Matiyu 25

Naya loleʼa aʼmafaʼne anagaʼaifeʼmo huʼniya gemae

1 # Le 19:7; Lu 12:35 Gotiʼa yagaino apatesiya afinaʼmo afole aisigenoʼaeʼmo hisiya kava huno naya loleʼa aʼmafaʼne anagaʼmogimo veʼeʼmo lokaeʼa ohavaeʼnaya aʼmafaʼne anagaʼaitegamo afole aiʼniye. Ani aʼmafaʼne anagaʼmogimo saufa aʼmo alisiyafeʼmo huʼniya vekaʼeʼmo uʼa fotu hisayafeʼmo uʼnae. 2Ani kava huʼa naya magokayagaʼa aʼmafaʼnemogimo negi nagi apakesamo afiʼnageʼapaeʼmo naya magokayagaʼa aʼmafaʼnemogimo alagepa huʼa afiteʼa ageʼnae. 3Negi nagi aʼmafaʼnemogi lamuʼapimo aliʼnayaʼmonanafa lamuʼapifiʼmo lakiʼa ata kaesaya aniʼapimo oʼaliʼnayaʼmonanafa 4alagepa huʼa afiteʼa ageʼnaya aʼmafaʼnemogi lamuʼapifiʼmo lakiʼa ata kaesaya aniʼapiʼeʼmo aliniʼa uʼnae. 5Saufa aʼmo aligefe huʼniya vekamo oʼmeno yatala afinaʼmo maiʼnigeʼapaeʼmo muki aʼmafaʼne anagaʼamo apau maiʼmai huʼnigeʼa ago apau kaleʼnae.

6Haniʼilaga folaguʼmo keya aeʼa ge huʼapaeʼmo, saufa aʼmo alisiyafeʼmo huʼniya vekamo ago neʼeyanagi he titetapa fotu hiyo, huʼa ge huʼnae. 7Huʼa keya aeʼnageʼapaeʼmo naya loleʼa aʼmafaʼne anagaʼmogimo veʼeʼmo lokaeʼa ohavaeʼnaya aʼmafaʼne anagaʼmo apaupatiʼmo he tiʼa lamuʼapimo alo huʼnae. 8Negi nagi aʼmafaʼnemogimo alagepa huʼa afiteʼa ageʼnaya aʼmafaʼne anagaʼaifeʼmo, lamutifiʼmo aniʼamo ago leno lanesiyafeʼmo huʼnigi aniʼmo mago lamiyo, huʼa apafi geʼnageʼapaeʼmo, 9haʼao, huʼa, lapamisunana anitimo ago leno lanegaiye. Lamufi lakiʼa ata nekaya aniʼmo miya nefaiya vayaʼaitegatiʼmo uta miya failitapa eyo, huʼa hapa paiʼnae. 10Aniʼmo miya faisayafeʼmo uʼnagenoʼaeʼmo saufa aʼmo alisiyafeʼmo huʼniya vekamo ago eno avaʼyi huʼniye. Ago alo huʼa maiʼnaya aʼmafaʼne anagaʼmogi agaeʼeʼmo magokepi lokaeʼa uʼa haiʼa neʼyaʼmo yagita huʼnaya nopiʼmo maiʼnagenoʼaeʼmo kitamo ki maleʼniye.

11 # Lu 13:25-27 Henagaʼamo naya magokayagaʼa aʼmafaʼnemo veʼeʼmo lokaeʼa ohavaeʼnaya aʼmafaʼne anagaʼmo eʼa, Ala kava nene, huʼa, kitamo yakika lato, huʼa ge huʼnagenoʼaeʼmo 12#Mt 7:23geʼapileʼmo aeno atagaina huno hapa painoʼaeʼmo, alagi lama ge lapa nepauve, huno, olapakeʼnove, huno hapa paiʼniye, huno hapa paitenoʼaeʼmo, 13#Mt 24:42Vemo Mafaʼnemo hainu afinaʼmo eminesifi na agufa kanaleʼmo eminesifi, hutapa oʼafiʼnayaʼmofeʼmo alagepa hutapa kava yagaita maiyo, huno hapa paiʼniye.

Aliʼyaʼamo neʼaliya vayaʼmo monimo apamiʼniya kavafeʼmo aeno kalafefa gemo huʼniya gemae

(Lu 19:11-27)

