ACTS 24
24
Paul bik'íhát'ááh
1Ashdla' yiską́ą́dóó bik'ijį' Ananáíyas aláahgo náá'iiłniihii áádóó diné yá aląąjį' naazíinii ła', índa Tertálas yolyéé léi', éí á yáłti'ii nilį́įgo, ákóyaa yił yíkai. Éí Paul bee bik'i hodiit'áanii yee naat'áanii yił dahoolne', 2áko hágo ho'doo'niidgo, Tertálas kóníigo hak'i hodii'aahgo ayá'niiłti':
Niniiłt'aa t'áá íiyisí hodéesyéelgo dahinii'náago bąą nihił dahózhǫ́, áádóó honíyą́ągo baa áhólyánígíí binahjį' díí diné bitahgi doo yá'ádaat'éehii hasht'enáá'nííł, 3kwá'ásiní, aláahgo ił nílíinii Fííliks, t'áá áłahjį' índa t'áá ałtsogi t'áá íiyisí baa ahééh daniidzin. 4Nidi t'áadoo ádanihidiniłáhí, nee ajooba' biniit'aa saad t'áá díkwíí nihá didííts'į́įłgo baa nánooshkąąh. 5Jó, nihił béédahoozingo, eii diné nihwiiłchxǫǫhii nilį́, áádóó kéyah t'áá át'éé nít'éé' Jew dine'é bitahgóó hááhoniłcha'go naaghá, índa ła', Názariin dabidii'nínígíí yich'ijí danilíinii yá naha'áii nilį́. 6T'ah nááyówehgo, kin bii' sohodizin yidoołchǫǫłgo yíneeztą́ą́', nidi dasiilził, [áko t'áá nihí nihibee haz'áanii bik'ehgo haa nídadíit'įįł nít'éé'. 7Nidi siláo aląąjį' binanit'a'í Lísiyas nihaa ní'eezhgo t'áá íiyisí t'áá na'níle'dii nihílák'ee hahóółtį́, 8áko Lísiyas éí hak'i dahodii'aahii nidááhdóó nihidookahgo yá haadzíí']. T'áá ni nahódídííłkiłgo, bee hak'i dahodiit'ánígíí nił bééhodoozįįłgo haz'ą́.
9Jew dine'é ałdó' díí bee hak'i hodiit'ánígíí t'áá ałtso t'áá ákót'é dadííniid.
Fííliks bidááhdóó Paul ách'ą́ą́h haadzíí'
10Ákohgo hazdoodzih biniyé naat'áanii hó'deezhgishgo, Paul ájíní:
Díí dine'é bá ánihwii'aahii nílį́įgo lą'í nááhaígíí shił bééhózingo bąą, shił hózhǫ́ǫgo ninááł ák'i hadideesdzih. 11Naakits'áadah yiskánídą́ą́' atah nahodeeshłaał biniyé Jerúsalemgóó níyá, 12áko kin bii' sohodizin bił haz'ą́ą́ góne' diné doo ła' bił ałgha'disht'áahgo dashijiiłtsą́ą da, doo nidi diné bił hahonishchaad da, kin bii' áłah nída'adleehgi índa kin haal'áagi nidi doo ákósht'į́į da. 13Áko k'ad bee shik'ídahoji'áhígíí nidi ninááł t'áá aaníí ájít'į́ doo dashizhdóne' át'ée da. 14Nidi díí bee t'áá aaníígóó nich'į' ádaa ch'íhonisht'aah, jó, éí honít'i'ii,#24:14 Honít'i'ii nínígíí éí Jesus woodlą́, níigo ání. bee ałts'á'áldah deiłnínígíí bik'ehgo, danihizhé'é yę́ę biDiyin God bich'į' nahashłá, nidi bee nihá haz'áanii índa Diyin God yá dahalne'ii binaaltsoos bii' bee ak'eda'ashchínígíí t'áá ałtso wooshdlą́, 15áádóó t'áá daabí Diyin God yaa dadzólíigo, t'áá ákogi ádaat'éii índa doo ákwii ádaat'éii daneeznáádę́ę́' náábidi'dooljahgo yíká dadéez'į́į́', áko shí ałdó' t'áá ákónísht'é. 16Éí bąą t'áá áłahjį' dziilí bee Diyin God índa diné bich'į' t'áá ákwii ánísht'éego í'dííníszinígíí doo shi'diił'áágóó íínísin. 