عِزرا ۴
۴
معبدٚ چأکودنٚ اَمرأ موخالفت کونیدی
۱ وختی یهودا و بنیامینٚ دوشمنأن بیشتأوستیدی کی قومی کی تبعیدٚ جأ وأگردسته‌بید، یهوه، ایسرائیلٚ خودا رِه معبد چأکودَن‌دریدی، ۲ زروبابِل و خاندأنأنٚ پیله کسأنٚ ورجأ بوشوییدی و اوشأنَ بوگفتید: «وئلید اَمأن شیمی اَمرأ اَ معبدَ چأکونیم، چره کی اَمأنم شیمی مأنستن شیمی خودا دونبأل گردیمی، و جٚه او زمأتی کی اِسَرحَدّون، آشورٚ پادشا اَمرَ اَیه بأورده، شیمی خودا رِه قوربانی کونیمی.» ۳ ولی زروبابِل و یِشوعَ و الباقی خاندأنأنٚ پیله کسأن اوشأنَ بوگفتیدی: «اَمأن معبدٚ چأکودنٚ وأسی شیمی اَمرأ کاری نأریمی. بلکی اَمأن خودمأن تنها تنها، اونَ یهوه، ایسرائیلٚ خودا رِه چأکونیمی، هوطو کی کوروش، پارسٚ پادشا اَمرَ فرمان بدَه.»
۴ بأزین او سرزیمینٚ آدمأن، یهودا قومٚ دیل سرد بوکودید و اوشأنَ معبدٚ چأکودنٚ جأ بترسأنه‌ییدی. ۵ و مشاورأنی‌یَ اَجیر کودیدی تا یهودا قوم نتأنید خوشأنٚ مقصود و منظورَ دونبأل بیبید. اَ کارأن تومامٚ زمأتی کی کوروش، پارسٚ پادشا بو تا داریوش پادشایی ایدامه دأشتی.
عرضٚ حال، پادشایأنٚ رِه نیویشته به
۶ وختی خشایارشاه پادشا بوبوسته، اَوایلٚ اون سلطنت، قومٚ دوشمنأن اونٚ رِه ایتأ عرضٚ حال، یهودا و اورشلیمٚ مردومأنٚ ضد بینیویشتیدی. ۷ و اردشیر سلطنتٚ میأنم، بِشلام و میترِدات و طَبِئیل و الباقی اونٚ همدسأن ایتأ دس‌نیویشته، اردشیر، پارس پادشا رِه، آرامی زوانٚ اَمرأ بینیویشتید و ترجمه بوبوسته. ۸ هَطویم رِحوم کی فرماندار و شِمشایی کی کاتب بو، ایتأ عرضٚ حال اورشلیمٚ ضد، اردشیرٚ پادشا رِه اَطویی بینیویشتید: ۹ «جٚه رِحوم کی فرماندار و شِمشایی کی کاتب ایسه و الباقی اوشأنٚ همدسأن، ینی قاضیأن و بازرسأن و پیله پیله کسأن و پارس و اِرِک و بابِلٚ مردومأن و مردومأنی کی شوشٚ دورون زندگی کودیدی و اوشأنَ عیلامی گیدی ۱۰ و الباقی قومأنَ کی پیله و شریف آشوربانیپال، اوشأنَ تبعید بوکوده و وأدأشته سامره شهرٚ دورون و ماوراءالنهرٚ#۴:۱۰سرزیمینی‌یَ گیدی کی، فراتٚ روخانٚ غربٚ طرف نهَه. دیگر جاجیگایأن زندگی بوکونید. ۱۱ هَن ایسه دس‌نیویشته جٚه او عرضٚ حال کی پادشایَ اوسه کودید:
«پادشا اردشیرٚ رِه،
