Matiyu 26

Yagaiʼa neʼapataya vayaʼmogimo, Yesuʼmo atafauta kalavusi huta ateteta amagigune, huʼa huʼnaya gemae

(Mk 14:1-2; Lu 22:1-2; Yo 11:45-53)

1Yesuʼa muki geʼamo alagi hapa paino hano hutenoʼaeʼmo geʼamo neʼafiya vayaʼaifeʼmo hapa painoʼaeʼmo, 2#Hat 12:1-27; Mt 20:18ago afiʼnayana lole afinaʼmo utesigeno Pasova hopa afinaʼmo afole aigiye. Afole aitesigeʼapaeʼmo Vemo mafaʼnemo malipu yosaleʼmo nili aiteʼa aliʼa he tiʼa atesayafeʼmo avaleli uʼa apamigae, huno hapa paiʼniye.

3Inagi mono huʼa neʼapataya vayaʼaiteʼmo yagaiʼa neʼapataya vayaʼe Yu vayatama vayaʼmogiʼeʼmo hogote vekamo mono huʼa neʼapataya vayaʼaiteʼmo yagaino neʼapateya vekamo agiʼamo Kaiyafasi alopa noʼafiʼmo aliʼa anupa huʼa maiʼnae. 4Apakaemo kesi katetiʼmo uʼa Yesuʼmo atafauʼa kalavusi huʼa ateteʼa amagisayafeʼmo ge huge afige huʼa maiʼnae. 5Apakaemo, fiku yanageʼa apano aegae, huʼa apakesamo afiteʼa, hopa afinaʼmo oʼatafaugune, huʼa huʼnae.

Mago a kanoʼmoʼmo Yesuʼmo uvelimo lakino faleno ateʼniya gemae

(Mk 14:3-9; Yo 12:1-8)

6Yesuʼa Metani taonifiʼmo mago vekamo Saimoniʼa lepolosi kaitaʼmo hauʼniya vekamo nopiʼmo uno haino maiʼniye. 7#Lu 7:37-38Fai maiʼneʼa neʼyaʼmo neʼnagenoʼaeʼmo mago a kanomoʼa yafa kepi uvelimo alagepa atumo neʼaiya uvelimo alopa monileʼyaʼmo aeno agaseʼniya uvelimo alinineno agenopafiʼmo lakino ateʼniye. 8Geʼamo neʼafiya vayaʼmogimo ani kavaʼmo ageteʼapaeʼmo apaipamo leʼnigeʼapaeʼmo, na agufa kavatefeʼmo fikumo lakino fatali huʼniye. 9Maketi huʼniyesinana lusi monimo aliteno kagemi yaʼapimo ohaneʼnisiya vayaʼmo apamiʼniyesine, huʼa ge hauʼnae. 10Yesuʼa ani gemo afitenoʼaeʼmo, na kava higetapa lusi kana yaʼmo alita neʼamiye. Nagaetegamo kanale alagepa kavaʼmo huʼniye. 11#Loa 15:11Muki afinaʼmo kagemi yaʼapimo ohaneʼniya vayaʼmo ma mopafiʼmo lapakaeʼeʼmo magokepi lokaeʼa maigayaʼmonanafa nagaemo muki afinaʼmo lapakaeʼeʼmo magokepi lokaeʼna oʼmaiguve. 12Nagufamo alo huno nateʼniyanageʼa kanolufiʼmo kiʼa natesaya afinafeʼmo alagepa atumo neʼaiya uvelimo faleno nateʼniye. 13Lama ge lapa nepauve, huno, mani alagepa faigoko gemo aeʼa hakalo huʼa hapa paisaya kotegamo mani aʼmoʼa huʼniya kavaʼefeʼmo apakesamo afisayafeʼmo ava gemo hugae, huno hapa paiʼniye.

Yutasiʼa Yesu kutulu yaʼmo aliguve, huno huʼniya gemae

(Mk 14:10-11; Lu 22:3-6)

14 # Yo 11:57 Yutasiʼa Isakaliyoti kotega vekamo tuolofuʼa vayapati vekamo apataleno mono huʼa neʼapataya vayaʼaiteʼmo yagaiʼa neʼapataya vayaʼaitegamo uno hapa painoʼaeʼmo, 15#Sak 11:12avaleʼna lapamisuvafeʼmo na agufa yaʼmo namigae, huno ge huno apafi geʼnigeʼapaeʼmo tetiʼa siluva monimo lekana paiʼa amiʼnae. 16Ani afinatetiʼmo Yutasiʼa aepa faino atafausiya afinafeʼmo yagaino maiʼniye.

