مزامیر ۳۸
۳۸
اَی خوداوند، مرَ تنها نوأ نهن
داوودٚ مزمور، یادگاری رِه.
۱ اَی خوداوند، مرَ تی خشمٚ اَمرأ وأزخوأست نوکون
و تی غیظٚ اَمرأ مرَ تنبیه نوأ کودن.
۲ چونکی تی تیرأن می جانٚ دورون فرو بوشو دأره
و تی دس می سرٚ تأنَ بوخورده.
۳ تی غیظٚ وأسی می جانٚ گوشت ساق و سالم نی‌یه؛
می گوناه وأسی می خاشأنٚ دورون هیچ سلامتی‌یی وجود نأره.
۴ می تقصیرأن می سرٚ جأ بوگوذشته،
ایتأ سنگینٚ بارٚ مأنستن کی می طاقتٚ جأ ویشتره.
۵ می حیماقتٚ وأسی می زخمأنَ چلکَ کوده و بو دکفته.
۶ خمَ بوستم، بچمستم؛
تومامٚ روز غم و غورصه اَمرأ رأ شم.
۷ می کمر دردٚ جأ سوج کونه،
می جان ساق و سالم نی‌یه.
۸ می جان بیشکفته و خسته‌یه، له و لورده بوبوستم؛
دیلٚ غورصه مره ناله کونم.
۹ اَی سرور، تومامٚ می دیلٚ ناجه‌یأن تی ورجأ نهَه؛
می ناله‌یأن تی جأ جیگا بدَه نی‌یه.
۱۰ می سینه دورون می دیل توند توند زنه،
زور و قوّت می جأ بوشو،
می چومأنم کم سو بوبوستید.
۱۱ می دوست و رِفِقأن می زخمأنٚ وأسی می جأ دوری کونیدی؛
می فک و فامیلأنم دور دورأن ایسیدی.
۱۲ اوشأنی کی قصد دأریدی مرَ بوکوشید، مِره دام نهیدی،
می بدخوأیأن جٚه می هلاکت گب زنیدی؛
و تومامٚ روز خیانت کودنٚ رِه نقشه کشیدی.
۱۳ من ایتأ کرٚ آدمٚ مأنم کی نیشنأوه،
و لالٚ آدمٚ مأنم کی نتأنه گب بزنه.
۱۴ رأس رأسی گم، من ایتأ کرٚ آدمٚ مأنستن بوبوستم کی نیشنأوه
و هیچ جوابی اونٚ دَهنٚ دورونی ننه.
۱۵ اَی خوداوند، تی رافا ایسَم؛
تو اَی سرور، می خودا، می جوابَ دیهی.
۱۶ چره کی بوگفتم: «اگه می پا لغزش بوخوره،
ونأل اوشأن می ضد شادی بوکونید و خوشأنَ گولاز بوکونید.»
۱۷ چونکی نزدیکه بکفم،
و می درد همیشه می اَمرأیه.
۱۸ می تقصیرأنَ ایعتراف کونم؛
و می گونایأنٚ وأسی پریشأنم.
۱۹ می دوشمنأن پور جٚه زور و قوتیدی،
زیاد ایسیدی اوشأنی کی بیخودی می جأ بیزارید.
۲۰ اوشأنی کی می خُبی‌یَ، بدی اَمرأ جواب دیهیدی،
چره کی می حقّٚ سعی اَنه کی خوروم کارأنَ انجام بدم، مرَ بهتأن زنیدی.
۲۱ اَی خوداوند، مرَ تنها نوأ نهن؛
اَی می خودا، می جأ دور نوأ ایسَن.
۲۲ هر چی زودتر مرَ کومک بوکون،
اَی سرور، کی مرَ نجات دیهی!
Currently Selected:
مزامیر ۳۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
