ᒫᑎᔪ 14

ᒞᓐ ᓰᑲᐊᑖᑫᐎᓂᓂ ᑳᑮᐃᔑ ᓂᓯᓐᒡ

(Mark 6.14-29; Luke 9.7-9)

1ᒦᔥ ᐯᔑᑾᓐ ᐊᐲ ᐁᕒᐊᑦ Herod ᑳᑮᐋᓂᑫᐎᑭᒫᐎᐃᒡ#14.1 ᐁᕒᐊᑦ ᑳᑮᐋᓂᑫ ᐎᑭᒫᐎᐃᓐᒡ: ᒦᓴ ᐗᐊ ᐁᕒᐊᑦ ᑳᑮᐃᔑᓂᑳᓱᒡ ᐁᑎᐸᔅ Antipas, ᑳᑮ ᑎᐯᑕᕽ ᑳᓬᐊᓬᐄᐎ ᐊᑮᓂ Galilee, ᐳᕒᐄᔭ ᐊᑮᓂ Perea ᑲᔦ, ᐊᐲ 4 B᙮C᙮ ᐲᓂᔥ 39 A᙮D᙮ ᑮᐃᔑᐲᐃᑳᑌᓂᑭᓐ ᑭᑭᓅᓄᐎᓇᓐ᙮ ᐃᐃᒫ ᑳᓬᐊᓬᐄᕽ Galilee, ᑮᓈᓅᑕᒻ ᐁᐃᓈᒋᒥᒥᓐᒡ ᐃᓂ ᒋᓴᓲᓐ᙮ 2ᒦᑕᔥ ᑳᐃᓈᒡ ᐅᑕᓄᑮᐋᑲᓇᐞ: ᒦ ᓴ ᐊᐌ ᒞᓐ John ᓰᑲᐊᑖᑫᐎᓂᓂ ᐁᑮ ᑮᐌᐱᒫᑎᓯᒡ, ᒦ ᒫᐐᓐ ᐃᐃᐌ ᑳᐅᒋ ᐊᔮᒡ ᒪᔥᑲᐎᓰᐎᓐ ᑳᐅᒋ ᓈᑯᑑᒡ ᒫᒪᑳᒋᒋᑫᐎᓇᓐ, ᑮᐃᑭᑐ᙮

3 # Luke 3.19-20. ᒦᑕᔥ ᐅᐅᐌ ᒞᓐ ᑳᑮᐅᒋ ᑭᐸᐃᑲᓂᐎᑯᐸᓀᓐ, ᐁᕒᐊᑦ ᑮᐐᐎᑯᐸᓐ ᐃᓂ ᐃᑴᐗᓐ ᐃᕒᐆᑎᔭᓴᓐ Herodias, ᐃᓂ ᐐᒋᑭᐌᔭᓐ ᐱᓬᐊᑉ Philip ᐐᐎᓂ᙮ 4#Lev 18.16; 20.21. ᒞᓐ ᑕᔥ ᑮᐃᓈᑯᐸᓐ ᐃᓂ ᐁᕒᐊᑕᓐ: ᑳᐐᓐ ᑭᑖ ᐃᔑᒋᑫᓰ ᐃᐃ ᑳᐃᔑᒋᑫᔭᓐ ᒋᐅᑖᐱᓂᒪᒡ ᑮᒋᑭᐌᓯ ᐱᓬᐊᑉ ᐐᐗᓐ, ᒦᐃ ᑳᐃᓈᑯᐸᓀᓐ᙮ 5ᐁᕒᐊᑦ ᐃᓴ ᐐᓂᓵᑯᐸᓐ ᒞᓇᓐ ᔖᑰᒡ ᐃᑕᔥ ᐅᑮ ᑯᓵᐞ ᒎᐗᐞ ᐋᓃᔥ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐅᑮᐃᓀᓂᒫᓂ ᒞᓇᓐ᙮

6ᐊᐲ ᑕᔥ ᐁᕒᐊᑦ ᐁᑮ ᑎᐱᔥᑲᕽ, ᐃᕒᐆᑎᔭᔅ ᐅᑖᓂᓴᓐ ᑮᓃᒥᐗᓐ ᐁᓈᓴᒪᐱᐙᒡ, ᐁᕒᐊᑦ ᐃᑕᔥ ᐐᑫ ᑮᒥᓉᑕᒻ᙮ 7ᐅᑮᐊᔓᑕᒪᐙᓐ ᑕᔥ ᐃᓂ ᐅᔥᑭᓃᑭᑴᓐ ᐁᐐ ᒦᓈᒡ ᐌᑯᓀᓂᑯ ᑫᑲᑴᒋᒥᑯᒡ᙮