Pasova neʼyaʼmo neʼnaya kavafeʼmo huʼniya gemae

(Mk 14:12-21; Lu 22:7-14,21-23; Yo 13:21-30)

17 # Hat 12:14-20 Yu vayaʼmogi aeno apafu noleya peleti mayamo neʼnaya hopa afinapatiʼmo hogote afinaʼmo afole aiʼnigeʼapaeʼmo geʼamo neʼafiya vayaʼmo Yesutegamo eʼa, Pasova neʼyaʼmo nesunafeʼmo haiyategamo uta alo hisune, huʼa ge huʼa afi geʼnagenoʼaeʼmo, 18#Mt 21:3alopa taonifiʼmo uta haitapa mago agesaya vekaeʼmo, Tisa vekatimoʼmo laha painoʼaeʼmo, nagae afinaʼmo alagi ago hogo huʼniye. Nagaeʼe geʼnimo neʼafiya vayaʼeʼmo nokafiʼmo Pasova neʼyaʼmo negaune, huno laha paiʼniye, hutapa ha paiyo, huno hapa paiʼniye. 19Geʼamo neʼafiya vayaʼmogi hapa paiʼniya gemo akame huʼa uʼa Pasova neʼyaʼmo alo huʼnae. 20Yegemo uno lamino faletegeʼapaeʼmo Yesuʼe tuolofuʼa vayaʼmo geʼamo neʼafiya vayaʼaʼeʼmo hiʼyalamuteʼmo siyateʼmo fai maiʼnae. 21Neʼyaʼmo neʼneʼapaeʼmo, lama gemo lapa nepauve, huno, mani lapakaepatiʼmo mago vekamoʼmo nagae kutulu yaʼmo ago aliʼniyanageno kame vayaʼmo navaleno apamigiye, huno hapa paiʼniye. 22Ani gemo afiteʼapaeʼmo apaipamoʼmo lusi kava huno kana huʼnigeʼapaeʼmo apamete apamete huʼa huʼapaeʼmo, Ala kava nene, huʼa, nagaefeʼmo nehapiye, huʼa ge huʼa afige afige huʼnae. 23#Sam 41:9Yesuʼa hunoʼaeʼmo, nagaeʼeʼmo magokepi peleti mayamo aliteno yuvapafi anipiʼmo aeteno neʼniya vekamoʼmo kutulu yaʼmo aliʼniye. 24Vemo mafaʼnemoʼa Goti mukufiʼmo ago avoʼmo kae maleʼnaya kateʼmo ugiyaʼmonanafa kutulu yaʼmo aliʼniya vekalegamo kage kage kavaʼmo afole aigiye. Itaʼamoʼmo alino oʼateʼniyesinana agaetefeʼmo kanale huʼniyesine, huno hapa paiʼniye. 25Yutasiʼmo kutulu yaʼmo aliʼniya vekamoʼmo hunoʼaeʼmo, Tisao, huno, nagaefeʼmo nehapiye, huno afi geʼnigenoʼaeʼmo Yesuʼa, ago alagi nehane, huno ha paiʼniye.

Ala kava neʼmo kaveʼmo neʼnaya kavafeʼmo huʼniya gemae

(Mk 14:22-26; Lu 22:15-20; 1 Ko 11:23-25)

