MATTHEW 12
12
Jesus bídahooł'aahii háá'áyį́į́h jį́į́ góne' tł'oh naadą́ą́' deinizh
(Mk. 2:23-28; Lk. 6:1-5)
1Íídą́ą́' háá'áyį́į́h jį́ azlį́į'go tł'oh naadą́ą́' bitahgóó Jesus hódahooł'aahii bił jookah, áko hódahooł'aahii dichin daazlį́į'go tł'oh naadą́ą́' yida'niinizhgo#Deut. 23:25. yida'niiyą́ą́'. 2Nidi Férisii danilíinii éí dayiiłtsą́ągo ádahodííniid, Shoo, nídahooł'aahii háá'áyį́į́h jį́į́ góne' doo bee haz'ánígíí yaa naakai.#Ex. 34:21. 3Nidi Jesus áhodííniid, Da' t'ahásh doo David índa hoł naakaígíí dichin daazlį́į'go ádaadzaa yę́ęgi da'íínółta' da: 4shą́ą́', David éí Diyin God bikin góne' yah ajííyáago, Diyin God bich'į' bááh nááhániihii jííyą́ą́',#1Sam. 21:1-6. éí doo jidooyį́į́łgóó índa hoł naakaígíí ałdó' doo deidooyį́į́łgóó bee haz'ą́ą́ nít'éé', nidi nááda'iiłniihii t'éiyá?#Lev. 24:5-9. 5Áádóó háá'áyį́į́h jį́ ná'oodleeł bik'eh nááda'iiłniihii kin bii' sohodizin góne' háá'áyį́į́h jį́į́ góne' bee haz'áanii doo yik'eh dahół'į́į da nidi bee haz'áanii Mózes baa deet'áanii doo yee ádąąh dah nidahat'a' da nít'éé'.#12:5 Náá'iiłniihii danilínígíí háá'áyį́į́h jį́į́ góne' bee haz'áanii k'ídeezti' nidi doo haa nídát'íní da. Da' éísh t'ah doo deínółta' da?#Num. 28:9,10. 6Nihił hashne', ła' kin bii' sohodizin yiláahdi ayóó át'éii kwe'é naaghá. 7Nidi, Aa a'ááh hasin t'éí nisin, nááhániihii éí dooda, díí ááhyiłníinii nihił béédahózin nít'ée'go,#Mt. 9:13. t'áadoo ádąąh dah dahool'a'ii doo bá nidahosoo'ą́ą da doo nít'éé'.#Hos. 6:6. 8Háálá Diné Silį́į'ii háá'áyį́į́h jį́ bee hóhólnííh.
Diné bíla' bąąh dah haz'áanii
(Mk. 3:1-6; Lk. 6:6-11)
9Áko áádóó Jesus dah diiyáago kéédahat'íinii bikin yii' áłah nádleeh góne' yah ííyá. 10Nít'éé' jó'akon, diné léi' bíla' t'ááłáhíjí bąąh dah haz'ą́ą́ léi' ákwe'é naagháá lá. Áádóó, Háá'áyį́į́h jį́į́ góne'ésh nááhodi'doodláałgo bee haz'ą́? daaníigo nidahódééłkid, éí yee hak'i dahodidoo'ááł yiniyé ádaaní. 11Áko Jesus áhodííniid, Nihí nihitahdóó diné ła'da dibé t'ááłá'í bee hólǫ́ǫgo, nít'éé' háá'áyį́į́h jį́į́ góne' bits'ą́ą́' a'ą́ą́tłizhgo, da' doósh áádę́ę́' háidoołtéeł da?#Lk. 14:5. 12Dooládó' diné éí dibé yiláahgo ílį́į da lá! Éí bąą háá'áyį́į́h jį́į́ góne' yá'át'éehgo ázhdooníiłgo bee haz'ą́. 13Ákohgo diné bíla' bąąh dah haz'áanii ííłní, K'ídílchííd. Áko k'ídeeshchidgo bíla' t'áá łahjí át'éhígi át' éego hadaałt'é násdlį́į́'. 14Nidi Férisii danilíinii ch'ékaigo haa nídaast'įįd, áádóó ha'át'éegoda dahodiyoołhéłígíí yee hondahaz'ą́.
