ᒫᑎᔪ 15

ᑳᑮᐱ ᐃᔑ ᐋᔮᓂᑫ ᑭᑭᓄᐊᒫᑯᐙᒡ ᐃᐃ ᐅᑫᑌᐊᔭᐋᒥᐙᐸᓃᐞ

(Mark 7.1-13)

1 ᐯᕒᐊᓰᒃ Pharisees ᐃᑭ ᑲᔦ ᐅᓇᔓᐌᐎ ᑭᑭᓄᐊᒫᑫᒃ ᒉᕒᐆᓴᓬᐊᒥᕽ Jerusalem ᑮᐱ ᐅᒌᐗᒃ ᐁᑮ ᐱᓈᓯᑲᐙᐙᒡ ᒋᓴᓲᓐ ᐁᑮᐃᓈᐙᒡ: 2ᐌᑯᓀᓂᓂ ᑕᔥ ᑭᑭᑭᓄᐊᒪᐙᑲᓇᒃ ᐌᒋ ᑑᑕᓯᒀ ᐃᐃ ᑳᑮᐱ ᐋᔮᓂᑫ ᑭᑭᓄᐊᒫᑰᔭᕽ ᑳᑮᐱ ᓂᑖ ᐃᔑᒋᑫᓂᒡ ᐃᐃᐌᓂᐗᐞ ᐅᑖᓈᕽ ᑳᑮ ᐱᒫᑎᓯᓂᒡ᙮ ᑳᐐᓐ ᐄᑐᒃ ᑾᔭᒃ ᐃᓇᑫ ᐃᔑᑭᓰᓂᒌᓰᐗᒃ ᑭᑭᑭᓄᐊᒪᐙᑲᓇᒃ ᒋᑆ ᐐᓯᓂᐙᒡ, ᐅᑮᐃᓈᐙᓐ᙮

3ᒋᓴᔅ ᐃᑕᔥ ᑮᐃᑭᑐ: ᐌᑯᓀᓐ ᐃᑕᔥ ᑫᑮᓇᐙ ᐌᒋ ᑑᑕᓯᐌᒃ ᑭᔐᒪᓂᑑ ᐅᑲᑮ ᑭᒥᐌᐎᓐ, ᓇᐗᒡ ᐃᓂ ᑭᑖᓂᑫ ᑭᑭᓄᐊᒫᑎᐎᓂᐙ ᐁᑲᓇᐌᑕᒣᒃ? 4#Ex 20.12; 21.17; Lev 20.9; Deut 5.16. ᑭᔐᒪᓂᑑ ᑕᔥ ᑮᐃᑭᑐ: ᑭᑌᓂᒻ ᑭᑌᑌ, ᑭᒫᒫ ᑲᔦ᙮ ᑮᔥᐱᓐ ᐃᑕᔥ ᐊᐎᔭ ᒪᒋ ᐃᓈᒡ ᐅᑌᑌᓐ, ᐅᒫᒫᓐ ᑲᔦ, ᑕᑲ ᑕᓂᓵᑲᓂᐎ᙮ 5ᑮᓇᐙ ᑕᔥ ᐅᐅ ᑭᑎᔑᒋᑫᒻ, ᐊᐎᔭ ᑫᑰᓂᓂ ᐁᐊᔮᒡ ᑫᑮᐅᒋ ᐐᒋᐋᐸᓐ ᐃᓂ ᐅᑌᑌᓐ ᑯᒫ ᑲᔦ ᐅᒫᒫᓐ, ᑮᔥᐱᓐ ᑕᔥ ᐃᑭᑐᒡ, ᑫᑮᒦᓂᓈᐹᓐ ᐋᔕ ᓂᑮᒦᓈ ᑭᔐᒪᓂᑑ, 6ᒦᑕᔥ ᑳᐐᓐ ᒣᒬᒡ ᐅᑲ ᑭᑌᓂᒫᓰᓐ ᐃᓂ ᐅᑌᑌᓐ, ᐁᑭᑐᔦᒃ᙮ ᒦᑕᔥ ᐁᔑ ᐲᑯᓇᒧᐌᒃ ᑭᔐᒪᓂᑑ ᐅᑎᑭᑐᐎᓐ, ᐃᐃᐌ ᓇᐗᒡ ᐁᐐ ᐱᒥᓂᔕᐊᒣᒃ ᑮᓇᐙ ᑭᑎᔑᑣᐎᓂᐙᓐ᙮ 7ᑮᓇᐙ ᐅᒥᓍᑎᓰᔑᑑᒃ! ᐋᐱᒋ ᑾᔭᒃ ᑭᑮᐃᑯᐙᑯᐸᓐ ᐋᐃᓭᔭ Isaiah ᐁᑮ ᑲᓅᑕᒪᐙᑯᐸᓀᓐ ᑭᔐᒪᓂᑑᓐ:

