Neniyo 4
4
Nepukanesaʼa napa tu afinaʼmo alagamuna ageʼniya gemae
1Kini vekamo Nepukanesaʼmo muki kotega maiʼnaya vayaʼaitegagi muki nofi vayaʼaitegagi muki alu apake alu apake neʼaiya vayaʼaitegagi huno ge huno atalegeno uneno huʼniye. Agaemo ina ge huno huʼniye. Lapaipamoʼmo falu huʼninagetapa alagepa hutapa maiyo. 2#Nen 3:26Nagaemo aeno apaka seno alagi anaga Gotiʼa naha maeya aune kavaʼe oʼageʼnaya lokiya kavaʼefeʼmo ava gemo lapa paigesuve. Lapa paisuva kavaʼmo alagepa kava huguve, huʼna nagesamo afiʼnove. 3Agaemo lokiya himamuʼaletiʼmo lokiya kavaʼmo huʼnigeʼa vayaʼmogi ageteʼapaeʼmo hapau neʼaiye. Yagaino neʼapateyanageno muki afinaʼmo yagaino hano osuno yagaino apateme apateme ugiye. Afole aiʼa maite maite hume visaya vayaʼaiteʼmo alagi yagaino apategaiye. 4Nagaemo Nepukanesaʼnamo alopa noʼnifiʼmo alagepa huʼna maiʼnogeno muki aliʼyaʼanimoʼmo alagepa huno afole aiʼniye. 5#Nen 2:1Mago haniʼilagamo nagaemo hipaʼnile havaeʼneʼna alagamuna ageteʼnaeʼmo koli huteʼna maiʼnogeno ageʼnova kavaʼmoʼa naipa kana yaʼmo alino namiʼniye. 6Inagi nagaemo Mamiloni kotega muki afiteʼa ageʼnaya vayaʼmogimo eʼa alagamuna geʼnimo aepaʼamo naha paisayafeʼmo mago gemo huʼna atalogeno uʼniye. 7#Nen 2:2Ani gemo huʼna atalogeʼa apaune vayanagi afole aisiya kavaʼmo agesayafeʼmo kanefiʼmo ageʼa aiyaka neʼaliya vayanagi Kalatiya vayanagi afole aisiya kavafeʼmo ava ge nehaya vayanagi huʼa ageʼna alagamuna geʼnimo hapa paiʼnovaʼmonanafa aepaʼamo afiʼa ha oleʼa naha opaiʼnae. 8Henagaʼamo Neniyoʼmo eʼniye. Alu agiʼamo Melitesasaʼae. Ani agimo gotiʼnimo agiye. Apaote gotigi apauneʼapameʼmo aipafi maiʼnae. Nagaemo alagamuna gemo ha paiʼnaeʼmo, 9Melitesasao, huʼna, apaune vayaʼaiteʼmo yagaika neʼapatana vekae, Nagaemo kageʼnovana apaote gotigi apauneʼapameʼmoʼmo kagae kaipafi maiʼnayaʼmofeʼmo mago yaʼmo kagaeteʼmo alagi fala okigiye. Inagi kagaemo ageʼnova alagamunamo aepaʼamo naha paiyo. 10#Iyi 31:3Nagaemo hipaʼnileʼmo havaeʼneʼnaeʼmo ani alagamuna ageʼnove. Nagaemo agovana mago yatala yatala yosamo muki ma mopamo folagapiʼmo he tino haneʼnigeʼna ageʼnove. 