8ᐁᑮ ᑭᑭᓄᐊᒫᑯᒡ ᐃᑕᔥ ᐅᒫᒫᓐ ᐊᐊ ᐅᔥᑭᓃᑭᑴ, ᒦᐃ ᑳᐃᑭᑐᒡ: ᒞᓐ ᓰᑲᐊᑖᑫᐎᓂᓂ ᐅᑎᒀᓐ ᒦᔑᔑᓐ ᐅᐅᒫ ᔐᒫᒃ ᐅᓈᑲᓂᕽ ᒋᐲᒋᑳᑌᒃ, ᐁᑮᐃᑭᑐᒡ᙮

9ᑭᒋᐅᑭᒫ ᑕᔥ ᐐᑫ ᑮᒥᒋᓇᐌᓯ᙮ ᐋᔕ ᑕᔥ ᐁᑮ ᐹᑲᒋ ᐊᔓᑕᒫᑫᒡ, ᐁᐹᑏᓄᓂᒡ ᑲᔦ ᑳᑮᒪᐗᑎᓯᑯᒡ, ᑮᐃᑭᑐ ᐱᓵᓂᑯ ᒋᒦᓂᒥᓐᒡ ᐃᓂ ᐅᔥᑭᓃᑭᑴᓐ ᑳᑮᐃᔑ ᑲᑴᑗᓂᒡ᙮ 10ᑭᒋᐅᑭᒫ ᑕᔥ ᑮᐊᓅᑮ ᒋᑮᔥᑭᑴᑕᐅᒥᓐᒡ ᒞᓇᓐ ᐃᐃᒫ ᑭᐸᐅᑏᐎᑲᒥᑯᕽ᙮ 11ᐅᓈᑲᓂᕽ ᐃᑕᔥ ᑮᐃᔑ ᐲᑕᒪᐙ ᐃᐃᐌᓂ ᐅᑎᑾᓂᒫ᙮ ᐅᔥᑭᓃᑭᑴ ᑕᔥ ᑮᒦᓈᑲᓂᐎ᙮ ᒦᑕᔥ ᑳᐃᔑ ᒦᓈᒡ ᐃᓂ ᐅᒫᒫᓐ᙮ 12ᒞᓐ ᐃᑕᔥ ᐅᑭᑭᓄᐊᒪᐙᑲᓇᐞ ᑮᐱ ᑕᑯᔑᓅᐞ ᐁᑮᒫᒌᑑᐙᒡ ᒞᓇᓐ ᐅᐐᔭᐎᓂ, ᐁᑮᓂᑾᐊᒧᐙᒡ ᑲᔦ᙮ ᒦᑕᔥ ᐅᑮᐊᐎ ᐐᑕᒪᐙᐙᓐ ᒋᓴᓲᓐ᙮

ᓈᓂᕽ ᒥᑖᔂᒃ ᐁᑮᐊᔕᒥᑣ

(Mark 6.30-44; Luke 9.10-17; John 6.1-14)

13ᐊᐲ ᑕᔥ ᒋᓴᔅ ᑳᓅᑕᕽ, ᒌᒫᓂᕽ ᑮᐴᓯ ᐸᑳᓐ ᐁᑮᐃᔖᒡ ᐐᓀᑕ ᑫᔑ ᐸᐯᔑᑯᒡ᙮ ᐁᑮᓅᑕᒧᐙᒡ ᐃᑕᔥ ᐃᑭ ᐯᒫᑎᓯᐙᒡ ᐋᑎ ᐁᔮᓂᒡ ᒋᓴᓲᓐ, ᑮᐃᓈᔕᑳᒣᐗᒃ ᐁᑮᓈᓯᑲᐙᐙᒡ᙮ ᒥᓯᐌ ᑕᔥ ᐆᑌᓈᑳᕽ ᑮᐱ ᐅᒌᐗᒃ᙮ 14ᐁᑮ ᑲᐹᒡ ᐃᑕᔥ ᒌᒫᓂᕽ, ᐁᑮᐙᐸᒫᒡ ᐯᒫᑎᓯᓂᒡ ᐁᐲᒋ ᐹᑏᓄᓂᒡ, ᐋᐱᒋ ᐅᑮ ᑭᒋᑰᐹᑌᓂᒫᐞ, ᐁᑮᒥᓄᐊᔮᐋᒡ ᑲᔦ ᑲᑭᓇ ᐃᒫ ᑳᑮᐋᑯᓯᓂᒡ᙮