8 # Isa 29.13. ᑭᔐᒪᓂᑑ ᐃᑭᑐ, ᐅᑯ ᐯᒫᑎᓯᐙᒡ ᓂᑎᑰᒃ ᐁᑭᒋ ᐃᓀᓂᒥᐙᒡ᙮

ᐅᑌᐃᐙᕽ ᐃᑕᔥ ᐐᓐ ᓇᐹᒡ ᐃᓇᑫ ᐃᓀᑕᒨᒃ ᑳᐃᓀᑕᒧᐗᒃ᙮

9ᐊᓂᔖ ᓴ ᓂᑕᓇᒥᐁᑖᑰᒃ,

ᐋᓃᔥ ᐊᐗᔑᒣ ᑭᑭᓄᐊᒫᑫᐗᒃ ᐃᓂ ᐃᓂᓃᐎ ᑭᑭᓄᐊᒫᑫᐎᓇᓐ

ᑖᐱᔥᑰ ᐁᐃᓍᑕᒧᐙᒡ ᐃᓴ ᐃᓂ ᑭᔐᒪᓂᑑᓐ ᐅᑭᑭᓄᐊᒫᑫᐎᓂᓂ᙮

ᐊᐎᔭ ᑳᐅᒋ ᐃᓇᑭᒥᓐᒡ ᐁᑌᐊᐲᑌᑖᑯᓯᓯᒃ ᒋᐊᓇᒥᐁᑕᐙᒡ ᑭᔐᒪᓂᑑᓐ

(Mark 7.14-23)

10ᒋᓴᔅ ᐃᑕᔥ ᐅᑮ ᑲᓅᓈᐞ ᐊᐎᔭᐞ ᒋᓈᓯᑳᑯᒡ, ᐁᑮᐃᓈᒡ: ᐱᓯᑕᒧᒃ, ᓂᓯᑐᑕᒧᒃ ᐅᐅ! 11ᑳᐐᓐ ᐐᓐ ᐊᐎᔭ ᑳᐃᓇᒋᑫᒡ ᐅᒋ ᐃᓇᑭᒫᓰ ᐁᑌᐊᐲᑌᑖᑯᓯᓯᒃ ᒋᐊᓇᒥᐁᑕᐙᒡ ᑭᔐᒪᓂᑑᓐ,#15.11 ᐁᑌᐊᐲᑌᑖᑯᓯᓯᒃ ᒋᐊᓇᒥᐁᑕᐙᒡ ᑭᔐᒪᓂᑑᓐ: ᐙᐸᑕᓐ ᐐᓀᑖᑯᓯᐎᓐ ᐃᑭᑐᐎᓇᓐ ᑳᔑ ᐅᔑᐲᐃᑳᑌᑭᓐ᙮ ᐃᐃᐌᓂ ᓴ ᑳᐅᒋ ᑮᑭᑐᒡ ᐅᑑᓂᕽ ᐅᒋ ᐃᓇᑭᒫ ᐁᑌᐊᐲᑌᑖᑯᓯᓯᒃ᙮

12 ᑭᑭᓄᐊᒪᐙᑲᓇᒃ ᐃᑕᔥ ᐅᑮᐃᓈᐙᓐ ᒋᓴᓲᓐ: ᑭᑭᑫᓂᒫᒃ ᐃᓇ ᐯᕒᐊᓰᒃ Pharisees ᐋᓃᓐ ᐁᐲᒋ ᒫᓀᑕᒧᐙᒡ ᑳᑮᐃᑭᑐᔭᓐ? ᐅᑮᐃᓈᐙᓐ᙮

