SOERA NEHEMIA FAZA 13.
FAZA 13.
I. Ifahaogoʼõ sibai gosali Nehemia. II. Itegoe zato, me no lõ moebeʼe mbalazo gere. III. Iw̃aʼõ sibai zoei weʼamoniʼõ loeo sabato. IV. Itenaw̃a wangai ono niha baero.
1I. Ba me loeo daʼõ, ba labaso ba niha sato zoera Moze, ba lasõndra, wa no moesoera ba daʼõ, wa õʼõ manõ tola mõi banoea Lowalangi Ndraono Gamoni ba Iraono Moabi, (Moz. V. 23, 3—6), 2me no lõ laʼohe õ Ndraono Gizeraëli roti ba idanõ, fõna no, ba me no laʼoni Mbileamo andrõ, ba wangelifi jaʼira, fangelifi andrõ nibaliʼõ Lowalangida howoehowoe. (Moz. IV. 22, 5. 6. Jos. 24, 9). 3Ba me larongo goroisa andrõ, ba laheta ba Ndraono Gizeraëli niha bõʼõ fefoe. 4Ba fõna daʼõ saʼae, ba no maoso Geliasibi ere, si tengabõʼõ Dobia, si no moefataro samaigimaigi ba mbateʼe andrõ ba gosali Lowalangida, (Hez. 8, 7), 5no ihaogõ nahia Dobia andrõ mbateʼe seboea; ba mege, ba soemange niʼā andrõ niʼirõʼõ ba daʼõ ba koemõjõ ba gamagama ba si samboesamboea niʼofoeloe mboea nowi ba agoe ba fanicha, sinema Nono Lewi ba sanoenõ ba sanaro ba mbawandroehõ, awõ mboeala saoha gõlõ andrõ, balazo gere. (Moz. IV. 18, 21). 6Be me loeo daʼõ, ba lõ jaʼo ba Jeroezalema, noa sa mõido chõ razo, ba ndrõfi si 31 chõ Aretazasa, razo Mbabeli; ba lõ ara, ba oefoeli oeʼandrõ aefa ndraʼo chõ razo, (F. 11, 24), 7ba me oeroegi Jeroezalema, ba oeʼila horõ Geliazibi andrõ, me no ihaogõ chõ Dobia mbateʼe ba zinga golajama gosali Lowalangi. 8Ba abao sibai dõdõgoe ba daʼõ, ba oetema oeheta ba mbateʼe andrõ gamagama Dobia, ahori oetiboʼõ baero, 9ba oew̃aʼõ lafoelī lahaogõ mbateʼe andrõ; ba oefoelī bacha gamagama ba gosali Lowalangi, awõ zoemange niʼā, awõ goemõjõ.
10II. Ba oerongo na gõi, wa lõ moebeʼe mbobotolõ andrõ, sinema Nono Lewi, ba no tobali laheta ira Ono Lewi ba sanoenõ andrõ, nifataro ba halõw̃õra; no isaw̃a mbenoeania zamõsana. 11Ba oetahigõ zatoea, oemane: Hana wa no laʼerogõ gosali Lowalangi? Ba oefakaoniʼõ ira, ba oefoeli oefataro ira ba nahara. (F. 10, 40). 12Ba dozi niha Jehoeda, ba laʼohe zi samboesamboea niʼofoeloe, boea nowi ba agoe ba fanicha, labeʼe ba mbateʼe wangõhõna andrõ. (Moz. IV. 18, 21). 13Ba oefataro samaigimaigi ba mbateʼe wangõhõna andrõ Zelemia ere ba Sadoki sangila amachoita ba Fedaja Ono Lewi, ba tohoetohoe dangara Hanano, ono Zakoeroe ono Matania; daʼõ sa zi fadoehoe dõdõma, ba ba dangara tebeʼe wamaosa ba dalifoesõra. (Ngaʼõt. I. 26, 20). 14Tõrõtõrõ tõdõoe chõgoe daʼõ, jaʼoegõ Lowalangigoe, ba bõi olifoegõʼõ zi sõchi andrõ, nilaoegoe ba gosali Lowalangigoe ba ba halõw̃õ ba daʼõ.
