Aiyeya 60

Malaga vayaʼmo alu nofi vayaʼmogi eʼa Saiyoni vayaʼaifeʼmo huʼa auleʼa apategae, huno huʼniya gemae

1 # Aiy 52:1-2; Ef 5:8,14; Lu 1:78-79; 2:32 Saiyoni taoniyo, huʼna, he tika yegegana huka aeka ha lo. Ha le yatapimo alino lapamiʼniyanagi Ala kava neʼmo ha le konali yaʼamo eno afole aiteno lapakaeteʼmo aeno ha leʼniye. 2#Ap 26:18; Lo 1:21-32; Ham 3:3; Yo 1:14,18Afiyo, huʼna, Alopa haniʼmo hu kavaʼmoʼmo muki ma mopafi vayaʼmo aino apati kaegaiyaʼmonanafa Ala kava neʼmoʼa yegegana huno haineno lapakaeteʼmo aeno ha lesigeʼa ha le konali yatapimo agegae. 3#Aiy 49:6; Sam 98:2-3; Ap 13:47; Aep 49:7,23Malaga nofi vayaʼmogimo ani ha le yatapimo ageteʼapaeʼmo lapakaetegamo egae. Kini vayaʼmogiʼeʼmo ani lokiya ha le yatapimo ageteʼapaeʼmo he tiʼa lapakaetegamo egae.

4 # Yo 4:35; Ap 13:44; Mt 8:11; Ga 3:29 Lapakaemo lapakenopamo alita maku hutapa agelita utetapa hisayategamo ve mafaʼne anagatapimo magokepiʼmo aliʼa anupa huteʼa lapakaetegamo afagi kotegatiʼmo egae. A mafaʼne anagatapimo apavaleʼa hapaifiʼyaleʼmo apateteʼa apavaleliʼa lahapaopaleʼmo egae. 5#Hos 1:10; Le 21:26; Aiy 24:14-15; 60:11Kagaemo ani kavaʼmo neʼagesanagenoʼaeʼmo lapaugosafatiʼmo lusi kava huno aeno ha legaiye. Lahapau lapayamopamoʼmo aeno hailo hisigeno lusi kava huno lapamogaga aigiye. Lapakaemo malaga vayaʼmogi lapakaetegamo esagetapa kagemi yaʼapimo aligayaʼmofeʼmo lapamogaga aigae. 6#Aiy 45:14; Mal 1:11; Le 7:9-11Asole kamo afu anagaʼmo Mitiyani kotegatinagi Ifa kotegatinagi Sima kotegatinagi huʼa kagemi yaʼmo aliniʼa kagaetegamo egae. Sima kotegatiʼmo esaya kamo afu anagaʼmogimo goli yafaʼe atafiʼmo kaeʼnageno alagepa atumo neʼaiya yaʼeʼmo aliniʼa kagaetegamo egae. Esaya vayaʼmogimo Ala kava neʼmo ala agiʼaleʼmo aliʼa asaga huʼa ategae. 7#Aiy 56:7; Hi 13:15-16; Hag 2:7-9Kena vayaʼmogiʼe Nimeyoti vayaʼmogiʼeʼmo muki sipisipi anagaʼmo kagaetegamo apavaleliʼa egae. Apakaemo ani sipisipi ofalinimo yafa hiʼyalamuʼnileʼmo namisageʼna aliteʼnaeʼmo hapaoke hegauve. Nagaemo hale konali noʼnieʼmo ala agiʼamo amiguve.

8 # Aiy 60:4; 45:22 Haiya vayaʼmogimo yasimoʼmo hiyaʼmo avalelino neʼeya kava huʼa ege nama anagaʼmogimo apanotegamo haleliʼa neʼaya kava huʼa ege nehae. 9#Aiy 42:4,10; Yas 9:9; Aiy 55:5Alagi lama gemo huʼnaeʼmo, afagi kotega vayaʼmogimo nagava maigae. Nagava maiʼneʼa sipiʼapimo aliʼa atesageno lapakae mafaʼne anagaʼmo apavalelino lapakaetegamo egaiye. Aote Isaleli vayaʼmogi Gotiʼapimoʼmo ala lapakitapimo lapamigiyaʼmofeʼmo apakaemo Ala kava neʼmo Gotitapimo agiʼalefeʼmo siluvaʼe goli yafaʼeʼmo sipifiʼmo lapakaetegamo aliniʼa egae.

