Neniyo 2
2
Nepukanesaʼa alagamunamo ageʼniya gemae
1 #
Est 6:1
Nepukanesaʼa lole kafugamo kini vekamo maiʼnenoʼaeʼmo mago haniʼilagamo alagamuna ageʼniyana lusi kava huno aipamoʼmo kana huʼnigeno magoʼe huno au okaleno maiʼniye. 2#Hat 7:11Inagi agaemo apaune vayaʼaitegagi afole aisiya kavaʼmo agesayafeʼmo kanefi ageʼa aiyaka neʼaliya vayaʼaitegagi vayaʼai apaipafiʼmo neʼagaya vayaʼaitegagi huno ge huno atalegeno uʼniye. Apakaemo eʼa kini vekamo aulagaleʼmo he tiʼnae. 3#Nen 6:6,21Kini vekamoʼmo hunoʼaeʼmo, Nagaemo mago alagamuna ageʼnovanageʼna aepaʼamo afisuvafeʼmo naipamo he tiʼniye, huno huʼnigeʼa 4apakaemo Alame apakefatiʼmo huʼapaeʼmo, O kini vekae, huʼa, alagepa huka maiyo. Kagaemo aliʼyakamo neʼaluna vayaʼmo alagamuna gemo laha paigeta aepaʼamo kaha paino, huʼa huʼnae. 5Kini vekamoʼmo geʼapileʼmo aeno atagaina hunoʼaeʼmo, Ani gemo ago alagike huʼnovanagetapa alagamuna ge aepaʼamo naha opaisayana ati vayaʼnimogimo naipeletiʼmo lapaiya lapayaʼmo hatagausagetapa faligae. Notapimo heʼa halagape vaiʼa atalesageno no atufaʼageʼmo hanegaiye. 6#Nen 5:16Hanegaiyaʼmonanafa alagamuna gemo aepaʼamo naha paisayana nagaemo miyaʼmo lapamige ala lapakitapimo lapamige huʼna fikumo lapamiguvaʼmofeʼmo alagamuna gemo aepaʼamo naha paiyo, huno huʼniye. 7Apakaemo halate geʼaleʼmo aeʼa atagaina huʼa huʼapaeʼmo, kini vekamo aliʼyaʼamo neʼaluna vayaʼamogitaeʼmo alagamuna gemo laha paisigeta aepaʼamo ha paigune, huʼa ha paiʼnae. 8Kini vekamoʼmo geʼapileʼmo aeno atagaina hunoʼaeʼmo, Lapakaemo afiʼnayana geʼaleʼmo alu gemo osugiye, hutapa ago afiʼnayaʼmofeʼmo afaʼa maitapa falu hisaya afinaʼmo alisayafeʼmo nehae. 9Lapakaemo alagamuna gemo naha opaisayaʼmoʼmo hu maleʼnova kavaʼmo lapakaeteʼmo alagi afole aigiye. Aigofe geletiʼmo humi atelita neʼvisunageno alu kava hugiye, hutapa vege hu maleʼnetapaeʼmo nehayaʼmofeʼmo alagamuna gemo naha paisageʼna afiteʼnaeʼmo aepaʼamo afaʼa naha paigae, huʼna huguve, huno hapa paiʼniye. 10Apakaemo ani gemo afiteʼapaeʼmo, Muki ma mopafi vayapatiʼmo magoke vekamoʼmo ani ageʼnana kavapifeʼmo afaʼa kaha opaigiye. Mago kini vekamoʼmofi ala vekamoʼmofi yagaiʼniya vekamoʼmofi huno ani agufa kavafeʼmo apaune vayaʼaifenagi afole aisiya kavaʼmo agesayafeʼmo kanefi ageʼa aiyaka neʼaliya vayaʼaifenagi Kalati nofi vayaʼaifenagi huʼa ge huʼa apafi okeʼnae. 11#Nen 5:11Kini vekamoʼmo lusi kava huno lokiya vaiʼniya kavafeʼmo ge huno lafi geʼniye. Muki ma mopafiʼmo vayapatiʼmo magoke vekamoʼmo ani kavafeʼmo kaha opaigayaʼmonanafa ma mopafi oʼmaiya gotigigeʼmo afaʼa kaha paigae, huʼa huʼnageno 12kini vekamo magoʼe huno lusi kava huno aipamo leʼnigeno, Mamiloni kotegamo muki afiteʼa ageʼnaya vayaʼmo kamitimo apamagiyo, huno huʼniye. 13Kamitimo apamagisayafeʼmo ati vayaʼaitegamo ge huno atalegeno uʼniye. Ati vayaʼmogimo afiteʼapaeʼmo uʼa afiteʼa ageʼnaya vayaʼmo kamitimo apamagiʼnae. Apakaemo uʼa Neniyoʼe ao vayaʼeʼmo kamitimo apamagisayafeʼmo kahauya huʼnae.
