Lomu 16

Ge apamamaeʼniya gemae

1Nagaemo lasatimoʼa Fipiʼmo Senikali kotega siosi aliʼyaʼmo neʼaliya a kanomo lapakaemo ha maesayafeʼmo agiʼaleʼmo aliʼna asaga huʼna ategesuve. 2Agaemo asole vayaʼe nagaeʼeʼmo laha maeʼniyaʼmofeʼmo lapakaemo na yaʼmo ha maetapa amisaya yaʼmo haneʼnisifi afaʼa ha maetapa amiyo. Apaote vayaʼmogi nehaya agufa alagepa kavaʼmo hutapa Ala kava neʼmo agiʼalefeʼmo alita falu fala hutapa ateteta yagaitapa ateyo. 3#Ap 18:2,18,26Pilisilaʼe Akuvilaʼeʼmo Kalaisi Yesu aliʼyaʼamo nagaeʼeʼmo neʼaliʼa yalavelafeʼmo, Poloʼa ge lanamamaeʼniye, hutapa hana paita nateyo. 4Anakaemo ofaliʼna afaʼa maisuvafeʼmo faliʼana natesaʼafeʼmo alo huʼana maiʼnaʼaʼmofeʼmo nagaemo hanao ke nehogeʼanaeʼmo muki alu nofi siosi vayaʼmogiʼeʼmo hanao keʼmo nehaʼae. 5#1 Ko 16:15,19; 2 Ti 1:15Ani kavaʼmo hutapa noʼanifiʼmo aliʼa anupa huʼa neʼmaiya siosi vayaʼaifeʼmo, Poloʼa ge lapamamaeʼniye, hutapa hapa paitapa nateyo. Nahau nayamopafiʼmo nahauʼniya vekamo Epinitasiʼa hogoteno Akaiya kotega Kalisitini vekamo hamaleʼniya vekaeʼmo, Poloʼa ge kamamaeʼniye, hutapa ha paitapa nateyo. 6Maliyaʼa laha maesiyafeʼmo lusi aliʼyaʼmo aliʼniya a kanoeʼmo hutapaeʼmo, Poloʼa ge kamamaeʼniye, hutapa ha paitapa nateyo. 7Atalonikasiʼe Yuniyasiʼefeʼmo hana paitanaeʼmo, Poloʼa ge lanamamaeʼniye, hutapa hana paitapa nateyo. Nagaemo Kalaisipiʼmo oʼmaiʼnova afinaʼmo hogoteʼana Kalaisipiʼmo maiʼnaʼa vekalane. Anakaemo nagae nofi vekalaʼmo maiʼneʼana mago afinaʼmo nagaeʼeʼmo magokepi kalavusi huʼnone. Anakaemo apa vayapatiʼmo ala anaki vekalane. 8Ala kava nepiʼmo maiʼniya vekamo Apaliyetasifeʼmo nahau nayamopafiʼmo nahauʼniya vekaeʼmo, Poloʼa ge kamamaeʼniye, hutapa ha paitapa nateyo. 9Epaniʼa Kalaisi aliʼyaʼamo lagaeʼeʼmo aliʼniya vekaʼe Setekisiʼefeʼmo nahau nayamopafiʼmo nahauʼniya vekalaʼanifeʼmo, Poloʼa ge lanamamaeʼniye, hutapa hana paitapa nateyo. 10Apelisiʼa Kalaisiʼmo oʼataleno akame huʼniyaʼmofeʼmo agimo haneʼniya vekaeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. Alisitomulasi afamo anagaʼaifeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo. 11Nagae nofi vekamo Helotiyanifeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. Nasisi afamo anagaʼamogimo Ala kava nepiʼmo maiʼnaya vayaʼaifeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo. 12Talaifinaʼe Talaifasaʼeʼmo Ala kava neʼmo aliʼyaʼamo neʼaliʼa atalaʼanifeʼmo hana paitanaeʼmo, Poloʼa ge lanamamaeʼniye, hutapa hana paitapa nateyo. Pesisifeʼmo siosi vayaʼmogimo hapau apayamopafiʼmo hapauʼniya a kanomo Ala kava netefeʼmo lusi aliʼyaʼmo aliʼniya afeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. 13#Mk 15:21Lufasiʼa Ala kava nepiʼmo hogoteno maiʼniya vekaeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. Itaʼamoʼmo itaʼnimokana huno maiʼniye. 14Asikalitasiʼagi Falikoniʼagi Hemasiʼagi Patolopasiʼagi Hemesiʼagi huʼa apakaegiʼeʼmo magokepi lokaeʼa maiʼnaya konagatimogiʼefeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo. 15Filogasiʼagi Yuliyaʼagi Neliyasiʼagi Neliyasi asaʼamoʼagi Olipasiʼagi huʼa apakaegiʼeʼmo muki vayaʼmo magokepi lokaeʼa maiʼnaya apaote vayaʼaifeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo. 16#1 Ko 16:20; 1 Pi 5:14Lapaote kavaʼmo hutapaeʼmo konagatapimogimo hapaetapa netetapa ge apamamaeyo. Muki haopalegamo aliʼa anupa huʼa neʼmaiya siosi vayaʼmogiʼeʼmo ge lapamamaeʼnae.