17Áko kwe'é doo naasháágóó díkwíí shį́į́ shinááhaigo, da'oodlání yee dajooba'ii shidine'é baa dadeeshnił áádóó náádi'yeeshnih biniyé k'ad índa náánísdzá. 18Éidíígíí baa naasháago, kin bii' sohodizin bił haz'ą́ą́ góne' doo ąąh chingóó nahadlá bíighah aséłį́į'go, doo nida'aldeehgóó, doo nidi hahóó'áágóó Éízhadę́ę́' Jew dine'é ła' shik'ídadziskai.#Acts 21:17-28. 19Éí bee shik'ídahoji'áahii hwee dahólǫ́ǫgo, kwe'é nidááhdóó nizhdookahgo bee hadazdoodzih nít'éé'. 20Éí doodago, díí diné ándaha'áii bidááhdóó sézį́į́ nít'éé' yę́ędą́ą́', doo ákǫ́ǫ́ íisdzaii shá hoł béédahoozin ládą́ą́', háni'dii t'áá hó baa ch'ídahojí'aah, 21t'áá hazhó'ó bitahgi sézį́į́ nít'éé' yę́ędą́ą́' t'ááłáhígo t'éiyá t'áá yéego bee haasdzíí', jó éí, Da'neeznáádę́ę́' náádi'doojah ha'nínígíí biniinaa díí jį́ nihinááł shaa hwiinít'į́, dííniid.#Acts 23:6.
22Nidi Fííliks [díí yidiizts'ą́ą'go], honít'i'ii t'áá íídą́ą́' bił bééhózingo, Lísiyas, siláo aląąjį' binanit'a'í níyáago índa bee naa hwiinít'íinii ná baa nídéesht'įįł, níigo náás yideez'ą́. 23Áádóó Fííliks éí siláo neeznádiingo binanit'a'í áyidííniid, Paul baa áhólyą́, áádóó bíni'dii t'áá bí nízingóó nahaltsaadgo dabich'oonéhígíí bá nidaal'a' doo biniyé baa nídaakahígíí t'áadoo bits'ą́ąjį' kóníł'íní.
Paul éí Fííliks áádóó be'asdzą́ą́ yich'į' yáłti'
24Nidi t'áá díkwíida yiską́ągo, Fííliks be'asdzą́ą́ Drusíla yił ní'áázh, éí Jew dine'é nilį́. Fííliks éí Paul yíká i'ííł'a', nít'éé' áádę́ę́' níyáago Christ Jesus woodlą́ągo baa hodzódlí yaa halne'go yidiizts'ą́ą́'. 25Áko ts'ídá t'áá ákogi é'ét'é índa ádaa áháyą́, áádóó ánihoot'aah bich'į' hoolzhishígíí bee hadziisdzíi'go, Fííliks t'áá íiyisí yik'ee bił yéé' hazlį́į́', áko, K'ad nílááh yínááł; hahgoda ashja hoodzaago índída níká anáá'deesh'aał, hodííniid. 26[Paul béézh'níłnii'go] eii shį́į́ béeso ła' sheidooniłgo da'át'é jiniizį́į́'. Áko t'áá ahą́ą́h yíká aná'áł'aahgo yił ahił náhálnih. 27Nidi áádóó naaki nááhaigo Pórshas Féstas éí Fííliks naat'áanii nilį́į́ nít'éé' yę́ęgi naat'áanii nilį́į doo biniyé níyá, áádóó Fííliks éí Jew dine'é bił dahodeeshǫǫł niizį́į'go, Paul t'áá awáalyaa sidáa doogo yee nihoní'ą́ągo dah diiyá.
Currently Selected:
ACTS 24: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
