Matiyu 27

Yutasiʼa aneʼmumo aeʼniya gemae

(Mk 15:1; Lu 23:1-2; Yo 18:28-32)

1Kotilamiyapiʼmo mono huʼa neʼapataya vayaʼaiteʼmo yagaiʼa neʼapataya vayaʼe Yu vayaʼmogi vayatama vayaʼapiʼeʼmo aliʼa anupa huʼa maiʼneʼapaeʼmo amagigeno falino, huʼa hapa paiʼnae. 2Nofitetiʼmo ayatalateʼmo kiʼa ateteʼa avaleli uʼa gamani vekamo yagaino neʼapateya vekamo Pailati ayapiʼmo ateʼnae. 3#Mt 26:14-15Yutasiʼa kutulu yaʼmo aliʼniya vekamoʼmo afiʼniyana Yesufeʼmo huʼapaeʼmo, faligiye, huʼa huʼnageno afitenoʼaeʼmo aipamo alino afe leteno tetiʼa siluva laga monimo mono huʼa neʼapataya vayaʼaiteʼmo yagaiʼa neʼapataya vayaʼaitegaʼe vayatama vayaʼaitegaʼeʼmo alininunoʼaeʼmo, 4alagepa vekamo kutulu yaʼmo aliʼnovaʼmofeʼmo hosu kavaʼmo huʼnove, huno hapa paiʼnigeʼapaeʼmo, lagae yaʼmo ohaneʼnifa kagaika yaʼmo haneʼniye, huʼa ha paiʼnae. 5Ha paiʼnagenoʼaeʼmo ataleno uno alopa mono nopiʼmo tetiʼa siluva laga monimo yaga auno aino atagu faeno ataleteno atalenuno aneʼmumo aeʼniye. 6Mono huʼa neʼapataya vayaʼaiteʼmo yagaiʼa neʼapataya vayaʼmogimo uʼa ani laga monimo aliteʼapaeʼmo, ani monimo kola monimo haneʼniyaʼmofeʼmo alita ofalini monifiʼmo malesunana keʼaepa gemo amagita atalegaune, huʼa huʼnae. 7Huʼa huteʼa alini uʼa mago mopaletiʼmo samomo alo nehiya vekamo mopamo alu kote vayaʼmo eʼa maiʼneʼa falisaya vayaʼmo alini uʼa kiʼa apatesaya mopamo miya faiʼnae. 8Ani kava huʼnayaʼmofeʼmo ani mopamo agiʼamo Kolakayagae huʼa agi aeme aeme eʼa hemeniʼeʼmo ani agimo neʼae. 9#Sak 11:12-13Ani kavaʼmo huʼnagenoʼaeʼmo Gotitegati gemo alinineno aeno hakalo huno hapa nepaiya vekamo agiʼamo Yelemaiyaʼa huʼniya gemo afole aiʼniye. Yelemaiyaʼa hunoʼaeʼmo, Apakaemo tetiʼa siluva laga monimo Isaleli vayaʼmogi apakesa afiʼa hu maleʼnaya monimo ani vekamo miya faisaya monimo aliʼnae. 10Aliteʼa uʼa Ala kava neʼmoʼa huvo huno naha paiʼniya gemo akame huʼa mopaletiʼmo samomo alo nehiya vekamo mopamo miya faiʼnae, huno avoʼmo kae maleʼniye.

Yesuʼa Pailati aulagaleʼmo he tino maiʼniya gemae

(Mk 15:2-5; Lu 23:3-5; Yo 18:33-38)

11Yesuʼa yagaino neʼapateya gamani vekamo aulagaleʼmo he tino maiʼnigenoʼaeʼmo, Yu vayaʼmogi kini vekaʼapimo maiʼnapiye, huno ge huno afi geʼnigenoʼaeʼmo, he ani gemo ago alagi nehane, huno ha paiʼniye. 12#Aiy 53:7; Mt 26:63Mono huʼa neʼapataya vayaʼaiteʼmo yagaiʼa neʼapataya vayaʼe vayatama vayaʼmogiʼeʼmo huʼapaeʼmo, ani hosu kavaʼmo huʼniye ina hosu kavaʼmo huʼniye, huʼa huʼnagenoʼaeʼmo ge osuno afaʼa maiʼniye. 13Pailatiʼa hunoʼaeʼmo, muki kavafeʼmo kagaefeʼmo nehaya gemo oʼafiʼnapiye, huno afi geʼniyaʼmonanafa 14geʼaleʼmo aeno atagaina huno ha opaiʼniyaʼmofeʼmo gamani vekamoʼmo lusi kava huno hau aiʼniye.

