MATTHEW 10
10
Jesus éí naakits'áadahígíí náyiizláá'
(Mk. 3:13-19; Lk. 6:12-16)
1Áádóó Jesus hódahooł'aahii naakits'áadahígíí hágo bizhdííniidgo níłch'i danchxǫ́'íii ayi'dę́ę́' hadeiniiłkaad doo biniyé bee óhólnííh bitaazdeez'ą́, áádóó nidaałniih t'áá ałtso índa ka nidaakaígíí t'áá ałtso hadaałt'é áńdazhdoodlííł ałdó' biniyé bee óhólnííh bitaazdeez'ą́. 2Áko naakits'áadahgo daal'aadii éí kódaolyé: áłtséhígíí Sáíman, éí Peter wolyéhígíí, áádóó yił háá'áázh Andrew; Zébedii biye'ké, James índa yił háá'áázh John; 3Philip áádóó Barthálemew; Thomas áádóó Matthew tax nahalyéhígíí yiniyé sidáii; James éí Alfíyas biye', índa Lebíyas, Thádiyas ałdó' wolyéhígíí; 4Sáíman éí Kéínan dine'é jílínígíí, índa Júdas Iskáriyat éí nináhodidoo'áłígíí.
Jesus bídahooł'aahii naakits'áadahígíí dayííł'aad
(Mk. 6:7-13; Lk. 9:1-6)
5Jesus kóníigo díí diné naakits'áadahgoígíí ayiis'a', Doo Jew dine'é danilíinii t'ááká bitahjį' dadohkááh yíila', áádóó Samériya dine'é ła' bikin haal'áajį' dadohkááh lágo, 6nidi Ízrel dine'é éí dibé nahalingo yóó'adahaaskaígíí bich'į'go dadohkááh. 7Áádóó dayínóhkááhgóó kódadohníigo dahołne', Yá'ąąshii bee bóhólníihgo bił haz'áanii koshídę́ę́' bich'į' hoolzhish. 8Áádóó diné bitah dahoneezgaígíí náádahidoołjeeh, łóód ats'íís yiyáanii naałdzidii bee bąąh dah nidahaz'áanii hadaałt'é áńdaahdle', diné daneeznáanii hinááh áńdaahdle', níłch'i bi'iiníziinii bii' dahólóonii biyi'dę́ę́' hadahinołkaad. Nihaa dadeest'ánígíí t'áá jíík' e nihaa dadeest'ą́, áko t'áá jíík'e bee ádaahnííł. 9Óola áádóó béésh łigaii índa béésh łitsoida ła' nihidah na'ayizii biih daoh'ááł lágo, 10áádóó dah sidoohkaigóó azis bee na'aljidí, índa nihi'éé' naakigo, áádóó nihikee', índa nihigishda t'áadoo dayínóhjáhí, háálá naalnishí ba'dooltsołgi yą́ą́h nilį́.#1Cor. 9:14; 1Tim. 5:18. 11Áko t'áá haa'ída kin hadaas'áagi índa kin naazhjaa'gi nidahohkáahgo, diné bił ílíinii hazhó'ó bínda'ídółkid, áko dah náádahidoohkáahjį' t'áá ákwii nahísóotą́ą doo. 12Índa hooghangi yah adahohkáahgo, Díí hooghangi hózhǫ́ǫ le', dadohníi doo. 13Áko hooghangi kéédahat'íinii bił da'ílį́įgo, bíni'dii k'é bee yínóh'níinii bił hólǫ́ǫ dooleeł, nidi doo yą́ą́h danilį́į́góó, éí k'é dadooniidii nihich'į' t'ą́ą́' nídoodleeł. 14Áádóó t'áá háiida doo danihinízingóó índa nihizaad doo deidiits'a'góó, éí hooghandóó, doodaii' kin haal'áádóó dah náádahidoohkáahgo nihikee' łeezh bąąh nidahołdéeh dooleeł.#10:14 Nihikee' łeezh bąąh nidanołdééh, jiníigo Diyin God bits'ą́ą́dóó yóó'ahodoot'ą́ągo óolyé. Acts 13:51. 15T'áá aaníí ánihidishní, Ánihwiit'aah beiníłką́ądi éí kin haal'áhígíí Sádam índa Gomárah#Gen. 19:24-28. biláahgo atíbidi'doolnííł.#Mt. 11:24; Lk. 10:4-12.
