Lomu 14

Konagatapimogi yuʼilaga mafaʼneʼapieʼmo alita fako osiyo, huno huʼniya gemae

1 # Lo 15:7 Mago konagatapimogimo Goti geʼaeʼmo lokiya vaiʼa apakesamo afiʼa fatago nosisaya konagatapimogimo siosifiʼmo apavalelitapa eyo. Lapakaemo ge hapaisageʼapaeʼmo alu apakesa afisayafeʼmo apavalelita oʼmetapa fikumo apavalelitapa eyo. 2#Aep 1:29; 9:3Mago vayaʼmogimo apakesamo afiʼa fatago nehuʼapaeʼmo, muki agufa neʼyaʼmo afaʼa negaune, huʼa nehageʼapaeʼmo mago lokiya vaiʼa apakesamo afiʼa fatago nosaya vayaʼmogimo ameʼamo noʼnae. 3#Kl 2:16Muki agufa neʼyaʼmo afaʼa neʼnaya vayaʼmogimo ameʼamo noʼnaya vayaʼaifeʼmo, ina agufa vayaʼmo maiʼnae, huʼa osisaya kavaʼmo haneʼniye. Gotiʼa muki agufa neʼyaʼmo neʼnaya vayaʼmo afaʼa apavaleʼniyaʼmofeʼmo ameʼamo noʼnaya vayaʼaifeʼmo, hosu kavaʼmo nehae, huʼa osisaya kavaʼmo haneʼniye. 4#Mt 7:1; Ye 4:11-12Ina lagitapamo mago aliʼyaʼmo afoʼamofeʼmo aliʼyaʼamo neʼaliya vekaeʼmo hutapaeʼmo, hosu kavaʼmo nehiye, hutapa alita fako hutapa neʼatae. Agaemo aliʼyaʼmo afoʼamoʼmo agaiʼamo alino fako huno atetenoʼaeʼmo, he tino lokiya vaino maiʼniye, huno hisifi ago asagauno aiʼniye, huno hisifi agaiʼa yane. Gotiʼa afaʼa alino he tino ategaiyaʼmofeʼmo he tino maigiye.

5 # Ga 4:10 Mago vayaʼmogimo mago afinafeʼmo huʼapaeʼmo, aote afinaʼmo haneʼniye, huʼa apakesamo neʼafigeʼapaeʼmo mago alu vayaʼmogimo huʼapaeʼmo, muki afinaʼmo magoke agufa afinakeʼmo haneʼniye, huʼa apakesamo neʼafiye. Muki vayaʼmogimo huʼapaeʼmo, aote afinaʼmo haneʼniye, huʼa nehafi magoke agufa afinaʼmo haneʼniye, huʼa nehasafigeʼa apakaiʼapimo apamete apamete huʼa lole apakesa oʼafiʼa magoke apakesamo afisaya kavaʼmo haneʼniye. 6Mago vayaʼmogi Ala kava nefeʼmo apakesamo afiteʼapaeʼmo, aote afinaʼmo haneʼniye, huʼa nehae. Ameʼamo neʼnaya vayaʼmogi Ala kava nefeʼmo apakesamo afiteʼa nesayafeʼmo Gotifekeʼmo haoke nehae. Ameʼamo noʼnaya vayaʼmogi Ala kava nefeʼmo apakesamo afiteʼapaeʼmo Gotifekeʼmo haoke nehae. 7Afaʼa maiʼnetaeʼmo lagaitilefeʼmo oʼmaiʼnone. Falisunana lagaitilefeʼmo ofaligune. 8#Lu 20:38; Ga 2:20; 1 Te 5:10Afaʼa maiʼnetaeʼmo Ala kava netefekeʼmo maiʼnone. Falisunana Ala kava netefekeʼmo faligune. Afaʼa maiʼnopi falisupi huta Ala kava neʼmo vayaʼamo maiʼnone. 9Kalaisiʼa faliʼnaya vayaʼe afaʼa maiʼnaya vayaʼmogiʼeʼmo kava vekaʼapimo maisiyafeʼmo ago faliteno he tiʼniye. 10#Mt 25:31-32; Ap 17:31; 2 Ko 5:10He tiʼniyaʼmofeʼmo konagatapimogi nehaya kavaʼmo alita fako hutapa neʼapataya vayanagi na kava higetapaeʼmo ani kavaʼmo nehae. Konagatapimogifeʼmo ina agufa vayaʼmo maiʼnae, hutapa nehaya vayanagi na kava higetapaeʼmo ani kavaʼmo nehae. Kalaisiʼa siyaʼaleʼmo fai maiʼnenoʼaeʼmo kavatimo alino fako huno latesiyafeʼmo mukiʼamogita uta haita aulagaleʼmo he tita maigune. 11#Aiy 45:23; Fl 2:10-11Goti mukufiʼmo haneʼniya geeʼmo Ala kava neʼmoʼa hunoʼaeʼmo,

Nagiʼniletiʼmo alagi lama gemo nehuve. Muki vayaʼamogi nagaetegamo eʼa apaleʼyaʼmo faiʼneʼapaeʼmo, Gotigamo alika fako huka latesana vekamo maiʼnane, huʼa aeʼa hakalo huʼa naha paigae,

huno huʼniye. 12#Ga 6:5Inagi mukiʼamogita lamete lamete huta Gotifeʼmo hutaeʼmo, ina kavaʼmo huʼnove, ma kavaʼmo huʼnove, huta ha paigune.