13ᒋᓴᔅ ᑕᔥ ᑮᐃᑭᑐ: ᑭᑎᑳᓇᓐ ᑳᑮ ᑭᑎᑳᑕᓯᒃ ᐊᐊ ᓂᑌᑌ ᑭᒋᑮᔑᑯᕽ ᑳᐊᔮᒡ, ᑲᑭᓇ ᑕᒪᓂᐱᒋᑳᑌᐗᓐ᙮ 14#Luke 6.39. ᑫᑯ ᐸᐹ ᐱᓯᔅᑫᓂᒫᑫᒀᓂᒃ! ᑳᐐᓐ ᐅᔕ ᐙᐱᓰᐗᒃ ᒥᓴᐙ ᐋᓇᑲᑴ ᓃᑳᓃᑕᐙᐙᒡ ᑳᐙᐱᓯᓂᒃ᙮ ᑮᔥᐱᓐ ᑳᐙᐱᓯᒃ ᓃᑳᓃᑕᐙᒡ ᐃᓂ ᑯᑕᒃ ᑳᐙᐱᓯᓂᒃ, ᒥᒋᓃᔥ ᑕᐲᑖᓂᑳᓀᓭᐗᒃ᙮

15ᐲᑕᕒ Peter ᑕᔥ ᑮᐃᑭᑐ: ᐐᑕᒪᐎᔑᓈᒻ ᐋᓃᓐ ᒪᔮ ᐁᑭᑑᒪᑲᒃ ᐃᐃ ᐁᔑ ᑭᑭᓄᐃᑫᔭᓐ᙮

16ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᐃᓇ ᑫᑮᓇᐙ ᒪᔑ ᑭᑑᓂᓯᑐᑕᒫᐎᓂᓰᒻ? 17ᑳᐐᓐ ᐃᓇ ᑭᓂᓯᑐᑕᓰᒻ? ᑫᑰᓂᓂ ᐊᐎᔭ ᑳᒦᒋᒡ ᐅᒥᓴᑖᕽ ᐃᔑᓭᓂ, ᑕᓂ ᓵᑲᐊᒨᒪᑲᓂᓂ ᑕᔥ᙮ 18#Mat 12.34. ᐃᐃᐌᓂ ᑕᔥ ᑫᑰᓂᓂ ᑳᐱ ᐅᒌᓂᒃ ᐃᐃᒫ ᐅᑌᐃᕽ, ᒦᓴ ᐃᐃᐌᓂ ᑫᐅᒋ ᑌᐊᐲᑌᓂᒥᑯᓯᒃ ᑭᔐᒪᓂᑑᓐ᙮ 19ᒦᑕᔥ ᐅᓄᐌᓂᐗᓐ ᑳᐅᒌᑭᓐ ᐃᐃᒫ ᐊᐎᔭ ᐅᑌᐃᕽ, ᒪᒋ ᐃᓀᑕᒧᐎᓇᓐ, ᓂᔑᐌᐎᓐ, ᑳᐱᒣᓂᒫᒡ ᐸᑳᓐ ᐊᐎᔭᓐ ᐅᐐᑎᑫᒫᑲᓂᓂ, ᐊᓅᒋᑯ ᐊᐎᔭ ᑳᔑ ᐱᔑᒀᑎᓯᒡ, ᑭᒨᑎᐎᓐ, ᑮᐗᓂᒧᐎᓐ, ᒪᒋᑕᔑᒥᐌᐎᓐ᙮ 20ᒦᐗᓐ ᐃᑕᔥ ᐃᓂ ᑳᐅᒋ ᐃᓇᑭᒥᓐᒡ ᐊᐎᔭ ᐁᑌᐊᐲᑌᓂᒥᑯᓯᒃ ᑭᔐᒪᓂᑑᓐ᙮ ᐊᐊ ᑕᔥ ᐐᓐ ᑳᑭᓰᓂᒌᓯᒃ ᒋᑆ ᐐᓯᓂᒡ, ᑳᐐᓐ ᐃᐃᒫ ᐃᐃ ᐃᓇᑫ ᑕᐅᒋ ᐃᓇᑭᒫᓰ, ᑮᐃᑭᑐ᙮

ᑳᑮᐃᔑ ᒪᔥᑲᐎ ᑌᐺᔦᓂᒥᑯᒡ ᐃᑴᐗᓐ

(Mark 7.24-30)