15ᐁᐊᓂ ᐅᓈᑯᔑᓂᓂᒃ ᐊᐲ ᐅᑭᑭᓄᐊᒪᐙᑲᓇᐞ ᐅᑮ ᐱᓈᓯᑳᑰᐞ ᐁᑮᐃᑯᒡ: ᐋᐱᒋ ᐅᔕ ᐋᔕ ᐅᓈᑯᔑᓐ, ᐱᑾᒐᔭᐄ ᑲᔦ ᐅᐅ ᑳᐊᔮᔭᕽ᙮ ᐃᑯᒋ ᑕᔥ ᐃᔑᓂᔕᐅ, ᐁᔨᔑᑖᓂᐗᓂᓂᒃ ᒋᐃᔖᐙᒡ ᒋᐊᑖᐌᐙᒡ ᑫᒦᒋᐙᒡ, ᐁᑮᐃᑯᒡ᙮

16ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᒣᒬᒡ ᐃᑯᒋ ᑕᐃᔖᓰᐗᒃ, ᑮᓇᐙ ᐊᔕᒥᑯᒃ, ᒦ ᑳᐃᓈᒡ᙮

17ᐅᑮᐃᔑ ᓇᑴᑖᑰᐞ ᐃᑕᔥ: ᓈᓇᓐ 5 ᐅᔐᑕ ᓂᑕᔮᐙᓈᓂᒃ ᐸᑴᔑᑲᓇᒃ, ᓃᔑᓐ 2 ᐃᑕᔥ ᑮᑰᔭᒃ, ᑮᐃᑭᑐᐗᐞ᙮

18ᒋᓴᔅ ᑕᔥ ᐅᑮᐃᓈᐞ: ᐅᐅᒫ ᓴ ᐱᒦᔑᔑᒃ, ᐅᑮᐃᓈᐞ᙮ 19ᐅᑮ ᑲᓅᓈᐞ ᐃᑕᔥ ᑲᑭᓇ ᐊᐎᔭᐞ ᒋᓇᒪᑕᐱᓂᒡ ᐃᐃᒫ ᒪᔥᑯᓰᑳᕽ᙮ ᐁᑮᐅᑖᐱᓈᒡ ᐃᑕᔥ ᐃᓂ ᓈᓇᓐ ᐸᑴᔑᑲᓇᐞ, ᐃᐃ ᑲᔦ ᓃᔑᓐ ᑮᑰᔭᐞ, ᐃᔥᐱᒥᕽ ᑮᐃᓈᐱ ᐁᑮᓇᓈᑯᒫᒡ ᑭᔐᒪᓂᑑᓐ᙮ ᒦᑕᔥ ᑳᐃᔑ ᐸᐸᑴᐱᓈᒡ ᐃᐃ ᐸᑴᔑᑲᓇᐞ ᐁᑮᒫᒦᓈᒡ ᐅᑭᑭᓄᐊᒪᐙᑲᓇᐞ, ᒦᑕᔥ ᑳᐃᔑ ᒫᒫᑕᐆᓈᓂᒡ ᑲᑭᓇ ᑳᑮᓇᒪᑕᐱᓂᒡ᙮ 20ᑲᑭᓇ ᑕᔥ ᐊᐎᔭ ᑮᑌᐐᓯᓂ᙮ ᑭᑭᓄᐊᒪᐙᑲᓇᒃ ᑕᔥ ᐅᑮᒫᒨᔕᑭᓈᓈᐙ ᑳᑮᐃᔥᑯᓭᓂᒃ ᒦᒋᒻ᙮ ᒥᑖᔑᓃᔓ 12 ᐐᑯᐲᒪᑲᒃ ᒥᓂᒃ ᑮᐃᔥᑯᓭᓂ᙮ 21ᑯᒫ ᓈᓂᕽ ᒥᑖᔂᒃ 5,000 ᑮᑕᔑᐗᐞ ᐃᓂᓂᐗᐞ ᑳᑮᐊᔕᒫᒡ, ᔑᑾ ᑲᔦ ᐃᑴᐗᐞ, ᐊᐱᓅᒌᔕᐞ ᑲᔦ᙮

ᒋᓴᔅ ᐁᑮ ᐱᒧᓭᒡ ᐗᑭᒋᓂᐲᕽ

(Mark 6.45-52; John 6.15-21)

