Neniyo 3

Nepukanesaʼa muki vayaʼaifeʼmo, alo huʼnova auneʼalefeʼmo mono hiyo, huno huʼniya gemae

1Nepukanesaʼmo ina ge huno huʼniye. Lapakaemo goliletiʼmo mago vaya kanomo auneʼamo alo hiyo, huno huʼnigeʼa alo huʼnae. Ani aunemo yatalaʼamo tuveti seveni mita hanete alopaʼamo tali mita hanete huʼniye. Apakaemo Mamiloni palovenisifiʼmo Nula otu haopalegamo aliʼa he tiʼa ateʼnae. 2Ali he tiʼa ateteʼapaeʼmo kini vekamoʼmo hunoʼaeʼmo, neʼyagaiya vayaʼaifenagi hogote vayaʼaifenagi napa tu vayaʼaifenagi kanisole vayaʼaifenagi gamani monileʼmo neʼyagaiya vayaʼaifenagi yasi vayaʼaifenagi alu kotegamo gamani aliʼyaʼmo neʼaliya vayaʼaifenagi hutapa ge hutapa alita anupa hiyo. Mono hisunafeʼmo alo huʼnova auneʼamo alita afole aita ategauvanagi eyo, hutapa hapa paiyo, huno huʼniye. 3Inagi muki ani gamanile ala vayaʼmo ani aunelefeʼmo amuse huʼa mono hisayafeʼmo eʼa aliʼa anupa huteʼa ani aune yaʼmo aulagamo he tiʼa maiʼnae. 4Inagi gamani vayaʼaipati ge aeno hakalo nehiya vekamoʼmo keya aeno alopa gefatiʼmo hunoʼaeʼmo, 5Lapakaemo muki kotega vayanagi muki nofi vayanagi muki alu apake alu apake neʼaiya vayanagi hutapa afiyo. Pikulimoʼagi feliyopaʼmoʼagi muki alu age alu age neʼaiya yaʼmoʼagi huno age aisigetapa neʼafitapaeʼmo asagautapa aitetapa kini vekamo Nepukanesaʼmo alino he tino ateʼniya auneʼalefeʼmo mono hiyo. 6Mago vekamoʼmo asagauno aiteno auneʼalefeʼmo mono osisiya vekamo lagaemo malage huta alopa sitopufi neleya atafiʼmo asagauta yaga augune. 7Ani gemo afiyaʼmofeʼmo alu age alu agemo aiʼnigeʼa afiteʼapaeʼmo muki alu kote alu kote vayanagi muki nofi vayanagi muki alu apake alu apake neʼaiya vayanagi huʼa kini vekamo Nepukanesaʼmo alino he tino ateʼniya auneʼalefeʼmo asagauʼa aiteʼa mono huʼnae.

