ACTS 23
23
1Áko Paul éí diné ándaha'áii yéego yiníł'į́įgo ádííniid, [Shahastóí áádóó] shik'isóó, Diyin God binááł yá'át'éhígi ááshníłígíí díí jį́įdi doo ła' shi'diił'áa da. 2Áko aláahgo náá'iiłniihii Ananáíyas éí Paul yíighahgóó naazínígíí, Paul bizadzołts'inéii, yidííniid. 3Nít'éé' Paul éí Ananáíyas áyidííniid, Iná'ástł'inii łigaigo yishdléezhii nílíinii,#Mt. 23:27,28. Diyin God atínidoolííł! Bee haz'áanii bik'ehgo shaa nídíít'įįłgo dah sínídáa nidi, da' ákoósh bee haz'áanii doo bídéét'i'góó shizazdoolts'į́įłgo bee hwiinił'a'? 4Nít'éé' ákǫ́ǫ́ naazínígíí ádadííniid, Da' Diyin God aláahgo yich'į' náá'iiłniihiísh yínídziih? 5Áko Paul ání, Shik'isóó, aláahgo náá'iiłniihii jílínígíí doo shił bééhózin da lá, háálá kóníigo Diyin God bizaad bee ak'e'ashchį́, Nidine'é binanit'a'í baa'ihgo doo bá hadíídzih da.#Ex. 22:28.
6Nidi diné ándaha'áii ła' Sádjusii danilį́įgo, ła' Férisii danilį́įgo Paul bił bééhoozingo, yéego yich'į' haadzíi'go ání, Shik'isóó, Férisii danilíinii nishłį́ áádóó Férisii biyázhí nishłį́;#Acts 26:5; Phil. 3:5. da'neeznáádę́ę́' náá'didoojahgo bee shił chohoo'íinii biniinaa shaa hwiinít'į́. 7Áko ákózhdííniidgo, Férisii danilíinii índa Sádjusii danilíinii ałghada'dit'áahgo yaa nídiikai, áko áłah nilínígíí ałts'áskai. 8Háálá Sádjusii danilíinii, Da'neeznáádę́ę́' doo náádi'yiijeeh da,#Mt. 22:23; Mk. 12:18; Lk. 20:27. áádóó diyingo naal'a'í ádin, índa níłch'i danilínígíí ałdó' ádin, daaní, nidi Férisii danilíinii éí, T'áá aaníí éí dahólǫ́, daaní. 9Áádóó ayóó át'éego hahodíídláád, áko bee haz'áanii yínda'niłtinii Férisii yich'ijí danilíinii ła' saał nídiijée'go ádaaní, Diné doo bąąhági áát'įįdgóó nihił béédahoozin. Níłch'i nilíinii, éí doodaii' diyingo naal'a'í ła' bich'į' haadzíi'go [haa'íshą' Diyin God t'áadoo bich'į' nideiildzilí doo]. 10Áko ayóó át'éego hahodíídláadgo siláo aląąjį' binanit'a'í nilíinii Paul nideiyiyóníísh lágo nízingo yinásdzííd áádóó, Nílááh, ákóyaa dohkáahgo baghanołteehgo siláo bighandi bił yah oohkááh, níigo yee hooł'a'.
11Áko t'áá éí bitł'éé' Paul éí Bóhólníihii hwíighahgi yiizį'go áháłní, Chánah nílį́, háálá t'áá Jerúsalemgi shá hwíínílne'ígi át'éego, Romedi ałdó' ts'ídá shá hodíílnihí.
Paul hodiyoolyéełgi honahat'á
12Hoos'įįdgo Jew dine'é ła' ahíikaigo, T'áadoo Paul dasiilyéhí doo nááda'diidį́įł da, doo nidi nááda'diidlį́įł da, daaníigo ádee hadadeesdzíi'go niná'ádadeest'ą́. 13Dízdiindóó ba'aan yilt'éego kót'éego dahodeez'ą́. 14Áko aláahgo nááda'iiłniihii índa diné yá aląąjį' naazíinii yaa yíkaigo ádaaní, Paul t'áadoo dasiilyéhí doo anááda'diilnah da, dadii'níigo ádee hadadeedzíi'go niná'ádadeet'ą́. 15Éí bąą k'ad nihí índa diné ándaha'áii Paul hazhó'ó baa nínáádadóoht'įįł ádahodoł'į́įgo, siláo aląąjį' binanit'a'í, Paul bił nihaa díí'ash, dabidohníigo bich'į' hane' óhłééh. Áko t'áadoo áadi jígháhí, dahodiyiilyééł biniyé hasht'e'ádadíníilzin doo.