22ᒋᓴᔅ ᐃᑕᔥ ᐅᑮ ᐴᓯᓂᔕᐙᐞ ᐁᑮᓃᑳᓂ ᓂᔕᐙᒡ ᐅᑭᑭᓄᐊᒪᐙᑲᓇᐞ ᐊᑳᒥᕽ ᒋᐃᔖᓂᒡ, ᐁᑮ ᑲᓅᓈᒡ ᐃᐃ ᑲᔦ ᑳᒫᒪᐌᓄᓂᒡ ᐊᐎᔭᐞ ᒋᐊᓂ ᒫᒑᓂᒡ᙮ 23ᐊᐲ ᑕᔥ ᑳᐸᑭᑎᓈᒡ ᒋᒫᒑᓂᒡ, ᐗᑭᑕᑎᓐ ᑮᐃᔖ ᐐᓀᑕ ᐁᑮᐊᑕ ᐊᓇᒥᐋᒡ᙮ ᐁᐅᓈᑯᔑᓂᓂᒃ ᑕᔥ ᐐᓀᑕ ᒋᓴᔅ ᑮᒥᒋᐯᔑᑯ ᐃᐃᐌᑎ᙮ 24ᐅᐅ ᑕᔥ ᐊᐲ ᐋᔕ ᐙᓴ ᒥᔕᐗᑳᒻ ᑮᐊᓂ ᐊᔮᐗᒃ ᑭᑭᓄᐊᒪᐙᑲᓇᒃ ᐃᐃᒫ ᓵᑲᐃᑲᓃᕽ, ᐋᐱᒋ ᐁᑮᐅᒑᓂᒪᐅᑯᐙᒡ ᐁᑮ ᑭᒋᓅᑎᓂᓂᒃ, ᐁᑮᐅᒋᔥᑲᐙᓂᒪᓂᓂᒃ᙮

25ᓂᑯᒋᑯ ᑫᑳ ᐁᐊᓂ ᐲᑖᐸᓂᓂᒃ, ᒋᓴᔅ ᐅᑮᓈᓯᑲᐙᐞ ᐗᑭᒋᓂᐲᕽ ᐃᑕᔥ ᐁᑮ ᐱᒧᓭᒡ᙮ 26ᑭᑭᓄᐊᒪᐙᑲᓇᒃ ᐃᑕᔥ ᐁᐙᐸᒫᐙᒡ ᐁᐱᓈᑯᓯᓂᒡ ᐗᑭᒋᓂᐲᕽ, ᐐᑫ ᑮᑭᒋ ᓭᑭᓯᐗᒃ, ᒌᐸᔾ! ᐁᑮᐃᑭᑐᐙᒡ᙮ ᒦᑕᔥ ᑳᐃᔑ ᔖᑯᐌᐙᒡ ᐁᓭᑭᓯᐙᒡ᙮

27ᒋᓴᔅ ᐃᑕᔥ ᔐᒫᒃ ᐅᑮ ᑲᓅᓈᐞ: ᒪᔥᑲᐌᑕᒧᒃ! ᓃᓐ ᐅᔕ! ᑫᑯ ᓭᑭᓯᑫᒃ, ᐅᑮᐃᓈᐞ᙮

28ᐅᑮ ᑲᓅᓂᑰᓐ ᐃᑕᔥ ᐲᑕᕒᐆᓐ Peter: ᑌᐯᒋᑫᔭᓐ, ᑮᔥᐱᓐ ᑮᓐ ᐋᐎᐗᓀᓐ, ᑲᓅᔑᔑᓐ ᒋᐱᓈᓯᑲᐎᓈᓐ ᓂᐲᕽ, ᐅᑮᐃᑰᓐ᙮

29ᒋᓴᔅ ᑕᔥ ᐅᑮᐃᓈᓐ: ᐋᐎᓴ ᐊᐯ! ᐲᑕᕒ ᑕᔥ ᑮᑲᐹ ᒌᒫᓂᕽ ᐁᑮ ᐱᒧᓭᒡ ᐗᑭᒋᓂᐲᕽ ᐁᓈᓯᑲᐙᒡ ᒋᓴᓲᓐ᙮ 30ᐁᐙᐸᑕᕽ ᐃᑕᔥ ᐁᑭᒋᓅᑎᓂᓂᒃ, ᑮᓭᑭᓯ᙮ ᒦᑕᔥ ᑳᑮᐊᓂ ᑯᓵᐲᒡ᙮ ᑮᐃᔑ ᔖᑯᐌ ᑕᔥ: ᑌᐯᒋᑫᔭᓐ ᐱᒫᒋᐃᔑᓐ! ᑮᐃᑭᑐ᙮