26 # Mt 14:19 Neʼyaʼmo neʼneʼapaeʼmo Yesuʼa peleti mayamo alino auleno ateteno nunumuʼmo huteno akaya heno geʼamo neʼafiya vayaʼmo apamitenoʼaeʼmo, mani peleti mayamo nagufaʼnimo haneʼniye. 27Alita neyo, huno hapa paiteno kapumo aliʼneno Gotifeʼmo haoke heteno apamitenoʼaeʼmo, mukiʼamogitapamo mani kapufatiʼmo neyo. 28#Hat 24:8; Yel 31:31-34; Sak 9:11; 1 Ko 10:16Mani kapufi aniʼmo saufa kotalake kolaʼnimae. Gotiʼa hu maleʼniya kotalakemo mani kava huguve, huno hu maleʼniya gemo afole aisiyafeʼmo aiʼna lakiguve. Nagaemo asole vayaʼai hosu kavaʼapimo aliʼna atalesuvafeʼmo kolaʼnimo aiʼna lakiʼna apategauve. 29Lapa nepauve, huno, halate nofi alagafati aniʼmo oʼneʼna maime maime neʼuʼna Afoʼnimoʼmo yagaino neʼapateya koteʼmo saufa afinaʼmo afole aisigeʼnaeʼmo lapakaeʼeʼmo magokepi lokaeta maiʼneta negaune, huno hapa paiʼniye. 30#Lu 22:39; Yo 18:1Apakaemo mono yokemo huʼa hano huteʼa kumategamo uʼa lamiʼa Alifiʼaepa avefiʼmo uʼa haiʼnae.

Yesuʼa Pitafeʼmo hunoʼaeʼmo, nagaefeʼmo oʼageʼnova vekae, huka hugane, huno ha paiʼniya gemae

(Mk 14:27-31; Lu 22:31-34; Yo 13:36-38)

31 # Yo 16:32; Sak 13:7 Neʼuʼapaeʼmo Yesuʼa hunoʼaeʼmo, Mani haniʼilagamo nagaetegamo afole aisiya hosu kavatefeʼmo asagauta aitetapa mukiʼamogitapamo nataleta lapaune hegae. Goti Mukufiʼmo avoʼmo kae maleʼniya gemoʼa hunoʼaeʼmo,

Nagaemo sipisipileʼmo yagaino neʼapateya vekamo amagisugeʼapaeʼmo sipisipi anagaʼamo ataleʼa apaune heʼa u eʼa hugae,

huno hu maleʼniya gemo haneʼniyaʼmofeʼmae. 32#Mt 28:7,16Namagigayaʼmonanafa kanolufatiʼmo halate ago alino he tino natesigeʼnaeʼmo Galeliya kotegamo uʼna hogotetesugetapa ugae, huno hapa paiʼniye. 33Pitaʼa hunoʼaeʼmo, Kagaetegamo afole aisiya hosu kavatefeʼmo asagauʼa aisayana nagaemo asagauʼna oʼaiguve, huno ha paiʼnigenoʼaeʼmo, 34#Mt 26:69-75alagi lama gemo kaha nepauve, huno, ani haniʼilagamo kokolemo age oʼaiʼnisigekaeʼmo nagaefeʼmo loleʼe magoʼe afinaʼmo oʼageʼnova vekae, huka hugane, huno ha paiʼnigeno 35#Mt 26:56Pitaʼa hunoʼaeʼmo, agaeʼeʼmo magokepi faligaʼae, huʼa nehisageʼnaeʼmo nagaemo kagaefeʼmo oʼageʼnova vekae, huʼna osuguve, huno ha paiʼnigeʼapaeʼmo muki geʼamo neʼafiya vayaʼmogiʼeʼmo ani agufa gegeʼmo huʼnae.

Getesemani hoyafiʼmo uno nunumuʼmo huʼniya gemae

(Mk 14:32-42; Lu 22:39-46)

