Omataiya 1
1
Gotiʼa Inomi vayaʼmo kayoʼmo apamisiya kavafeʼmo huʼniya gemae
1 #
Sam 137:7; Iyi 25:12-14; Mal 1:3-4; Yel 49:14-15 Ala kava neʼmo Gotiʼa mani gemo Omanaiyafeʼmo ha paiʼnigeno alagamuna agegekana huno ageʼniye. Mani gemo Gotiʼa Inomi vayaʼmogi alu apakiʼapimo Iso kotega vayaʼaitegamo hisiya kavafeʼmo ava gemo haneʼniye. Ala kava neʼmoʼa apa vekaʼamo alino ateʼnigeno alu nofi vaya alu nofi vayaʼaitegamo uʼnigeta lagaemo ani gemo ago afiʼnone. Agaemo ina gemo hunoʼaeʼmo, Lagaemo Inomi vayaʼeʼmo kamemo hugunanagi alo huta vigetao, huno hapa paiʼniye. 2#Aiy 23:9; Iyi 29:15; Lu 1:51-52Ala kava neʼmoʼa Inomi vayaʼaifeʼmo hapa painoʼaeʼmo, Afiyo, huno, Nagaemo lokiyatapimo aliʼna afepiʼmo atesugetapaeʼmo aise vayaʼmo maigae. Muki vayaʼmogimo apakameʼyamo lapamiteʼapaeʼmo, apakaemo ina agufa vayane, huʼa hugae. 3#Mai 16:18; Yel 49:16; Le 18:7-8Lapakaemo himuʼnamu kavaʼmo hutetapa lapakufamo avalelita haiʼnaya kavatapimoʼmo humi lapateʼniye. Lapakaemo alopa taonitapileʼmo lokiya yafa kegiʼyamoʼmo faino vego huno lapateʼnigetapa anaga ave koteʼmo maiʼnetapa alopa yafa kapiʼmo fala kiʼnayaʼmofeʼmo lapakaemo lapaipafiʼmo hutapaeʼmo, Ina lagimo eʼa hai eʼa lavaleliʼuʼa lamiʼa aliʼa afepiʼmo lategae, hutapa nehae. 4#Yop 20:6-8; Aiy 14:12-15Lapakaemo muga anafilagamo hakikimogimo haleliʼa uʼa nehaiya agufa kava hutapa muga anafilagamo kanefiʼmogi folagapiʼmo noʼmo ki malegayaʼmonanafa nagaemo alagi heʼna lapavayu huliʼna emiʼnegauve. Ala kava neʼmo Gotiʼnamo mani gemo huʼnove. 5#Yel 49:9-10; Aiy 17:6Haniʼilagamo kumaya vayaʼmo lapakaetegamo eʼnaesinana hapauʼniya yaʼageʼmo aliteʼapaeʼmo haine, huteʼa mago yaʼamo afaʼa ataleʼnaesine. Vayaʼmogimo nofi alagamo lagiʼa aliʼa anupa huteʼapaeʼmo magoʼamo afaʼa neʼatae. He, afaʼa neʼatayaʼmonanafa kame vayatapimogimo eʼa lapakaemo mukiʼamo lahapaeʼa hano huʼa lapatalegae. 6#Aiy 10:13-14; Mt 6:19-20Iso nofi vayaʼmogitapae, huʼna, Kame vayatapimogi eʼa fala kino haneʼniya yaʼmo hogote yaʼmo alopa moniletiʼmo miya nefaiya agufa yatapimo muki yapilagamo kahauya huʼa ageʼa aliteʼa aliniʼa ugae. 7#Sam 55:12-13; Sam 41:9Lapa maeʼnaya vayaʼmogimo kamemo lahapaeteʼa mopatapiletiʼmo lapafaiʼa lapatalegae. Lapakaeʼeʼmo alagepa huʼa magokepiʼmo lokaeʼa maiʼnaya vayaʼmogimo humi lapateteʼa lapakaeʼeʼmo kamemo huʼa aeʼa lapakasegae. Lapakaeʼeʼmo magokepiʼmo neʼyaʼmo neʼnaya lapao vayaʼmogimo lapatafausiyafeʼmo umenimo malegae. Hugayaʼmonanafa lapakaemo muki ani afole aisiya kavaʼmo oʼageʼnae. 