متّی ۶
۶
صدقه فدن
۱ «مواظب بیبید شیمی دوروستکارییَ مردومأنٚ چومأنٚ جُلُو، خودنمایی وأسی انجام ندید. اگه اَ کارَ بوکونید، هیچ پاداشی شیمی آسمانی پئرٚ ورجأ نأریدی. ۲ پس وختی کی صدقه فدی، جار نوأ زِئن، هوطویی کی ریاکارأن، کنیسهیأن و کوچهیأنٚ میأن کونیدی تا مردوم اوشأنٚ جأ تعریف بوکونید. آمین شمرَ گم کی اوشأن، هوطویی تومامٚ خوشأنٚ پاداشَ فیگیفتیدی. ۳ وختی تو صدقه فدی، کاری بوکون کی تی چپٚ دس جٚه اونچی کی تی راستٚ دس کونه، وأخبرَ نبه، ۴ تا کی تی صدقه فَدن آشکارَ نبه. بأزین تی آسمانی پئر کی هیچی اونٚ ورجأ قایمٚ بوستنی نییه، ترَ پاداش فده.
دوعا
۵ «وختی کی دوعا کونی، ریاکارأنٚ مأنستن نوأ بوستن کی دوس دأریدی کنیسهیأنٚ دورون و خیابانأنٚ کنار بِیسید و دوعا بوکونید تا مردوم اوشأنَ بیدینید. آمین شمرَ گم کی اوشأن هوطویی تومامٚ خوشأنٚ پاداشَ فیگیفتیدی. ۶ ولی تو، وختی کی دوعا کونی، بوشو تی اوطاقٚ دورون، درَ دٚوٚد و بأزین تی آسمانی پئر کی هیچی اونٚ ورجأ قایمٚ بوستنی نییه، ترَ پاداش فده.
۷ «وختی دوعا کودَن دریدی، بُتپرستأنٚ مأنستن بیخودٚ گبأنَ تکرار نوکونید. اوشأن گومان کونیدی زیادی گب زِئنٚ مره، اوشأنٚ دوعا مستجاب به. ۸ اوشأنٚ مأنستن نیبید، چونکی شیمی پئر قبلٚ اَنکی چیزی اونٚ جأ بخوأیید، شیمی نیازَ دأنه.
۹ «شومأن وأستی اَطو دوعا بوکونید:
اَی اَمی پیرٚ آسمانی،
تی نام موقدّس ببه.
۱۰ تی پادشایی بأیه.
تی اراده هوطو کی آسمانٚ میأنی انجام به،
زیمینٚ رویم انجام ببه.
۱۱ ایمروز اَمی روزانه نانَ اَمرَ فدن
۱۲ و اَمی گونایأنَ ببخش،
هَطویی کی اَمأنم کسأنییَ کی اَمرَ بدی بوکودیدی، بخشیم.
۱۳ اَمرَ وسوسهیأنٚ جأ دور بدأر
و او شریر جأ#۶:۱۳ او شریر ینی شیطأن. نجات بده.
چونکی پادشایی، قودرت و جلال، تا اَبد تی شینه. آمین.
۱۴ «چونکی اگه مردومٚ گونایأنَ ببخشید، شیمی آسمانی پئرم شمرَ بخشه. ۱۵ ولی اگه مردومٚ گونایأنَ نبخشید، شیمی پئرم شیمی گونایأنَ نبخشه.
روزه
۱۶ «وختی کی روزه دأریدی، ریاکارأنٚ مأنستن خودتأنَ پریشأن احوال نیشأن ندید. اوشأن، اَ کارٚ مره خوشأنٚ سرمچهیَ ایجوری چأکونیدی کی خوشأنَ روزهدار نیشأن بدید. آمین شمرَ گم کی اوشأن هوطویی خوشأنٚ تومامٚ پاداشَ فیگیفتیدی. ۱۷ امّا تو، وختی روزه دأری، تی سرَ روغن وسین و تی دیمَ آب بزن ۱۸ تا تی روزه مردومٚ رِه معلوم نبه بلکی فقط تی آسمانی پئرٚ رِه کی هیچی اونٚ ورجأ قایمٚ بوستنی نییه. بأزین تی پئر ترَ پاداش فده.