Gotiʼa Neniyoʼmo alagamuna gemo aepaʼamo alino ave liʼniya gemae
14Inagi kini vekamo ati vayaʼaleʼmo yagaiʼniya vekamo Aliyokiʼmo Mamiloni kote afiteʼa ageʼnaya vayaʼmo kamitimo apamagisiyafeʼmo uʼniye. Uno maiʼnigenoʼaeʼmo agaetegamo Neniyoʼa uno alagepa huno agesa afiteno geʼaletiʼmo Aliyokifeʼmo ina ge huno ge huno afi geʼniye. 15Na kava huʼnigenoʼaeʼmo kini vekamoʼmo malage huno afole aisiyafeʼmo lokiya gemo huʼniye, huno afi geʼnigeno Aliyokiʼa afole aiʼniya kavafeʼmo Neniyofeʼmo ha paiʼniye. 16Neniyoʼa ani gemo afitenoʼaeʼmo kini vekalegamo uno ha painoʼaeʼmo, Mago afinaʼmo nagava maiʼnegeʼnao alagamuna gemo aepaʼamo kaha paiguve, huno ha paiʼniye. 17Inagi Neniyoʼa noʼalega uno kini vekamoʼmo huʼniya gemo ao vayaʼmo Hananaiyafenagi Misagelifenagi Asalaiyafenagi huno hapa paiʼniye. 18#Mt 18:19Agaemo ani gemo huno hapa paiʼniye. Lagaemo kokuʼnapi maiʼniya Gotiʼa hau huno lateteno ani fala kiʼniya alagamuna gemo aepaʼamo alino lave lisiyafeʼmo agaefeʼmo nunumuʼmo hugune. Alino lave lisigetaeʼmo lagaeʼe alu vayaʼmo afiteʼa ageʼnaya Mamiloni vayaʼeʼmo magokepiʼmo ofaligune. 19#Yop 33:15-16Haniʼilagamo Gotiʼa Neniyoʼmo alagamuna kategamo kini vekamo alagamuna gemo aepaʼamo alino ave liʼniye. Neniyoʼa agetenoʼaeʼmo kokuʼnapi maiʼniya Gotiʼa alino auleno ateʼniye. 20#Sam 113:2; Yel 32:19Neniyoʼa hunoʼaeʼmo, Muki afinaʼmo Goti agiʼamo aliʼa auleʼa atege atege huʼa maigae. Afiteno ageʼniya kavaʼamogi lokiya kavaʼamogi huno agaiʼa yaʼmo haneʼniyaʼmofeʼmo aulena agiʼamo hanegaiye. 21#Nen 7:25; Sam 75:6-7Agaemo afinaʼe kanaʼeʼmo alino alu afinaʼe kanaʼeʼmo alino afole aino neʼate. Agaemo mago kini vayaʼmo alino hapafaino apataleteno mago alu kini vayaʼmo alino he tino neʼapate. Agaemo afiteʼa neʼagaya vayaʼaina afiteʼa agesaya kavaʼmo alino neʼapamiye. Agaemo afiʼnaya vayaʼaina afiʼa ha nelaya kavaʼmo alino neʼapamiye. 22#Yop 12:22; Sam 139:11-12Agaemo aeno ati kaeno alagi huʼniya kavaʼmo alino apave neliye. Agaemo hanipi haneʼniya kavaʼmo ha le yaʼmo agaeʼeʼmo lokaeno haneʼnigeno ageʼniye. 23#Nen 2:18O Gotiyo, huʼna, naginago vayaʼmogi Gotiʼapimogae, huʼna, kahaoke heʼna ala kagikamo nekamuve. Kagaemo afiteʼna ageʼnova kavaʼe himamuʼniʼeʼmo namiʼnane. Lagaemo nunumuʼmo huta ge huta kafi geʼnonageka ago alika nave liʼnane. Kini vekamoʼmo, aepaʼamo naha paiyo, huno huʼnigekaeʼmo alagamuna gemo aepaʼamo ago alika lave liʼnane, huno huʼniye.