8#Yop 5:12-14; Aiy 29:14; Yel 49:7; 1 Ko 3:19-21Ala kava neʼmoʼa hunoʼaeʼmo, Ani afinaʼmo nagaemo Inomi vayapatiʼmo afiteʼa ageʼnaya vayatapimo aliʼna hano huʼna apataleteʼna muki lapakaemo afitetapa ageʼnaya kavatapimo aliʼna atalegauve. 9#Yel 49:22; Aiy 63:1-3O Timani vayaʼmogitapae, huʼna, lokiya vaiʼa kame nehaya vayatapimogimo lusi kava huʼa koli hugae. Muki Iso aveleʼmo maiʼnaya vayaʼmogi kamitimo hapaesageʼa faligae. 10#Iyi 25:12; 35:1-5,11-15; Yel 49:17-20Lapakaemo konagatapimo Yekopu nofi vayaʼmogi yaʼmo kumayaʼmo alitetapa kamitimo apamagiʼnayaʼmofeʼmo nagaemo aliʼna hano huʼna lapatalesugeʼa muki afinaʼmo lapakitapileʼmo aliʼa afepiʼmo atege atege huʼa maigae. 11#2 Kin 24:14; Yol 3:3; Sam 137:7Oʼapakeʼnaya vayaʼmogimo eʼa Isaleli vayaʼmo kalavusi huʼa apateteʼa apavaleliʼa uʼnaya afinaʼmo lapakaemo alagi osisaya agufa kavaʼmo hutapa afaʼageʼmo maitetapa hapa oʼmaeʼnae. Alu nofi vayaʼmogi Yulusalemu taonile kegiʼyafatiʼmo uʼa haiʼa muki yaʼmo aliʼa apakaiʼapifikeʼmo fako huʼnaya afinaʼmo afaʼa maiʼnetapaeʼmo hapa oʼmaetapa ani alu nofi vayakana hutapageʼmo maiʼnae. 12#Mai 17:5; Iyi 35:10; Ye 3:5; Yu 16Apakaemo konagatapimo kalavusi huʼa apateʼnaya afinaʼmo lapakaemo alagi osisaya agufa kavaʼmo hutapa afaʼa maiʼnageno ani kavafeʼmo lapaipamoʼmo kanale huʼniye. Aliʼa hano huʼa apataleʼnaya afinaʼmo magoʼe hutapa alagi osisaya agufa kavaʼmo hutapa lapamogaga aiʼnae. Lusi kana yaʼmo aliʼnaya afinaʼmo magoʼe hutapa alagi osisaya agufa kavaʼmo hutapa kigi yokalo gegeʼmo huʼnae. 13#Sam 22:17; Sak 1:15Lapakaemo magoʼe hutapa alagi osisaya agufa kavaʼmo hutapa vayaʼnimogimo lusi hanageke yaʼmo aliʼnaya afinaʼmo taoniʼapifiʼmo uta haiʼnae. Magoʼe hutapa alagi osisaya agufa kavaʼmo hutapa hanageke yaʼmo aliʼnaya kavafeʼmo lapamogaga aitetapa kagemiyaʼapimo aliʼnae. 14#Emo 1:6,9Lapakaemo magoʼe hutapa alagi osisaya agufa kavaʼmo hutapa kataguneteʼmo he titapa maiʼnetapaeʼmo Yuta vayaʼmo apaune nehagetapaeʼmo apatafautapa kame vayaʼapimogi apayapiʼmo apamiʼnae. 15#Yel 25:15-21; Aiy 33:1; Yag 1:6; Ham 2:8; Mt 7:22Ala kava neʼmoʼna afinaʼmo ago eno hogo huʼniye. Ani afinaʼmo muki nofi vayaʼmo agoti huʼna apategauve. Inomi vayaʼmogitapae, huʼna, Lapakaemo apakaetegamo hosu kavaʼmo huʼnaya agufa kavaʼmo huʼa lapakaetegamo hosu kavaʼmo hugae. Hosu kavaʼmo huʼnaya anonatapilefeʼmo hosu kavaʼmo hugae. 16#Sam 11:6; 75:8; Aiy 51:21-23; 1 Pi 4:17Vayaʼnimogimo nagaiʼni naote aveleʼmo lapamiʼnova hanageke yaʼmo atu neheya aniʼmo neʼnaya agufa kavaʼmo huʼa muki nofi vayaʼmogimo muki afinaʼaeʼmo nayapatiʼmo atu neheya aniʼmo nege nege huʼa maigae. Apakaemo ani kapufiʼmo haneʼniya aniʼmo alagi neʼa hano hugae. Neʼa hano huteʼapaeʼmo alagi oʼmaigae.
