استر ۴
۴
مردخای، شهبانو استرٚ جأ کومک خوأیه
۱ وختی مردخای تومامٚ اَ کارأنٚ جأ وأخبرَ بوسته، خو لیباسأنَ ژندره مندرَه کوده، پلاس دوکوده و خاکسترَ خو سر فوکوده. بأزین ضجّه و ایجگره زنان شهرٚ میأن بوشو. ۲ مردخای کاخٚ درٚ جُلُو بمو ولی نتأنستی بودورون بشه چونکی هیکس حق نأشتی پلاسٚ اَمرأ کاخٚ دورون وارد ببه. ۳ هر ولایتی‌یَ کی پادشا دستور فأرسه‌یی، یهودیأنٚ میأن ایتأ پیله‌دأنه عزاداری به پا بوستی، روزه گیفتیدی و گریه و زاری کودیدی و خیلی‌یأن پلاس دوکودیدی و خاکسترٚ میأن خوفتیدی.
۴ وختی ندیمه‌یأن و خواجه‌یأن، استرَ جٚه مردخای کردکارأن وأخبرَ کودید، استر پریشأنَ بوسته و مردخای رِه لیباس اوسه کوده کی خو پلاسَ بیرون بأوره و اوشأنَ دوکونه، ولی مردخای قوبیل نوکوده. ۵ هو وخت استر ایتأ شاه خواجه‌یأنَ کی هتاک نام دأشتی و اونَ خدمت کودی، دوخوأده و دستور بدَه کی مردخای ورجأ بشه و بیدینه چی ایتفاقی دکفتن دره و چره مردخای اَطویی رفتار کونه. ۶ بأزین هتاک بوشو مردخای ورجأ کی شهرٚ میدانٚ دورونی، کاخٚ دروازه جُلُو نهَه‌بو. ۷ مردخای، هرچی کی اونٚ سر بمو، هتاکٚ رِه تعریف بوکوده و مقدارٚ دقیقٚ پولی‌یَ کی هامان قول بده‌بو در عوضٚ کوشتنٚ یهودیأن پادشا خزانه‌یَ فده، اونٚ‌ره بوگفته ۸ و ایتأ دستخطٚ او دستورَ کی شوشٚ میأن هلاک کودنٚ یهودیأنٚ‌ره بینیویشته بوبوسته، هتاکٚ دس فدَه. مردخای هتاکٚ جأ بخوأسته کی استرٚ ورجأ بشه و او دسخطَ نیشأن بده، اَ ماجرایَ تعریف بوکونه و استرٚ جأ بخوأیه کی پادشا ورجأ بشه و پادشایَ ایلتماس بوکونه کی اونَ و اونٚ قومَ رحم بوکونه. ۹ بأزین هتاک بوشو تا مردخای پیغامَ استرَ فأرسأنه. ۱۰ استر، هتاکَ بفرمأسته کی مردخای ورجأ بشه و بگه: ۱۱ «تومامٚ پادشا خدمتکارأن و اونٚ ولایتٚ مردومأن، همه‌تأن دأنیدی کی اگه مردای یا زنأکی پادشا ورجأ، صحنٚ اندرونی میأن بشه بدونٚ اَنکی پادشا اونَ دوخوأنه، تنها ایتأ حوکم اجرا به و اون کشته به، مگر اَنکی پادشا خو طلایی چوگانَ اونٚ طرف درازَ کونه تا اون زنده بمأنه. هسأ سی روزه پادشا مرَ دونخوأده کی اونٚ ورجأ بشم.»
۱۲ وختی استرٚ پیغامَ، مردخای‌یَ فأرسأنه‌ییدی، ۱۳ مردخای استرَ پیام فدَه: «ترَ فیکر نوکون چون شاه کاخٚ میأن زندگی کونی یهودیأنٚ میأن تنها تو زنده مأنی. ۱۴ هسأ اگه تو ساکیت بیبی، یهودیأنٚ رِه کومک و نجات جایٚ دیگرٚ جأ فأرسه. بأزین تو و تی خاندان همه‌تأن هلاکَ بیدی. و کی دأنه؟ بلکی هَه روزأنٚ وأسی بو کی تو شهبانو بوبوستی!»
۱۵ استر اَ پیغامَ، مردخای‌یَ اوسه کوده: ۱۶ «بوشو تومامٚ یهودیأنی کی شوشٚ میأن ایسه‌ییدی‌یَ جمَ کون و اوشأنَ بوگو کی می وأسی روزه بیگیرید و سه روز و سه شب هیچی نوخورید. من و می ندیمه‌یأنم شیمی مأنستنی روزه گیریم. بعدٚ اون پادشا ورجأ شم، گرچه دأنم اَ کار خلافٚ پادشا قانونه. اگه وأستی بیمیرم، میرمه.» ۱۷ پس مردخای بوشو و هوطویی کی استر دستور بده‌بو بوکوده.
Currently Selected:
استر ۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
