ROMANS 2
2
Diyin God ts'ídá t'áá ákogi át'éego ánihwii'aah
1Éí bąą kwá'ásiní nílíinii, t'áá háiida náánáłahjį' diné baa nánít'į́įgo t'áadoo ách'ą́ą́h nidóótséhí da. Bee aa nánít'ínígíí t'áá éí bee ádá nihoyít'aahgo át'é, háálá bee aa nánít'íinii ts'ídá t'áá éí ałdó' baa naniná.#Mt. 7:1; Lk. 6:37. 2Áko kót'éego ch'ét'ánígíí baa nidajikaii t'áá aaníígóó Diyin God há nihodoo'áałgo nihił béédahózin. 3Áko kwá'ásiní nílíinii, ákódaat'éii yaa nidaakaii bee baa nánít'į́įgo, da' ákondiísh ni ałdó' t'áá éí baa nanináago Diyin God yee atí'doolíiłii baa dáádideeshááł nínízin? 4Éí doodaléi' Diyin God bibee ajooba' índa yee ak'édí nilíinii áádóó nízaadgóó yee ha'ólníinii yee alááh neel'áanii daats'í t'áadoo nilínígóó baa nitsíníkees? Doósh nił bééhózin da, Diyin God naa jooba'go łahgo át'éego tsíńdííkosgo shich'į' dah nídidíídááł nízin? 5Nidi doo niníhóó'áhígíí bąą, áádóó doo łahgo ánáo'ne' ánít'éégóó bąą Diyin God t'óó báhádzidgo yee atí'doolííł bijį́įdi ts'ídá t'áá ákogi át'éego ánihwiit'aah yit'íní áyiilaadi t'óó báhádzidgo yee atínidoolíłígíí ádá hasht'e'nihidí'níiłgo át'é. 6Háálá t'ááłá'í jinítínígo ádajíít'įįdígíí bik'ehgo Diyin God hach'į' nidi'yoolééł.#Ps. 62:12; Prov. 24:12. 7Áko hada'jólníigo yá'át'éhígi ádajooníłígíí bee aa ha'niih áádóó ił ídlį́ índa iiná doo ninít'i'ii t'áá hazááká bíká ádajit'ínígíí éí hool'áágóó jiináa doogo Diyin God haididoo'ááł. 8Nidi diné t'áá shí t'éí daznízinii áádóó t'áá aaníinii doo bik'eh dahojíł'íinii, nidi doo t'áá ákogi ádaat'éii bik'eh dahojíł'ínígíí éí Diyin God hach'į' hashké dínóodzįįłgo t'óó báhádzidgo atíhodoolííł. 9Nihokáá' dine'é t'ááłá'í jinítínígo doo aaníígóó ájít'íinii hach'į' nahwii'náa doo, áádóó ti'hojooníih doo, Jew dine'é nilíinii áłtsé, áádóó doo Jew dine'é nilíinii ałdó'. 10Nidi t'ááłá'í jinítínígo yá'át'éehgo ájooníiłii haa ha'niih doo, áádóó ił jílį́į doo, índa hach'į' hózhǫ́ǫ doo, Jew dine'é nilíinii áłtsé, áádóó doo Jew dine'é nilíinii ałdó'. 11Háálá Diyin God éí diné doo ła' a'ohgo yaa nitsíkees da.#Deut. 10:17.
12T'áá ádzíłtso bee haz'áanii Mózes baa deet'áanii doo hoł béédahózingóó bąąhági ádajíít'įįdii éí bee haz'áanii doo bee haa nídahódóot'įįłgóó dazhdínóonééł. T'áá ádzíłtso éí bee haz'áanii hoł béédahózingo bąąhági ádajíít'įįdii éí bee haz'áanii bee haa nídahódóot'įįł. 13Háálá bee haz'áanii yik'eh dahół'íinii t'éiyá ts'ídá t'áá ákogi ádaat'éego Diyin God bá hadoodzih, t'óó dazdiits'a'í t'éiyágo éí dooda. 14Doo Jew dine'é danilíinii éí bee haz'áanii Mózes baa deet'áanii doo bee dahólǫ́ǫ da, nidi t'áá bí ádaat'éhígíí bik'ehgo bee haz'áanii yida'ał'į́įgo t'áá bí ádá bee haz'áanii danilį́, azhą́ bee haz'ánígíí bee ádaadin nidi. 15Áko éí bee haz'áanii áníinii dabijéí biyi'di bił ííshjání áyósin, háálá éí yik'ehgo ádaanííł. Ha'át'íhída ádajoolíłígíí yá'ádaat'éehgo, doodaii' doo yá'ádaat'ééhgóó hoł béédahózinígíí ałdó' éí bił ííshjání áyósin. Ałk'ídahojit'ááh, éí doodago t'óó ahida'jiilníihgo nitsídadzikees. 16Jó, hane' yá'át'éehii baa hashne'ii bik'ehgo ánihwiit'aah beiníłką́ądi hajéí biyi'di nidazhnił'inii Jesus Christ binahjį' Diyin God há nihodiyoo'ááł.