Isaleli vayaʼmogimo kamemo huʼa aeʼa apaka sesaya kavafeʼmo huʼniya gemae
17 #
Aiy 4:3; 60:21; Lo 6:22; Aiy 14:1-2 Oʼmaigayaʼmonanafa Saiyoni avefiʼmo maiʼnaya vayaʼnimogimo faiʼa kasalo paegae. Yekopu nofi vayaʼmogi aote fatago kavaʼmo huteʼa apakaiʼapi yaʼmo aligae. 18#Mka 5:8; Sak 12:6; Emo 5:15Yekopu nofi vayaʼmogimo atagana huʼa maige Yosefe nofi vayaʼmogimo ata vaikana huʼa maige Iso nofi vayaʼmogimo vaiʼniya hiʼyagofagana huʼa maige hugae. Maiʼneʼapaeʼmo Yekopu nofi vayaʼmogiʼe Yosefe nofi vayaʼmogiʼeʼmo atamoʼmo neleya agufa kavaʼmo huʼa Iso nofi vayaʼmo aliʼa hano huʼa apatalegae. Iso nofi vayapatiʼmo magoke vekamo afaʼa oʼmaigiye. Ala kava neʼmoʼa ani gemo huʼniyaʼmofeʼmae. 19#Sef 2:7Yuta vayaʼmo lamaga haopalegamo maiʼnaya vayaʼmogimo Iso avemo aligae. Yegemo uno lamino nefaleya haopalega aise aveleʼmo maiʼnaya Yuta vayaʼmogimo Filisitiya vayaʼmogi mopamo aligae. Apakaemo Ifalemi vayaʼmogi mopaʼe Sameliya vayaʼmogi mopaʼeʼmo alisageʼa Menisameni nofi vayaʼmogimo yegemo haine neʼeya haopalega Giliyati koʼmo aligae. 20#Iyi 25:14; Yel 32:44Mago hoga haopalegamo maiʼnaya Isaleli vayaʼmo alu kotegamo kalavusi huʼnayanageʼa halate eʼa Kenani nofi vayaʼmogi mopaleʼmo haneʼniya Selefati taoniʼeʼmo aligae. Yulusalemu vayaʼmo Sefalati taonifiʼmo kalavusi huʼa apateʼnaya vayaʼmogimo eʼa lamaga haopalegamo haneʼniya taonimo aligae. 21#Yag 3:9,15; Aiy 30:18-20; Ye 5:20; Le 11:15Mago vayaʼmogi vayaʼnimo apakufamo aliʼa katiʼa neʼapataya vayaʼmogimo Saiyoni aveleʼmo eʼa Iso vayaʼeʼmo kame huteʼapaeʼmo koʼapimo aliteʼa apakaeteʼmo yagaiʼa apategae. Ani afinaʼmo Ala kava neʼmoʼa agaiʼamo kini vekamo maiʼniyanageno muki vayaʼaiteʼmo yagaino apategaiye.
Currently Selected:
Omataiya 1: kyg2013
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