Neniyo ao vayaʼmogimo kini vekaeʼmo, gekamo akame osugune, huʼa huʼnaya gemae

8 # Nen 6:12-13 Inagi ani afinaʼmo mago Mamiloni vayaʼmo kini vekalegamo eʼa Yuta vayaʼmo agoti huʼa apateʼnae. 9Apakaemo kini vekaeʼmo ha paiʼapaeʼmo, kini vekae, huʼa, muki afinaʼmo alagepa huka maiyo. 10Kagaemo keʼaepa gemo ago hu maleʼnane. Kagaemo hukaeʼmo, Alu age alu age aisigetapaeʼmo asagauta aitetapa goli auneʼalefeʼmo mono hiyo, huka huʼnane. 11Mago vekamoʼmo asagauno aiteno mono osisigeʼapaeʼmo alopa sitopufi neleya atafiʼmo asagauʼa yaga augae, huka laha paiʼnane. 12Mago Yuta vayaʼmogimo Mamiloni polovenesile yagaisayafeʼmo lekana paika apateʼnana vayaʼmo Satalakiʼagi Misakiʼagi Ameʼnagoʼagi huʼa kagaefeʼmo apakesa oʼafiʼa gekamo ago amagiʼa ataleʼnae. Apakaemo gotikamogi aliʼyaʼapileʼmo oʼmaige alika he tika atana goli auneʼalefeʼmo mono osuge huʼnae. 13#Nen 2:12; 3:19Nepukanesaʼmo ani gemo afitenoʼaeʼmo lusi kava huno aipamo leʼnigeno hapa painoʼaeʼmo, Satalakiʼagi Misakiʼagi Ameʼnagoʼagi hutapa apavalelita eyo, huno huʼnigeʼa apavaleli eʼnae. 14Nepukanesaʼmo apakaefeʼmo hunoʼaeʼmo, O Satalakiyo, O Misakiyo, O Ameʼnago, huʼna, gotiʼnimogi aliʼyaʼapileʼmo oʼmaige nagaemo aliʼna he tiʼna ateʼnova goli auneʼalefeʼmo mono osuge huʼnafiye. Apakaemo lapakaefeʼmo lapavage huʼnaya gemo lama ge huʼnafiye. 15#2 Kin 18:35Lapakaemo alo huʼnisayana alu age alu ageʼmo neʼafitapaeʼmo asagauta aitapa alo huʼnova auneʼalefeʼmo mono hisayana kanalene. Ani kava osisayaʼmoʼmo hemenitomo alopa sitopufi neleya atafiʼmo lapasagauʼa yaga augae. Haiya goti lapa maeno nayapatiʼmo lapakufamo alino katino lapategaiye. 16#Mt 10:19Inagi Satalakiʼagi Misakiʼagi Ameʼnagoʼagi huʼa kini vekaeʼmo huʼapaeʼmo, O Nepukanesao, huʼa, alu gemo kaha opaigune. 17#1 Sam 17:37Kagaemo huʼnana agufa kavaʼmo lagaetegamo hisanaʼmoʼmo aliʼyaʼamo neʼaluna Gotitimoʼa alopa sitopufiʼmo neleya atafatiʼmo lagufamo afaʼa alino katino lategaiye. O kini vekae, huta, kayapatiʼmo lagufamo afaʼa alino katino lategaiye. 18#Yop 13:15Alino katino lategaiyaʼmonanafa laha maeno lagufamo alino katino olatesiyaʼmoʼmo afa afiganana gotikamogi aliʼyaʼapimo alagi oʼalita goli yafatetiʼmo alo huteka alika he tika ateʼnana auneʼalefeʼmo alagi mono osugune, huʼa huʼnae.

Gotiʼa atafatiʼmo apakufamo alino katino apateʼniya gemae

19Nepukanesaʼa ani gemo afitenoʼaeʼmo lusi kava huno aipa leʼnigeno ani vayaʼaifeʼmo augosamo alino lokiya vaiʼniye. Agaemo aliʼyaʼamo neʼaliya vayaʼaifeʼmo hunoʼaeʼmo, atamo kaegeno lusi kava huno leno amuko hino, huno huʼniye. Mago afinaʼmo kaeʼnigeno leno amuko nehiya kavaʼmo ago aeno aga seno magoʼe huno leno amuko huʼniye. 20Agaemo ami vayapatiʼmo lokiya kamemo nehaya ami vayaʼaifeʼmo hunoʼaeʼmo, Satalakiʼagi Misakiʼagi Ameʼnagoʼagi hutapa nofi kita apatetetapa apasaugauta atafi yaga aiyo, huno hapa paiʼniye. 21Apakaemo loleʼe magoʼe vayaʼmo kukena yaʼapiʼeʼmo nofi kiʼa apateteʼa alopa atafiʼmo apasagauʼa yaga auʼnae. 22Kini vekamoʼmo lokiya gemo huʼniyaʼmofeʼmo atamo kaeʼnageno lusi kava huno leno amuko huʼniya yapiʼmo Satalakiʼagi Misakiʼagi Ameʼnagoʼagi huʼa apavaleliʼuʼa apasagauʼa atafiʼmo yaga auʼnaya ati vayaʼmo ago alagi apaleʼnigeʼa faliʼnae. 23Nofi kiʼa apataya vayaʼmo Satalakiʼagi Misakiʼagi Ameʼnagoʼagi huʼa atamo folagaʼafiʼmo asagau aiʼnae. 24Nepukanesaʼmo lusi kava huno apakeno hau aiteno malage huno he tino alagepa aipa agesamo neʼamiya vayaʼaifeʼmo hunoʼaeʼmo, lagaemo loleʼe magoʼe vayaʼmo nofi kita apateteta atafiʼmo apasagauta yaga auʼnopiye, huno ge huno apafi geʼnigeʼapaeʼmo, he, huʼa, ala kini vekae, huʼa, lagaemo ani kava huʼnone, huʼa ha paiʼnae. 25#Aiy 43:2Inagi agaemo hunoʼaeʼmo, Ageyo, huno, Nagaemo atafiʼmo loleʼe loleʼe vayaʼmo nofi kiʼa oʼapateʼnageʼa aiʼa hakalu heʼa uʼeʼa nehae. Atamoʼeʼmo apakaemo noʼapale. Napa fo vekamo mago gotigi mafaʼnegana huʼna neʼagove, huno huʼniye.

