MATTHEW 2
2
Hastóí dahóyáanii yíkai
1Hérad aláahgo naat'áanii nilį́įgo yoołkááł yę́ędą́ą́'#2:1 37 B.C.dóó 4 B.C.jį' Hérad Ayóó'át'éii hodi'níinii éí t'áá át'é Ízrel dine'é binanit'a'í jílį́į́ nít'éé'. Judíya kéyah biyi' Béthlehemgi Jesus yizhchį́, nít'éé' jó'akon, ha'a'aahdę́ę́' Jerúsalemjį' hastóí dahóyáanii yíkaigo kódaaní, 2Háadiyee' Jew dine'é Aláahgo biNanit'a'í yizhchį́? Jó, ha'a'aahdi bisǫ' deiiltsą́, áko bich'į' nidahodiidlaał biniyé niikai. 3Hérad aláahgo naat'áanii nilíinii díidí yidiizts'ą́ą'go niseeltłah, áádóó Jerúsalemgi kéédahat'íinii ałdó' t'áá ałtso ákódaadzaa, 4áko aláahgo nááda'iiłniihii índa bee haz'áanii yínda'niłtinii t'áá ałtso áłah áyiilaago háadi Christ doochíłígíí yína'ídééłkid. 5Nít'éé' ádahodííniid, Judíya kéyah hoolyéii biyi' Béthlehemgi lą́ą, háálá kót'éego Diyin God yá halne'ii yee ak'e'ashchį́:
6Júdah bikéyahgi Béthlehem nílíinii,
Júdahgi naat'áanii danilíinii bitahdóó doo akéédę́ę́' ánít'ée da,
háálá nits'ą́ą́dóó naat'áanii shidine'é Ízrel yoo'ish dooleełii ch'ídoogááł.#Mic. 5:2.
7Nít'éé' Hérad éí hastóí dahóyáanii yíkaígíí t'áá nant'inee hágo yidííniidgo, ts'ídá haa'í hoolzhishgo sǫ' dajiiłtsánígíí hats'ą́ą́dóó bił bééhoozin. 8Áko Béthlehemgóó ho'níłnii'go áhodííniid, Nihílááh, ts'ídá haleebee awéé' hadanohtá, áko bik'ínohkaigo hane' shaa nídadooh'ááł, áko shí ałdó' ákǫ́ǫ́ deesháałgo bich'į' nahodeeshłaał. 9Aláahgo naat'áanii áhodííniidígíí dazdiizts'ą́ą'go dah náázhdiikai, nít'éé' jó'akon, ha'a'aahdi sǫ' dajiiłtsánígíí halą́ąjį' nihináánádzáago ashkii áłts'íísí sitínígíí bikáa'gi niiltłah. 10Sǫ' dajiiłtsą́ągo t'áá íiyisí bąą hoł dahóózhǫǫd, 11áko kin góne' yah ajookai nít'éé' ashkii áłts'íísígíí bimá Mary t'áá bił dajiiłtsą́, áko Jesus bich'į' nitsidazdeezgo'go bich'į' nidahodzisá, índa hanaalye'é da'ílíinii ąą ádajiilaago, óola áádóó tsin bijeeh łikání halchinii fránkinsens índa mir wolyéii baa dajiiznil. 12Áádóó na'iigeełgo Hérad baa nínáánóhkááh lágo ho'doo'niidgo, nák'ee'ąągo hakéyahgóó aníjookai.
Ííjipgóó choda'dzoos'įįd
13Áko dah nízhdiikaigo, jó'akon, Jóseph nayiiyeełgo Bóhólníihii bidiyingo naal'a'í bich'į' yit'íní í'diilyaago ábidííniid, Nídiidááh, áádóó ashkii áłts'íísígíí bimá bił ts'ídá tsxį́įłgo Ííjipgóó dohkááh. Nił náhweesh'ne'jį' áadi nihighan doo, háálá Hérad éí ashkii yidiyoołhééł biniyé háidínéeztą́ą́'. 14Áko nízhdii'na'go ashkii áłts'íísígíí áádóó bimá ałdó' bił t'áá tł'éé' Ííjipgóó ajookai. 15Áadi kééhojit'į́įgo Hérad yę́ę daaztsą́. Áko, ShiYe' Ííjipdę́ę́' wóshdę́ę́' ch'ínínááh bidííniid,#Hos. 11:1. níigo Bóhólníihii éí Diyin God yá halne'ii biniit'aa yee haadzíi'ii bohoolyaa.
Áłchíní yázhí naaztseed
16Nít'éé' Hérad éí hastóí dahóyáanii binda'azlo'go nák'ee'ąągo anáákaígíí bił bééhoozingo t'áá íiyisí yik'ee ádá hoolchįįd. Áko Béthlehemgi índa binaagóó ashiiké naaki béédááhaidóó yaagoígíí yich'į' i'iis'a'go ałtso nidabi'diztseed, éí hastóí dahóyáanii sǫ' yaa ch'ídahaz'ánígíí bik'ehgo ákóhóót'įįd. 17Éí Diyin God yá halne'ii Jeremáíyah kóníigo yee haadzíí' yę́ę bohoolyaa:
18Réímahgi iinéé' diists'ą́ą́',
yínííł yee chanahałe'go áádóó yichago índa ayóó át'éego atíńdindleeh,
Réíchel ba'áłchíní náás ahoolchíiłii yaa yicha,
ha'íídóolniiłígíí doo yinízin da,
háálá áłchíní yę́ę ábi'disdįįd.#Jer. 31:15.
Ííjipdę́ę́' ná'íldee'
19Nidi Hérad daaztsą́ą́dóó bik'ijį', jó'akon, Ííjipgi Jóseph nayiiyeełgo Bóhólníhii bidiyingo naal'a'í bich'į' yit'íní í'diilyaago 20ábíłní, Nídiidááh, ashkii áádóó bimá ałdó' bił Ízrel bikéyahgóó nihéénóhkááh, háálá ashkii yida'niiłhį́ yę́ę daneezná. 21Áko nízhdii'na'go t'áá áko ashkii índa bimá ałdó' bił dashdiikaigo Ízrel bikéyahgóó níjíkai. 22Nít'éé' Judíyagi Arkiléíyas éí bizhé'é Hérad yę́ę bitsásk'ehgi naat'áanii nilį́įgo jíínii'go biniinaa ákǫ́ǫ́ nízhdoo'néłígíí béédzísdzííd, áko baa nináájiisgeelgo honáá'ílnii'go Gálilii kéyahgóó jiníná. 23Diyin God yá dahalne'ii, Názariin#Is. 11:1. deiłníi dooleeł, daaní yę́ę bohodoolnííł biniyé Názareth kin haal'áagi jinínáago ákwii kééhojit'į́.#Mk. 1:24; Lk. 2:39; Jn. 1:45.
Currently Selected:
MATTHEW 2: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).