36Huteʼapaeʼmo Yesuʼe geʼamo neʼafiya vayaʼeʼmo mago mopamo agiʼamo Getesemanigayagamo magokepi neʼuʼapaeʼmo, manileʼmo maiʼnigeʼnao nagaemo mugaʼaleʼmo uʼna nunumuʼmo huguve, huno hapa paiteno 37apataleno Pitaʼe Sepeti mafaʼnelaʼeʼmo apavalelino uʼniye. Aepa faino aipamoʼmo lusi kava huno kana huʼnigeno agesa alaʼamo afitenoʼaeʼmo, 38#Yo 12:27falisuva agufa kana yaʼmoʼa nagupi mafaʼnemo lusi kava huno faino vego huno nateʼniye. Manile nagaeʼeʼmo magokepi kava yagaita maigetao, huno hapa paiʼniye. 39#Hi 5:7-8; Mt 6:10Apataleno aise afagiʼaleʼmo uno mopafiʼmo agoʼya faiʼneno augosalegatiʼmo mopafiʼmo aino ati kaeno maiʼneno nunumuʼmo hunoʼaeʼmo, Afoʼnimogae, huno, visuva kaʼmo mago alu kaʼmo haneʼnisiyana nagaetegatiʼmo mani kapumo afaʼa alika atalo. Ani gemo huvaʼmonanafa nagaemo nahauʼniya kavaʼmo akame osuka kagaemo kahauʼnisiya kavaʼmo akame huvo, huno nunumuʼmo huʼniye. 40Atagi neno eno geʼamo neʼafiya vayaʼmo apakeyana apau kaleʼa maiʼnageno apaketeno Pitafeʼmo, lapakaemo magoke afinaʼmo nagaeʼeʼmo afaʼa yagaita oʼmaiʼnafiye, huno afi geʼniye. 41#Mt 6:13; Hi 2:14; 4:15Lapamalageka hisiya kavapiʼmo haita ofalesayafeʼmo kava yagaita maiʼnetapa nunumuʼmo hiyo. Lapaunelapameʼmoʼa hunoʼaeʼmo, afaʼa hugune, huno nehiyaʼmonanafa hisayafeʼmo amega lapakufamoʼmo lokiya noʼvaiye, huno hapa paiʼniye. 42Halate napa tu afinaʼmo apataleno uno, Afoʼnimogae, huno, mani kapumo afaʼa alika oʼatalesanaʼmoʼmo kanalenagi kahauʼnisiya kavaʼmo akame huvo, huno nunumuʼmo huʼniye. 43Atagi neno eno apakeyana apau maiʼmai huʼnigeʼa apau kaleʼageʼmo maiʼnageno 44#2 Ko 12:8apakegeno apatalenuno halate huʼniya agufa gemo huno napa tali afinaʼmo nunumuʼmo huʼniye. 45Atagi neno eno geʼamo neʼafiya vayaʼaifeʼmo, maitapa falu hutapageʼmo lapau kaleʼnafiye. Ani afinaʼmo alagi ago hogo huʼniyanagi ageyo. Vemo mafaʼnemo kutulu yaʼmo aliʼniyanageno hosu vayaʼai apayapiʼmo avaleno apamigiye. 46#Yo 14:31He tita vigetao. Nagae kutulu yaʼmo aliʼniya vekamo ago neʼe, huno hapa paiʼniye.

Yesuʼmo atafauʼa nofi kiʼa ateʼnaya gemae

(Mk 14:43-50; Lu 22:47-53; Yo 18:3-12)

47Yesuʼa ge nehigenoʼaeʼmo Yutasiʼmo tuolofuʼa vayapati vekamo ago eʼniye. Agaeʼeʼmo asole vayaʼmo naipe alige kayoʼmo alige huliʼa eʼnae. Mono huʼa neʼapataya vayaʼaiteʼmo yagaiʼa neʼapataya vayaʼe Yu vayaʼaiteʼmo yagaiʼa neʼapataya vayatama vayaʼmogiʼeʼmo aliʼa apateʼnageʼa eʼnae. 48Hogoteno kutulu yaʼmo aliʼniya vekamoʼmo hapa painoʼaeʼmo, haeʼna nesuva vekaina alagena kavaʼmo huguvanagi uta atafaiyo, huno hapa paiʼniye. 49Yutasiʼa eno avaʼyi nehunoʼaeʼmo malage huno Yesutegamo unoʼaeʼmo, Tisao, huno ge amamaeteno haeno neʼniye. 50Yesuʼa hunoʼaeʼmo, nao vekae, huno, ani kavaʼmo hisanafeʼmo neʼapiye, huno afi nekegeʼapaeʼmo eʼa atafauʼnae. 51#Yo 18:26Atafauʼnagenoʼaeʼmo Yesuʼeʼmo magokepi lokaeno maiʼniya vekamoʼmo naipeʼamo asagino mono huʼa neʼapataya vayaʼaiteʼmo yagaino neʼapateya vekamo aliʼyaʼamo neʼaliya vekamo agesamo heno lafe hutalegeno asagauno aiʼniye. 52#Aep 9:6; Le 13:10Yesuʼa hunoʼaeʼmo, naipekamo alika anoʼafiʼmo faika falu kao. Muki vayaʼmogimo naipeʼapimo aliʼa neʼasagiya vayaʼmo naipeletiʼmo apaisageʼa faligae. 53Hemenimo nagaemo Afoʼnimofeʼmo afaʼa nunumuʼmo hisugeno tauseni tauseniʼa enisole vayaʼamo alino apatesigeʼa emi eʼa naha maegae, hutapa oʼafiʼnafiye. 54Nagaemo Afoʼnimofeʼmo ge hisuvana Goti Mukufiʼmo avoʼmo kae maleʼniya gemoʼa hunoʼaeʼmo, nagaetegamo ani kavaʼmo hugae, huno huʼniyaʼmofeʼmo haiya kava huno ani gemo afole aigiye, huno hapa paiʼniye.