جٚه تی ختمتگوزارأن کی ماوراءالنهرٚ میأن زندگی کونیمی: ۱۲ پادشایَ وأخبرَ کونیمی کی یوهودیأنی کی جٚه تی ورجأ، اَمی ورجأ بموییدی، اورشلیمَ فأرسه‌ییدی، و هسأ او شهری‌یَ کی پور جٚه فیتنه و شرارت بو دوواره چأکودَن‌درید. اوشأن دیفارأنَ بوجور بردَن‌دریدی و پاکارأنَ کندَن‌درید. ۱۳ هَطویم پادشا وأستی وأخبرَ به کی اگه اَ شهر دوواره چأکوده ببه و اونٚ دیفارأن بوجور بشه، اوشأن دِه جزیه و خراج و باجَ فئندید و آخرٚ سر پادشا خزانه‌یَ ضرر زنیدی. ۱۴ جٚه اَ خأطر کی اَمأن شیمی نان و نمکَ خوریمی و دوروست نی‌یه کی پادشا بی‌حورمتی‌یَ بیدینیم، هَنٚ وأسی اَ عرضٚ حالَ اوسه کودیم کی پادشایَ وأخبرَ کونیم ۱۵ تا تاریخٚ کیتابٚ دورون کی شیمی پئرأنٚ شین بو، وأمجید و اَ کیتابٚ جأ شومأن متوجه بیدی کی اَ شهر، شهری ایسه پور جٚه فیتنه و شرارت و موشکلأنی پادشایأن و سرزیمینأنٚ رِه کی جٚه اولأرسالان اونٚ میأن فیتنه تأودَه‌ییدی و هَنٚ وأسی اَ شهر جٚه بین بوشو. ۱۶ هَنٚ وأسی پادشایَ وأخبرَ کونیم کی اگه اَ شهر دوواره چأکوده ببه و اونٚ دیفارأن بوجور بشه، ماوراءالنهرٚ جأ هیچی شمرَ نمأنه.»
پادشا دستورٚ اَمرأ کار تعطیلَ به
۱۷ بأزین پادشا اَطویی جواب بدَه:
«رِحوم کی فرماندار و شِمشایی کی کاتب ایسه و الباقی اوشأنٚ همدسأن کی سامره و دیگر ماوراءالنهرٚ شهرأنٚ دورون زندگی کونیدی، سلام. ۱۸ دس‌نیویشته کی اَمرَ اوسه کودیدی، می ورجأ روشن بخوأنده بوبوسته. ۱۹ ایتأ فرمان می جأ اوسه کوده بوبوسته، بأزین اوشأن وأرس دپرس بوکودید و بفأمستید کی اَ شهرٚ مردوم جٚه اولأرسالان پادشایأنٚ ضد ویریشتیدی و شورش و فیتنه اونٚ دورون ایتفاق دکفتی. ۲۰ پور زور و قوّتٚ پادشایأن، اورشلیمٚ میأن ایسَه‌بید کی تومامٚ ماوراءالنهرَ حکومت کودیدی و جزیه و خراجٚ و باج فیگیفتیدی. ۲۱ هسأ شومأن وأ ایتأ فرمان بدید کی او مردأکأنٚ کارٚ جُلُو بیگیفته ببه تا او زمأتی کی من حوکم نوکودم، اَ شهر چأکوده نبه. ۲۲ شیمی حواس جم ببه کی اَ کارٚ میأن دس دس نوکونید، نوکونه اَ کارٚ میأن ضرر و زیان زیادَ به کی پادشا ضرر بیدینه؟»
۲۳ وختی اردشیرٚ پادشا جواب، رِحوم و شِمشایی کاتب و اوشأنٚ همدسأنٚ ورجأ بخوأنده بوبوسته، اوشأن توند بوشویید یوهودیأنٚ ورجأ کی اورشلیمٚ دورون ایسَه‌بید و زور و قوّتٚ اَمرأ اوشأنَ وأدأشتیدی کی کارٚ جأ دس اوسأنید. ۲۴ او وخت معبدٚ کار کی اورشلیمٚ میأن نهَه‌بو، هوطو بمأنسته تا داریوش، پارسٚ پادشا سلطنتٚ دوّمی سالٚ میأنی.
Currently Selected:
عِزرا ۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