13Ha paigunaʼmofeʼmo konagatimogi kavaʼapimo magoʼe huta alita fako osuta atalegetao. Konagatimogi apaiyafiʼmo hapaesigeʼa hosu kavapiʼmo asagauʼa aisayafeʼmo mago kavaʼmo afaʼa osugune, huta lagesamo afigetao. 14#Ap 10:15; Ta 1:15Nagaemo Ala kava neʼmo Yesupiʼmo maiʼneʼnaeʼmo muki neʼyafeʼmo huʼnaeʼmo, hosu neʼyaʼmo ohaneʼniye, huʼna ago afiʼnove. Afiʼnovaʼmonanafa mago vayaʼmogi neʼyafeʼmo, hosu neʼyaʼmo haneʼniye, huʼa apakesamo neʼafisayana apakaiʼapilefeʼmo hosu neʼyaʼmo haneʼniye. 15#1 Ko 8:11-13Lapakaemo neʼyaʼmo neʼnaya kavatetiʼmo konagatapimogimo alita hosu hutapa neʼapatesayana lahapau lapayamopafiʼmo nolahapaiye. Fikumo yanagetapa neʼyaʼmo neʼnaya kavatetiʼmo Kalaisiʼa falino apateʼniya konagatapimogi alita hosu hutapa apategae. 16#Ta 2:5Mago vayaʼmogi, alagepa kavaʼmo nehune, huʼa nehaya kavatefeʼmo hosu kavaʼmo nehae, huʼa hisaya agufa kaʼmo lapakaemo valitapa oʼapateyo. 17Na kava higetapaene. Gotiʼa neʼyaʼe aniʼeʼmo neʼnaya kavateʼmo yagaino noʼapatefa Goti Aunemeʼamoʼmo laipafiʼmo maiʼnigeta fatago kavaʼmo nehunagenoʼaeʼmo laipamoʼmo falu huʼnisigeta lamogaga aisuna kavatekeʼmo yagaino nelate. 18Vayaʼmogimo ani kavaʼmo nehuʼa Kalaisi aliʼyaʼamo neʼalisayana Gotiʼa amuse huno neʼapategeʼa muki vayaʼmogiʼeʼmo amuse huʼa neʼapatae.

19 # Lo 12:18; 15:2 Amuse huno neʼapateyaʼmofeʼmo magoke laipa lagesamo aliʼneta alita lokiya vaita apatesuna kavaʼmo hisunafeʼmo layamukiki higetao. 20#1 Ko 8:13Lapakaemo neʼyafekeʼmo lapakesamo afitetapa vayaʼai apaipafiʼmo Goti aliʼyaʼamo alita hosu hutapa oʼateyo. Muki neʼyaʼamo alagepa huta nesuna yaʼmo haneʼniyaʼmonanafa lapakaemo mago neʼyaʼmo neʼnayaʼmofeʼmo mago vayaʼmo asagauʼa aisayana lapakaemo hosu kavaʼmo nehae. 21Lapakaemo konagatapimo asagauʼa oʼaisayafeʼmo ameʼamo oʼnege lokiya aniʼmo nofi alagafati aniʼmo oʼnege muki agufa kavaʼmo alita hosu hutapa apatesaya agufa kavaʼmo osuge nehisayana alagepa kavaʼmo nehae. 22Ani kavatefeʼmo lapakesamo afita fatago nehaya kavaʼmo alita lapaipafiʼmo malegeno Goti aulagaleʼmo haneno. Vayaʼmogi nehaya kavafeʼmo lole apakesamo oʼafiʼa, alagepa kavaʼmo nehune, huʼa apakesamo neʼafiya vayaʼmogi apamogaga neʼaiye. 23#Ta 1:15Neʼaiyaʼmonanafa lole apakesamo afiʼneʼa neʼnesaya vayaʼmogi hosu kavaʼmo nehae. Nehaya kavafeʼmo alagepa kavaʼmo nehune, huʼa nosisayana apakesamo afiʼa fatago nosayaʼmofeʼmo hosu kavaʼmo nehae. Muki kavaʼmo nehutaeʼmo, alagepa kavaʼmo nehune, huta osuta fikumo nehisunana ani agufa kavatimo hosu kavaʼmo nehune.

Currently Selected:

Lomu 14: kyg2013

Highlight

Copy