55 # Lu 19:47; 21:37 Hapa paiteno asole vayaʼaifeʼmo hunoʼaeʼmo, lapakaemo naipe alige kayoʼmo alige hulita eʼnayana nagaefeʼmo hutapaeʼmo, vayaʼmo apamagiteno kumaya neʼaliya vekamo maiʼniye, hutapa lapakesamo neʼafifiye. Nagaemo muki afinaʼae afinaʼaeʼmo alopa mono nopiʼmo aliʼna apaya neʼmalogetapaeʼmo eta oʼnatafauʼnayaʼmonanafa 56#Mt 26:31Gotitegati gemo alini eʼa aeʼa hakalo huʼa hapa nepaiya vayaʼmogi avoʼmo kae maleʼnaya gemo afole aisiyafeʼmo mani kavaʼmo afole neʼaiye, huno hapa nepaigeʼapaeʼmo muki geʼamo neʼafiya vayaʼmo ataleʼa apaune heʼa uʼnae.

Kanisole vayaʼmogi agoti huʼa ateʼnaya gemae

(Mk 14:53-65; Lu 22:54-55,63-71; Yo 18:13-14,19-24)

57Yesuʼmo atafauʼa avaleliʼa hogote vekamo mono huʼa neʼapataya vayaʼaiteʼmo yagaino neʼapateya vekamo agiʼamo Kaiyafasi nopiʼmo keʼaepa gemo avoʼmo kaeʼa aliʼa apaya neʼmalaya vayaʼe vayatama vayaʼeʼmo aliʼa anupa huʼa maiʼnaya nopiʼmo avaleli uʼa haiʼnae. 58Pitaʼa apamasa hulinuno mono huʼa neʼapataya vayaʼaiteʼmo yagaino neʼapateya vekamo kumateʼmo uno haino na agufa kavaʼmo afole aisifi huno agesiyafeʼmo mono no kumateʼmo kava neʼyagaiya vayaʼeʼmo fai maiʼniye. 59Mono huʼa neʼapataya vayaʼaiteʼmo yagaiʼa neʼapataya vayaʼe muki kanisole vayaʼmogiʼeʼmo Yesuʼa amagisaya geeʼmo kahauya huʼnae. 60Asole vayaʼmo agotileʼmo maiʼneʼa aigofe faigoko gemo hapa paiʼnageʼapaeʼmo amagisaya geeʼmo kahauya huʼnayana oʼafiʼnae. Henagaʼamo lole vekalaʼmoganimo he tiʼana 61#Yo 2:19-21hapa paiʼanaeʼmo, mani vekamoʼmo hunoʼaeʼmo, alopa mono noʼmo afaʼa heʼna halagape vaiteʼna loleʼe magoʼe afinaʼmo halate kiʼna hano huguve, huno huʼniye, huʼana hapa paiʼnaʼae. 62Hapa paiʼnaʼageno mono huʼa neʼapataya vayaʼaiteʼmo yagaino neʼapateya vekamoʼmo he tino Yesufeʼmo ge huno afi geʼniye, geʼanileʼmo afaʼa aeka atagaina huka osugapiye. Na agufa faigoko gemo kagaefeʼmo nehae, huno afi geʼniyaʼmonanafa Yesuʼa ge osuʼniye. 63#Aiy 53:7; Mt 27:12Halate agaefeʼmo hukaeʼmo, maige maige huno neʼmaiya Gotitegatiʼmo alagi lama gemo nehuve, huka huvo. Kalaisi vekamo Goti mafaʼneʼamo maiʼnisanana laha paiyo, huno afi geʼnigenoʼaeʼmo, 64#Sam 110:1; Nen 7:13; Mt 24:30ani gemo ago alagi nehane. Inagi nagaemo mukiʼamogitapaeʼmo magoʼe gemo lapa paiguve, lapakaemo agegayana Vemo mafaʼnemo lokiyaʼamo haneʼniya vekamo lamaga haopaleʼmo fai maiʼnenoʼaeʼmo he tino kokuʼnapi hiya mopaleʼmo eminesigetapa agegae, huno hapa paiʼniye. 65#Ap 14:14; Mt 9:3; Yo 10:33Mono huʼa neʼapataya vayaʼaiteʼmo yagaino neʼapateya vekamoʼmo ani gemo afiteno agaiʼa kukenaʼamo alino apake aitenoʼaeʼmo, Gotifeʼmo huno faipa huno ateʼniye. Magoʼe faigoko gemo eʼa laha paisaya vayaʼaifeʼmo ge osugune. Hemenimo Gotifeʼmo huno faipa huno ateʼniya gemo ago afiʼnagi 66#Ap 14:14; Mt 9:3; Yo 10:33na agufa kavafeʼmo lapakesa neʼafiye, huno apafi geʼnigeʼapaeʼmo, hosu gemo huʼniyaʼmofeʼmo faligiye, huʼa huʼnae. 67#Aiy 50:6; 53:5Huʼa huteʼa augosafiʼmo apavenatuʼna heʼa ateteʼa siki kayoʼmo amagiʼnae. 68Mago vayaʼamogimo apayaʼmo aliʼa ataleliʼeʼa amagite amagite nehuʼapaeʼmo, Kalaisiyo, huʼa, kaune vekamo maiʼnanagi ina laʼmo kamagiʼniye, huʼa ge huʼa afige afige huʼnae.

