عِزرا ۵

معبدَ دوواره چأکودن

۱ بأزین دوتأ پیغمبر، ینی حِجَّی و زکریا کی عِدّو زأی بو، یوهودیأنٚ رِه کی یهودا و اورشلیمٚ دورون زندگی کودیدی، ایسرائیلٚ خودا نامٚ اَمرأ کی اوشأنٚ سرٚ جور ایسَه‌بو نبوّت بوکودید. ۲ هو زمأتم زروبابِل، شالتیئیلٚ زأی و یِشوعَ، یوصاداقٚ زأی، ویریشتیدی کی معبدَ دوواره چأکونید و خودا پیغمبرأن اوشأنٚ اَمرأ بید و کومک کودیدی. ۳ هو وخت، تَتِنایی، ماوراءالنهرٚ والی و شِتَربوزِنای و اوشأنٚ همدسأن بموییدی اوشأنٚ ورجأ و اَطویی بوگفتیدی: «کی شمرَ ایجازه بدَه کی اَ معبدَ دوواره چأکونید و اونَ کامیلَ کونید؟» ۴ هَطویم وأورسه‌ییدی: «کسأنی کی اَ معبدَ چأکودَن‌دریدی، اوشأنٚ نام چیسه؟» ۵ ولی یوهودیأنٚ خودا چومأن، یهودا پیله کسأنٚ رو نهَه‌بو و کسی‌یم نتأنستی اوشأنٚ کارٚ جولُویَ بیگیره تا ایتأ دس‌نیویشته داریوشٚ پادشا دس فأرسه و اونم خو جوابَ اَ کارٚ وأسی اوشأنٚ رِه بینیویسه و اوسه بوکونه.

تَتِنایی دس‌نیویشته، داریوش پادشا رِه

۶ تَتِنایی، ماوراءالنهرٚ والی و شِتَربوزِنای و اونٚ همدسأن ینی پیله کسأن کی ماوراءالنهرٚ دورون زندگی کودیدی، داریوش پادشایٚ ورجأ ایتأ دس‌نیویشته اوسه کودید. ۷ او دس‌نیویشته میأن کی اونٚ رِه اوسه کودیدی، اَطویی بینیویشته بوبوسته‌بو:

«داریوشٚ پادشا جان ساق و سالم ببه! ۸ پادشایَ وأخب‌دارَ کونیمی کی اَمأن، یوهودیأنٚ سرزیمین، پیله خودا معبدَ بوشوییم و بیده‌ییمی کی اوشأن، او معبدَ پیله‌دأنه بتأشته سنگأنٚ اَمرأ چأکودَن‌دریدی و اونٚ دیفارأنٚ لا میأنی چوب نهیدی و اَ کار اوشأنٚ دسٚ اَمرأ دیقتٚ اَمرأ و توند توندی پیش شوئون دره. ۹ بأزین اوشأنٚ پیله کسأنٚ اَمرأ گب بزه‌ییمی و وأورسه‌ییم: ‹کی شمرَ ایجازه بدَه کی اَ معبدَ چأکونید و اونَ کامیلَ کونید؟› ۱۰ و هَطویم اوشأنٚ نامأنَ وأورسه‌ییمی و اوشأنٚ رئیسأنٚ نامَ بینیویشتیم تا شومأن بدأنید. ۱۱ اوشأن اَطویی اَمی جوابَ بدَه‌ییدی: ‹اَمأن خودایٚ آسمان و زیمینٚ ختمتگوزارأنیم و اونٚ معبدَ دوواره چأکودَن‌دریم کی اولأرسالان ایتأ جٚه ایسرائیلٚ پیله پادشایأن چأکوده و اونَ کامیلَ کوده‌بو. ۱۲ ولی جٚه اَ خأطر کی اَمی پئرأن، آسمانٚ خودایَ غیظَ بیرون بأوردیدی، پس خودا اوشأنَ، نبوکدنصرٚ کَلدانی، بابِلٚ پادشا دس تسلیم بوکوده کی اَ معبدَ جٚه بین ببرده و بنی‌ایسرائیلَ تبعید بوکوده بابِلٚ سرزیمین. ۱۳ ولی کوروش، بابِلٚ پادشا خو سلطنتٚ اوّلی سال، دستور بدَه کی اَ معبد دوواره چأکوده ببه. ۱۴ و هَطویم معبدٚ طلا و نقره ظرفأنَ کی نبوکدنصر، اورشلیمٚ معبدٚ جأ اوسأده‌بو و ببرده‌بو بابِلٚ معبدٚ دورون، کوروشٚ پادشا، بابِلٚ معبدٚ جأ بیرون بأورده و بیسپرده اینفرٚ دس، شِیشبَصَّر نام، کی اونَ والی چأکوده‌بو ۱۵ و اونَ بوگفته: ‹اَ ظرفأنَ اوسأن و بوشو. اوشأنَ بنَه او معبدی کی اورشلیمٚ دورون نهَه و وهل معبد خو اوّلی جاجیگاه میأن دوواره چأکوده ببه.“ ۱۶ بأزین شِیشبَصَّر بمو معبدٚ پاکارَ اورشلیمٚ میأن بکنده و جٚه او زمأت تا هسأ اونٚ چأکودن ایدامه دأره و هنوز تومامَ نوبوسته.› ۱۷ پس هسأ اگه پادشا صلاح بدأنه، وئلید پادشا خزانه دورون کی بابِلٚ میأن نهَه، وأمجید کی بیدینید کوروشٚ پادشا فرمان بدَه کی معبد، اورشلیمٚ میأن چأکوده ببه یا نه؟ بأزین اونچی‌یَ کی پادشایَ خوش بمو اَمرَ بینیویسه تا وأخب‌دارَ بیم.»

Currently Selected:

عِزرا ۵: گیلکی (رشتی)

Highlight

Copy