Neniyoʼa alagamuna gemo aepaʼamo kini vekaeʼmo ha paiʼniya gemae
24Inagi Neniyoʼmo Aliyokitegamo uʼniye. Kini vekamoʼmo Aliyokifeʼmo afiteʼa ageʼnaya Mamiloni vayaʼmo kamitimo apamagiyo, huno lekana paino ateʼniya vekalegamo uno ha painoʼaeʼmo, Kagaemo afiteʼa ageʼnaya vayaʼmo kamitimo oʼapamagiyo. Navalelika kini vekalegamo ugeʼna alagamuna gemo aepaʼamo ha paiguve, huno huʼniye. 25Inagi Aliyokiʼa malage huno Neniyoʼmo avalelino kini vekalegamo uno kini vekaeʼmo ha painoʼaeʼmo, nagaemo ageʼnovana mani Yuta nofi vekamo kalavusi huka ateʼnana vekamoʼmo alagamunakamo aepaʼamo afaʼa kaha paigiye. 26Kini vekamoʼmo Neniyoʼmo alu agiʼamo Melitesasafeʼmo ha painoʼaeʼmo, Kagaemo ageʼnova alagamuna geʼe aepaʼaʼeʼmo afaʼa naha paigapiye, huno ge huno afi geʼniye. 27Neniyoʼa geʼaleʼmo aeno atagaina hunoʼaeʼmo, Afiteʼa ageʼnaya vayaʼmofi kanefiʼmo ageʼa aiyaka neʼaliya vayaʼmofi apaune vayaʼmofi afole aisiya kavafeʼmo ava gemo huʼa nehaya vayaʼmogimofi huʼa ageʼnana alagamunamo fala kiʼniya aepaʼamo afaʼa kaha opaigae. 28#Aep 49:1Afaʼa kaha opaigayaʼmonanafa kokuʼnapi maiʼniya Gotiʼa fala kiʼniya kavaʼmo afaʼa alino apave neliye. Agaemo kini vekamo Nepukanesaʼa atupa afinaʼmo afole aisiya kavaʼmo alino ave liʼniye. Kagaemo hipakaleʼmo havaeʼnekaeʼmo ageʼnana alagamuna gemo aepaʼamo haneʼniyana 29O kini vekae, huʼna, Kagaemo kau kaleʼnanagenoʼaeʼmo Gotiʼa henagaʼamo afole aisiya kavaʼmo alagamuna kategatiʼmo alino kave liʼniye. Ani Gotiʼa agaemo fala kino haneʼniya yaʼmo alino afole neʼaiya Gotiʼmogeno afole aisiya kavaʼmo alino kave liʼniye. 30#Ap 3:12Gotiʼa ani fala kiʼniya gemo alino nave liʼniye. Afiteʼna ageʼnova kavatetiʼmo alu vayaʼmogi afiteʼa ageʼnaya kavaʼmo aeʼna apaka seʼnovaʼmofeʼmo alino nave oliʼnifa kagaemo laha maege alagamuna gemo aepaʼamo agege hisanafeʼmo alino nave liʼniye. 31O kini vekae, huʼna, Kagaemo ageʼnanana mago vekamo auneʼamo kanale alopa aunegeʼmo he tiʼnigeka agetekaeʼmo kahau aika atete huʼnane. 32-33Auneʼmo agenopaʼamo alagepa goliletiʼmo alo huge haifiʼyaʼe lole ayatalaʼeʼmo siluvatetiʼmo alo huge afafaʼamo haesa aeniletiʼmo alo huge lole aiyalaʼmo aeniletiʼmo alo huge afelaga lole aiya agusalaʼmo aeniʼe kalipa mopaletiʼeʼmo alo huge huʼniye. 