15III. Ba me loeo daʼõ, ba oeʼila õsa ba mado Joeda, solazi boea nagoe ba loeo sabato ba solohe jomo boea nowi ba samonoro kalide õsi nagoe ba boea nagoe ba boea ara ba hadia ia na ngawalõ, ba solohe jomo ba Jeroezalema, ba loeo sabato. Ba oetegoe ira na laʼamawa hadia ia mbalazo. (F. 10, 32. Jer. 17, 21—27). 16Ba banoea Diro andrõ, si no fatewoe chõra ba daʼõ, ba laʼohe jomo giʼa ba hadia ia ngawalõ waniaga, ba laʼamawa ba niha Jehoeda ba Jeroezalema, ba loeo sabato. 17Ba oetahigõ zalaw̃a niha Jehoeda, oemane chõra: He moroi wa mosala manõ ami, wa lõ miʼamoniʼõ loeo sabato? 18Hadia, tenga no lamanõ gõi ira toeami, si tobali bõrõ wa ifatõrõ chõda ba ba mbanoea andre wamakao andrõ fefoe Lowalangida? Ba jaʼami, ba minõnõ na wõnoe Lowalangi andrõ ba Ndraono Gizeraëli, wolaoe salacha ba loeo sabato! 19Ba ha siʼaikõ ogõmi ba mbawa gõli, sara wongi lõ sabato, ba oew̃aʼõ ladoehõ mbawa gõli; ba oeʼoroiʼõ na: lõ tola lafoeli labokai, irege no aefa loeo sabato. Ba oefataro õsa nono matoea andrõ chõgoe, ba zinga mbawa gõli, fa bõi laʼohe jomo waniaga, ba loeo sabato. 20Ba baero mbanoea Jeroezalema laʼiagõ saniaga ba samawamawa hadia ia ba kade, ba zi bongi, mato doea wongi. 21Ba oetegoe ira, oemane chõra: Hadia wa baero gõli doemaodao ami ba zi bongi! Na samoeza tõ, ba oefaraʼoeʼõ ami! Ba iʼotarai daʼõ, ba labato weʼamõi na loeo sabato. 22Ba oebeʼe gõi li ba Nono Lewi: lahaogõ ira ba mõi manaro ba mbawa gõli ba weʼamoniʼõ loeo sabato. Ba daʼõ gõi tõrõ tõdõoe chõgoe, jaʼoegõ Lowalangigoe, ba hachõsi tõdõ ndraʼo, ba waʼeboea dõdõoe andrõ, si no fahõna!
23IV. Ba me loeo daʼõ, ba mõido gõi moefaigi niha Jehoeda andrõ, si no mangai ira alawe [baero], banoea Gasoto ba Iraono Gamoni ba Iraono Moabi. 24Onora, ba matonga lalaoe li Gasoto, ba ma li soi no mege, ba lõ laʼila li niha Jehoeda. 25Ba oetahigõ ira, oeʼelifi ira, ba oebago õsa ndra matoea andrõ ba oedõdõni mboera, ba oebeʼe ba hõloe ira chõ Lowalangi, oemane: Bõi mibeʼe ba nonora matoea nonomi alawe, ba bõi mihalõ oemõnõmi, ba ma dongami, nonora alawe! (Moz. V. 7, 3)! 26Tenga no daʼõ mbõrõ horõ Zelomo, razo Ndraono Gizeraëli? Ba niha baero andrõ fefoe, ba no lõ razo si máne jaʼia, ba no ibaliʼõ razo Ndraono Gizeraëli fefoe ia Lowalangi, balazi waʼomasi Lowalanginia ia. Ba jaʼia gõi, ba ira alawe baero zamowõhõ, ba wamazõchi horõ. (Sam. II. 12, 24. Raz. I. 3, 13; 11, 4). 27Ba ijaʼe, ba tarongo chõmi, mosala seboea ami, sala andrõ fefoe, wamazõchi horõ ba Lowalangida, me mihalõhalõ ndra alawe baero? 28Ba no oemõnõ Zanabala andrõ, banoea Horona, nono Jojada ono Geliasibi ere seboea; ba oefofanõ daʼõ, oeheta ia ba ngaigoe. 29Tõrõtõrõ tõdõoe chõra, jaʼoegõ Lowalangigoe, me no lalaoe zalacha ba gere ba ba nibeʼe õmõra, jaʼira ere ba Ono Lewi! 30Ba tobali oehaogõ ira, oeheta chõra hoekoe niha baero fefoe, ba oehonogõi halõw̃õ gere ba halõw̃õ Nono Lewi, hadia halõw̃õ zamõsana, 31ba he fameʼe eoe andrõ, na inõtõ, awõ zi aʼa hadia ia. Tõrõtõrõ tõdõoe chõgoe [daʼõ], jaʼoegõ Lowalangigoe, ba zi sõchi!
Currently Selected:
SOERA NEHEMIA FAZA 13.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.