متّی ۷
۷
دیگرأنَ قضاوت کودن
۱ «دیگرأنَ قضاوت نوکونید تا خودا شمرَ قضاوت نوکونه ۲ چونکی هوطو کی دیگرأنَ قضاوت کونیدی، خودا شمرَ قضاوت کونه و هو اندازه پیمانه اَمرأ کی دیگرأنَ فدیدی، شومأنم هو قدر فیگیریدی. ۳ چره پرٚ کاهَ تی برأرٚ چومٚ دورون دینی، ولی روبارخالی کی تی چوم دره وأخبر نی‌یی؟ ۴ چوطویی تأنی تی برأرَ بیگی: ‹بِیس، پرٚ کاهَ تی چومٚ جأ بیرون بأورم،› در حالی کی خودت ایتأ روبارخال تی چومٚ دورونی دأری؟ ۵ اَی ریاکار، اوّل او روبارخالَ تی چومٚ جأ بیرون بأور، بأزین بهتر تأنی بیدینی تا پرٚ کاهَ تی برأرٚ چومٚ جأ بیرون بأوری.
۶ «اونچی کی موقدّسه، سگأنَ فَندید و شیمی مرواریدأنَ خوکأنٚ جُلُو تأنودید. اگه اَ کار بوکونید، ممکنه اوشأن مرواریدأنَ لقد مال بوکونید، بأزین وأگردید و شمرَ تیکه‌پارَه کونید.
بخوأیید، وأمجید، بوکوبید
۷ «اَنقدر بخوأیید کی بدس بأورید؛ اَنقدر وأمجید کی بیأفید؛ و اَنقدر بوکوبید کی در شِمره وازَ به. ۸ چونکی هر کی اَ کارأنٚ دورون ایدامه بده موفق به،#۷:۸ اَ سه‌تأ فعل متنٚ یونانی دورون به صورتٚ استمراری به کار بوشو به اَ معنی کی وأ اَ کارأن هی ایدامه بده تا نتیجه بیگیره. هر کی بخوأیه، به دس اَوره، هر کی‌یم وامجه، پیدا کونه و هر کی بوکوبه، در اونٚ رِه وازَ به. ۹ شومأن کی پئر ایسیدی، اگه شیمی زأی شیمی جأ نان بخوأیه، اونَ سنگ فدیدی؟ ۱۰ یا ماهی بخوأیه، اونَ لنتی فدیدی؟ ۱۱ هسأ اگه شومأن، با اَنکی شیمی ذات خرابه، دأنیدی وأستی خوروم چیزأنَ شیمی زأکأنَ فدید، چقدر ویشتر شیمی آسمانی پئر خوروم چیزأنَ فده اوشأنی‌یَ کی اونٚ جأ خوأییدی. ۱۲ هَنٚ وأسی مردومٚ اَمرأ، هو جور رفتار بوکونید کی خوأییدی اوشأنم شیمی اَمرأ هو جور رفتار بوکونید. اَن ایسه خلاصه‌یٚ تورات و انبیا نیوشته‌یأن.
رأیٚ حیات
۱۳ «تنگٚ دروازه جأ بأیید بودورون، چونکی پت و پهنه او دروازه، و عریضه او رأیی کی به هلاکت ختمَ به و ایتأ عالمه ایسیدی اوشأنی کی اونٚ دورون شیدی. ۱۴ ولی تنگ ایسه او دروازه و سخته او رأیی کی به حیات ختمَ به و کم ایسیدی کسأنی کی اونَ پیدا کونیدی.
درخت و اونٚ میوه
۱۵ «پیغمبرأنٚ دوروغی هوایَ بدأر. اوشأن، گوسفندأنٚ لیباسٚ میأن شیمی ورجأ اَییدی، امّا خوشأنٚ باطنٚ میأن گرگٚ درنده ایسیدی. ۱۶ اوشأنٚ میوه‌یأنٚ جأ، اوشأنَ شنأسیدی. آیا تأنیدی انگورَ، جٚه تمش و انجیلَ، خار و خسٚ جأ بچینید؟ ۱۷ هَطو ایسه کی هر خوروم درخت، خوروم میوه فده، درختی‌یم کی بد ببه، بدٚ میوه اَوره. ۱۸ خوروم درخت نتأنه بدٚ میوه بأوره و درختی‌یم کی بد ایسه، نتأنه خوروم میوه بأوره. ۱۹ هر درختی کی خوروم میوه فَنده، وأوِه به و آتشٚ میأنی تأودَه به. ۲۰ پس اوشأنٚ میوه‌یأنٚ جأ، اوشأنَ شنأسیدی.
۲۱ «اَطویی نی‌یه کی هر کی مرَ ‹خوداوند، خوداوند› دوخوأنه، آسمانٚ پادشایی میأن شه، بلکی اونی کی می آسمانی پئرٚ اراده‌یَ بجا بأوره. ۲۲ وختی او روز#۷:۲۲ اَ جمله میأن عیسی ایشاره بوکوده به روزٚ قیامت. فأرسه، خیلی‌یأن مرَ گیدی: ‹خوداوند، خوداوند، آیا تی نامٚ اَمرأ نبوّت نوکودیمی؟ تی نامٚ مره دیوأنَ بیرونَ نوکودیمی و ایتأ عالمه معجزه انجام ندَه‌ییمی؟› ۲۳ ولی هو وخت من اوشأنَ گم: ‹هرگز شمرَ نشنأختم، می جأ دورَ بید، اَی بدکارأن!›
معمارٚ عاقل و معمارٚ بی‌عقل
۲۴ «هَنٚ وأسی هر کی می گبأنَ بیشنَوه و اوشأنَ عمل بوکونه، ایتأ عاقلٚ مردأکَ مأنه کی خو خانه‌یَ صخره سر چأکوده‌بو. ۲۵ وختی وارش بمو و سیل رأ دکفته و باد بمو و اونَ زور بأورده، او خانه خرابَ نوبوسته، چونکی اونٚ پاکار صخره سر نهَه‌بو. ۲۶ ولی هر کی می گبأنَ بیشنَوه و عمل نوکونه، ایتأ بی‌عقلٚ مردأکَ مأنه کی خو خانه‌یَ فورشٚ سر چأکوده. ۲۷ وختی وارش بمو، سیل رأ دکفته و باد بمو و اونَ زور بأورده، او خانه فوگُردسته و ایتأ پیله‌دأنه خرابی به وجود بأورده.»
۲۸ وختی عیسی اَ گبأنَ تومامَ کوده، مردوم اونٚ تعلیمٚ جأ قاقَ بوستیدی، ۲۹ چونکی اختیار و قودرتٚ اَمرأ تعلیم دَیی، نه اوشأنٚ دینٚ علما مأنستن.
Currently Selected:
متّی ۷: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media