Roma 10
10
1Mwe bamunyinane, ine ndafwaisha nganshi no mutima wandi onse no kupepelako abena Israeli ukuti bakapusuke. 2Ine ndi kambone wabo ukuti balicincila nganshi mukubombela Lesa. Nomba babombafye ukwabula ukwishiba ico balecita. 3Pantu tabaishiba inshila Lesa alwilamo abantu ukuba abakaele pa cinso cakwe. Bena abene baifwaila inshila shabo. Kanshi eico bakaanina ukubomfya inshila Lesa alwilamo abantu ukuti babe abakaele pa cinso cakwe. 4Pantu Amafunde yakwa Mose yapelelafye pali Kristu, epakuti abamusumina, Lesa abalule ukuba abakaele pa cinso cakwe.
Lesa afwaya ukuti abantu bonse bapusuke
5 #
Levi 18:5
Mose alemba pakucita ifyo Lesa afwaya ukulingana na Mafunde yakwe ayatila, “Uyo onse uusunga aya mafunde, ni ku mafunde akekalila umumi.” 6#Amaf 30:12-14Nomba ifyalandwa pakucita ifyo Lesa afwaya ukulingana ne cisumino fitila, “Wilasosa mu mutima obe auti, ‘Nani enganina mu mulu?’” (Ici ekweba ukuti Kristu ekile panshi.) 7“Nangu ukusosa ukuti, ‘Nani engekila ku calo ca bafwa?’” (Ici ekweba ukuti Kristu abuuke ku bafwa.) 8Lelo Amalembo Yamushilo yatila, “Ishiwi lilifye mupepi na iwe. Lili mu kanwa kobe na mu mutima obe.” Ili line e shiwi lya citetekelo tubila. 9Kanshi nga walumbula pa lwalala auti, “Yesu ni Mfumu,” kabili na mu mutima obe nausumina ukuti Lesa alimubusha ku bafwa, awe ninshi wapusuka. 10Pantu ni mukusumina mu mutima emo tumwena ukuba abakaele pa cinso cakwa Lesa. Elyo mukulumbula pa lwalala, lyena ninshi twapusuka. 11#Esaya 28:16Kabili Amalembo Yamushilo yatila, “Uyo onse uwacetekela Lesa takekatwe ne nsoni.” 12Lesa ni Mfumu ya bantu bonse. Taba na kapatulula pakati ka Bayuda na Benafyalo. Kabili eupeela ne fintu ifingi kuli bonse abamulomba. 13#Yere 2:32Efyo calembwa ukuti, “Abantu bonse abakalilila peshina lya Mfumu ebakapusuka.”
14Nomba bushe kuti bakuuta shani Imfumu iyo bashasumina? Nga kuti basumina shani Imfumu, iyo bashatala abomfwapo? Nga kuti baumfwapo shani nga takuli uwakubabilila? 15#Esaya 52:7Nga kuti babila shani nga tababatumine? Efyo calembwa ukuti, “Ala yaliyemba amakasa ya baleta Imbila Nsuma!” 16#Esaya 53:1Nomba te bonse bapokelela Imbila Nsuma. Esaya wena asosa ati, “We Mfumu, ngo wingasumina ifi fintu tuleshimika, nani?” 17Kanshi icisumino cifuma ku mashiwi bomfwa. Elyo na aya mashiwi, yantu bafundwa pali Kristu.
18 #
Amalu 19:4
Nomba ine ndeipusha, bushe cine cine tabaumfwa? Awe ukumfwa balyumfwa! Kabili calembwa ukuti,
“Awe, iciunda cafiko cilasalangana pano calo ponse,
ne mbila yafiko ilafika ukwapelela isonde.”
19 #
Amaf 32:21
Nakabili ndeipusha, bushe abena Israeli tabaishiba umo calola? Mose umwine ayasuka kale ati,
“Nkalenga ukuti mukabe no mufimbila
ku bantu abashaba mushobo wine wine.
Nkalenga ukuti mukafulwe
ku mushobo wa fiwelewele fya bantu.”
20 #
Esaya 65:1
Esaya wena alisosekeshapo nganshi ati,
“Abantu abashalemfwaya, ebansanga.
Naisokolola ku bantu abashaleipusha palwa ine.”
21 #
Esaya 65:2
Lelo pa bena Israeli pena alandapo ati,
“Akasuba konse cila bushiku naletambika amaboko yandi ku bantu abashinakila,
kabili balinsangukila.”
Currently Selected:
Roma 10: ILL15
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