11Haino alopa heteno muga anaga kokuʼnapilegamo haiʼniyanageʼa muki haopalega ma mopafi maiʼnaya vayaʼmogimo agesaya kava huʼniye. 12Ani yosamo haitaʼamoʼmo kanale haitamo maletenoʼaeʼmo alagaʼamo muki vayaʼmogi nesayafeʼmo asole alagamo aeʼniye. Afela afu anagaʼmo eʼa aepafiʼmo maiʼa falu huge nama anagaʼmogi akopaleʼmo apano kige muki alu ya alu yaʼmogimo alagaʼamo nege huʼnae. 13#Nen 4:17,23Nagaemo hipaʼnile havaeʼneʼnaeʼmo ani alagamunafiʼmo ageʼnovana yagaino neʼapateya aote enisole vekamo kokuʼnapatimo emiʼneʼnigeʼna ageʼnove. 14#Iyi 31:10-14Agaemo alopa gefatiʼmo hunoʼaeʼmo, ani yosamo heʼya aitalegeno asagauno aino. Akopaʼamo yagetapa ataletetapa haitaʼamo alituta ataletetapa alagaʼamo alita yaga autapa atalegeno uneno hino. Ani yosamo aepafi maiʼnaya afu anagaʼe akopale maiʼnaya nama anagaʼeʼmo ataleʼa uʼeʼa hugae. 15Hugayaʼmonanafa yosa atufaʼaʼe hafuʼyaʼaʼeʼmo mopafiʼmo afaʼa ategeno haneno. Ani yosamo atufaʼaleʼmo aeni nofitetiʼe haesa aeni nofitetiʼeʼmo lako osisiyafeʼmo nofi ki maleyo. Kahaufiʼmo hanesigeno haniʼilagamo kokuʼnapati lao yaʼmo emineno yosa atufaʼaleʼmo alino lanitani hino. Agaemo afu anagaʼmogiʼeʼmo kahaumo neʼnaya agufa kava hugiye 16Hogoteno vaya aipamo huʼniyaʼmonanafa henagaʼamo afumo aipagana agufa aipamo hanesigeno seveniʼa kafugamo maigiye. 17#Sam 9:16; 83:18; 2:8; Nen 4:25,32; Yel 27:5-7Yagaiʼa neʼapataya enisole vayaʼmogimo ani agufa kavaʼmo afole aisiyafeʼmo ago vege hu maleʼnae. Muki vayaʼmo aeno apaka seno alagi anaga Gotiʼa muki kini vayaʼaiteʼmo yagaino neʼapateya kavaʼamo agesayafeʼmo apaote vayaʼmogimo ago vegemo hu maleʼnae. Gotiʼa ina laʼmo yagaino apatesiya himamuʼmo amiguve, huno hisifi afaʼa amigiye. Agaemo henagamo neʼmaiya vayapatikeʼmo yagaisayafeʼmo lekana paino neʼapate, huno huʼniye. 18Nagaemo kini vekamo Nepukanesaʼnamo alagamuna ageʼnova kavafeʼmo kaha pauve. Inagi Metasasao, huʼna, aepaʼamo alika nave liyo. Yagaiʼna neʼapatova vayapatiʼmo muki afiteʼa ageʼnaya vayaʼmogimo aepaʼamo afaʼa naha opaigayaʼmonanafa kagaemo afaʼa naha paigane. Apaote gotigi apauneʼapameʼmo kagae kaipafiʼmo maiʼnayaʼmofeʼmae, huno ha paiʼniye.