Pitaʼa Yesufeʼmo, oʼageʼnova vekae, huno huʼniya gemae

(Mk 14:66-72; Lu 22:56-62; Yo 18:15-18,25-27)

69Ani afinaʼmo Pitaʼa no kegiʼya yuʼilaga itopaleʼmo maiʼnigeno aliʼyaʼmo neʼaliya aʼmafaʼnemoʼmo eno agaefeʼmo, kagaemo Yesuʼa Galeliya kotega vekaʼeʼmo neʼmaina vekamo maiʼnane, huno huʼnigeno 70-71muki vayaʼai apaulagaleʼmo hunoʼaeʼmo, na agufa kavafeʼmo ani gemo nehapi huʼna oʼafiʼnove, huno huteno atalenuno hiʼyanaleʼmo maiʼnigeno mago alu aʼmafaʼnemo aliʼyaʼmo neʼaliya aʼmafaʼnemoʼmo ageteno vayaʼaifeʼmo, Ani vekamo Yesuʼa Nasalasa taonifi vekaʼeʼmo magokepi lokaeno maiʼniya vekae, huno hapa paiʼnigenoʼaeʼmo 72anagatiʼmo alagi lama gemo nehuve, huno, oʼageʼnova vekae, huno halate huʼniye. 73Aise afinaʼmo utegeʼa he tiʼa maiʼnaya vayaʼmogimo Pitategamo uʼapaeʼmo alagi lama gemo nehune, huʼa, apakaepati vekamo maiʼnane. Kagaemo alu kagemo neʼaina kagemoʼa alino afole aino kateʼniye, huʼa ha paiʼnae. 74Pitaʼa hunoʼaeʼmo, lama gemo nosisuvana Gotiʼa lifana huno nategaiye. Anagatiʼmo alagi lama gemo nehuve, huno, oʼageʼnova vekae, huno hapa nepaigenoʼaeʼmo kokolemoʼmo age aiʼnigenoʼaeʼmo 75#Mt 26:34Hogoteno Yesuʼa Pitafeʼmo ha painoʼaeʼmo, kokolemoʼmo age oʼaiʼnisigekaeʼmo nagaefeʼmo loleʼe magoʼe afinaʼmo oʼageʼnova vekae, huka hugane, huno ha paiʼniya geeʼmo agesamo afino ho hutenoʼaeʼmo kegiʼya malaga uno lamino aipafi atu haeʼnigeno aviʼyaʼmo huʼniye.

Currently Selected:

Matiyu 26: kyg2013

Highlight

Copy