Lomu 15

1Lokiya vaita lagesamo afita fatago nehuna vayaʼmogitamo lagaitiekeʼmo lagesamo afiteta lahauʼnisiya kavaʼmo osuta lokiya oʼvaiʼnaya vayaʼmogimo afiʼa ha leʼa noʼafiya kavatefeʼmo vase vase huta hapa maesuna kavaʼmo haneʼniye. 2#Lo 14:19; 1 Ko 9:19; 1 Ko 10:24,33Lagaemo lamete lamete huta konagatimogi apamogaga aiʼa alagepa huʼa maisayafeʼmo hapa maeta alita lokiya vaita apatesuna kavaʼmo haneʼniye. 3#Sam 69:9Kalaisiʼa agaiʼa hauʼniya kavaʼmo akame osuno ataleʼniya kavafeʼmo Goti mukufi gemoʼmo hunoʼaeʼmo, Huʼa faipa huʼa kateʼnaya gemo nagaeteʼmo asagauno aiʼniye, huno huʼniye. 4#Lo 4:23-24; 1 Ko 10:11Akeyaʼvilagamo avoʼmo kae maleʼnaya gemoʼmo alino laya malesiyafeʼmo avoʼmo kae maleʼnae. Goti mukufiʼmo huʼniya gemoʼa laha maesigeta oʼataleta atafauta alagi huta maiʼnisunageno laipamoʼmo falu huʼnisigeta lavayagunagu huta agava maisunafeʼmo avoʼmo kae maleʼnae. 5Gotiʼa oʼataleta atafauta alagi huta maiʼnisunagenoʼaeʼmo laipamoʼmo falu hisiya kavaʼmo aepa vekamoʼmo lapaipafiʼmo aliʼyaʼmo alisigetapa Kalaisi Yesuʼa huʼniya geleʼe kavateʼefeʼmo alagepa hutapa lapakesamo afitetapa magokepi lokaeta maiyo. 6Magoke lapaipa lapakesamo aliʼnetapa magoke lapavayafatiʼmo Ala kava netimo Yesu Kalaisi Gotiʼamo Afoʼamo agiʼaleʼmo alita asaga hutapa atesayafeʼmae.

7 # Lo 14:1 Inagi Gotiʼa ala agiʼamo alisiyafeʼmo Kalaisiʼa ago lapavaleʼniya kava hutapa lapakaemo muki konagatapimogimo apavaleyo. 8#Mt 15:24Nagaemo huʼnaeʼmo, Gotiʼa Yu vayaʼmogita laginago vayaʼaifeʼmo fikumo lapa maegauve, huno hapa paiʼniya polomasi geʼamo afole aisiyafeʼmo Kalaisiʼa Goti aliʼyaʼamo neʼalinoʼaeʼmo Yu vayaʼaitegamo uno aliʼyaʼmo aliʼniye. 9#Ap 3:25; Lo 11:30; Sam 18:49Ani kavaʼmo huno alu nofi vayaʼaifeʼmo Gotiʼa hau huno apateʼniyaʼmofeʼmo agiʼaleʼmo aliʼa asaga huʼa atesayafeʼmo uno aliʼyaʼamo aliʼniye. Goti mukufi gemoʼa ani kavatefeʼmo hunoʼaeʼmo,

Alu nofi vayaʼai folagapiʼmo maiʼneʼnaeʼmo kagikaleʼmo aliʼna asaga huʼna kateteʼna kagikalefeʼmo mono yokemo huguve,

huno huʼniye. 10#Loa 32:43Magoʼe gemo hunoʼaeʼmo,

Alu nofi vayaʼmogitapae, huno, Goti vayaʼamogiʼeʼmo magokepi lapamogaga aiyo,

huno huʼniye. 11#Sam 117:1Magoʼe gemo hunoʼaeʼmo,

Muki alu nofi vayaʼmogitapae, huno, Ala kava neʼmo agiʼaleʼmo alitapa asaga hiyo. Muki alu nofi vayaʼmogiʼe alu nofi vayaʼmogiʼeʼmo agiʼaleʼmo aliʼa asaga hiyo,