14 # Mk 13:34 Ani kava huno Gotiʼa yagaino apatesiya afinaʼmo afole aisiya kava huno mago vekamoʼmo noʼamo ataleno alu kotega ugefe hunoʼaeʼmo aliʼyaʼamo neʼaliya vayaʼaifeʼmo ge huʼnigeʼa eʼnagenoʼaeʼmo, kagemi yaʼnileʼmo yagaita nateyo, huno hapa paiʼniye. 15#Lo 12:6Agaemo magoke magoke vayaʼmogimo alopa aliʼyaʼmo alisafi aise aliʼyaʼmo alisafi huno agesamo afitenoʼaeʼmo apamete apamete huno moniʼaleʼmo yagaiʼa atesayafeʼmo alino fako huno apamiʼniye. Agaemo monimo fako huno mago vekamo faefu tausenimo amige mago vekamo tu tausenimo amige mago vekamo vani tausenimo amige huteno uʼniye. 16Faefu tausenimo amiʼniya vekamoʼmo malage huno alininuno ani moniletiʼmo aliʼyaʼmo aliteno akamelegaʼamo magoʼe huno faefu tausenimo aliʼniye. 17Ani kava huno tu tausenimo amiʼniya vekamoʼmo akamelegaʼamo magoʼe huno tu tausenimo aliʼniye. 18Aliʼniyaʼmonanafa vani tausenimo amiʼniya vekamoʼmo alininuno ani monimo keli kafiteno ani kelifiʼmo maleteno aeno ati kae maleʼniye.

19Yatala afinaʼmo utegeno aliʼyaʼmo afoʼamoʼmo halate atagi neno eno apamiʼniya moniletiʼmo aliʼyaʼmo aliʼnaya monieʼmo ava gemo afisiyafeʼmo eʼniye. 20Faefu tausenimo aliʼniya vekamoʼmo akamelegaʼamo magoʼe huno faefu tausenimo alinineno, Ala kava nene, huno, monimo faefu tausenimo namiʼnane. Ago, huno, alininuʼna aliʼyaʼmo aliteʼna akamelegaʼamo magoʼe huʼna faefu tausenimo aliʼnove, huno ha paiʼnigeno 21#Mt 24:45-47; Lu 16:10aliʼyaʼmo afoʼamoʼmo ha painoʼaeʼmo, aliʼyakamo oʼataleʼnanaʼmofeʼmo aliʼna amufa nekamuve, huno, alagepa kavaʼmo huʼnane. Aise yateʼmo alagepa huka yagaiʼnanaʼmofeʼmo alopa yateʼeʼmo afaʼa yagaisanafeʼmo kavalegauvanagi eka nagaeʼeʼmo kamogaga aiyo, huno ha paiʼniye. 22Inagi tu tausenimo amiʼniya vekamoʼmo eno ha painoʼaeʼmo, monimo tu tausenimo namiʼnane. Ago, huno, alininuʼna aliʼyaʼmo aliteʼna akamelegaʼamo magoʼe huʼna tu tausenimo aliʼnove, huno ha paiʼnigenoʼaeʼmo 23aliʼyaʼmo afoʼamoʼmo hunoʼaeʼmo, aliʼyakamo oʼataleʼnanaʼmofeʼmo aliʼna amufa nekamuve, huno, alagepa kavaʼmo huʼnane. Aise yateʼmo alagepa huka yagaiʼnanaʼmofeʼmo alopa yateʼeʼmo afaʼa yagaisanafeʼmo kavalegauvanagi eka nagaeʼeʼmo kamogaga aiyo, huno ha paiʼniye. 24Inagi vani tausenimo amiʼniya vekamoʼmo eno ha painoʼaeʼmo, Ala kava nene, huno, kageʼnovana kagaemo lokiya kaipa vekamo maiʼnekaeʼmo avina yaʼmo ohakaleʼnana hoyafatiʼmo neʼyaʼmo alige haletiʼyaʼamo ohaleʼnana nopatiʼmo neʼyaʼmo alige nehana vekamo maiʼnanaʼmofeʼmo 25kolikamo huteʼna namiʼnana vani tauseni monikamo alininuʼna keli kafiteʼna kelifiʼmo maleʼnove. 26Ago, huno, monikamo afaʼa haneʼniye, huno ha paiʼnigenoʼaeʼmo aliʼyaʼmo afoʼamoʼmo hunoʼaeʼmo, aliʼyafeʼmo alagaʼmo nekahaeya vekamogae, huno, Avina yaʼmo ohakaleʼnana hoyafatiʼmo neʼyaʼmo alige haletiʼyaʼamo ohaleʼnana nopatiʼmo neʼyaʼmo alige nehane, huka nageʼnapiye. 27Nageʼnanaʼmofeʼmo na kava higekaeʼmo moniʼnimo monimo neʼmalaya nopiʼmo oʼmaleʼnane. Maleʼnanesinana halate atagi neʼna eʼnaeʼmo akamelegaʼamo magoʼe monimo aliʼnovesine. 28Agaetegatiʼmo vani tausenimo alita teni tausenimo aliʼniya vekamo amiyo. 29#Mt 13:12; Mk 4:25; Lu 8:18Aliʼnaya vayaʼmo magoʼe huʼna apamisugeʼa magoʼe yaʼmo aligae. Oʼaliʼnaya vayaʼai apayapatiʼmo apamiʼnova yaʼmo hapa falegauve. 30#Mt 8:12Inagi afa aliʼyaʼmo neʼaliya vekamo atafaulituta malaga hani kopiʼmo asagautapa yaga auta atalegeno aviʼyaʼmo huge avepiʼmo hanino alagi huge huno maino.