21ᒋᓴᔅ ᑕᔥ ᑮᐊᓂᐅᒋ ᒫᒑ ᐌᑎ ᐁᑮᐃᔖᒡ ᐊᑮᕽ ᑕᔭᕒ Tyre ᔑᑾ ᓵᐃᑕᓐ Sidon ᑳᑮᐃᔑ ᐊᔮᓂᑭᓐ᙮ 22ᐊᐊ ᑕᔥ ᐃᑴ ᐃᐃᒫ ᑫᓇᓐ Canaan ᐊᑮᕽ ᑳᑮᐅᒌᒡ, ᑳᑮ ᒎᐎᐎᓯᒃ ᐃᐃᒫ ᑳᐃᔑᑖᒡ ᐊᑮᕽ, ᐅᑮ ᐱᓈᓯᑲᐙᓐ ᒋᓴᓲᓐ ᐁᑮ ᑭᔒᐌᒡ: ᑮᓐ ᑌᐱᑎᕽ David ᑳᐅᑕᑳᓀᓯᔭᓐ!#15.22 ᑌᐱᑎᕽ ᑳᐅᑕᑳᓀᓯᔭᓐ: ᐙᐸᑕᓐ 9.27᙮ ᑯᐹᓯᓇᐎᔑᓐ! ᓂᑖᓂᔅ ᐅᔕ ᐅᑭᑭᔥᑳᑯᓐ ᒪᒋᐊᒑᑾᓐ, ᒫᐗᒡ ᐃᑯ ᐁᑭᒋ ᒫᔑ ᐊᔮᒡ, ᐁᑮᐃᓈᒡ᙮

23ᒋᓴᔅ ᑕᔥ ᑳᐐᓐ ᐅᑮᓇᑴᑕᐙᓰᓐ᙮ ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮᐃᑰᐞ: ᐃᑯᒋ ᐃᔑᓂᔕᐅ ᐊᐊ ᐃᑴ! ᑭᓂᐹᒋ ᓂᔕᐅᑯᓈᓐ, ᐅᐲᑭᓯ ᑲᔦ, ᐁᑮᐃᑯᒡ᙮

24ᒋᓴᔅ ᑕᔥ ᑮᐃᑭᑐ: ᐃᑭ ᐅᔕ ᑳᐱᒫᑎᓯᐙᒡ ᐃᐃᒫ ᐃᔅᕒᐃᔭᓬᐃᑳᕽ Israel, ᑳᐗᓂᔑᓄᐙᒡ ᒫᓇᒑᓂᔕᒃ, ᑳᑮᐅᒋ ᐲᒋᓂᔕᐅᑰᔮᓐ᙮

25ᐅᐅ ᑕᔥ ᐊᐲ ᐊᐊ ᐃᑴ ᐅᑮ ᐱᓈᓯᑲᐙᓐ ᐁᑮᐅᒋᒌᑾᓇᐲᑕᐙᒡ, ᐁᑮᐃᑭᑐᒡ: ᑕᑲ ᓈᑕᒪᐎᔑᓐ᙮

26ᒋᓴᔅ ᑕᔥ ᑮᐃᑭᑐ: ᐃᑭ ᓴ ᐊᐱᓅᒌᔕᒃ ᐅᒦᒋᒥᒥᐙ ᑳᐐᓐ ᑖᒥᓄᓈᑾᓯᓅᓐ ᒋᐅᑖᐱᓇᒪᐎᑣᐸᓐ ᒋᐊᐸᑭᑕᒪᐎᑣᐸᓐ ᐃᑭ ᐊᓂᒧᔕᒃ᙮#15.26 ᐊᓂᒧᔕᒃ: ᐃᐃ ᓴ ᐊᐲ ᐊᓂᒧᔑᕽ ᒎᐗᒃ ᐅᑮᐃᔑᓂᑳᓈᐙᐞ ᑳᑮ ᒎᐎᐎᓯᓂᒃ᙮ ᑳᐐᓐ ᐅᑮ ᑌᐊᐲᑌᓂᒫᓯᐙᐙᐞ, ᐅᓵᒻ ᐋᓂᔥ ᑳᐐᓐ ᑮᐅᒋ ᑎᐯᑖᑯᓯᓰᐗᐞ ᐐᓇᐙ ᐐᓐ ᑭᔐᒪᓂᑑᓐ ᐁᑮᐅᒋ ᑎᐯᑖᑯᓯᐙᒡ᙮