10 # Sak 6:15; Aiy 49:23; 54:8 Yulusalemuo, huʼna, alu nofi vayaʼmogimo eʼa taonile yafa kegiʼyatapimo hugae. Kini vayaʼapimogimo aliʼyatapimo aligae. Naipamo leʼnigeʼnaeʼmo lapamagiʼnovaʼmonanafa fiku lapa maeʼna lapamiʼnova afinaʼmo nahau huʼna lapateʼnove. 11#Le 21:25Nahau huʼna kategauvaʼmofeʼmo kegiʼyale kitamo felugaʼe haniʼilagaʼeʼmo afaʼa aino yakino haneʼnisigeʼa alu nofi vayaʼmogi kagemi yaʼapimo lapakaetegamo aliniʼa eʼapaeʼmo kini vayaʼapimo apavaleliʼa egae. 12#Aiy 41:11; Nen 2:35,44; Mt 21:44Haiya nofi vayaʼmofi haiya gamani vayaʼmogi yagaiʼnaya kegiʼyafiʼmo maiʼnaya vayaʼmofi huʼa lapaiyafiʼmo oʼmaige aliʼyatapimo oʼalige hisaya vayaʼmo alagi hano hugae. 13#Aiy 35:2; Sam 96:6Vayaʼmogimo Lepanoni aveletiʼmo ha le konali yosaʼamo lapakaetegamo aliniʼa egae. Saipalesi yosagi paini yosagi alu alagepa yosaʼenagi huʼa heʼya aiʼa mono noʼnimo ani yosaletiʼmo kisageno alagepa apaulagamo agesaya mono noʼmo hanegaiye. Naiyamo aeʼna neʼmauva noʼnimo ani ha le konali yatetiʼmo aliʼna alagepa huʼna ategauve. 14#Aiy 14:1-2; Sam 87:3Kana yaʼmo aliʼa lapamiʼnaya vayaʼmogi ve mafaʼne anagaʼapimogimo eʼa lapakaeteʼmo ape hugae. Apakameʼyamo lapamiʼnaya vayaʼmogimo lapaiya agusalegatiʼeʼmo aliʼa asagauʼa lapategae. Apakaemo lapakaefeʼmo huʼapaeʼmo, Ala kava neʼmo taoniʼafiʼmo maiʼnaya vayane, huʼa huge Isaleli vayaʼai aote Vekamoʼmo taoniʼamo Saiyoni taoniʼmae, huʼa huge huʼa lapaki aegae. 15#Aiy 49:14-23; Yel 33:11Yulusalemuo, huʼna, kagaefeʼmo apaini huteʼa kataleʼa uʼnayaʼmofeʼmo vayaʼmo kakaleʼmo uʼeʼa osuʼnae. Osuʼnayaʼmonanafa nagaemo hanege hanege huno hanesiya kanale hogote taonimo aliʼna hamaleʼna katesugeʼa muki kafugaʼae kafugaʼaeʼmo vayaʼmogimo kagaefeʼmo apamogaga aigae. 16#Aiy 61:6; 66:14; Iyi 34:30Itaʼapimogimo nute mafaʼneʼapimo nuʼmo neʼapamiya kava huʼa alu nofi vaya alu nofi vayaʼe kini vayaʼmogiʼeʼmo alagepa huʼa yagaiʼa lapategae. Lapakaemo Ala kava neʼmo nagegayana lagufamo alino katino nelateya vekamo maiʼniye. Isaleli nofi vayaʼmogita lokiya vekatimoʼmo miya faino hatu maeno lateʼniya vekamo maiʼniye.

17 # Aiy 30:26; Sak 12:8; 2 Pi 3:13 Nagaemo haesa aenimo aimuʼyaleʼmo goli yafaʼmo aliniʼna lapakaetegamo egauve. Aenimo aimuʼyaleʼmo siluva yafaʼmo aliniʼna egauve. Yosamo aimuʼyaleʼmo haesa aenimo aliniʼna egauve. Afa yafaʼmo aimuʼyaleʼmo aenimo aliniʼna egauve. Nagaemo yagaiʼa nelapataya vayatapimo alagepa huʼna hapa maesugeʼa alagepa huʼa yagaiʼa lapatesagetapa taonifiʼmo alagi alagepa hutapa maigae. Ina kava huʼna Gamani vayatapimo alagepa huʼna hapa maesugeʼa fatago kavaʼmo huʼa alagepa aliʼyaʼmo aligae. 18#Aiy 11:9; Sak 9:8; Aiy 26:1Kagae koteʼmo kaveta osuge kame ohapaege mago yaʼmo aliʼa hosu huʼa oʼatege hisagetapa alagepa huta maigae. Lapakaeteʼmo yafa kegiʼyatapimoʼmo faino vego huno lapateʼnisigetapa yuʼilaga afaʼa maiʼnetapaeʼmo kegiʼyamo alopa kipatapilefeʼmo ala agiʼamo amigae.

Gotiʼa vayaʼamo ha le konali yaʼamo maigae, huno huʼniya gemae

19 # Le 21:23; 22:5; Sam 62:7 Felugamo yegemoʼmo magoʼe huno aeno haleno lapatesiya yaʼmo ohanege haniʼilagamo kaimoʼmo magoʼe huno aeno haleno lapatesiya yaʼmo ohanege hugiyaʼmonanafa Ala kava neʼmoʼa muki afinaʼaeʼmo yu oseno aeno ha leno lapatesiya vekamo maigiye. Ina kava huno Gotitapimoʼmo ha le konali yatapimo maigiye. 20#Sam 84:11; Aiy 25:8; Le 7:15-17Lapakae yegeʼe kaiʼeʼmo uʼana lamiʼana falesaʼageno haniʼmo hisigetapa afaʼa oʼagegae. Na agufa kavaʼmo hinagetapaene. Nagaemo Ala kava neʼmoʼnamo muki kafugaʼae kafugaʼaeʼmo ha le yatapigana huʼna maiguve. Lapakaemo yulagefa neʼaiya afinaʼmo hano hugiye. 21#Aiy 4:3-4; Sam 37:11-12; Aiy 45:11; Ef 1:12Muki vayatapimo fatago vayaʼageʼmo maigae. Apakaemo mopa hetamaʼapimo aliteʼa ani mopaleʼmo maige maige huʼa maigae. Nagaemo ala nagiʼnimo alisuvafeʼmo vayatapimo saufamo fai maleʼnogeno muki nehageya yosagana huʼa maigae. Apakaemo nayatetiʼmo alo huʼnova vayaʼmo maigae. 22#Ap 5:14; Ham 2:3Afa vekamo lapakaeteʼmo maiʼnisiya vekamoʼmo asole nofi vayaʼmogi afoʼapimoʼmo hamalegaiye. Aise nofi vayaʼmogimo magoʼe huʼa asole vayaʼmo afole aigae. Nagaemo Ala kava neʼmoʼnamo ani kavaʼmo malage huʼna aliʼna afole aiʼna atesugeno lekana pai maleʼnova afinaʼmo afole aigiye.

Currently Selected:

Aiyeya 60: kyg2013

Highlight

Copy

Compare