15Yagaino neʼapateya gamani vekamoʼmo Yu vayaʼai hopa Pasova afinaʼmo kalavusifiʼmo maiʼnaya vayapatiʼmo lekana paiʼnaya vayakeʼmo muki kafugaʼae kafugaʼaeʼmo magoke magoke vayaʼmo hatu maeno apategeʼa ute ute huʼnae. 16Ani afinaʼmo mago vekamo kalavusifiʼmo maiʼniya vekamo agiʼamo Malamasiʼae. Vayaʼmogimo ani vekamo ageʼnayana alagi hosu vekamo maiʼniye, huʼa ageʼnae. 17Muki vayaʼmo eʼa aliʼa anupa huʼa maiʼnageno Pailatiʼa ge huno apafi geʼniye, haiya vekamo atesugeno lapakaetegamo afaʼa ugiye. Malamasiʼa atesufi Kalaisiʼae hutapa agi neʼaya vekamo Yesuʼmo atesuve, huno apafi geʼniye. 18#Yo 11:47-48; Yo 12:19Apaipa kafamo haeʼnagenoʼaeʼmo avaleli eʼa nayapiʼmo ateʼnae, huno ago ageʼniyaʼmofeʼmo ani ge huno ge huno apafi geʼniye.

19Pailatiʼa uno haino agoti huno neʼapateya siyateʼmo fai maiʼnigenoʼaeʼmo aʼamoʼmo mago gemo huno atalegeno agaetegamo eʼniye. Ani gemo hunoʼaeʼmo, hemeni haniʼilagamo alagamuna ageteʼnaeʼmo ani vekaeʼmo naipamoʼmo lusi kava huno kana huʼniyaʼmofeʼmo ani alagepa vekalegamo mago agufa kavaʼmo afaʼa osuka ato, huno ha paiʼniye.

20Mono huʼa neʼapataya vayaʼaiteʼmo yagaiʼa neʼapataya vayaʼe vayatama vayaʼmogiʼeʼmo muki vayaʼaifeʼmo hapa paiʼapaeʼmo, Malamasiʼa ateteka Yesuʼmo amagiyo, hutapa hiyo, huʼa apaipafiʼmo faiʼnae. 21Yagaino neʼapateya gamani vekamoʼmo hunoʼaeʼmo, lole vekalapatiʼmo ina laʼmo atesugeno lapakaetegamo ugiye, huno ge huno apafi geʼnigeʼapaeʼmo, Malamasiʼa ato, huʼa ha paiʼnagenoʼaeʼmo, 22Atesuvana Kalaisiʼae, hutapa agi neʼaya vekamo Yesutegamo na agufa kava hisuve, huno apafi geʼnigeʼapaeʼmo, malipu yosaleʼmo nili aiyo, huʼa ha paiʼnae. 23Gamani vekamoʼmo, Na kava huʼnigetapaene. Haiya hosu kavaʼmo huʼniye, huno apafi geʼnigeʼapaeʼmo alopa gefatiʼmo magoʼe magoʼe huʼa huʼapaeʼmo, malipu yosaleʼmo nili aiyo, nili aiyo, huʼa ha paiʼnae. 24#Loa 21:6-9; Mt 27:4Pailatiʼa apaketenoʼaeʼmo lusi kava huʼa apano aeteʼa geʼnileʼmo ago huʼa aeʼa ati kaeʼnayaʼmofeʼmo afaʼa aeʼna oʼapaka segauve, huno agesamo afiteno muki vayaʼai apaulagaleʼmo aniʼmo alino ayaʼmo sese hutenoʼaeʼmo, mani alagepa vekamo falisiya vaiʼmo nagae yaʼmo ohaneʼnifa lapakaitapi yaʼmo haneʼniye, huno hapa paiʼnigeʼapaeʼmo 25#Mt 23:35; Ap 5:28muki vayaʼmogimo huʼapaeʼmo, falisiya vaiʼmo afaʼa alisunageʼa mafaʼnetimogiʼeʼmo afaʼa aligae, huʼa ha paiʼnae. 26Huʼa ha paiʼnageno Malamasiʼa ateʼnigeno apakaetegamo uʼnigenoʼaeʼmo ati vayaʼaifeʼmo, nofi kayotetiʼmo amagiyo, huno huteno malipu yosaleʼmo nili aiteʼa aliʼa he tiʼa atesayafeʼmo avalelinuno apamiʼniye.

