Popular Bible Verses from Aiyeya 60

Share

Saiyoni taoniyo, huʼna, he tika yegegana huka aeka ha lo. Ha le yatapimo alino lapamiʼniyanagi Ala kava neʼmo ha le konali yaʼamo eno afole aiteno lapakaeteʼmo aeno ha leʼniye.

Malaga nofi vayaʼmogimo ani ha le yatapimo ageteʼapaeʼmo lapakaetegamo egae. Kini vayaʼmogiʼeʼmo ani lokiya ha le yatapimo ageteʼapaeʼmo he tiʼa lapakaetegamo egae.

Afiyo, huʼna, Alopa haniʼmo hu kavaʼmoʼmo muki ma mopafi vayaʼmo aino apati kaegaiyaʼmonanafa Ala kava neʼmoʼa yegegana huno haineno lapakaeteʼmo aeno ha lesigeʼa ha le konali yatapimo agegae.

Afa vekamo lapakaeteʼmo maiʼnisiya vekamoʼmo asole nofi vayaʼmogi afoʼapimoʼmo hamalegaiye. Aise nofi vayaʼmogimo magoʼe huʼa asole vayaʼmo afole aigae. Nagaemo Ala kava neʼmoʼnamo ani kavaʼmo malage huʼna aliʼna afole aiʼna atesugeno lekana pai maleʼnova afinaʼmo afole aigiye.

Felugamo yegemoʼmo magoʼe huno aeno haleno lapatesiya yaʼmo ohanege haniʼilagamo kaimoʼmo magoʼe huno aeno haleno lapatesiya yaʼmo ohanege hugiyaʼmonanafa Ala kava neʼmoʼa muki afinaʼaeʼmo yu oseno aeno ha leno lapatesiya vekamo maigiye. Ina kava huno Gotitapimoʼmo ha le konali yatapimo maigiye.

Lapakae yegeʼe kaiʼeʼmo uʼana lamiʼana falesaʼageno haniʼmo hisigetapa afaʼa oʼagegae. Na agufa kavaʼmo hinagetapaene. Nagaemo Ala kava neʼmoʼnamo muki kafugaʼae kafugaʼaeʼmo ha le yatapigana huʼna maiguve. Lapakaemo yulagefa neʼaiya afinaʼmo hano hugiye.

Kagaemo ani kavaʼmo neʼagesanagenoʼaeʼmo lapaugosafatiʼmo lusi kava huno aeno ha legaiye. Lahapau lapayamopamoʼmo aeno hailo hisigeno lusi kava huno lapamogaga aigiye. Lapakaemo malaga vayaʼmogi lapakaetegamo esagetapa kagemi yaʼapimo aligayaʼmofeʼmo lapamogaga aigae.

Lapakaemo lapakenopamo alita maku hutapa agelita utetapa hisayategamo ve mafaʼne anagatapimo magokepiʼmo aliʼa anupa huteʼa lapakaetegamo afagi kotegatiʼmo egae. A mafaʼne anagatapimo apavaleʼa hapaifiʼyaleʼmo apateteʼa apavaleliʼa lahapaopaleʼmo egae.

Muki vayatapimo fatago vayaʼageʼmo maigae. Apakaemo mopa hetamaʼapimo aliteʼa ani mopaleʼmo maige maige huʼa maigae. Nagaemo ala nagiʼnimo alisuvafeʼmo vayatapimo saufamo fai maleʼnogeno muki nehageya yosagana huʼa maigae. Apakaemo nayatetiʼmo alo huʼnova vayaʼmo maigae.

Kagae koteʼmo kaveta osuge kame ohapaege mago yaʼmo aliʼa hosu huʼa oʼatege hisagetapa alagepa huta maigae. Lapakaeteʼmo yafa kegiʼyatapimoʼmo faino vego huno lapateʼnisigetapa yuʼilaga afaʼa maiʼnetapaeʼmo kegiʼyamo alopa kipatapilefeʼmo ala agiʼamo amigae.

Nahau huʼna kategauvaʼmofeʼmo kegiʼyale kitamo felugaʼe haniʼilagaʼeʼmo afaʼa aino yakino haneʼnisigeʼa alu nofi vayaʼmogi kagemi yaʼapimo lapakaetegamo aliniʼa eʼapaeʼmo kini vayaʼapimo apavaleliʼa egae.

Asole kamo afu anagaʼmo Mitiyani kotegatinagi Ifa kotegatinagi Sima kotegatinagi huʼa kagemi yaʼmo aliniʼa kagaetegamo egae. Sima kotegatiʼmo esaya kamo afu anagaʼmogimo goli yafaʼe atafiʼmo kaeʼnageno alagepa atumo neʼaiya yaʼeʼmo aliniʼa kagaetegamo egae. Esaya vayaʼmogimo Ala kava neʼmo ala agiʼaleʼmo aliʼa asaga huʼa ategae.

Yulusalemuo, huʼna, alu nofi vayaʼmogimo eʼa taonile yafa kegiʼyatapimo hugae. Kini vayaʼapimogimo aliʼyatapimo aligae. Naipamo leʼnigeʼnaeʼmo lapamagiʼnovaʼmonanafa fiku lapa maeʼna lapamiʼnova afinaʼmo nahau huʼna lapateʼnove.

Yulusalemuo, huʼna, kagaefeʼmo apaini huteʼa kataleʼa uʼnayaʼmofeʼmo vayaʼmo kakaleʼmo uʼeʼa osuʼnae. Osuʼnayaʼmonanafa nagaemo hanege hanege huno hanesiya kanale hogote taonimo aliʼna hamaleʼna katesugeʼa muki kafugaʼae kafugaʼaeʼmo vayaʼmogimo kagaefeʼmo apamogaga aigae.

Itaʼapimogimo nute mafaʼneʼapimo nuʼmo neʼapamiya kava huʼa alu nofi vaya alu nofi vayaʼe kini vayaʼmogiʼeʼmo alagepa huʼa yagaiʼa lapategae. Lapakaemo Ala kava neʼmo nagegayana lagufamo alino katino nelateya vekamo maiʼniye. Isaleli nofi vayaʼmogita lokiya vekatimoʼmo miya faino hatu maeno lateʼniya vekamo maiʼniye.