᐙᒡ ᐯᔑᒃ, ᐁᑮᓂᓵᐙᒡ ᐃᓂ ᑯᑕᒃ ᐯᔑᒃ, ᐁᑮ ᐸᐲᒶᓯᓇᐋᐙᒡ ᑲᔦ ᐯᔑᒃ᙮ 36ᒦᓇᐙ ᑕᔥ ᐊᐊ ᑭᑎᑫᐎᑭᒫ ᐅᑮᐃᔑᓂᔕᐙᐞ ᐅᑕᓄᑮᐋᑲᓇᐞ ᐊᐗᔑᒣ ᐁᑮ ᐹᑏᓄᓂᒡ, ᒦᑕᔥ ᐃᑭ ᑭᑎᑫᐎᓂᓂᐗᒃ ᐯᔑᑾᓐ ᑳᑑᑕᐙᐙᒡ᙮ 37ᐃᔥᒀᒡ ᑕᔥ ᐅᑮᐃᔑᓂᔕᐙᓐ ᐅᑯᓯᓴᓐ, ᐁᑮᐃᑭᑐᒡ: ᐅᑲ ᑭᑌᓂᒫᐙᓐ ᐃᓴ ᐃᓂ ᓂᑯᓯᓴᓐ᙮ 38ᐊᐲ ᑕᔥ ᑭᑎᑫᐎᓂᓂᐗᒃ ᐁᐙᐸᒫᐙᒡ ᐃᓂ ᐅᑯᓯᓯᒫᓐ, ᒦᑕᔥ ᑳᐃᑭᑐᐙᒡ: ᒦᓴ ᐃᓂ ᑭᑎᑫᐎᑭᒫ ᐅᑯᓯᓴᓐ᙮ ᐊᐯᔪᒃ ᑕᑲ ᓂᓯᒫᑖᓂᓐ, ᒋᐊᔮᐗᕽ ᐃᐃ ᑳᐐ ᑎᐱᓇᐌᐎᓯᓂᒡ! 39ᒦᑕᔥ ᐅᑮᐅᑎᑎᓈᐙᓐ, ᐁᑮ ᓵᑭᒋᐌᐱᓈᐙᒡ ᐃᐃᒫ ᑭᑎᑳᓂᕽ, ᐁᑮᓂᓵᐙᒡ ᑲᔦ᙮

40ᐋᓃᓐ ᑕᔥ ᑫᑑᑕᐙᒡ ᐊᐊ ᑭᑎᑫᐎᑭᒫ ᑳᑎᐯᑕᕽ ᔔᒥᓂ ᑭᑎᑳᓂᓂ ᐃᐃ ᑳᑮᐊᐎᐋᒡ ᐊᐲ ᑕᑯᔑᕽ? ᐅᑮᐃᓈᐞ᙮

41ᒦᑕᔥ ᑳᐃᑯᒡ: ᑫᑫᑦ ᐃᓴ ᒫᐐᓐ ᐅᑲ ᑲᒀᑕᑭᓂᓵᐞ ᐃᐃ ᒪᒋᑭᑎᑫᐎᓂᓂᐗᐞ, ᑯᑕᒃ ᑕᔥ ᑭᑎᑫᐎᓂᓂᐗᐞ ᐅᑲᐊᐎᐋᐞ ᑫᒦᓂᑯᒡ ᑫᑮᐅᒋ ᐅᑎᓯᐸᓐ ᐊᐲ ᒪᐎᔂᓂᐗᓂᓂᒃ, ᑮᐃᑭᑐᐗᐞ᙮

42 # Psa 118.22-23. ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᐃᓇ ᑭᑐᒋ ᐊᓇᒥᑑᓰᒻ ᑳᐃᔑᐲᐃᑳᑌᒃ ᑫᑌᒪᓯᓇᐃᑲᓂᕽ?

ᐃᓂ ᓴ ᐊᓯᓃᓐ ᑳᑮᐋᓇᐌᓂᒫᐙᒡ ᐃᑭ ᐅᐙᑳᐃᑫᒃ

ᒦᓴ ᐊ ᒫᐗᒡ ᑳᑮ ᑭᒋ ᐃᓀᑖᑯᓯᒡ ᐊᓯᓐ᙮

ᐋᓃᔥ ᑳᑎᐯᒋᑫᒡ ᐃᐃ ᐅᑎᔑᒋᑫᐎᓐ᙮

ᐋᐱᒋ ᑕᔥ ᒫᒪᑳᓯᓈᑾᓐ,

ᐃᔑᐲᐃᑳᑌ᙮

43ᒦᑕᔥ ᐅᐅᐌ ᐌᒋ ᐃᓂᓇᑰᒃ: ᑭᑲ ᒪᑲᒥᑰᒻ ᐃᓴ ᐃᐃ ᑭᔐᒪᓂᑑ ᐅᑎᐯᒋᑫᐎᓐ ᒣᔥᑾᒡ ᒋᒦᓂᑣ ᐃᑭ ᑯᑕᒃ ᐯᒫᑎᓯᐙᒡ ᑫᓈᑯᑑᐙᒡ ᑭᔐᒪᓂᑑᓐ ᑳᐊᑕᐌᑕᒥᓂᒡ, ᐅᑮᐃᓈᐞ᙮ 44[ᐊᐌᓀᓐ ᓴ ᑫᐸᑭᔑᕽ ᐃᐃᒫ ᐗᑭᒋᐊᓯᓐ ᑕᐱ ᑭᔥᑭᔑᓐ᙮ ᐊᐊ ᑕᔥ ᑫᐸᑕᑯᔥᑳᑯᒡ ᐃᓂ ᐊᓯᓃᓐ, ᐐᑫ ᑕᔑᑯᔥᑰᓱ, ᑖᐱᔥᑰ ᑫᑰᓐ ᑳᐹᔥᑭᓀᓭᒃ ᑕᐃᔑᓈᑯᓯ᙮]#21.44 ᐅᐅᐌ ᑳᐃᔑ ᑭᑭᓇᐙᒋᐲᐃᑳᑌᒃ [ ] 44 ᐅᔑᐲᐃᑲᓀᔅ, ᑳᐐᓐ ᑮᑕᑯᐲᐃᑳᑌᓯᓅᓐ ᐋᓂᑕ ᑫᑌᐅᔑᐲᐃᑫᐎᓂᕽ᙮ ᐙᐸᑕᓐ Luke 20.18᙮

45 ᑭᒋᐊᓇᒥᐁᐎᑭᒫᒃ ᑕᔥ, ᐯᕒᐊᓰᒃ Pharisees ᑲᔦ, ᐁᑮᓅᑕᐙᐙᒡ ᒋᓴᓲᓐ ᐅᐅ ᐁᐃᔑ ᐋᐌᒋᑫᓂᒡ, ᐅᑮ ᑭᑫᑖᓈᐙ ᓴ ᐐᓇᐙ ᐁᑮ ᑕᔑᒥᑯᐙᒡ᙮ 46ᒦᑕᔥ ᑳᐃᔑ ᑲᑴᑕᑯᓈᐙᒡ, ᔖᑰᒡ ᐃᑕᔥ ᐅᑮ ᑯᓵᐙᐞ ᐃᐃ ᑳᑮ ᐹᑏᓄᓂᒡ, ᐋᓃᔥ ᐅᑮᐃᓇᑭᒫᓂ ᐃᓂ ᒋᓴᓲᓐ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐁᑎᓄᐎᓂᒡ᙮

Currently Selected:

ᒫᑎᔪ 21: OJBS

Highlight

Copy