استر ۳

هامان یهودیأنٚ کوشتنٚ‌ وأسی نقشه کشه

۱ بأزین خشایارشاه خو ایتأ اَمیر، هامانَ کی هَمِداتای اَجاجی زأی بو، ایتأ مقامَ پیله‌تر جٚه مقامٚ گوذشته، فدَه و اَطویی هامان تومامٚ دیگر اَمیرأنٚ جأ بوجورتر بوبوسته. ۲ پادشا دستور بدَه‌بو کی تومامٚ دربارٚ خادمأن وأستی اونٚ ورجأ سرٚ تعظیم بیجیر بأورید و خم بیبید ولی مردخای اَ کارَ نوکوده. ۳ پادشا خادمأن کی کاخٚ دروازه ورجأ ایسَه‌بید مردخای‌یَ وَورسه‌ییدی: «تو چره پادشا دستورَ انجام نیدی؟» ۴ اوشأن هر روز اَ گبأنَ مردخای رِه واگویا کودیدی ولی اون گوش نوکودی. هَنٚ وأسی هامانَ خبر بدَه‌ییدی تا بیدینید اون مردخای کردکارأنَ تحمل کونه یا نه، چونکی مردخای اوشأنَ بوگفته‌بو کی یهودی ایسه. ۵ هامان چون بیده کی مردخای اونٚ ورجأ خمَ نیبه و سرٚ تعظیم بیجیر نأوره، اونَ خیلی غیظَ گیفته. ۶ وختی بفهمسته کی مردخای یهودی ایسه، تصمیم بیگیفته تومامٚ اونٚ قومَ کی خشایارشاه مملکتٚ میأن زندگی کودید، بوکوشه، چره کی اون تنها مردخای کوشتنَ خودشٚ حد و اندازه نیده‌یی.

۷ دوازده سال خشایارشاه پادشایی جأ بوگوذشته‌بو کی ماهٚ نیسانٚ میأن کی اوّلی ماهٚ سال بو، هو وخت هر روز هامانٚ ورجأ «پور»، ینی قرعه، تأودَه‌ییدی و هَه کارَ هر ماه تا ماهٚ دوازدهم کی «اَدار» گفتیدی، ایدامه بدَه‌ییدی. ۸ هامان، خشایارشایَ بوگفته: «قومأنٚ میأنی، قومی ایسَه کی تومامٚ ولایتأنٚ شیمی مملکتٚ دورون پخش و پلاییدی کی اَشأنٚ رسم و رسوم قومأنٚ دیگرٚ اَمرأ فرق کونه و پادشا قوانینَ اجرا نوکونیدی. اوشأنٚ تحمل کودن به سودٚ پادشا نی‌یه. ۹ اگه مایل بیبید، ایتأ دستور بینیویشته ببه کی اوشأنَ بوکوشیم. بأزین من سیصد و شصت تُن نقره خزانه‌دارأنَ فدم تا خزانه دورون دوکونید.» ۱۰ پادشا خو انگوشتری‌یَ کی فرمانَ اونٚ اَمرأ مُهر کودی خو دسٚ جأ بیرون بأورده و اونَ هامانَ کی همداتای اَجاجی زأی و یهودیأنٚ دوشمن بو، فدَه. ۱۱ پادشا اونَ بوگفته: «نقره و او قومَ تی دسأن ایسپرم تا هر چی کی خوأیی اوشأنٚ اَمرأ بوکونی.»

۱۲ بأزین سیزدهمی روزٚ اوّلٚ ماه، پادشا کاتبأنَ دوخوأدید و تومامی‌یٚ هامانٚ دستورأنَ، ساتْراپأن،#۳‏:۱۲ پارسٚ پادشایی حدوداً به ۳۶ پیله منطقه تقسیم بوبوسته‌بو کی حکومتٚ هر منطقه‌یَ اینفر به عهده دأشتی کی اونَ «ساتْراپ» گفتیدی. ولایتأنٚ فرماندارأن و پیله آدمأنٚ قومٚ رِه بینیویشتیدی. او نیویشته‌یأن، هر ولایتٚ‌ره اونٚ خط و هر قومَ اونٚ زبان جٚه خشایارشاه نام بینیویشته بوبوسته و پادشا انگوشترٚ اَمرأ مُهرَ بوستید. ۱۳ بأزین، قاصدأن، هو نامه‌یأنَ به پادشا ولایتأن ببردید و هَه دستورٚ اَمرأ تومامٚ یهودیأن - پیرأن و جوانأن، مردأکأن و زنأکأن و زأکأن - وأستی همه‌تأن ایتأ روزٚ میأن، ینی سیزدهمی روزٚ ماهٚ دوازده، هلاک بیبید و اوشأنٚ اموال به تاراج بشه. ۱۴ ایتأ دستخطٚ او دستور، وأستی ایتأ حکمٚ مأنستن تومامٚ ولایتأنَ فدَه بوبوسته‌بی و مردومأنٚ هر قومٚ رِه اعلام بوکوده‌بید تا او روزٚ رِه آماده بیبید.

۱۵ قاصدأن، پادشا دستورٚ وأسی، عجله اَمرأ بوشوییدی. اَ دستور شوشٚ قلعه میأن صادر بوبوسته. بأزین پادشا و هامان بینیشتید تا شراب بوخورید ولی شوشٚ میأن ولوله دکفته.

Currently Selected:

استر ۳: گیلکی (رشتی)

Highlight

Copy