27ᐃᑴ ᑕᔥ ᑮᐃᑭᑐ: ᑌᐺ ᐃᐃ ᑳᐃᑭᑐᔭᓐ, ᔖᑰᒡ ᐃᑕᔥ ᐊᓂᒧᔕᒃ ᐅᒦᒋᓈᐙᓐ ᐃᓂ ᐃᔥᑾᒋᑲᓇᓐ ᐐᓯᓂᐎᓈᑎᑯᕽ ᑳᐅᒋ ᐸᑭᓯᓂᓂᑭᓐ ᑮᐐᓯᓂᓂᒡ ᐃᐃ ᑳᑎᐯᓂᒥᑯᐙᒡ᙮

28ᒋᓴᔅ ᐅᑮᐃᓈᓐ: ᐋᐱᒋ ᑭᒪᔥᑲᐎᑌᐺᔦᑕᒻ! ᒦᓴ ᑫᑑᑖᑰᔭᓐ ᑳᔑ ᒥᓴᐌᑕᒪᓐ, ᐅᑮᐃᓈᓐ᙮ ᒦᑕᔥ ᐊᐲ ᑳᑮᒥᓄᐊᔮᓂᒡ ᐃᓂ ᐅᑖᓂᓴᓐ ᐊᐊ ᐃᑴ᙮

ᒋᓴᔅ ᐁᑮᒥᓄᐊᔮᐋᒡ ᐋᓃᓂᑯ ᑳᐃᓈᐱᓀᓂᒡ

29ᒋᓴᔅ ᑕᔥ ᑮᐊᓂᐅᒋ ᒫᒑ᙮ ᐌᑎ ᑕᔥ ᓵᑲᐃᑲᓃᕽ ᑳᓬᐊᓬᐄᕽ Galilee ᑮᐊᓂ ᐃᔑ ᐱᒫᔕᑳᒣ᙮ ᑮᐊᒀᒪᒋᐌ ᑕᔥ ᐁᑮᐅᓇᐱᒡ᙮ 30ᑮᐹᑏᓄᐗᐞ ᐃᑕᔥ ᑳᑮ ᐱᓈᓯᑳᑯᒡ, ᐁᑮ ᐲᓈᓂᒡ ᑳᒫᑭᔥᑳᓂᒡ, ᑳᐙᐱᓯᓂᒃ, ᑳᒫᑭᓯᓂᒡ, ᑳᑮ ᑭᑐᓯᓂᒃ, ᑯᑕᒃ ᑲᔦ ᐅᑖᑯᓰᐞ, ᐁᑮᐃᔑ ᐸᑭᑎᓂᒥᓐᒡ ᐃᐃᒫ ᐁᔑ ᓯᑌᐱᒡ᙮ ᒦᑕᔥ ᑳᐃᔑ ᒥᓄᐊᔮᐋᒡ᙮ 31ᐅᑯ ᑕᔥ ᑳᑮᒫᒪᐎ ᐊᔮᐙᒡ ᐐᑫ ᑮᑭᒋ ᒫᒪᑳᑌᑕᒨᒃ ᐊᐲ ᐁᐙᐸᒫᐙᒡ ᑳᑮ ᑭᑐᓯᓂᒃ ᐁᑮᑭᑐᓂᒡ, ᑳᒫᑭᓯᓂᒡ ᑲᔦ ᐁᒥᓄᐊᔮᓂᒡ, ᑳᐱᒧᓭᓯᓂᒃ ᑲᔦ ᐁᐱᒧᓭᓂᒡ, ᑳᐙᐱᓯᓂᒃ ᑲᔦ ᐁᐙᐱᓂᒡ, ᐁᓇᓈᑯᒫᐙᒡ ᐃᓂ ᐃᔅᕒᐃᔭᓬᐊᒃ Israel ᐅᑭᔐᒪᓂᑑᒥᐙᓐ᙮

ᒋᓴᔅ ᐅᑕᔕᒫᐞ ᓃᐎᕽ ᒥᑖᔂᒃ

(Mark 8.1-10)

