SOERA JOBI FAZA 9.
FAZA 9.
Fanedema Jobi: I. Ifaʼeleʼõ wa lõ ambõ faʼabõlõ andrõ chõ Lowalangi, soroma ba chõnia, jaʼia si lõ horõ. II. Tebai faboeʼa niha chõ Lowalangi.
1I. Ba itema linia Jobi, imane:
2”Jaʼia, oeʼila, wa si manõ — he iwisa niha waboeʼasa chõ Lowalangi! (Sin. 143, 2).
3Na omasi ia fasoso, ba he hõnõ ngawalõ isofoe, ba sambalõ lõ iʼila iboeʼa niha. (F. 38).
4Si no atoeatoea tõdõ ba si no fahõna faʼabõlõ — ha niha zirai fatandro chõnia, ba si lõ gõna hadia ia?
5Jaʼia andrõ, samawoeʼa hili, si lõ oroma, wanoeliʼõ ba wõnoenia;
6Samahisi tanõ ba nahania, fa mangiwa gehomonia.
7Sanenaw̃a loeo, ta bõi toemboe, ba sombaʼa dõfi.
8Samologõ banoea jaw̃a, ha jaʼia, ba sanõrõ taloe nasi. (Moz. I. 1, 7).
9Sombõi dofi soja ba ”si tõloe”, awõ ”zara” andrõ, fabaja bateʼe [ndrõfi] andrõ tánõ raja. (F. 38, 31. Amos. 5, 8. Jes. 40, 26).
10Solaoe seboea, si tebai aboto ba dõdõ niha, ba sahõlihõli dõdõ, si lõ moetaha moeʼerai. (F. 5, 9. Sin. 77, 15; 86, 10).
11Hiza, itõrõ ngaigoe, ba lõ oeʼila ia; amaedola zihombo ia, wanõrõ, ba lõ oroma chõgoe.
12Na ihori niha, ba ha niha zanenaw̃a jaʼia? Ha niha zi tola mangoemaʼõ chõnia: Hadia nilaoemõ? (Jes. 45, 9. Rom. 9, 20).
13Lõ iʼalõsi wõnoenia Lowalangi — noa sa lakõwõ ira fõnania sanolo Dawa Miseraji — (Jes. 30, 7; 51, 9. Sin. 87, 4; 89, 11),
14ba mendroea manõ tebai faboeʼa ndraʼo chõnia; tebai oesõndra niw̃aʼõgoe chõnia,
15jaʼodo, si tebai manema li, he na lõ horõgoe; sangandrõ faʼahachõ dõdõ enaʼõ ndraʼo chõnia sangoehoekoe jaʼodo.
16Ba he w̃aʼae itema ligoe, na oeʼangarõfi li ia, ba tebai fadoehoe dõdõgoe, wa ifondrondrongo chõgoe.
17Irasa naʼi ndraʼo angi sabõlõ, ba inõnõ zochogoe, lõ bõrõ.
18Lõ itehe chõgoe wangahasoegõ jaʼodo, iʼaboesoiʼõ ndraʼo safõchõ sibai chõgoe.
19Na faʼabeʼe zabõlõ mbalazi, ba hiza ia! ba na lala hoekoe mbalazi, ba ha niha zogaoni jaʼodo!
20Na lala chõgoe, ba bewegoe zangetoeʼõ hoekoegoe; ba na lõ horõgoe, ba si falimo ndraʼo ibeʼe [bewegoe andrõ]. (Mat. 12, 37).
21Lõʼõ sa horõgoe — ba lõ ba dõdõgoe nosogoe; anoezoe dõdõgoe weʼasogoe ba goeli danõ.
22Oi faoma manõ, andrõ oefaloea baeha: faoma iboenoe, he satoelõ ba he si so horõ.
23Na adõlõ famoenoe niha mbõzibõzi andrõ, ba maʼiki ia ba waʼaragoeragoe dõdõ zi lõ horõ.
24Oeli danõ andre, ba no moebeʼe ba danga zeboea horõ, hõrõ zangoehoekoe, ba iʼochõ: na tenga jaʼia, ba ha niha na sa!
25II. No alio mbaw̃agoe andrõ, moroi ba zi fagohi, moloi, lõ moeʼila waʼohahaoe dõdõ. (F. 7, 7).
26No itõrõ manõ, amaedola doendraha saoha, amaedola mojo sondraʼoe.
27Na oemane dõdõgoe: Daʼoeʼosolifoeagõ waʼaboe dõdõgoe andrõ, daʼoebõhõli wa lõ sõchisõchi dõdõgoe ba oeʼohaoehaoeʼõ mbawagoe;
28ba hoemocha mboegoe zafõchṍ andrõ chõgoe fefoe — oeʼila wa lõ õbeʼe aefa ndraʼodo.
29Lõ tola tenga si so horõ ndraʼodo, ba hadia wa oeʼeregeïsi na dõdõgoe si lõ boto?
30He oesasai ndraʼo taw̃a deoe si bakoe ba he oedoechoe idanõ nawoe dangagoe, (Jer. 2, 22).
31ba õʼoengoegõ ndraʼo ba getoena ba tobali ogoro noechagoe ndraʼodo.
32Tenga niha si mane jaʼodo ia, fa oeʼila oetema linia, fa tola faboeʼa ndraʼaga fõna zangoehoekoe. (Sangomb. 6, 10. Jer. 49, 19).
33Lõ chõma sameʼe ba lala, si faoma manoefa tanga jaʼaga.
34Enaʼõ na iheta ba hoeloegoe mbõzibõzinia, ba enaʼõ na lõ ikeani ndraʼodo fametaʼoe andrõ chõnia:
35Ba hoemede ndraʼo, lõ ataʼoedo ia; tenga sa si manõ dõgõgoe.”
Currently Selected:
SOERA JOBI FAZA 9.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.