SOERA JOBI FAZA 7.
FAZA 7.
Tohoetohoe: I. Mangarõngarõ Jobi ba wamakaonia ba ba wamakao niha bõʼõ. II. Feʼangarõfi li Lowalangi, enaʼõ ihachõsi tõdõ ia.
1I. ”Hadia, tenga amaedola halõw̃õ zanoewõ halõw̃õ niha ba goeli danõ, ha hadia, lõ itõrõ nitõrõ genoni?
2Si mane sawoejoe sihoeloe tõdõ, ba weʼamõi ba loemõ ba si mane enoni, si dõnadõna loeonia,
3si manõ wa no moetõrõ chõgoe mbaw̃a wamakao, awõ wa no teʼerai chõgoe mbongi waʼafõchõ.
4Na mõido mõrõ, ba oemane: Ha waʼara dania maosodo? Ba ara zi bongi, ba atage ndraʼo wombalimbali jaʼodo, irege ibõrõtaigõ moloeo.
5Baloebaloe nõsigoe goekoeõ ba goagoa, si hoelõ danõ; molawa koeligoe, ba ifoeli atõla.
6Alio welalõ mbaw̃agoe, moroi ba ziʼoea ba zanoso; tajataja manõ, lõ tõtõnafõ.
7II. Tõrõtõrõ tõdõoe, wa no hoelõ nangi weʼasogoe ba goeli danõ! Lõʼõ saʼae ifoeli iʼila waʼohahaoe dõdõ hõrõgoe andre. (F. 14, 1. Sin. 90, 5; 144, 4. Jak. 4, 14).
8Hõrõ zangila jaʼodo iadaʼe, ba lõʼõ saʼae iʼilado dania; na iʼaloei ndraʼo hõrõoe, ba lõ jaʼodo saʼae.
9Si mane lawoeo si taja ba silalõ misa, si manõ wa lõ mangawoeli mijaw̃a zi no noemalõ ba mbanoea tooe.
10Lõʼõ saʼae ifoeli ia ba nomonia, ba lõʼõ saʼae iʼila ia nahiania mege.
11Ba lõʼõ sa gõi oetenaw̃a mbewegoe, moehede ndraʼo, ba waʼatosasa dõdõgoe andre, ba mangarõngarõdo, ba waʼaboe dõdõgoe.
12Hadia, asi ndraʼodo, ba ma hioe, wa õfataro zanaro jaʼodo?
13Na oemane dõdõgoe: Fondrara dõdõgoe dania kasogoe, itolodo woloeʼi famakaogoe kasogoe andrõ,
14ba õkeani ndraʼo fangifi ba õfetaʼoedo angilata,
15tobali omasido, na nitõgi bagi ndraʼo, omasido waʼamate, moroi ba zi no hatṍ tõla andre.
16Ariri manõ ndraʼo, tenga saoeri si lõ aetoe ndraʼodo: bõhõido, angi sa weʼasogoe ba goeli danõ!
17Hadia niha, wa no eboea ia ba dõdõoe, wa no sosó dõdõoe ia? (Sin. 8, 5; 144, 3. Heb. 2, 6).
18Wa õʼerogõ mahemoloe, wamaigimaigi jaʼia, wa lõ aedoeʼaedoe õtandraigõ ia?
19Ha waʼara dania õʼefaʼõ hõrõoe chõgoe; ha waʼara lõʼõ manõ õbõhõido, irege oetõlõ gilogoe?
20Na so horõgoe — ba hadia nilaoegoe chõoe, jaʼoegõ sihõrõhõrõgõ niha? Hana wa õbaliʼõ tandrõsa ndraʼo chõoe, irege aboea ndraʼo chõgoe?
21Ba hana wa lõ õbeʼe aefa chõgoe horõgoe, hana wa lõ õheta lalõgoe? Oefalõgoe saʼae ndraʼo tooe, ba gawoegawoe, ba na õʼaloei ndraʼo, ba lõ jaʼodo saʼae.”
Currently Selected:
SOERA JOBI FAZA 7.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.