34#Sak 4:6Kagaemo neʼaganagenoʼaeʼmo mago vekamo ma mopafiʼmo oʼmaiʼniya vekamoʼmo yafa avefatiʼmo amagino anaku paetalegeno asagauno aino emineno ani auneʼmo aeniʼe kalipa mopaletiʼeʼmo alo hu maleʼnaya aiyaleʼmo neʼamagigeno aino atagino aise aise huʼniye. 35#Hos 13:3Muki aenigi kalipa mopagi haesa aenigi siluva yafanagi goli yafanagi huno muki yaʼamo aino atagino aise aise huno ataleʼnigeno haletiʼya yakana huno afole aiʼniye. Yasimoʼmo ago alino halelino uno alagi lageso huʼnigeno ohaneʼniye. Ani auneʼaleʼmo amagiʼniya yafaʼmoʼa alopa avemo alino hamaleteno ma mopafiʼmo muki haopalega uneno huno haneʼniye. 36Ani alagamuna gemo haneʼniye. Inagi hemenimo nagaemo aepaʼamo kaha paiguve. 37#Yel 27:6-7; Esa 1:2Kini vekae, huʼna, Kagaemo hogote kini vekamogeka muki kini vayaʼmo ago aeka apaka seʼnane. Kokuʼnapi maiʼniya Gotiʼa lekana paino kateʼnigeka maiʼnanagenoʼaeʼmo alopa lokiyakagi himamukagi ala kagikagi huno kamiʼniye. 38Agaemo muki nofi vayaʼaitenagi muki afu anagaʼaitenagi nama anagaʼaitenagi huka yagaisanafeʼmo lekana paino kateʼniye. Agaemo alino kayapiʼmo alino apateʼnigeka mukiʼamogiteʼmo yagaika neʼapatane. Goliletiʼmo alo huʼnaya agenopamo kagaemae. 39#Nen 5:28,31Alu kini vekamo kagae kakamelegatiʼmo henagaʼamo afole aigiyaʼmonanafa kagaekana huno lokiya kini vekamo oʼmaigiye. Henagaʼamo napa talimo afole aisiya kini vekamo haesa aenigana huno maiʼneno ma mopafiʼmo muki haopalegamo yagaigiye. 40#Nen 7:7Napa fomo afole aisiya kini vekamoʼmo aenigana huno magoʼe huno lokiya vaigiye. Aenimoʼmo muki yaʼmo amagino aino latapaino aise aise nehiya kava huno ani kini vekamoʼmo yagaino apateteno apamagino aino latapaino aise aise huno alino hano huno apatalegaiye. 41Kagaemo alagamuna ageʼnana aiyagi aginagogi huʼa kalipa mopaʼe aeniletiʼmo alo huʼniya auneʼmo ageʼnane. Ani kava huʼa kini vekamoʼmo yagaino apatesiya vayaʼmo aliʼa fako hugae. Fako hugayaʼmonanafa lokiya aenigana huno hanesigeʼa yagaino apatesiya vayaʼmo lokiya vaiʼa maigae. 42Aiya aginagomo aeniʼe kalipa mopaletiʼmo alo huʼniya kava huno vayaʼaiteʼmo yagaino apatesiya kavaʼmoʼa lokiyaʼamo hanege lokiyaʼamo ohanege hugiye. 43Ageʼnana aeniʼe kalipa mopaʼeʼmo magokepiʼmo lokaeʼana haneʼnaʼa kava huʼa ani vayaʼmo magokepi lokaeʼa maigayaʼmonanafa aeniʼe kalipa mopaʼeʼmo alagepa huʼana magokepi nohanaʼa kava huʼa alagepa huʼa magokepi lokaeʼa oʼmaigae. 