Roma 7

Icilangililo ca cupo

1Bamunyinane, cine cine mwalailuka pafyo nalamweba, pantu imwe bonse mwalishiba ifyo amafunde yaba. Ni pa nshita umuntu acili umumi elyo akonka amafunde. 2Kuti twamona ku mafunde pa mwanakashi uwaupwa. Umwanakashi uwaupwa tekuti aye upwa ku mwaume umbi ilyo wiba acili umumi. Nomba nga afwa, lyena ninshi ifunde lyakuba umukashi wakwe lyapwa. 3Kanshi umwanakashi nga aya upwa ku mwaume umbi ilyo wiba acili umumi, ninshi uyu mwanakashi balamwita umucende. Nomba nga wiba afwa, lyena ninshi ifunde lyakuba umukashi wakwe lyapwa. Nga cakuti aupwa ku mwaume umbi, tekuti balemwita umucende. 4Kanshi nifyo fine kuli imwe bamunyinane. Imwe nomba muli filundwa fya mubili wakwa Kristu. Kanshi calipwa, mwalifuma ku Mafunde yakwa Mose. Imwe nomba muli bantu bakwa uyu Lesa abushishe ku bafwa, pakuti na ifwe tulebombela Lesa icisuma. 5Ilyo twalakonkelela imikalile yabuntunse, Amafunde yakwa Mose yalengele ulunkumbwa lubi lwa mu mibili yesu ukuti tulebombafye ifyakutuletela imfwa. 6Kanshi apo capwilililafye twalisha icatuteekele ubusha, nomba twalilubuka ku Mafunde yakwa Mose. Kanshi nomba tatubombela Lesa mukukonka amafunde yalembelwe kale, lelo tukonka umusango upya wakwa Mupashi Wamushilo.

Amafunde yakwa Mose no bubifi

7 # Ukuf 20:17 Nga kanshi tutile shani? Bushe Amafunde yakwa Mose e bubifi bwine? Awe iyoo! Lelo kwena ukwabula ukwishiba Amafunde yakwa Mose, nga tekuti njishibe ifyo ububifi bwaba. Pantu amafunde ayakaana kunjeba ukuti, “Wilakumbwa,” awe ine no lunkumbwa nga nshalwishiba. 8Lelo ni muli ici cebo emo ububifi bwabelama no kundetela ulunkumbwa lwa misango ne misango. Pantu ukwabula Amafunde yakwa Mose ninshi ububifi takuli. 9Na ine wine nali uwamweo ilyo nshilaishiba Mafunde yakwa Mose. Nomba ilyo naishiba icebo, no bubifi bwaisa mu bumi bwandi no kufwa nafwa. 10Kanshi icebo ico cine icali nokumpeela umweo, ine nasanga ukuti ecandetela imfwa. 11#Icite 3:13Pantu ububifi bwabomfeshe icebo no kumbepaika. Kanshi ububifi bwaingila mu cebo no kunjipaya.

12Kwena Amafunde yakwa Mose yamushilo, ne cebo cine camushilo, cisuma, citutungulula na kukucita ifyo Lesa afwaya. 13Bushe calola mukutila icintu cisuma ecandetela imfwa? Awe iyoo! Bubifi ebwanjipaya. Ububifi bwabomfya icintu icisuma eco bwanjipailako, pakuti icine cine cishibikwe ifyo bwaba. Kanshi icebo citulanga ifyo ububifi bwabipisha.

Ubulwi twabamo

14Bonse twalishiba ukuti Amafunde yakwa Mose, mafunde yakwa Lesa. Lelo ine ndi muntufye, nateekwa ubusha no bubifi. 15#Gal 5:17Ifyo ncita, nshishiba neco mficitila. Kabili ifyo ndefwaya ukucita, nshicita. Elyo nasanga ndecita ifyo napata ukucita. 16Ilyo ncita ifyo nshifwaya kucita, ninshi nasuminisha ukuti Amafunde yakwa Mose yasuma. 17Kanshi ilyo ncita ifintu ncita, teine ncita, lelo bubifi ubwaba muli ine. 18Nalishiba ukuti mu buntunse bwandi, tekuti ncite icisuma nelyo cimo. Pantu ine nangu ningafwaya ukucita ifisuma, awe ndafilwa ukuficita. 19Pantu ifisuma mfwaya ukucita, nshicita. Lelo ifibi ifyo nshifwaya kucita, efyo ncita. 20Kanshi ilyo ncita ifintu nshilefwaya kucita, ninshi teine ncita ifyo, lelo bubifi ubwaba muli ine ebucita ifyo.

21Kanshi lyonse ifyo ciba nifi, lyonse ilyo mfwaya ukucita icintu icisuma, nsanga ndecita icibi. 22Mu mutima wandi mwena nalitemwa nganshi amafunde yakwa Lesa. 23Lelo umubili wandi ukonkelelafye fimbi ifyapusana nefyo umutima ufwaya. Ici ecalenga ukuti ububifi bwaba muli ine bunteeke ubusha. 24Yangu ne mulanda wine wine! Nani akampokololako kuli ici cimubili icilentwala ku mfwa? 25Lesa nakutotela, pa mulandu wakwa Yesu Kristu Imfumu yesu.

Kanshi ifi efyo caba kuli ine. Mu mutima wandi ndafwaya ukubombela Lesa, nomba bumuntu bwandi bwena bufwayafye ukubombela ububifi.

Currently Selected:

Roma 7: ILL15

Highlight

Copy

Compare