Á naal'a'í nídiiltíinii
15Éidíígíí Jesus hoł bééhózingo, áádóó dashdiiyá. Áádóó diné t'óó ahayóí hakéé' neheeskai, áko t' áá ałtso náádabizhdiyiisá, 16áko hadzoodzíi'go ábijiní, T'ááká shaa ch'ídahooh'ááł lágo. 17Kóhá'níigo Aizéíyah, Diyin God yá halne'ii, yaa hoolne'ígíí bohodoolnííł biniyé ákóbizhdííniid:
18Jó'akon, shá naal'a'í nídiiłtíinii,
ayóó'óósh'níinii shii' sizíinii baa bił hózhǫ́,
shiNíłch'i Diyinii baa dideesh'ááł,
áko doo Jew dine'é danilíinii ts'ídá t'áá ákwii é'ét'éego ánihwiit'aah yee yił hodoolnih.
19Doo ináádiiltłi' da doo, índa doo yéego dilwosh da doo,
kintah da'nítiingóó nidi biinéé' doo ła' jididoots'į́įł da.
20Ts'ídá t'áá ákwii é'ét'é ak'eh didlį́įgo áyiilaajį'
lók'aatsoh yisk'isii nidi doo k'íidootih da,
índa bee hool'iní biih yít'i'ígíí#12:20 Diné doo bidziilígíí áádóó ka nidaakaígíí ááhyiłní. t'óó bilid nidi doo yidínóołtsis da,
21Áádóó doo Jew dine'é danilíinii éí házhi' binahjį' bił chodahoo'į́į doo.#Is. 42:1-4.
Jesus áádóó Béíyalzííbab
(Mk. 3:20-30; Lk. 11:14-23)
22Nít'éé' diné léi' níłch'i bi'iiníziinii bii' hólǫ́ǫgo doo yáłti'góó índa doo oo'į́į́góó yił haa daaskai, áádóó hadaałt'é áńjiidlaa, áko diné doo yáłti' da yę́ę yáłti' áádóó oo'į́ silį́į́'. 23Áko diné t'áá ałtso t'óó bił adahóóyóigo ádadííniid, Da' díísh David biYe' át'į́? 24Nidi Férisii danilíinii éidíígíí deidiizts'ą́ą'go ádadííniid, Díí diné éí Béíyalzííbab, níłch'i bida'iiníziinii binanit'a'í nilíinii t'éiyá bee níłch'i bida'iiníziinii ayi'dę́ę́' hahizhniłkaad lá.#Mt. 9:34; 10:25. 25Nidi yaa nitsídaakeesígíí hoł bééhózingo ábizhdííniid, Ła' dine'é t'áá bił dah nahaz'ą́ą́góó t'áá bí ałk'i néijahgo éí t'áá ádzaaí neheleeh, índa kin haal'áagi kéédahat'ínígíí áádóó łahgo dah oonééł t'áá bí ałdó' ałk'i néijahgo t'óó ałts' á'áldah doo, 26áko Séítan nilíinii t'áá bí diné yii'dę́ę́' ha'ádi'nilchéehgo, t'áá bí ák'i néilwo' doo, ákoshą' haa yit'éego t'áá bí bee bóhólníihgo bił haz'áanii didoonaał? 