huno huʼniye. 12#Aiy 11:10; Le 5:5Aiyeyaʼa magoʼe gemo hunoʼaeʼmo,

Yesi aginago vayaʼmogimo mago yosamo heʼya aiʼa ataleʼnaya yosagana huʼa maiʼnae. Maiʼnayaʼmonanafa magoke aginagomoʼa alu nofi vayaʼaiteʼe alu nofi vayaʼaiteʼeʼmo yagaino apatesiyafeʼmo yosa atufaʼafatiʼmo ausisimo aesigeʼapaeʼmo alu nofi vayaʼmogimo agaefeʼmo apavayagunagu huʼa agava maigae,

huno huʼniye. 13Hemenimo Gotifeʼmo lapavayagunagu hutapa agava neʼmaiya kavaʼmo aepa vekamoʼmo magoʼe huno lapa maeno lapamisigetapa agaefeʼmo lapakesamo afita fatago nehutapaeʼmo magoʼe hutapa lapamogaga aisageno lapaipamoʼmo falu hugiye. Aote Aunemeʼamo himamuʼaletiʼmo magoʼe hutapa lapavayagunagu hutapa agava maisayafeʼmae.

Poloʼa aliʼyaʼamo aliʼniya kavafeʼmo huʼniya gemae

14Konagaʼnimogitapae, huʼna, alagepa kavaʼe afiʼnaya geʼeʼmo lapaipa lapakesafiʼmo havai teʼniyanagetapa afaʼa alita apaya malegae, huʼna lole nagesamo oʼafiʼnofa magoke nagesamo neʼafuve. 15Nagesa neʼafuvaʼmonanafa konagaʼnimogitapae, huʼna, Gotiʼa fikumo naha maeno namiʼniyaʼmofeʼmo mago kavafeʼmo lapakesamo afitapa ho hisayafeʼmo huʼna ha leʼna avoʼmo nekaove. 16#Lo 1:5; 12:3; 11:13; Fl 2:17Mono huʼa neʼapataya vayaʼmogimo Gotiʼmo ofalinimo neʼamiya kava huʼna alagepa faigoko geʼaletiʼmo aliʼyaʼmo neʼaliʼnaeʼmo alu nofi vayaʼmo apavaleliʼna eʼna ani ofalinimo Gotiʼmo amigesuve. Aote Aunemeʼamoʼmo apavaleno apaote apatesigeʼa alagepa ofalinieʼmo Gotiʼa amuse hisiya agufa ofalini yakana huʼa maisageʼna amiguve. 17Mani aliʼyaʼmo neʼaluvaʼmofeʼmo Goti aliʼyaʼamo neʼaluva kavatefeʼmo Kalaisi Yesuʼa naha maeʼniya kavatetiʼmo afaʼa hao ke hegauve. 18#2 Ko 3:5Kalaisiʼa lokiya vaino nateʼnigeʼna alu nofi vayaʼmogi Goti geʼamo afiteʼa akame hisayafeʼmo ge huge lokiya kavaʼmo huge nehuʼnaeʼmo aiʼna apavayu huliʼna neʼova kavafekeʼmo ava gemo huʼna lapa paiguve. 19Nagaemo Goti Aunemeʼamo himamuʼaletiʼmo noʼagaya agufa lokiya naune kavaʼmo huteʼnaeʼmo aliʼyaʼamo aliʼnove. Nagaemo Kalaisifeʼmo alagepa faigoko geʼamo aeʼna hakalo huʼna hapa pailiʼna uʼneʼna huliʼna Yulusalemu haopalegatiʼmo eʼna muki Ililikamu kotega haopalegamo uʼna hapa paiʼna hano huʼnove. 20#2 Ko 10:15-16Nagaemo muki afinaʼmo Kalaisifeʼmo alagepa faigoko geʼamo aeʼa hakalo huʼa hapa opaiʼnaya vayaʼaitegaʼeʼmo uʼna aeʼna hakalo huʼna hapa paisuvafeʼmo nayamukiki huʼnove. Mago vayaʼmogi noʼmo faiʼa ateʼnisaya yateʼmo no kisuvafeʼmo oʼnahauʼniye. 21#Aiy 52:15Ani kavatefeʼmo Gotiʼa avoʼmo kae maleʼniya gemoʼa hunoʼaeʼmo,

Ava gemo oʼafiʼnaya vayaʼmogi agegae. Oʼafiʼnaya vayaʼmogi afiʼa aeto hugae,

huno huʼniye.