Atí'él'į́įjį' hoolzhish
(Mk. 13:9-13; Lk. 21:12-17)
16Jó'akon, dibé éí mą'iitsoh yitahgóó dadeeskaígi át'éego danihidish'á;#Lk. 10:3. éí bąą tł'iish hóyánígi át'éego dahonohsą́, áádóó hasbídí ba'át'e' ádinígi át'éego niha'át'e' ádaadin. 17Diné bits'ąą ádaa ádahołyą́, háálá á nidahwii'aahii bidááhdę́ę́' nidanihidiyoo'ish, áádóó kin yii' áłah nídaadleehí naaznilgóó ninihída'iiłtsxáas doo, 18áádóó shiniinaa naat'áanii índa aláahgo naat'áanii naazdáágóó bidááhdę́ę́' nidanihii'éeshgo, éí índa doo Jew dine'é danilíinii binááł shá nidahołne' doo. 19Nidi nidanihii'éeshgo, ha'át'éegoda índa ha'át'íida bee hadadoohdzihii t'áadoo biniinaa ádił nidahodołchiłí, háálá bee hadadoohdzihii áadi índa nihił béédahodoozįįł, 20háálá nihí doo hadoohdzih da, nidi nihiTaa' biNíłch'i Diyinii nihiyi'dóó yáłti'ígíí hadoodzih.#Mk. 13:9-11; Lk. 12:11,12; 21:12-15. 21Áádóó ashiiké t'áá ła' hajíí'áazhgo ła' bidi'yoolyéełjį' niná'ahidiit'aah doo, áádóó azhé'é nilíinii ba'áłchíní ninéidii'aah doo, índa áłchíní bishchíinii yich'į' nídahidiikáahgo nahodi'dootsiłjį' ninádahodii'aah dooleeł,#Mk. 13:12; Lk. 21:16. 22áádóó shízhi' biniinaa diné t'áá ałtso nihik'ee dadiniih doo,#Mt. 24:9; Mk. 13:13; Lk. 21:17. nidi t'áá háiida t'áá nihoníyáajį' ha'ólnínígíí éí yisdádooltééł.#Mt. 24:13; Mk. 13:13. 23Nidi kin haal'áagi ła' atídanihił'į́įgo, náánáłahdi kin hanáánáál'áajį' choda'iidooł'įįł, háálá t'áá aaníí ánihidishní, Diné Silį́į'ii níyáajį' Ízrel dine'é bikin hadaas'áágóó doo ałtso tádadoohkai da dooleeł.
24Íhooł'aahii éí nahonitinii doo biláahgo ájít'ée da,#Lk. 6:40. índa naalnishí éí hananit'a'í doo biláahgo ájít'ée da;#Jn. 13:16; 15:20. 25íhooł'aahii nahonitinii bił ahijíłt'é jileehígíí hoł t'áá áko doo, áádóó naalnishí hananit'a'í bił ahijíłt'éhígíí hoł t'áá áko doo. Kin bee bóhólníihii éí Béíyalzííbab deiłníigo,#Mt. 9:34; 12:24; Mk. 3:22; Lk. 11:15. kin bee bóhólníihii ba'áłchíní ałdó' t'ah yówehgo ákódeiłníi doo!
Háishą' báhádzid doo?
(Lk. 12:2-7)
26Éí bąą kódaat'éhígíí t'áadoo béédaałdzidí, háálá t'óó bił ída'ít'éhígíí t'áá ałtso dadoo'nih, áádóó nidanil'inígíí t'áá ałtso béédahodoozįįł.#Mk. 4:22; Lk. 8:17. 27Ha'át'íhída t'áá nant'inee bee nihił hashne'ii t'áadoo bahat'aadí baa dahołne', áádóó ha'át'íhída bee nihijeeh náníshniihígíí kin bighą́ą́'dóó baa dahołne'. 28Ats'íís deidiyoołhéełgo yídaneel'áanii nidi ii' sizíinii ts'ídá doo dayiyółhééł át'ée daígíí t'áadoo béédaałdzidí, nidi hool'áágóó ti'hoo'nííh bił haz'ą́ądi ii' sizíinii áádóó ats'íís t'áá yił íidoołdįįłgo yíneel'áanii béédaałdzid. 29Da' tsídiiłbáhíísh naakigo doo t'ááłá'í sindáo bą́ą́h ílį́įgo nahaniih da? Ákondi nihiTaa' doo íinízingóó t'ááłá'í nidi doo ła' ni'jį' nidootłish da. 30Jó nihitsii' t'ááłá'í níláhígo nidi ałtso dayéélta'. 31Éí bąą t'áadoo nídaałdzidí; tsídiiłbáhí t'óó ahayóí nidi biláahgo da'nohłį́.