Ati vayaʼmogimo Yesufeʼmo kigi yokalo gemo huʼnaya gemae

(Mk 15:16-20; Yo 19:2-3)

27Pailati ati vayaʼamogimo avaleli uʼa gamani vayaʼai nopiʼmo uʼa haiʼa ateʼneʼapaeʼmo muki ati vayaʼaifeʼmo ge huʼnageʼa eʼa aliʼa anupa huʼa maiʼnae. 28#Lu 23:11Apakaemo kukenaʼamo asagiʼa maleʼneʼapaeʼmo haesa yatala kukenamo aliʼa vaiʼa ateʼnae. 29Vaiʼa atege aufe nofitetiʼmo aliʼa kalagiʼa kakolitamo alo huteʼa agenopaleʼmo maleʼa atege kanipa kayoʼmo aliʼa lamaga ayapiʼmo amige huteʼa aulagaleʼmo apaleʼyamo faiʼneʼapaeʼmo, Yu vayaʼai ala kini vekaʼapimogae, huʼa, alagepa huka maiyo, huʼa huteʼa kigi yokalo gemo huʼnae. 30#Aiy 50:6Apavenatuʼna heʼa atege ayapatiʼmo kanipa kayoʼmo hafaleʼa agenopaleʼmo amagige huʼnae. 31Kigi yokalo gemo huʼa hano huteʼapaeʼmo yatala kukenamo asagiʼa ataleteʼa agaiʼa kukenamo aliʼa vaiʼa ateteʼa malipu yosaleʼmo nili aiteʼa aliʼa he tiʼa atesayafeʼmo avaleliʼa uʼnae.

Yesuʼmo nili aiteʼa aliʼa he tiʼa ateʼnaya gemae

(Mk 15:21-32; Lu 23:26-43; Yo 19:17-27)

32Apakaemo taonifatiʼmo malaga avaleliʼa uʼnagenoʼaeʼmo mago vekamo agiʼamo Saimoniʼa Salini kotega vekamo neʼegeʼa fotu huteʼa malipu yosamo aliʼa kofiʼa ateʼnageno kofilino uʼniye. 33Gogatagayagae agimo aepaʼamo anuʼayamufagayagamo uʼa avaʼyi huʼnae. 34#Sam 69:21Apakaemo nofi alagafati anipiʼmo atu neheya malasinimo aliʼa lakiteʼa amiʼnageno neno afigenoʼaeʼmo magoʼe huno oʼneʼniye. 35#Sam 22:18Malipu yosaleʼmo nili aiteʼa aliʼa he tiʼa ateʼneʼapaeʼmo kukena yaʼamo aliʼa fako huʼa aliteʼa mago yafatetiʼmo yokalo leʼnae. Gotitegati gemo alinineno aeno hakalo huno hapa nepaiya vekamoʼmo hunoʼaeʼmo,

Kukenaʼnimo aliʼa fako huʼa aliteʼa yatala kukenaʼnileʼmo yokalo leteʼa aeno apaka seʼniya vekamoʼmo aliʼniye,

huno huʼniya gemo afole aisiyafeʼmo ani kavaʼmo huʼnae. 36Aliteʼapaeʼmo itopaleʼmo maiʼneʼa yagaiʼa maiʼnae. 37Apakaemo mago avoʼmo kae maleʼniya gemo aliʼa agenopale yosaleʼmo nili ai maleʼnae. Ani gemo ina hosu kavaʼmo huʼniye, huʼa huteʼa agoti huʼa ateʼnaya gemoʼa hunoʼaeʼmo,