32ᒋᓴᔅ ᑕᔥ ᐅᑮ ᑲᓅᓈᐞ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐋᐱᒋ ᓴ ᓂᑯᐹᑌᓂᒫᒃ ᐅᑯ ᑳᐹᑏᓄᐙᒡ, ᐋᓃᔥ ᐋᔕ ᓂᓱᑮᔑᒃ ᓂᐱᒥ ᐐᒌᐎᑰᒃ, ᑫᑰᓂᓂ ᑕᔥ ᐁᐊᔮᓯᒀ ᑫᒦᒋᐙᒡ᙮ ᑳᐐᓐ ᑲᔦ ᓂᑎᓀᑕᓰ ᒋᑮᐌ ᓂᔕᐗᒀ ᐊᑲᐌ ᐐᓯᓂᓯᒀ᙮ ᑕᓅᑌᑆᓇᐎᒋᑫᐗᒃ᙮

33ᑭᑭᓄᐊᒪᐙᑲᓇᒃ ᑕᔥ ᑮᐃᑭᑐᐗᒃ: ᐱᑾᑕᑲᒥᒃ ᐃᑕᔥ ᐁᐊᔮᔭᕽ, ᐋᑎ ᑕᔥ ᐃᓈ ᑫᐅᑎᓇᒪᑭᐸᓐ ᒦᒋᒻ ᒋᐊᔕᒥᑣᐸᓐ ᐅᑯ ᑳᐹᑏᓄᐙᒡ?

34ᒋᓴᔅ ᑮᐃᑭᑐ: ᐋᓃᒥᓂᒃ ᐸᑴᔑᑲᓐ ᐁᔮᐌᒃ?

ᐅᑮᐃᓈᐙᓐ ᑕᔥ: ᓃᔣᓱ 7 ᐸᑴᔑᑲᓂᑳᓇᒃ ᐸᑮ ᑲᔦ ᑮᑰᔦᓴᒃ᙮ 35ᒋᓴᔅ ᑕᔥ ᐅᑮ ᑲᓅᓈᐞ ᑲᑭᓇ ᒋᓇᒪᑕᐱᓂᒡ ᐃᐃᒫ ᒥᑕᑲᒥᒃ᙮ 36ᐅᑮᐅᑖᐱᓈᐞ ᐃᑕᔥ ᐃᐃ ᓃᔣᓱ 7 ᐸᑴᔑᑲᓀᓯᑳᓇᐞ, ᐃᐃ ᑲᔦ ᑮᑰᔦᓴᐞ, ᐁᑮᓇᓈᑯᒫᒡ ᑭᔐᒪᓂᑑᓐ᙮ ᒦᑕᔥ ᑳᐃᔑ ᐸᐸᑴᐱᓈᒡ ᐁᑮᒫᒦᓈᒡ ᐃᐃ ᐅᑭᑭᓄᐊᒪᐙᑲᓇᐞ᙮ ᐅᑯ ᑕᔥ ᑭᑭᓄᐊᒪᐙᑲᓇᒃ ᐅᑮᐊᔕᒫᐙᐞ ᐃᐃᒫ ᑳᑮᐊᔮᓂᒡ᙮ 37ᑲᑭᓇ ᑕᔥ ᑮᑌᐐᓯᓂᐗᒃ᙮ ᑭᑭᓄᐊᒪᐙᑲᓇᒃ ᑕᔥ ᐅᑮᐅᑖᐱᓈᓈᐙ ᓃᔣᓱ ᒪᔥᑯᓰᒪᑲᒃ ᑳᑮᐃᔥᑯᓭᓂᒃ ᒦᒋᒥᓂ᙮ 38ᓃᐎᕽ ᒥᑖᔂᒃ 4,000 ᑕᔥ ᑮᑕᔑᐗᒃ ᐃᑭ ᐃᓂᓂᐗᒃ ᑳᑮᐊᔕᒥᑣ, ᑳᐐᓐ ᑕᔥ ᐐᓐ ᐁᑕᑾᑭᒥᑣ ᐃᑭ ᐃᑴᐗᒃ, ᐃᑭ ᑲᔦ ᐊᐱᓅᒌᔕᒃ᙮ 39ᒦᑕᔥ ᒋᓴᔅ ᑳᐃᔑ ᑮᐌᓂᔕᐙᒡ ᐃᐃ ᑳᐹᑏᓄᓂᒡ, ᒌᒫᓂᕽ ᐃᑕᔥ ᑮᐴᓯ, ᐌᑎ ᓴ ᐁᑮᐃᔖᒡ ᐊᑮᕽ ᒫᑲᑕᓂᕽ Magadan᙮

Currently Selected:

ᒫᑎᔪ 15: OJBS

Highlight

Copy