SOERA JOBI FAZA 31.
FAZA 31.
Fangoʼozoe hoehoeo Jobi: I. Si lõ sinegoe mboeaboeania. II. No ogoro ia nadoe; no iʼomasiʼõ zi fatioe tõdõ chõnia, ba no ibeʼebeʼe gõ dome. III. Iʼangarõfi waʼatoelõ Lowalangi.
1I. ”No oeʼabeʼeʼõ nifachoigoe ba hõrõgoe andre ba hana wa oelekeʼõ menaʼõ nono alawe! (Mat. 5, 28).
2Hadia nifatõrõ Lowalangi menaʼõ moroi jaw̃a ba hadia dána chõgoe chõ Zi lõ ambõ faʼabõlõ ba mbanoea si jaw̃a?
3Hadia, tenga famakiko dána ba zanaonao horõ, ba tenga famakao ba zamazõchi si lõ sõchi?
4Hadia, lõ anehe ia lalagoe andrõ, ba bekagoe, ba hadia, lõ iʼerai? (Ngaʼõt. II. 16, 9).
5Na si falimolimo ndraʼodo ba na iʼohi wajafaja ahegoe, —
6ba jamoetoelo ndraʼo Lowalangi, ba waliëra, si lõ faʼangaja, enaʼõ iʼila, wa si lõ horõ ndraʼo. —
7Na no oeholeʼõ mbekagoe ba zinga lala, ba na no iʼoʼõ hõrõgoe tõdõgoe, ba na no togoele ba dangagoe zi lõ sõchi,
8ba hana na manaroe ndraʼo, ba na niha bõʼõ zi manga dania, ba hana na tedeha lewiõ zinanõgoe. (Moz. III. 26, 16. Moz. V. 28, 38).
9Na no owõhõ dõdõgoe ba ndra alawe, na no oedarodarogõ barõ mbatõ nawõgoe,
10ba jamõi sanoetoe fache niha bõʼõ ngambatõgoe, ba ndramoetalagoei ia niha bõʼõ. (Jes. 47, 2. Loek. 17, 35).
11Horõ seboea zi manõ, olalõw̃a, niʼotoeʼõ zangoehoekoe; (Moz. I. 38, 24. Moz. III. 20, 10. Moz. V. 22, 22),
12alitõ saʼae ia, si mangamanga hadia ia, iroegi gohokoho si tooe, sameʼe aetoe w̃aʼa zi so chõgoe, fefoe.
13Na lõ ba dõdõgoe lala chõ zawoejoegoe ira matoea ba chõ zawoejoegoe ira alawe, na so nifadõnima, —
14ba he oewisa gõi, na maoso enaʼõ Lowalangi, na izofoezofoe, ba hadia niw̃aʼõgoe wanema linia?
15Hadia, tenga sombõi jaʼodo zombõi gõi jaʼia, ba daloe ninania, tenga ha samõsa zamazõchi jaʼaga, ba daloe ninama andrõ! (F. 34, 19. Amaed. 14, 31).
16Na so zi lõ oeʼoʼõ somasi zi noemana, ba na no oebeʼe ariri hõrõ zi no mate ira matoea,
17na oeʼā manõ gõgoe, ha jaʼo, na lõ oechete ba si lõ ama, si lõ ina: —
18Lõʼõ; iʼotarai ono matoea na ndraʼodo, ba no amaedola namania ndraʼo, ba wanõinia andrõ, ba iʼotarai ono sawoejoe ndraʼo, ba oeʼoheʼohe danga zi lõ ira matoea.
19Na oeʼila zi noemana si lõ noecha, ba ma si lõ ambala,
20na lõ nifahowoeʼõ zolania jaʼodo, ba na lõ si mõi famadõhõ waʼoafoenia mboe nono mbiribiri chõgoe;
21na no oebaha dangagoe ba zi lõ ama, si lõ ina, me no oedõnadõna nawõgoe barõ mbawa gõli,
22ba jafaefa mboeʼoe galisigoe ba ja afatõ dõla daʼiogoe.
23Sataʼoe ndraʼo saʼae wamakiko andrõ, nifatõrõ Lowalangi chõgoe, ba si tebai ndraʼo, ba waʼasalaw̃ania andrõ.
24II. Na no oebeʼe tõtõnafõgoe ganaʼa ba na no oebeʼe tõi mbalaki ”wondrara dõdõgoe”; (Mar. 10, 24. Tim. I. 6, 17);
25na no omoeso dõdõgoe ba waʼeboea ganaʼagoe, ba me no fahõna gõlõgoe. — (Sin. 62, 11).
26Na oefaigifaigi haga loeo, faʼatarania andrõ, ba faʼasõchi mbaw̃a ba lalania andrõ, (Moz. V. 4, 19),
27ba na no tefowõhõ dõdõgoe, si lõ oroma, ba na no oeʼago dangagoe, wangoroʼõ jaʼia — (Raz. I. 19, 18)
28ba olalõw̃a gõi daʼõ menaʼõ, niʼotoeʼõ zangoehoekoe, me no samini tõdõ ndraʼo chõ Lowalangi jaw̃a.
29Na omoeso enaʼõ dõdõgoe, na gõna famakao zi faʼoedoe chõgoe, na owoeawoea enaʼõ dõdõgoe, na itõrõ ia si lõ sõchi — (Amaed. 4, 17)
30ba lõ oerai oetehe ba mbewegoe wolaoe si lõ sõchi, wangelifi jaʼia, enaʼõ aetoe nosonia. (Mat. 5, 44. Rom. 12, 14).
31Na lõ lamane menaʼõ awõgoe baomogoe: ’Ha niha zi lõ aboeso diwo andrõ nibeʼenia?!’
32Lõ tola mõrõ ba danõ niha bõʼõ; no oefaʼamõ amõi jomo zikoli.
33Na no oebiniʼõ horõgoe, si mane Toeada Adamo no, wamaloegõ barõ dõtõʼagoe lalõgoe, (Hebr. 13, 2. Fet. I. 4, 9),
34bõrõ waʼataʼoegoe zato, awõ wa oeʼataʼoefi tetibo ndraʼo ba dõdõ soi niha; tobali oehonogõ ndraʼo, lõ mõido tooe.
35III. Enaʼõ na so zamõsa samondrongo chõgoe! Jaʼe dandro tangagoe — jamoetema ligoe Si lõ ambõ faʼabõlõ! Ba enaʼõ na so ba dangagoe zoera andrõ, nisoera noedoegoe andrõ!
36Si ndroehoe, oeʼangalisigõ enaʼõ; oebeʼe saemboe ba hõgõgoe.
37Oeʼofaja chõnia mbekagoe; salaw̃a ndraʼo wangondrasi jaʼia.
38Na mangarõngarõ nowigoe, bõrõ ndraʼo, ba na meʼe gowotonia fefoe;
39na no oeʼā mboeania lõ oesoelõni, ba na no oeʼetoeʼõ noso zochṍ,
40ba jatoemboe zaʼasaʼa mao, salahi wache, ba doeʼoe salahi rigi!”
Ba daʼe aetoe hoehoeo Jobi andrõ.
Currently Selected:
SOERA JOBI FAZA 31.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.