Atamoʼmo Satalakiʼagi Misakiʼagi Ameʼnagoʼagi huno oʼapaleʼniya gemae

26Inagi Nepukanesaʼmo sitopuʼmo kipa haopaletiʼmo uno ina ge huno huʼniye. Satalakigagi Misakigagi Ameʼnagogagi hutapa lapakaemo alagi anaga Goti aliʼyaʼamo neʼaliya vayanagi emiteyo. Inagi apakaemo atafatiʼmo ataleʼa emiʼeʼnae. 27#Hi 11:34Neʼyagaiya vayanagi hogote vayanagi napa tu vayanagi kini vekamo kanisole vayaʼagi huʼa apakesayafeʼmo eʼa aliʼa anupa huʼa maiʼnae. Apakaemo apakeʼnayana ata apaleʼniya apakufamo mago ohaneʼnigeno apakufaleʼmo atamo avamusaʼmo ohaneʼniye. Atamoʼmo apakenopa apayokaʼmo apaleno hapafo osuge kukenaʼapimo olege halina atumo apakufaleti oʼaige huʼniye. 28Nepukanesaʼmo hapa painoʼaeʼmo, Vayaʼmogimo Satalakiʼagi Misakiʼagi Ameʼnagoʼagi huʼa Gotiʼapimoʼmo alita auletapa ateyo. Agaemo enisole vekaʼamo alino ateʼnigeno emineno agaefeʼmo mono huteʼa aliʼa amufa amiʼnaya vayaʼai apakufamo alino katino apateʼniye. Apakaemo geʼnimo amagiʼa ataleteʼa apakufamo falisaya kavaʼmo afaʼa amiʼnae. Gotiʼapimotefeʼmo mono hisaya kavafekeʼmo hapauʼniyaʼmofeʼmae. 29Satalakiʼagi Misakiʼagi Ameʼnagoʼagi huno gotiʼapimoʼmo hapa maeya agufa kava huno mago gotiʼa vayaʼamo hapa oʼmagaiye. Hemenimo nagaemo mago keʼaepa gemo hu malove. Ani Gotifeʼmo huʼa faipa huʼa oʼateyo. Haiya kotega vayaʼmogimofi haiya nofi vayaʼmogimofi haiya agufa apake neʼaisaya vayaʼmogimofi huʼa agaefeʼmo hosu gemo hisayaʼmoʼmo apakufamo aiʼa atalagausageʼa faligae. Inagi noʼapimo heʼa halagape vaiʼa atalesageno no atufaʼageʼmo hanegaiye. 30Kini vekamoʼmo ani ge hutenoʼaeʼmo Satalakiʼagi Misakiʼagi Ameʼnagoʼagi huno Mamiloni koteʼmo akeyaʼvilaga aliʼnaya aliʼyaʼmo aeno aga seʼniya aliʼyaʼmo apamiʼniye.

Currently Selected:

Neniyo 3: kyg2013

Highlight

Copy

Compare