Roma 3

1Bushe kanshi finshi Abayuda bacilapo pa Benafyalo? Bushe kanshi finshi Abayuda bamwenamo mukusembululwa? 2Awe fyena fingifye, ifyalekana lekana! Icapakubalilapofye, Abayuda ebo Lesa apeela ukulabakilila amashiwi yakwe. 3Nomba nangu nga cakuti bamo tabali na cisumino, bushe ukukanaba ne cisumino, ekwingalenga Lesa ukubalukila? 4#Amalu 51:4; 116:11Awe cakaana! Lesa wacishinka nangu abantu bonse babufi. Efyo calembwa ukuti,

“Ilyo ulanda, bonse balamona ukuti ulalungika.

Ulashinina na balekulubulwisha.”

5Nga kanshi kuti twatilapo shani, apo ifyo tulufyanya filanga ukuti Lesa alalungika? Bushe kuti twatila, Lesa atufyenga nga atukalipila? (Pano ndelanda na mano yabuntunse.) 6Awe iyoo! Lesa, nga talungika, bushe kuti apingula shani abantu bonse aba pano isonde?

7Umo kuti atila, “Ndi wabufi, lelo ubufi bwandi bulalumbanya Lesa pantu buleka ukuti bucishinka bwakwa Lesa bumonekeshe. Nga kanshi cinshi Lesa acili alempeela umulandu nga ne mubifi?” 8Ico cena e cimo nokutilafye, “Natulebifya pakuti ubusuma bulemoneka.” Efyo abantu bamo batubepesha ukuti efyo tufunda! Aba bantu cabalingafye ukukandwa.

Bonse tuli babifi

9Nga kanshi ni shani? Bushe ifwe fwe Bayuda twalicilapo pa Benafyalo? Awe cakaana! Ninanda kale ukuti, Abayuda pamo na Benafyalo bene, bonse twateekwa ubusha no bubifi. 10#Amalu 14:1-3; Amalu 53:1-3; Kaf 7:20Efyo calembwa ukuti,

“Takwaba muntu nelyo umo uwakaele pa cinso cakwa Lesa, cinefye takwaba.

11Takwaba muntu nelyo umo uwiluka pafyo Lesa afwaya.

Takwaba muntu nelyo umo uufwaya Lesa.

12Abantu bonse balifutatila Lesa.

Bayalukafye ifinangwa.

Tapaba nangu umo uuwamya,

nangufye umo.

13 # Amalu 5:9; 140:3 Imikolomino yabo ni nindi ishacenama.

Indimi shabo shilandafye ifyabufi.

Ubusungu bwa mafwafwa bwaba pa milomo yabo.

14 # Amalu 10:7 Mu tunwa twabo mwabafye ukulapisha no bukali.

15 # Esaya 59:7-8 Aba bantu basampuka nganshi kukwipaya.

16Konse uko bapita,

bonaushi no bulanda efishalako.

17Tabaishiba ifyakwikala mu cibote.

18 # Amalu 36:1 Umwenso wakutiina Lesa tawaba pa finso cabo.”

19Nomba ifwe twalishiba ukuti fyonse ifyaba mu Mafunde yakwa Mose, fyaba nokukonkwa na bantu abo fyapeelwako. Fyapeelwa pakuti abantu bemona akabepesho. Elyo beshibe nokuti abantu bonse aba pano isonde bali nokulubulula kuli Lesa. 20#Gal 2:16Pantu takwaba muntu nelyo umo uwingaba uwakaele pa cinso cakwa Lesa mukusunga Amafunde yakwa Mose. Amafunde yakwa Mose yena yakulangililafye umuntu ukwishiba ukuti abifya.

Ifyo Lesa atulenga ukuba abakaele

21Nomba Lesa nasokolola ifyo afwaya ukuti alule umuntu abe uwakaele pa cinso cakwe. Kanshi temukusunga Amafunde yakwa Mose. Kwena Amafunde yakwa Mose na Bakasesema e bakambone pali uyu mulandu. 22Ni mu cisumino muli Yesu Kristu emo Lesa alenga ukuti abantu babe abakaele pa cinso cakwe. Efyo Lesa acita ku muntu onse uwasumina muli Kristu. Pantu Lesa taba na kapatulula. 23Abantu bonse balibifya kuli Lesa, kabili balafilwa no kufika ku bucindami Lesa abapekanishisha. 24Nomba muli Yesu Kristu uwatulubula, emo Lesa ku cikuukufye cakwe atucita ukuba abakaele pa cinso cakwe. 25Kabili ni mu mulopa wakwa Kristu uo Lesa alekele ukuba ilambo lyakufumisha abantu ifyabubifi, pali ico bamusumina. Kanshi mukucita ifi, Lesa atulanga ifyo aba umololoke. Ku mulandu wa mutekatima wakwe, na kale line alesuula ku fyabubifi fya bantu. 26Lelo muli shino nshiku mukukanasuulakofye ku fyabubifi, Lesa alanga ukuti mololoke. Kanshi efyo alanga nokuti umwine wine wakaele, kabili alenga no muntu onse uwasumina muli Yesu ukuba uwakaele.

27Nga kanshi finshi twingaitakishishapo? Awe nangu fimo! Nga mulandu nshi? Bushe nico tusunga Amafunde yakwa Mose? Awe iyoo, lelo nico twaba ne cisumino. 28Ifwe twashininkisha ukuti umuntu aba uwakaele pa cinso cakwa Lesa, teico asunga Amafunde yakwa Mose, lelo nico aba ne cisumino. 29Bushe Lesa ni Lesa wa Bayuda beka? Bushe tali Lesa wa Benafyalo nabo bene? Ee, cine cine na Benafyalo bene nabo ni Lesa wabo. 30#Amaf 6:4; Gal 3:20Kwabafye Lesa umo, eulenga Abayuda babe abakaele pa cinso cakwe ico basumina. Kabili eulenga na Benafyalo nabo babe abakaele pa cinso cakwe ico basumina. 31Bushe calola mukutila tuleonaula Amafunde yakwa Mose ku cisumino ici? Awe cakaana, tulekosha na Mafunde yakwa Mose.

Currently Selected:

Roma 3: ILL15

Highlight

Copy

Compare