Diné binááł Christ bee ádééhozdoolzįįłígíí
(Lk. 12:8,9)
32Éí bąą t'áá háiida diné binááł shee ádééhodzílzinígíí, shí ałdó' shiTaa' yá'ąąshdi hólóonii bidááhdę́ę́' hwee ádééhodeeszįįł. 33Nidi t'áá háiida diné binááł, Doo hwééhasin da, shididooniiłígíí, shí ałdó' shiTaa' yá'ąąshdi hólóonii bidááhdę́ę́', Doo hwééhasin da, hodideeshniił.#2Tim. 2:12.
K'é hólǫ́ doo bił níyáa da, nidi diltłish nítą́
(Lk. 12:51-53; 14:26-27)
34Nahasdzáán bikáa'gi t'áá k'é hólǫ́ǫ dooleeł biniyé jiníyá t'áadoo danohsingo shaa nitsídaahkeesí; k'é hólǫ́ǫ dooleeł doo biniyé níyáa da, nidi diltłish nítą́. 35Háálá diné bizhé'é yik'ijį' nilį́įgo, índa ach'é'é nilíinii bimá yik'ijį' nilį́įgo, áádóó azháá'áád nilíinii yizháá'áád nilíní yik'ijį' nilį́įgo ádadeeshłííł biniyé níyá, 36áko diné t'áá hó ha'áłchíní ła' hwe'ana'í danilį́į doo.#Mic. 7:6. 37T'áá háiida hazhé'é, doodaii' hamáda shiláahgo ayóó'ájó'nínígíí, éí doo shą́ą́h jílį́į da, índa t'áá háiida haye', doodaii' hatsi' shiláahgo ayóó'ájó'nínígíí, éí doo shą́ą́h jílį́į da. 38Áádóó t'áá háiida doo hatsin ałnáoszid nízhdiitįįhígíí áádóó doo shikéé' joogáłígíí, éí doo shą́ą́h jílį́į da.#Mt. 16:24; Mk. 8:34; Lk. 9:23. 39T'áá háiida jiinánígíí t'áá hó ádá shójoost'e'go éí yóó'azhdoołdił, áádóó t'áá háiida shí shiniinaa jiinánígíí yóó'azhdíí'ą́ągo éí jiinánígíí shóízhdoołt'eeł.#Mt. 16:25; Mk. 8:35; Lk. 9:24; 17:33; Jn. 12:25.
Nidoolyéełii
(Mk. 9:41)
40T'áá háiida nihich'į' k'é nídzinígíí éí shich'į' k'éznídzin,#Lk. 10:16; Jn. 13:20. áádóó t'áá háiida shich'į' k'éznídzinígíí éí Diyin God shiníł'a'ígíí ałdó' bich'į' k'éznídzin.#Mk. 9:37; Lk. 9:48. 41T'áá háiida Diyin God yá halne'ii t'áá aaníí Diyin God yá halne'ii nilínígíí bąą bich'į' k'éznídzingo, éí Diyin God yá halne'ii baa doolyéełii haa doolyééł, áádóó t'áá háiida diné ts'ídá t'áá ákogi át'éii t'áá aaníí t'áá éí nilínígíí bąą bich'į' k'éznídzingo, éí diné ts'ídá t'áá ákwii át'éii baa doolyéełii haa doolyééł. 42T'áá aaníí ánihidishní, T'áá háiida díí a'ohgo ádaat'éii ła' shíhooł'aahii nilínígíí bąą tó sik'azii yidoodlį́į́ł biniyé baazhníką́ągo, éí haa doolyéłígíí ts'ídá t'áá aaníí haa doolyééł.
Currently Selected:
MATTHEW 10: NVJOB
Highlight
Copy
Compare
Share
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