27Béíyalzííbab bee níłch'i bida'iiníziinii ayi'dę́ę́' hahinishkaadgo, ákoshą' nihídahooł'aahígíí éí háí bibee adziilii bee ayi'dę́ę́' hadeiniiłkaad? Éí bąą éí t'áá bí nihaa nídadóot'įįł. 28Nidi Diyin God biNíłch'i Diyinii bee níłch'i bida'iiníziinii ayi'dę́ę́' hahinishkaadgo, éí bee t'áadoo bahat'aadí Diyin God bee bóhólníihgo bił haz'áanii bił nihaa honíyá. 29Áádóó haa yit'éego diné ła' diné bidziilii bighan góne' yah azhdoogáałgo binaalye'é bighahizhdoo'nił? Jó, átsé be'dziztł'ǫ́ǫgo índa. Ákohgo índa binaalye'é bighandę́ę́' ch'íhizhdoojih. 30Diné doo shich'ijí jílínígíí éí shits'ą́ą́jí jílį́,#Mk. 9:40. áádóó doo shił ahanizh'niiłkaadígíí éí ta'izhnoołkaad. 31Éí bąą ánihidishní, Diné yee bąąhági ádaat'íinii índa Diyin God baa'ihgo baa yáti' ts'ídá t'áá ałtso bá yóó'anídahidit'aah dooleeł, nidi Níłch'i Diyinii baa'ihgo baa yáti' t'éí ts'ídá doo á yóó'anídidoot'áał da. 32Áádóó t'áá háiida Diné Silį́į'ii bik'ijį' jílį́įgo hadziidziihígíí, éí há yóó'anídidoot'ááł, nidi t'áá háiida Níłch'i Diyinii bik'ijį' jílį́įgo hadziidziihígíí, éí k'ad hoolzhishígíí biyi' índa náábíkéédę́ę́' hoolzhishígíí biyi' nidi, ts'ídá doo há yóó'anídidoot'áał da.#Lk. 12:10.
Ajéí bii' daahéełii hahwiileeh
(Lk. 6:43-45)
33Éí bąą tsinígíí yá'át'éehgo, bineest'ą' ałdó' yá'át'éeh doo; éí doodago tsinígíí nichxǫ́'ógo, bineest'ą' ałdó' nichxǫ́'ó doo, háálá tsinígíí bineest'ą' bee bééhózin.#Mt. 7:20; Lk. 6:44. 34Tł'iish ba'áłchíní danohłíinii,#Mt. 3:7; 23:33; Lk. 3:7. doo yá'ádanoht'ééhgóoshą' haa yit'éego éí yá'át'éehii bee hadahohdziih doo? Háálá t'áá hajéí bii' hólónígíí t'áá éí bee yájíłti' łeh.#Mt. 15:18; Lk. 6:45. 35Diné yá'át'éehgo hináanii éí yá'ádaat'éehii bijéí bii' hólóonii bits'ą́ą́dóó yá'át'éehii hahwiileeh, áádóó diné doo yá'áshóonii éí doo yá'ádaat'éehii bijéí bii' hólóonii bits'ą́ą́dóó doo yá'át'éehii hahwiileeh. 36Áko ánihidishní, Diné saad t'ááłá'í ní'ánígo t'áadoo nánídlíinii yee hadahadziihígíí ánihwiit'aah beiníłką́ądi t'áá éí bee ádaa nidahozhdoolnih, 37háálá nizaadígíí binahjį' ts'ídá t'áá ákogi ánít'éego ná ha'doodzih, doodaii' nizaadígíí binahjį' ná nihodoot'ááł.