Alino fako huno apatesiya kavafeʼmo huʼniya gemae

31 # Mt 16:27; 19:28; Le 20:11-13 Vemo mafaʼnemoʼa ha le konali yaʼamo aliteno enisole vayaʼaʼeʼmo emineno yagaino apatesiyafeʼmo kini siyateʼmo fai maigiye. 32#Lo 14:10; Iyi 34:17Fai maiʼnisigeʼapaeʼmo muki ma mopafi vayaʼmo eʼa aulagaleʼmo aliʼa anupa huʼa maigae. Afuleʼmo neʼyagaiya vekamoʼmo sipisipiʼe memeʼeʼmo magokepi lokaeʼa maiʼnagenoʼaeʼmo alino fako huno neʼapateya kava huno vayaʼmo alino fako huno apategaiye. 33Agaemo sipisipi vayaʼmo alino lamaga haopaleʼmo apateteno meme vayaʼmo alino hoga haopaleʼmo apategaiye. 34Apateʼnenoʼaeʼmo ala kini vekaʼapimoʼmo lamaga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo alino auleno lapateʼniya vayanagi eyo. Gotiʼa ma mopamo alo huʼniya afinaʼmo lapamisiyafeʼmo alo huno lapateʼniye. Mafaʼneʼapimogimo afoʼapimogi yaʼmo neʼaliya kava hutapa uta haita muki yaʼnimo aliyo. 35#Aiy 58:7Naga teʼnigetapaeʼmo neʼyaʼmo namige anifeʼmo nahauʼnigetapaeʼmo aniʼmo namige alu kotegatiʼmo eʼnogetapaeʼmo navaleliteta alitapa falu hutapa natege huʼnae. 36Kukenaʼnimo ohaneʼnigetapaeʼmo kukenamo aliniteta vaitapa natege kaita nahauʼnigetapaeʼmo eta yagaita natege kalavusifiʼmo maiʼnogetapaeʼmo eta nagege huʼnayaʼmofeʼmae, huno hapa paigiye. 37Fatago vayaʼmogimo huʼapaeʼmo, Ala kava nene, huʼa, Hainu afinaʼmo kageʼnonageka kaga teʼnigetaeʼmo neʼyaʼmo kamiʼnone. Hainu afinaʼmo anifeʼmo kahauʼnigetaeʼmo aniʼmo hefita kamiʼnone. 38Hainu afinaʼmo alu kotegatiʼmo eʼnanagetaeʼmo kavaleliteta alita falu huta kateʼnone. Hainu afinaʼmo kukenakamo ohaneʼnigeta aliniteta vaita kateʼnone. 39Hainu afinaʼmo kaita kahauʼnigetaeʼmo eta kageʼnone. Hainu afinaʼmo kalavusifiʼmo maiʼnanagetaeʼmo eta kageʼnone, huʼa afi gegae. 40#Mai 19:17; Mt 10:42; 18:5; Mk 9:41Ala kini vekaʼapimoʼmo hunoʼaeʼmo, lama ge lapa nepauve, huno, lapakaemo nagae vayapatiʼmo ina agufa naganaʼnimogitegamo ani kava huʼnaya kavaʼmo nagaetegageʼmo huʼnae, huno hapa paigiye.

41 # Mt 7:23; Le 20:10 Huno hapa paiteno hoga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo lifana huno lapateʼniya vayanagi nagaetegatiʼmo ataleta lapaune heta viyo. Gotiʼa Nevoʼe hosu apaune vayaʼaʼeʼmo maisayafeʼmo alo hu maleʼniya ata kopiʼmo leno yu oseno lege lege huno neʼmaiya ata kopiʼmo lamitapa maiyo. 42-43Naga teʼnigetapaeʼmo neʼyaʼmo oʼnamige anifeʼmo nahauʼnigetapaeʼmo aniʼmo hefita oʼnamige alu kotegatiʼmo eʼnogetapaeʼmo navaleliteta alita falu huta oʼnatege kukenaʼnimo ohaneʼnigetapaeʼmo aliniteta vaitapa oʼnatege kaita nahauʼnigetapaeʼmo yagaita oʼnatege kalavusifiʼmo maiʼnogetapaeʼmo yagaita oʼnatege huʼnayaʼmofeʼmae, huno hapa paigiye. 44Apakaemo huʼapaeʼmo, Ala kava nene, huʼa, hainu afinaʼmo kageʼnonageka kaga tege anifeʼmo kahauge alu kotegatiʼmo ege kukenakamo ohanege kaita kahauge kalavusifiʼmo maige huʼnanageta kaha oʼmaeʼnone, huʼa afi gegae. 45Afi gesagenoʼaeʼmo, lama ge lapa nepauve, huno, nagae vayapatiʼmo ina agufa naganaʼnimogitegamo ani kava osuʼnayaʼmofeʼmo nagaetegamo osuʼnae, huno hapa paigiye. 46#Nen 12:2; Yo 5:29He, agaemo kayotetiʼmo apamagime apamagime uno apamagino hano osugiyaʼmonanafa fatago vayaʼmo alagepa huʼa maige maige huʼa maigae, huno hapa paiʼniye.

Currently Selected:

Matiyu 25: kyg2013

Highlight

Copy