44#Aiy 60:12Inagi ani teniʼa kini vayaʼmo maisaya afinaʼmo Gotiʼa mago kini vekamo alino afole aino atesigeno muki afinaʼmo yagaino apatege apatege huno maigiye. Mago alu kini vayaʼmo afole aiteʼa Gotiʼa alino afole aino atesiya kini vekamo afaʼa aliʼa afepi oʼategayaʼmonanafa agaekeʼmo alino afepi apateteno muki kini vayaʼmo alino hosu huno apataleteno agaemo muki afinaʼmo alagepa huno yagaino apatege apatege huno maigiye. 45Kagaemo ageʼnanana yafaʼmo ma mopafi oʼmaiʼniya vekamoʼmo yafa avefatiʼmo amagino anaku paetalegeno asagauno aino emineno ani auneʼamo aeniletinagi haesa aeniletinagi kalipa mopaletinagi siluva yafatetinagi goli yafatetinagi huno alo huʼniya yaʼmo amagino aino atagino aise aise huʼnigeka ageʼnane. Ala kava neʼmo Gotiʼa ageʼnana kavaʼmo henagaʼmo afole aisiya kavaʼmo alino kave liʼniye. Kaha pauva kavaʼmo alagi afole aigiye. Alagamunakamo aepaʼaeʼmo alagi lama gemo huʼna kaha pauve.
Kini vekamoʼmo Neniyoʼmo ala agi amiʼniya gemae
46 #
Ap 10:25
Kini vekamo Nepukanesaʼa ani gemo afitenoʼaeʼmo Neniyo aiyafiʼmo asagauno aitenoʼaeʼmo, Neniyoʼmo ofalinimo amitetapa agaetefeʼmo alagepa atu neʼaiya laʼnefamo atafi kaeyo, huno hapa paiteno 47Neniyofeʼmo ha painoʼaeʼmo, Gotikamoʼmo muki alu gotigimo ago aeno apaka seʼniye. Agaemo muki kini vayaʼaiteʼmo yagaino neʼapate. Kagaemo ani fala kiʼniya gemo naha paiʼnanaʼmofeʼmo nagaemo afiʼnovana Gotikamoʼmo fala kiʼniya gemo alino apave neliye, huno huʼniye. 48Kini vekamoʼmo Neniyoʼmo alopa aliʼyaʼaleʼmo maisiyafeʼmo avaleno ateteno asole yaʼmo fikumo amiʼniye. Kini vekamoʼmo Neniyoʼmo Mamiloni koteʼmo hogote vekamo maiteno muki afiteʼa ageʼnaya vayaʼaiteʼmo yagaino apatesiyafeʼmo lekana paino ateʼniye. 49#Est 2:19,21Inagi Neniyoʼmo kini vekaeʼmo hunoʼaeʼmo, Satalakiʼagi Misakiʼagi Ameʼnagoʼagi huka Mamiloni koteʼmo muki afiteʼa ageʼnaya vayaʼaiteʼmo yagaiʼa apatesayafeʼmo lekana paika apato, huno ge huno afi geʼniye. Inagi ani aliʼyaʼmo aliʼniyaʼmonanafa Neniyoʼmo kini vekamo kegiʼya kipateʼmo fai maiteno hogote vekamo maiʼniye.
Currently Selected:
Neniyo 2: kyg2013
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