Mani vekamo Yesuʼae. Yu vayaʼaiteʼmo ala kini vekaʼapimoʼae,

huno avoʼmo kaeteno nili ai maleʼniye. 38#Aiy 53:12Lole vekalaʼmoganimo vayaʼmo apamagiteʼana kumayaʼmo neʼaliʼa vekalaʼmo agaeʼeʼmo nili aiteʼa aliʼa he tiʼa anateʼnae. Mago vekamo lamaga haopaleʼmo aliʼa he tiʼa ateteʼa mago vekamo hoga haopaleʼmo aliʼa he tiʼa ateʼnae. 39#Sam 22:7; 109:25Kateʼmo u eʼa huʼnaya vayaʼmogimo keka huteʼapaeʼmo, 40#Mt 26:61; Yo 2:19alopa mono noʼmo heʼna halagape vaiteʼna loleʼe magoʼe afinaʼmo halate kiʼna hano huguve, huka huʼnana vekamogi kagaika kagufamo alika katika kato. Goti mafaʼneʼamo maiʼnisanana aika akaika emikeno, huʼa huteʼa huʼa faipa huʼa ateʼnae. 41Mono huʼa neʼapataya vayaʼaiteʼmo yagaiʼa neʼapataya vayanagi keʼaepa gemo avoʼmo kaeʼa aliʼa apaya neʼmalaya vayanagi vayatama vayanagi huʼa ina ge huʼa huʼnae, 42#Yo 11:50alu vayaʼmo hapa maeʼniyanageno agaiʼamo afaʼa ha oʼmaegaiye. Isaleli vayaʼmogitaleʼmo yagaino nelateya kini vekamo maiʼnisiyana malipu yosaletiʼmo aino akaino eminesigetaeʼmo geʼamo afaʼa afigune. 43#Sam 22:8Agaemo Gotifeʼmo alino amufa amiʼniye. Agaemo hunoʼaeʼmo, Goti mafaʼneʼamo maiʼnove, huno huʼniyaʼmofeʼmo Gotiʼa agufamo alino katino atesifigeta agegaune, huʼa huteʼa huʼa faipa huʼa ateʼnae. 44Ani gemo huʼana vayaʼmo apamagiteʼana kumayaʼmo neʼaliʼa vekalaʼmoganiʼeʼmo huʼana faipa huʼana ateʼnaʼae.

Yesuʼa faliʼniya kavafeʼmo huʼniya gemae

(Mk 15:33-41; Lu 23:44-49; Yo 19:28-30)

45Felugakukuʼmo muki haopalegamo hani huteno loleʼe magoʼe aovamo utegeno halate uneʼmo yegemo leʼniye. 46#Sam 22:1Une agufa afinaʼmo Yesuʼa, Ilai, Ilai, lama samakatani, huno alopa gefatiʼmo keya aeno ge huʼniye. Ani ge huʼniya gemo aepaʼamo haneʼniyana Gotiʼnimo, Gotiʼnimo, huno, na kava higekaeʼmo nataleka uʼnane, huno huʼniye. 47Mago he tiʼa maiʼnaya vayaʼmogimo ani gemo afiteʼapaeʼmo, Ilaiyafeʼmo keya aeno ge nehiye, huʼa huʼnae. 48#Sam 69:21Apakaepatiʼmo mago vekamoʼmo ani gemo afitenoʼaeʼmo nagu nagu huno uno kakiʼnofagana yaʼmo alino nofi alagafati anipiʼmo aeteno yatala kanipa kayoteʼmo faino lanu paiteno amiʼniye. 49Amiʼniyaʼmonanafa alu vayaʼmogi ha paiʼapaeʼmo, afa ato. Ilaiyaʼa emineno ha maesifigeta agava maiʼneta agegaune, huʼa ha paiʼnae. 50Yesuʼa halate alopa gefatiʼmo keya aeno ge hutenoʼaeʼmo aunemeʼamo ataleno faliʼniye.

51 # Hat 26:31-33; Hi 10:19-20 Faliʼnigenoʼaeʼmo alopa mono nopiʼmo alapaʼage lavolavoletiʼmo aeʼa akani maleʼnaya lavolavomo anagati aeno apake ailino emineno afelaga ataleʼniye. Lusi imima aliʼnigeno alopa yafa avemo aino apalo atiʼniye. 52Yafa kapiʼmo kiʼa apateʼnaya vayaʼmo yafa kaʼmo aino apalo atiʼnigeno Gotiʼa apaote asole vayaʼmo alino he tino apateʼniye. 53Gotiʼa Yesuʼmo alino he tino ateʼnigeʼapaeʼmo yafa kapatiʼmo he tiʼa aote alopa taonifiʼmo uʼa maiʼnageʼa asole vayaʼmogi apakeʼnae.