Jew dine'é áádóó bee haz'áanii
17Jó'akon, Jew dine'é nishłį́, diní, bee haz'áanii Mózes baa deet'áanii baa dzíínílíigo Diyin God bee ádaa hó'niih, 18áádóó Diyin God yee ná íinízinii nił bééhózin, índa bee haz'áanii bits'ą́ą́dóó nandi'neestą́ą'go yá'át'éehii nidííní'ą́; 19doo da'oo'íinii t'áá aaníí yish'ish índa chahałheeł yii' dayíkáhígíí bá adinídíín nishłį́ nínízin. 20Diné doo dahóyáanii hasht'e'nináhásh'éésh índa áłchíní át'éii nanishtin nínízin. Bee haz'áanii t'áá yíní át'éegi índa t'áá aaníinii nił bééhózin. 21Áko ni, diné náánáła' neinitinii nílíinii, da' niísh t'áá ni doo niná'ádidíníítįįł da? Doo azhni'įįh da, diníigo diné bił hólne'ii, t'áá ni daats'í aní'įįhgo ádíní? 22Doo azhdilée da, diníinii, t'áá ni daats'í adíléego ádíní? Eda'alyaii t'áá íiyisí bik'ee diníniihii, t'áá ni daats'í t'áadoo le'é dadiyinii nihíłchxǫǫh? 23Bee haz'áanii bee ádaa hó'niihii, t'áá ni daats'í bee haz'áanii hítíihgo bee Diyin God doo nił nilį́į da? 24Háálá Diyin God bizaad bee ak'e'ashchíinii ánínígi át'éego, Nihí nihiniinaa doo Jew dine'é danilíinii bitahgóó Diyin God bízhi' t'óó baa'ihgo baa yáti'.#Is. 52:5.
25Bee haz'áanii Mózes baa deet'áanii bik'eh hojíł'į́įgo ąąh náhinilgish t'áá aaníí ílį́, nidi bee haz'áanii doo bik'eh hojíł'į́į́góó ąąh náhinilgish t'áadoo biniyéhí da yileeh.#Gen. 17:9-14. 26Éí bąą doo Jew dine'é jílíinii éí bee haz'áanii t'áá ákogi át'éego áníinii bik'ehgo ájít'éego, doo hąąh náhineeshgizh da nidi, t'áá bąąh náhineeshgizhii jílį́ nahalingo Diyin God haa nitsíkees. 27T'áá aaníí Jew dine'é danohłį́įgo nihąąh nídahineeshgizhgo bee haz'áanii bee ak'e'ashchíinii nihee dahólǫ́ǫ nidi dahohtííh, áko ła' doo Jew dine'é danilį́į da nidi, áádóó doo bąąh nídahineeshgizh da nidi, bee haz'áanii yik'eh dahół'į́įgo, da' éísh doo nihaa nídadóot'įįłgo nihá nidahodiyoo'áał da? 28Háálá t'áá aaníí Jew dine'é jílíinii éí doo ats'íís t'éiyá bee Jew dine'é jílíinii óolyée da, índa t'áá aaníí ąąh náhineeshgizh wolyéii éí doo t'áá ats'íís t'éí bąąh náhineeshgizhii óolyée da. 29Nidi t'áá aaníí Jew dine'é jílíinii éí t'áá aaníígóó ąąh náhinilgish bee hajéí tł'áahdi#Deut. 30:6. Níłch'i Diyinii nahwiiłnáanii, éí doo bee haz'áanii bik'ehgo da. Áko éí bee haa ha'niihii doo diné bits'ą́ą́dę́ę́' át'ée da, nidi Diyin God bits'ą́ą́dę́ę́' át'é.
Currently Selected:
ROMANS 2: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