Doo yá'áshxǫ́ǫ́góó ahoolchíiłii bee ééhózinii hadeintá
(Mk. 8:11,12; Lk. 11:29-32)
38Ákohgo bee haz'áanii yínda'niłtinii áádóó Férisii danilíinii ła' kódaaníigo hach'į' hadaasdzíí', Na'nitiní, nibee adziilii bee bééhózinii ła' ná dadíníil'įįł.#Mt. 16:1; Mk. 8:11; Lk. 11:16. 39Áko Jesus hach'į' hanáádzíi'go áhodííniid, Doo yá'áshxǫ́ǫ́góó índa adilyé yee ahoolchíiłii bee ééhózinii hadeintá,#Mt. 16:4; Mk. 8:12. nidi bee ééhózinii doo ła' bá ádoolníił da, t'áá hazhó'ó Jónah, Diyin God yá halne'ii nilį́įgo bee ééhózinii silį́'ígíí t'éiyá. 40Háálá t'áá Jónah tágí jį́ áádóó tágí tł'éé' łóó'tsoh bibid yii' sitį́į́ nít'éé' yę́ęgi át'éego,#Jon. 1:17. Diné Silį́į'ii ałdó' nahasdzáán bijéí bii' tágí jį́ áádóó tágí tł'éé' hólǫ́ǫ doo. 41Níneveh dine'é yę́ę ánihwiit'aah beiníłką́ądi díí k'ad ahoolchíłígíí yá nidahodoo'áałgo yee deidoozįįł, háálá Jónah éí Diyin God bizaad yaa hoolne'ígíí binahjį' łahgo át'éego Diyin God yich'į' tsíńdadeezkéezgo dayoosdląądgo ádił nida'iiszí'ígíí yits'áhaaskai,#Jon. 3:5. nidi jó'akon, Jónah yiláahgo át'éii éí kǫ́ǫ́ naaghá. 42Kéyah Shádi'ááh hoolyéedi asdzání naat'áanii jílį́į́ nít'é'ígíí díí k'ad ahoolchíłígíí ánihwiit'aah beiníłką́ądi bił náázhdidoojahgo bá nihozhdoo'ááł, háálá éí Sálaman bibee hódzáanii yízdóołts'įįł biniyé, ni' nineel'ą́ą́dę́ę́' jiníyá,#1Kgs. 10:1-10; 2Chr. 9:1-12. nidi jó'akon, Sálaman yiláahgo ayóó át'éii éí kǫ́ǫ́ naaghá.
Níłch'i nichxǫ́'íii nádááh
(Lk. 11:24-26)
43Níłch'i nichxǫ́'ígíí diné yii'dę́ę́' haagháahgo, háádoolyįhgi haintáago tó ádaadingóó hahidiighááh, nidi doo ła' yik'égháah da. 44Áko ániih, Shighandóó ch'íníyá yę́ęgóó nídeeshdááł. Áko nádáahgo doo siláhígóó, áádóó nahashzhóo'go, índa hasht'ehoolyaago yik'éghááh. 45Áko dah náádiidáahgo, náánáła' níłch'i tsosts'idgo t'ah biláhídi doo yá'ádaashóonii yił nákah, áko éí yił hwiih yikahgo hwii' kéédahat'į́į łeh, áko diné áłtséédą́ą́' át'éé nít'éé' yę́ę t'óó nówehda át'įįh. T'áá éigi át'éego díí doo yá'áshxǫ́ǫ́góó ahoolchíłígíí ałdó' t'áá ákót'ée dooleeł.
Jesus bimá índa bitsilíké
(Mk. 3:31-35; Lk. 8:19-21)
46Jesus éí diné áłah nilínígíí t'ah bich'į' yájíłti'go, jó'akon, hamá índa hatsilíké hach'į' hadadiidzih daaníigo tł'óo'di naazį́. 47[Nít'éé' diné ła' áhodííniid, Nimá índa nitsilíké nich'į' hadadiidzih daaníigo tł'óo'di naazį́.] 48Nidi hoł hoolne'ígíí bich'į' hadzoodzíi'go ábizhdííniid, Háishą' shimá nilį́, áádóó háishą' shitsilíké danilį́? 49Áko Jesus hódahooł'aahii bich'į' dashdidiilnii'go ázhdííniid, Jó, kǫ́ǫ́ shimá áádóó shitsilíké! 50Háálá t'áá háiida shiTaa' yá'ąąshdi hólóonii íinízinii bi'jił'ínígíí éí shitsilí áádóó shideezhí índa shimá jílį́.
Currently Selected:
MATTHEW 12: NVJOB
Highlight
Copy
Compare
Share
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