54Ati vayaʼaiteʼmo yagaino neʼapateya vekaʼe ati vayaʼaʼeʼmo Yesuteʼmo yagaiʼa maiʼneʼa ageʼnayana imima aliʼnigeno muki kavaʼmo afole aiʼnigeʼa ageteʼapaeʼmo lusi kava huʼa koli huteʼapaeʼmo, alagi lama gemo hune, huʼa, ani vekamo Goti mafaʼneʼamo maiʼniye, huʼa huʼnae.

55 # Lu 8:2-3 Asole aʼne anagaʼmo eʼa aise afagiʼaleʼmo he tiʼa maiʼneʼa aulu heʼa ageʼa maiʼnae. Apakaemo Galeliya kotegatiʼmo Yesuʼmo yagaiʼa atesayafeʼmo akame huʼa eʼnae. 56#Mt 20:20Ani aʼne anagapiʼmo Maliyaʼa Maganala kotega anagi Maliyaʼa Yemisiʼe Yosefeʼeʼmo itaʼanimoʼagi Sepeti mafaʼnelaʼmogani itaʼanimoʼagi huʼa maiʼnae.

Yesuʼmo yafa kapiʼmo kino ateʼniya kavafeʼmo huʼniya gemae

(Mk 15:42-47; Lu 23:50-55; Yo 19:38-42)

57Yegemo uno lamino faleʼnigenoʼaeʼmo mago kagemi yaʼaʼe vekamo Alamatiya taonifi vekamo agiʼamo Yosefeʼa Yesu geʼamo neʼafiya vekamo eʼniye. 58#Loa 21:22-23Pailatitegamo uno, Yesu agufaʼamo alininuʼna kiʼna ategesuve, huno afi geʼnigeno Pailatiʼa hunoʼaeʼmo, Amiyo, huno hapa paiʼniye. 59Yosefeʼa alitenoʼaeʼmo saufa lavolavomo yaveyave lavolavofiʼmo hayaeteno 60#Aiy 53:9agaiʼamo saufamo kafi maleʼniya yafa kapiʼmo alininuno haino maleʼniye. Maleteno alopa yafakefamo alino heleve heleve hulinuno ani yafa ka avayaleʼmo aino akani maleʼniye. 61Maganala kotega Maliyaʼe hamoʼamo Maliyaʼeʼmo yafa ka haopaleʼmo itopale maiʼnaʼae.

Ati vayaʼmogi yafa kateʼmo yagaiʼa maiʼnaya gemae

62Ani haniʼilagamo utesigeʼa alo nehaya afinaʼmo mono huʼa neʼapataya vayaʼaiteʼmo yagaiʼa neʼapataya vayaʼe Falasi vayaʼeʼmo Pailatitegamo uʼa, 63#Mt 12:40; 16:21; Yo 2:19-21Ala vekae, huʼa, ani aigofe gemo nehiya vekamoʼmo afaʼa maiʼnenoʼaeʼmo, loleʼe magoʼe afinaʼmo utesigeʼna halate he tiguve, huno huʼniya geeʼmo lagesamo afiʼnonaʼmofeʼmo 64kanoluleʼmo yagaita maime maime neʼvigenoʼao loleʼe magoʼe afinaʼmo hano hugiye, huka hapa paiyo. Fiku yanageʼa geʼamo neʼafiya vayaʼmogi eʼa agufaʼamo kumaya aliniʼa uteʼapaeʼmo muki vayaʼaifeʼmo ago he tino uʼniye, huʼa hapa paigae. Mani henagamo hisaya aigofe gemoʼa hogoteno huʼniya aigofe gemo ago aeno aga seno asole vayaʼmo humi apategaiye, huʼa ha paiʼnae. 65Pailatiʼa, ati vayatapimo maiʼnayanagi apavalelituta yagaita apateyo. Ageʼnaya kavaʼmo hutapa alu kava alu kavaʼmo hutapa yagaita maiyo, huno hapa paiʼnigeʼa 66#Nen 6:17atale uʼa aino akani maleʼniya yafateʼmo kameletiʼmo faleʼa aeʼa kamae maleteʼa ati vayaʼaifeʼmo, alagepa hutapa yagaita maiyo, huʼa hapa paiʼnageʼa uʼnae.

Currently Selected:

Matiyu 27: kyg2013

Highlight

Copy