16Nidi Paul bádí biyáázh Paul baa nidi'yooldahígíí yiyíínii', áko siláo bighan góne' yah ííyáago Paul yił hoolne'. 17Áko Paul éí siláo binanit'a'í ła' hágo yidííniidgo ííłní, Díí dinééh siláo aląąjį' binanit'a'í bił baa díí'ash, háálá t'áadoo le'é yee yił hodoolnih. 18Áko éí yił dah dii'áázh áádóó siláo aląąjį' binanit'a'í yił yaa ní'áazhgo áyidííniid, Paul awáalyaaí nilíinii hágo shidííniid, nít'éé' díí dinééh t'áadoo le'é yee nił hodoolnih, niłníigo nich'į' yił shidees'a'. 19Áko siláo aląąjį' binanit'a'í hála' yiyiiłtsoodgo t'áá sahdii hoł niní'áazhgo áháłní, Ha'át'íishą' bee shił ahoni'nilne'? 20Áko ání, Jew dine'é ła' nidaha'áago ádaaní, Paul hazhó'ó ninááhódídóokiłígíí t'óó bik'ijį' si'ą́ągo yiską́ągo diné ándaha'áii bich'į' Paul bił díí'ash daniłní. 21Nidi t'ááká bee ba'dóó'ááł lágo, háálá dízdiindóó ba'aan yilt'éego, Paul t'áadoo dasiilyéhí ts'ídá doo nááda'diidį́įł da, doo nidi nááda'diidlį́įł da daaníigo, ádee hadadeesdzíi'go hondahaz'ą́, áko k'ad lą́ didííniiłígíí yiba' hasht'e'ádadólzin. 22Áko siláo aląąjį' binanit'a'í, Díidí bee shił hwíínílne'ígíí t'ááká diné ła'da bee bił hóólne' yíila', yiłníigo éí dinééh yéé'níłnii'.
Fííliks naat'áanii nilíinii bich'į' Paul bi'deel'a'
23Áádóó siláo neeznádiingo binanit'a'í naaki hágo yidííniidgo ííłní, Siláo naakidi neeznádiin, áádóó siláo łį́į́' nidabiyéhígíí tsosts'idiingo, índa tsiidétáán nideijaahii naakidi neeznádiingo, hózhǫ́ hiłiijį́į'go Sesaríyajį' doonééł biniyé hasht'eohłééh. 24Índa łį́į́' ałdó' ła' bik'i dah adoohnił, éí Paul booyéeł doo, áko baa ádahołyą́ągo yá'át'éehgo Fííliks naat'áanii nilíinii bił baa doohkah. 25Áádóó kót'éego naaltsoos áyiilaa:
26Shí Kládiyas Lísiyas nishłíinii, Fííliks naat'áanii ił nílíinii k'é nidishní. 27Díí hastiin éí Jew dine'é ła' dahoołtsoodgo hoda'niiłhį́, nít'éé' Rome dine'é jílį́įgo shił bééhoozingo siláo bił haa niikaigo bighadahosiiltį́. 28Áádóó biniinaa hak'i dahodii'ánígíí shił bééhodoozįįł biniyé diné ándaha'áii bich'į' hoł ní'áázh. 29Nít'éé' t'áá bí yee nahas'áanii ła' yinahjį' hak'i dahodii'ą́ą́ lágo shił bééhoozin, nidi biniinaa hodiyoolyéełgi, éí doodago biniinaa yah ahodi'doolt'eełgi t'áadoo ła' bee há ha'oodzíi' da. 30Áko hodi'yoolyéełgo bee honahast'ánígíí bee shił hóóne'go, t'áá áko akǫ́ǫ́ nich'į' ahóół'a', áko hak'i dahodii'aahii yee hak'i dahodii'áanii t'áá ninááł yee hadahidoodzih dishníigo bee haasdzíí'. [K'adí, t'áá ákót'éhí dooleeł.]
31Ákohgo siláo t'áá bee bich'į' ha'oodzíí' yę́ęgi át'éego, tł'ée'go Paul yił dah diikaigo Antípatris hoolyéegi yił níná. 32Áádóó biiskání siláo bighangóó anídahaas'náago łį́į́' nidabiyéhígíí t'éiyá hoł dah náádii'ná. 33Éí Sesaríyagi nínáago éí naaltsoos naat'áanii yaa deistsoozgo, Paul ałdó' yich'į' yił nidaaskai. 34Áádóó naat'áanii éí naaltsoos yiyííłta'go, Háí kéyahdę́ę'shą' ánít'į́? hodííniid. Áko Silíshiyadę́ę́' ájít'į́įgo bił bééhoozingo 35áhodííniid, Nik'ídaha'áahii ałdó' yíkaigo índa, níídéests'įįł. Áko, Hérad nant'á bił haz'ą́ągi haa áháyą́ą doo, níigo yee hooł'a'.
Currently Selected:
ACTS 23: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