31ᔐᒫᒃ ᐃᑕᔥ ᒋᓴᔅ ᐅᑮ ᑌᐱᓈᓐ ᐁᑮᐐᑯᐱᓈᒡ ᐁᑮᐃᓈᒡ ᑲᔦ: ᑮᓐ ᑳᔭᑳᓯᕽ ᑭᑌᐺᔦᑕᒧᐎᓐ, ᐌᑯᓀᓐ ᑳᐅᒋ ᐋᓉᑕᒪᓐ? ᐅᑮᐃᓈᓐ᙮

32ᐁᑮ ᐴᓯᐙᒡ ᐃᑕᔥ ᒌᒫᓂᕽ, ᒦ ᓴ ᐐᑫ ᑳᐃᔑ ᐃᔥᒀ ᑭᒋᓅᑎᓂᓂᒃ᙮ 33ᐃᓂ ᑕᔥ ᑳᑮ ᐴᓯᓂᒡ ᐃᐃᒫ ᒌᒫᓂᕽ, ᐅᑮᐅᒋᒌᑾᓇᐲᑖᑰᐞ ᐁᑮᐃᑯᒡ: ᑌᐺ ᓴ ᑮᓐ ᑭᔐᒪᓂᑑ ᐅᑯᓯᓴᓐ ᑭᑎᓄᐤ! ᐅᑮᐃᑰᐞ᙮

ᒋᓴᔅ ᐁᒥᓄᐊᔮᐋᒡ ᐊᐎᔭᐞ ᐃᐃᒫ ᑫᓀᓴᕒᐃᑎᑳᕽ

(Mark 6.53-56)

34ᐊᐲ ᑕᔥ ᐁᑮᐃᔥᒀ ᐋᔕᐎᔥᑳᐙᒡ ᐃᐃᐌᓂ ᓵᑲᐃᑲᓐ, ᑫᓀᓴᕒᐃᑎᑳᕽ#14.34 ᑫᓀᓴᕒᐃᑎᑳᕽ: ᒦᓴᐃᐌᑎ ᐊᑮᕽ ᑳᑮᐃᒋᑳᑌᒃ ᑳᐃᔑᑕᑕᒀᒃ ᑳᑮᐃᔑᐌᒋᓂᑖᐎᑭᒃ ᑫᑰᓐ, ᑮᐌᑎᓄᓂᑳᐲᐊᓄᕽ ᐃᓇᑫᑳᒻ ᑳᓬᐊᓬᐄᐎ ᓵᑲᐃᑲᓃᕽ᙮ Gennesaret ᐃᑕᔥ ᑮᐃᔑ ᒥᔕᑳᐗᒃ᙮ 35ᐁᑮᓂᓯᑕᐎᓇᐙᐙᒡ ᑕᔥ ᒋᓴᓲᓐ ᐃᑭ ᐃᓂᓂᐗᒃ ᐃᐃᒫ ᑳᑮᐊᔮᐙᒡ, ᒦᔥ ᑳᐃᔑ ᒫᒌᔮᒋᒧᐙᒡ᙮ ᒦᔥ ᑲᑭᓇ ᐅᑖᑯᓰᒃ ᑳᑮ ᐲᒋᑲᓂᐎᐙᒡ ᐁᔑ ᐊᔮᓂᒡ ᒋᓴᓲᓐ᙮ 36ᒦᑕᔥ ᑳᐃᓈᐙᒡ ᒋᓴᓲᓐ: ᑕᑲ ᐸᑭᑎᓐ ᐅᑖᑯᓰᒃ ᐱᓵᓐ ᒋᓵᒥᓇᒧᐙᒡ ᑳᐃᔑ ᓇᓃᓰᑭᒀᑌᓂᒃ ᑭᑲᔥᑮᑮᐎᓐ,#14.36 ᑳᔑ ᓇᓃᓰᑭᒀᑌᓂᒃ ᑭᑲᔥᑮᑮᐎᓐ: ᐙᐸᑕᓐ 9.20᙮ ᒦ ᑳᐃᑯᒡ᙮ ᒥᓂᒃ ᐃᑕᔥ ᑳᑮ ᓵᒥᓇᒥᓂᒡ ᑲᑭᓇ ᑮᒥᓄᔭᔮᐗᐞ᙮

Currently Selected:

ᒫᑎᔪ 14: OJBS

Highlight

Copy