Mago vayaʼmogimo siosimo aliʼa fako nehaya vayaʼaifeʼmo huʼniya gemae

17 # Mt 7:15; Ta 3:10 Konagaʼnimogitapae, huʼna, aliʼna he tiʼna lapatesuvafeʼmo huvanagi mago vayaʼmogi lapakaemo afiʼnaya gelefeʼmo kame huʼa ateteʼa aliʼa fako huʼa lapatege hosu kavaʼmo hisayafeʼmo lapayateʼmo alige nehaya vayaʼaifeʼmo alagepa hutapa yagaita maiʼnetapaeʼmo maitapa halove huta maiyo. 18#Fl 3:19; Kl 2:4; 2 Pi 2:3Ani agufa vayaʼmogimo Ala kava netimo Yesu Kalaisi aliʼyaʼamo noʼalifa amega apakufamoʼmo hauʼniya kavaʼmo akame nehae. Haga hapausiya agufa gemo huteʼa aigofe geʼapiletiʼmo hapao ke heʼa apametala huteʼa fikumo neʼafiya vayaʼmo apakesa nefaiye. 19#Lo 1:8; Mt 10:16; 1 Ko 14:20Muki vayaʼmogimo lapakaemo alagepa hutapa gemo afitetapa akame nehaya kavafeʼmo lapava gemo ago afiʼnayaʼmofeʼmo namogaga aiʼna nelapatove. Afiʼnayaʼmonanafa lapakaemo alagepa kavaʼmo hisayafeʼmo afiʼnaya lapaipa lapakesamo alisayafekeʼmo nahauʼniyaʼmonanafa hosu kavaʼmo osisayafeʼmo oʼafiʼnaya vayakana hutapa maisayafeʼmo nahauʼniye. 20#Lo 15:33; Aep 3:15Gotiʼa alagepa huta neʼmauna kavaʼmo aepa vekamoʼmo malage huno Sataniʼmo lapaiya afeʼalumelagamo alino aeno latapaigiye. Ala kava netimo Yesu Kalaisiʼa fikumo lapa maeno lapamino. He, Lama ge.

21 # Ap 16:1-2; 19:22; 20:4 Timotiʼa nagaeʼeʼmo lokaetaʼa aliʼyaʼmo neʼaluʼa vekaʼe nagae nofi vayaʼmo Lusiyasiʼagi Yesoniʼagi Sosipataʼagi huʼa ge lapamamaeʼnae. 22Nagaemo Tetiyusiʼnamo mani gemo Polo avayafatiʼmo aliʼna avoʼmo kaeʼnaeʼmo Ala kava nepiʼmo maiʼneʼnaeʼmo ge lapamamaeʼnove. 23#1 Ko 1:14Gaiyasiʼa Poloʼnaleʼmo alagepa huno yagaino nateʼniya vekaʼe noʼafiʼmo aliʼa anupa huʼa maiʼnaya siosi vayaʼmogiʼeʼmo ge lapamamaeʼnae. Elasatasiʼa taonifi monileʼmo neʼyagaiya vekaʼe Kuvotasiʼa konagatimoʼeʼmo ge lapamamaeʼnaʼae. 24Ala kava netimo Yesu Kalaisiʼa mukiʼamogitapamo fikumo lahapa maeno lapamino. He, lama ge.

Goti agiʼaleʼmo alino asaga huno ateʼniya gemae

25 # Ef 1:9; 3:5,9; Kl 1:26; Lo 1:5 Gotiʼa nagaemo aeʼna hakalo nehuva alagepa faigoko geʼaletiʼe Yesu Kalaisifeʼmo ava gemo aeʼa hakalo nehaya geʼaletiʼeʼmo afaʼa alino lokiya vaino lapategaiye. Ma mopamo alo huʼniya afinatetiʼmo ani gemo fala kino haneme haneme eʼniyaʼmonanafa 26hemenimo Gotitegati gemo alini eʼa aeʼa hakalo huʼa hapa nepaiya vayaʼmogimo avoʼmo kae maleʼnaya gemo alagepa faigoko geʼamo ha le yategamo ago afole aiʼniye. Maige maige huno neʼmaiya Gotiʼa, alita aeta hakalo hiyo, huno huʼnigeʼa muki nofi vayaʼmogi apakesamo afiʼa fatago hisaya gemo akame hisayafeʼmo aeʼa hakalo huʼa hapa paiʼnae. 27#1 Ti 1:17; Yu 25Agaemo magoke Gotiʼa agaiʼageʼmo muki yaʼamo ageno aeto huʼniya vekamo agiʼaleʼmo Yesu Kalaisitetiʼmo aliʼa asaga hume hume uʼa aliʼa asaga huʼa hano osuʼa aliʼa asaga hiyo. He, lama ge.

Currently Selected:

Lomu 16: kyg2013

Highlight

Copy