Poloʼa Lomu taonifiʼmo ugesuve, huno huʼniya gemae

22 # Aiy 52:15 Alu afinaʼae alu afinaʼaeʼmo lapakaetegamo ugefeʼmo nehuvaʼmonanafa oʼafiʼnaya vayaʼaitegaʼe vayaʼaitegaʼeʼmo uʼneʼna huʼna aeʼna hakalo huʼna hapa nepauvaʼmofeʼmo visuva kaʼnimo alagi ohaneʼniye. 23-24#1 Ko 16:6Ohaneʼniyaʼmonanafa hemenimo manileʼmo aeʼna hakalo huʼna hapa paisuva koʼmo ohaneʼnigeʼnaeʼmo muki kafugaʼaeʼmo uʼna lapakesuvafeʼmo nehuvaʼmofeʼmo Sipeni kotega visuva afinaʼmo uʼna lapakegauve. Uʼnaeʼmo hogoteʼna lapakaeʼeʼmo mago afinaʼmo maiʼneʼna namogaga aiguve. Amuse hutapa natetesageʼnaeʼmo Sipeni kotegamo uguve, huʼna nagesamo afiteʼna navayagunagu nehuve. 25#Ap 19:21Hemenimo Yulusalemu taonifiʼmo maiʼnaya apaote vayaʼmo hapa maeʼna apamisuva ofalini monimo aliniʼna Yulusalemu taonifiʼmo visuvafeʼmo nehuve. 26#1 Ko 16:1; 2 Ko 8:1; 9:2,12; Ap 24:17Masetoniya kotega siosi vayanagi Akaiya kotega siosi vayanagi huʼa Yulusalemu taonifiʼmo maiʼnaya apaote vayaʼmo kagemi yaʼapimo ohaneʼniya vayaʼmo hapa maeʼa apamisayafeʼmo hapauʼnigeʼapaeʼmo mago ofalini monimo namiʼnae. 27#Lo 9:4; 1 Ko 9:11Yu nofi vayaʼmo oʼmaiʼnaya vayaʼmogimo hapauʼniyaʼmonanafa Yu vayaʼaina hapa maesaya anonaʼapimo haneʼniye. Yu vayaʼmogimo apauneʼapameʼmo hapa maesiya yaʼmo apamiʼnayaʼmofeʼmo Yu nofi vayaʼmo oʼmaiʼnaya vayaʼmogimo Yu vayaʼaina amega apakufale yaʼmo apamisaya agufa anonaʼapimo haneʼniye. 28Nagaemo mani muki maleʼnaya ofalini monimoʼa alagagana huno afole aiʼniya ofalini monimo aliniʼna uʼna Yu vayaʼaina apamiteʼnaeʼmo Sipeni kotega visuvategamo uʼna lapakaeʼeʼmo maiguve. 29#Lo 1:11Ago afiʼnovana uʼna avaʼyi huteʼna Kalaisifeʼmo alagepa faigoko geʼaletiʼmo magoʼe huʼna aliʼna auleʼna lapategauve. 30#2 Ko 1:11; Kl 4:3; 2 Te 3:1Konagaʼnimogitapae, huʼna, Lahapao ke hovanagi, Ala kava netimo Yesu Kalaisifeʼmo lahapau lahapayamopafiʼmo lahapauʼnigetapa Goti Aunemeʼamoʼmo lapaipafiʼmo aliʼyaʼmo aliʼnigetapa Goti mafaʼneʼaeʼmo lahapau lapayamopafiʼmo nelahapaiyaʼmofeʼmo lapayamukiki hutapa naha maeta nunumuʼmo hutapa nateyo. 31Gotiʼa Yuta kotega apakesamo afiʼa fatago osuʼnaya vayaʼai apayapatiʼmo nagufamo alino katino natesiyafeʼmo nunumuʼmo hutapa natege Yulusalemu taonifi apaote vayaʼmo hapa maesugeʼapaeʼmo amuse hisayafeʼmo nunumuʼmo hutapa natege hiyo. 32Lapakaemo nunumuʼmo hisagenoʼaeʼmo Gotiʼa hauʼnisiyana lapakaetegamo uʼna avaʼyi huteʼna lusi kava huʼna namogaga aiteʼna lapakaeʼeʼmo magokepi lokaeʼna maiʼneʼnaeʼmo naipamoʼmo falu hugiye. 33Gotiʼa alagepa huta neʼmauna yaʼmo aepa vekamoʼmo mukiʼamogitapaʼeʼmo magokepi lokaeno maino. He. Lama ge.

Currently Selected:

Lomu 15: kyg2013

Highlight

Copy