گنج، آسمانٚ میأن
۱۹ «زیمینٚ سر شیمی گنجَ انبار نوکونید، جایی کی بید و مورانه زنه و دوزدأن نقب زنیدی و بأزین دوزدی کونیدی. ۲۰ شیمی گنجَ آسمانٚ میأنی انبار بوکونید، جایی کی نه بید زنه نه مورانه، و دوزدأنم نقب نزنیدی تا دوزدی بوکونید، ۲۱ چونکی هر جا تی گنج نهَه، تی دیلم هویه نهَه.
۲۲ «چوم، چراغٚ بدنه. اگه تی چوم ساق و سالم ببه، تومامٚ تی وجودم روشنه. ۲۳ ولی اگه تی چوم سالم نبه، تومامٚ تی وجودَ تاریکی گیره. هَنٚ وأسی اگه نوری کی تی وجودٚ دورون نهَه، تاریک ببه، وأستی بدأنید کی چی پیلهدأنه تاریکییی به وجود اَیه.
۲۴ «هیکس نتأنه دوتأ اربابَ خدمت بوکونه، یا اوّلی جأ نیفرت دأره و دیگرییَ موحبت کونه، ویا اَ ایتأیَ وفادار مأنه و اویتأیَ به حیساب نأوره. نتأنیدی هم خودایَ خدمت بوکونید هم ثروت دارایییَ.
نیگرانٚ زندگی نیبید
۲۵ «هَنٚ وأسی شمرَ گم کی دیلنیگرانٚ شیمی زندگی نیبید کی چی وأ بوخورید یا چی وأ بونوشید؛ و نیگرانٚ شیمی جان نیبید کی چی وأ دوکونید، چونکی زندگی فقط خوردن و لیباس دوکودن نییه. ۲۶ پرندهیأنَ آسمانٚ جور فندرید کی نه کأریدی و نه وَوینیدی و نه انبارٚ میأنی تلنبار کونیدی و شیمی آسمانی پئر اوشأنَ روزی فدِه. آیا شیمی ارزش خودا رِه او پرندهیأنٚ جأ ویشتر نییه؟ ۲۷ کویتأ جٚه شومأن تأنه دیلنیگرانی اَمرأ، ایتأ ساعت خو عمرَ زیادَ کونه؟
۲۸ «چره لیباسٚ رِه دیلنیگرانیدی؟ صحرا سوسنأنَ فندرید کی چوطویی پیلَه بیدی؛ نه زحمت کشیدی و نه نخ ریسی کونیدی. ۲۹ شمرَ گم کی حتی سلیمانٚ نبی خو تومامٚ شکوه و جلالٚ اَمرأ ایتأ جٚه او گولأنٚ مأنستن آراسته نوبو. ۳۰ اَی سُست ایمانأن، اگه خودا صحرا علفأنَ کی ایمروز نهَهییدی و فردا تنورٚ میأنی تأوده بیدی، اَطویی اوشأنَ قشنگ چأکونه، آیا شمرَ ویشتر آراستَه نوکونه؟!
۳۱ «پس دیلنیگران نیبید و نیگید ‹چی بوخوریم؟› و ‹چی بونوشیم؟› و یا ‹چی دوکونیم؟›، ۳۲ چونکی اوشأنی کی خودایَ نشنأسیدی، همهیٚ اَ جورٚ چیزأنٚ دونبألیدی، ولی شیمی آسمانی پئر دأنه کی همهیٚ اَشأنَ احتیاج دأریدی. ۳۳ شومأن قبلٚ هر چیزی، خودا پادشایی و اونٚ عیدالتَ طلب بوکونید، بأزین همهیٚ هو چیزأن شمرَ فَده به. ۳۴ هَنٚ وأسی دیلنیگرانٚ فردا نیبید، چونکی فردا خو نیگرانییَ خو اَمرأ دأره. ایمروزٚ مشکلات، ایمروزٚ رِه کافی ایسه!
Currently Selected:
متّی ۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media