Neniyoʼa napa tu alagamuna gemo aepaʼamo kini vekaeʼmo ha paiʼniya gemae
19 #
2 Sam 18:32
Inagi Neniyoʼmo alu agiʼamo Metasasaʼa ani alagamuna gemo afitenoʼaeʼmo hau aiteno aipamo kana huʼniye. Aipamo kana huʼniyaʼmofeʼmo kini vekamoʼmo hunoʼaeʼmo, Metasasao, huno, Afaʼa atenageno ani alagamuna gemo aepaʼamoʼmo kaipa kana yaʼmo alino okamino, huno huʼnigeno Metasasaʼmo geʼaleʼmo aeno atagaina hunoʼaeʼmo, Ala neʼnimogae, huno, mani alagamuna gemo kagaefeʼmo alagi ohapauʼniya vayaʼaiteʼmo afole aisiya agufa kavaʼmae. Alagamuna gemo aepaʼamo kame vayakalegaeʼmo hisiya agufa kavaʼmae. 20#Nen 4:10-12Kagaemo mago yosamo uno haiʼnigeka ageʼnanageno alopa hetenoʼaeʼmo muga anaga kokuʼnapilagamo haiʼnigeʼa muki ma mopafi haopalega vayaʼmogimo agesaya agufa kavaʼmo huʼniye. 21Ani yosamo haitamo alagepa apaulaga neʼagaya agufa haitamo maletenoʼaeʼmo alagaʼamo muki vayaʼmogi nesayafeʼmo asole alagamo aeʼniye. Afela afu anagaʼmo eʼa aepafiʼmo maiʼa falu huge nama anagaʼmogi akopaleʼmo apano kige huʼnae. 22Ani yosamo kagaekeʼmae. Ani yosamo haino alopa heʼniya kava huka himamukamo kosino aino atagu faeʼnigeka muki ma mopafi vayaʼaiteʼmo yagaika neʼapatane. 23#Nen 5:21Kagaemo ageʼnanana aote enisole vekamo yagaino neʼapateya vekamo kokuʼnapati emineno hunoʼaeʼmo, Heʼya aitapa alita hosu hutapa ataleyo. Alita hosu hutapa atalegayaʼmonanafa yosa atufaʼaʼe hafuʼyaʼaʼeʼmo afaʼa hanegaiye. Yosa atufaʼaleʼmo haesa aeni nofitetiʼmo ki maleyo. Haniʼilagamo kokuʼnapati lao yaʼmo emineno alino lanitani hugiye. Afumogi kahaumo neʼnaya agufa kavaʼmo seveniʼa kafugamo hugiye, huno huʼnigeka afiʼnane. 24O kini vekae, huno, alagamuna gekamo aepaʼamo haneʼniyana aeno apaka seno alagi anaga Gotiʼa hu maleʼniya gemo ala kini vekaʼnimogaleʼmo afole aiʼniye. 25#Sam 106:20; Yel 27:5Vayaʼmogi apakaetegatiʼmo aliʼa kaha faiʼa katalesageka afela afuʼeʼmo kahaufilagamo maigane. Pulumaka anagaʼmogi kahaumo neʼnaya kava huka kahaumo negane. Lao yaʼmo emineno kagufaleʼmo alino lanitani hugiye. Inagi seveniʼa kafugamo utesigekaeʼmo agesanana aeno apaka seno alagi anaga Gotiʼa kini vayaʼaiteʼmo yagaino neʼapate. Agaemo ina lafeʼmo yagaigiye, huno huʼnisifi afaʼa lekana paino atesigeno yagaigiye. 26Enisole vayaʼmogi huʼapaeʼmo, Yosa atufaʼaʼe hafuʼyaʼaʼeʼmo afaʼa ategeno haneno, huʼa huʼnayaʼmofeʼmo halate kini vekamo maiteka yagaika apategane. Gotiʼa muki vayaʼaiteʼmo yagaino neʼapate, huka agetekaeʼmo yagaika apategane. 27#Sam 41:1-3O kini vekamogae, huʼna, kaipa kagesa afi yaʼmo kamisuva gemo afisanafeʼmo nahauʼniye. Alagamuna kavaʼmo kagaeteʼmo afole aigiyanagi hosu kavakamo ataleteka fatago kavaʼmo huvo. Feʼno yaʼapimo ohaneʼniya vayaʼaitegamo hosu kavaʼmo osuka kahau huka apato. Gotiʼa alagepa huka maisanafeʼmo asole yaʼmo kamisifi okamisifigi amalageka huka ago, huno ha paiʼniye. 28Inagi muki ani kavaʼamo kini vekamo Nepukanesateʼmo afole aiʼniye. 