Popular Bible Verses from Roma 3

Share

Abantu bonse balibifya kuli Lesa, kabili balafilwa no kufika ku bucindami Lesa abapekanishisha. Nomba muli Yesu Kristu uwatulubula, emo Lesa ku cikuukufye cakwe atucita ukuba abakaele pa cinso cakwe.

Ni mu cisumino muli Yesu Kristu emo Lesa alenga ukuti abantu babe abakaele pa cinso cakwe. Efyo Lesa acita ku muntu onse uwasumina muli Kristu. Pantu Lesa taba na kapatulula.

Kabili ni mu mulopa wakwa Kristu uo Lesa alekele ukuba ilambo lyakufumisha abantu ifyabubifi, pali ico bamusumina. Kanshi mukucita ifi, Lesa atulanga ifyo aba umololoke. Ku mulandu wa mutekatima wakwe, na kale line alesuula ku fyabubifi fya bantu. Lelo muli shino nshiku mukukanasuulakofye ku fyabubifi, Lesa alanga ukuti mololoke. Kanshi efyo alanga nokuti umwine wine wakaele, kabili alenga no muntu onse uwasumina muli Yesu ukuba uwakaele.

Pantu takwaba muntu nelyo umo uwingaba uwakaele pa cinso cakwa Lesa mukusunga Amafunde yakwa Mose. Amafunde yakwa Mose yena yakulangililafye umuntu ukwishiba ukuti abifya.

Efyo calembwa ukuti, “Takwaba muntu nelyo umo uwakaele pa cinso cakwa Lesa, cinefye takwaba. Takwaba muntu nelyo umo uwiluka pafyo Lesa afwaya. Takwaba muntu nelyo umo uufwaya Lesa. Abantu bonse balifutatila Lesa. Bayalukafye ifinangwa. Tapaba nangu umo uuwamya, nangufye umo.

Ifwe twashininkisha ukuti umuntu aba uwakaele pa cinso cakwa Lesa, teico asunga Amafunde yakwa Mose, lelo nico aba ne cisumino.

Awe cakaana! Lesa wacishinka nangu abantu bonse babufi. Efyo calembwa ukuti, “Ilyo ulanda, bonse balamona ukuti ulalungika. Ulashinina na balekulubulwisha.”