MATTHEW 3
3
John Tó Yee Asį́įhii nahalne'
(Mk. 1:1-8; Lk. 3:1-18; Jn. 1:19-28)
1Ákwii yoołkááł yę́ędą́ą́' John Tó Yee Asį́įhii, Judíya kéyah honoojíidi níyáago halne'go kóní, 2Łahgo át'éego Diyin God bich'į' tsíńdahidohkeesgo ádił nida'iyohsíihii bits'áhóhkááh, háálá yá'ąąshii bee bóhólníihgo bił haz'áanii bílátah dahashzhiizh.#Mt. 4:17; Mk. 1:15. 3John lą́ą, éí Aizéíyah Diyin God yá halne'ii nilíinii haa yáłti'go ání:
Honoojíidi ła' chánahgo kójíníigo hwiinéé' diits'a'go hojilne':
Bóhólníihii bá honít'i'ii hasht'e dahohłééh,
be'atiin k'éhézdongo ádaahłééh.#Is. 40:3.
4John éí ghą́ą́'ask'idii bighaa' bee éé' ályaago ha'éé', áádóó akał sis bee áká dzíszaaz,#2Kgs. 1:8. índa nahachagiitsoh índa tsés'ná bitł'izh ałdó' hach'iyą'. 5Nít'éé' Jerúsalemdę́ę́' áádóó Judíyadę́ę́' t'áá níłtéél nít'éé' índa Jórdan tooh binaadę́ę́' t'áá át'éé nít'éé' diné haa haaskai. 6Bibąąhági ádaat'éii yee ádaa dahoolne'go Jórdan tooh nílínígíí biyi' tó bee dadzíísį́į́'.
7Nidi Férisii áádóó Sádjusii danilíinii tó bee dabidi'doolzįh biniyé deíkáahgo jiiłtsą́ągo ábijiní, T ł'iish ba'áłchíní danohłíinii!#Mt. 12:34; 23:33. Háishą' Diyin God t'óó báhádzidgo bibee até'él'íinii bits'ą́ąjį' dah dadínóohchééh nihidííniid? 8Éí bąą łahgo át'éego Diyin God bich'į' tsíńdadohkeesgo beełt'éego nihits'ą́ą́dóó aneest'ą' dahóle', 9áádóó t'óó ádaa dadzíínóhdlíigo t'áá nihiyi'ídi, Éíbraham yee' nihizhé'é nilį́,#Jn. 8:33. t'áadoo dadohníní, háálá ánihidishní, Diyin God díí tsé kǫ́ǫ́ naaznilígíí bee Éíbraham ba'áłchíní íidoolíiłgo yíneel'ą́. 10K'ad nidi tsin bihétł'óól biniyé tsénił si'ą́, áko tsin t'áá ałtso bineest'ą' doo yá'át'ééhgóó bąąh nídahadleehígíí k'ídahalne'go, kǫ' biyi' góne' adahaltł'iid.#Mt. 7:19.
11Łahgo át'éego Diyin God bich'į' tsíńdahidohkeesgo bąąhági ádanoht'é yę́ę bits'áhóhkáahgo tó bee danihisį́į́h, nidi shikéédę́ę́' náájoodáłígíí éí shiláahgo ájít'é, áko hakee' yish łéeł#3:11 Ké yoolééł nínígíí éí naalte' binaanish át'éé nít'éé'. dooígíí doo bą́ą́h nishłį́į da; hó t'éí Níłch'i Diyinii índa kǫ' bee danihidzisį́įh doo. 12Hó éí ásaa' bee ąąh oolch'íhígíí dah joo'ááł, áádóó háá'jílk'áahgi hozhdidooshǫǫłgo hatł'oh naadą́ą́' nooh níjílchíihgi yah ahizhdooyééł, nidi azhool t'éí kǫ' doo nitséesii bee adizhdoołk'ą́ą́ł.
Jesus éí tó bee bi'doolzį́į́'
(Mk. 1:9-11; Lk. 3:21,22)
13Ákohgo Gáliliidę́ę́' Jórdanjį' Jesus níyá, John tó yee hodoosįh biniyé. 14Nidi John éí Jesus ch'ééh kóbizhdííniid, Nigo yee' tó bee shidíísįh nít'éé', da' ákoósh jó nida tó bee nideesįh biniyé shéíníyá? 15Nidi Jesus ánááhodoo'niidgo ání, Bíni'dii k'ad éí ákót'é, háálá ákót'éego t'áá ákogi ádaat'éii t'áá ałtso bi'diilnííł. Áko John yee lą́ asłį́į́'. 16Áádóó Jesus tó bee ho'doolzį́į'go táyi'dę́ę́' háádzísdzá, nít'éé' jó'akon yá' ąąsh ąą ádzaa, áádóó Diyin God biNíłch'i Diyinii hasbídí nahalingo Jesus bik'ijį' hadahooleełgo áádóó bik'i dah neezdáago jiiłtsą́. 17Áádóó yá'ąąshdę́ę́' iinéé' diists'ą́ą'go ání, Díí shiYe' ayóó'óósh'níinii jílį́, t'áá íiyisí hąą shił hózhǫ́.#Gen. 22:2; Ps. 2:7; Is. 42:1; Mt. 12:18; 17:5; Mk. 1:11; Lk. 9:35.
Currently Selected:
MATTHEW 3: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).