29Tuolofuʼa kaimo maitegenoʼaeʼmo Mamiloni taonifiʼmo kini vekamo noʼafiʼmo uneno nehunoʼaeʼmo, 30#Mai 16:18Mani Mamiloni taonimo alo huʼnova taonimo vayaʼmogi ageʼa amuse nehaya taonimo ohaneʼnifiye. Nagaiʼni ala nagiʼnilefeʼmo himamuʼniletiʼmo alo hutove, huno huʼniye. 31Ani gemo nehigenoʼaeʼmo mago vekamoʼmo kokuʼnapati ha painoʼaeʼmo, Kini vekamo Nepukanesao, huʼna, kagaefeʼmo ge nehuve. Yagaika neʼapatana himamukamo kayapatiʼmo aliʼna kahafaleʼna ataleʼnove. 32Vayaʼmogi apakaetegatiʼmo aliʼa kahafaiʼa katalesageka uka kahaufilaga afuʼeʼmo maigane. Pulumaka anagaʼmogi kahaumo neʼnaya kava huka kahaumo negane. Seveniʼa kafugamo utesigeka agekaeʼmo aeno apaka seno alagi anaga Gotiʼa kini vayaʼaiteʼmo yagaino neʼapate, huka agegane. Agaemo ina laʼmo yagaigiye, huno hisifi afaʼa lekana paino atesigeno yagaigiye. 33Inagi ani afinaʼmo Nepukanesafeʼmo ha paiʼniya gemo afole aiʼnigeʼa vayaʼmogi apakaetegatiʼmo aliʼa hafai atalageno pulumakagana huno kahaumo neʼniye. Lao yaʼmoʼa kokuʼnapatiʼmo emineno agufaleʼmo alino lanitani huʼniye. Ayokaʼmo hakiki namamo ayokakana huno aeʼniye. Aginagomo namamo aginagogana huno huʼniye.
Kini vekamo Nepukanesaʼa Goti agiʼaleʼmo alino asagauʼniya gemae
34 #
Nen 4:26; Lu 1:33 Seveniʼa kafugamo hano huʼnigeʼnaeʼmo nagaemo Nepukanesaʼnamo kokuʼnapi aliʼna aulu heʼna neʼagogenoʼaeʼmo alagepa nagesa afi yaʼmo halate afole aiʼnigeʼna aeno apakaseno alagi anaga Goti aliʼna auleʼna ateʼnove. Nagaemo muki afinaʼmo maige maige huno neʼmaiya Goti ala agiʼamo amiʼnove. Yagaino neʼapateyanageno muki afinaʼmo yagaino hano osuno yagaino apatelino ugiye. Afole aime aime hisaya vayaʼaiteʼmo yagaino apategaiye. 35#Aiy 40:15,17; Sam 115:3; 135:6; Yop 34:29; Lo 9:20Agae aulagaleʼmo muki ma mopafi vayaʼmo afaʼa ina agufa vayaʼmo maiʼnae. Agaemo muki kokuʼnapi vayaʼaitegaʼe ma mopafi vayaʼaitegaʼeʼmo hauʼniya kavaʼmo afaʼa nehiye. Mago vayaʼmogi agaemo mago kavaʼmo osisiyafeʼmo atafauʼneʼa, kagaemo na kava nehane, huʼa afaʼa osugae. 36#2 Sit 20:20; Mai 22:4Ani afinaʼmo alagepa naipa nagesa afi yaʼmo halate afole aiʼniye. Ani afinaʼmo yagaiʼnova koʼmoʼa konali yaʼamo hanesiyafeʼmo ala nagiʼnimo aliteʼna konali yaʼnimo aliʼnove. Aliʼnogeʼa kanisole vayaʼniʼe ala vayaʼniʼeʼmo eʼa nagaeʼeʼmo halate lokaeʼa maiʼnae. Nagaemo halate kini vekamo maiʼnogeno ala nagiʼnimoʼmo akeyaʼvilaga aliʼnova ala nagiʼnimo ago aeno aga seʼniye. 37Hemenimo nagaemo Nepukanesaʼnamo kokuʼnapi kini vekaeʼmo aliʼna auleʼna atege agiʼaleʼmo aliʼna asaga huge ala agiʼamo amige nehuve. Muki afinaʼmo agaemo lama ge kavaʼmo huge fatago kavaʼmo huno alino fako huge nehiye. Vayaʼmogimo apakaiʼapi apakiʼapileʼmo aliʼa asaga hugefeʼmo hisaya vayaʼmo afaʼa alino afepi apategaiye, huno huʼniye.
Currently Selected:
Neniyo 4: kyg2013
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
