SOERA JOBI FAZA 24.
FAZA 24.
Tohoetohoe: I. Folaoelaoe zeboea horõ ba II. loealoea dania.
1I. ”Hana wa lõ ihonogõi ginõtõ [wangoehoekoe] Si lõ ambõ faʼabõlõ, ba hana wa lõ laʼila mbaw̃a andrõ chõnia si lõ farõi chõnia?
2Lawoeʼai nola [niha si lõ sõchi], laraboe goerifõ ba lakoebaloi. (Moz. V. 19, 14).
3Laʼoloiʼõ koedo zi lõ ama si lõ ina, ba lahalõ gade zaw̃i lacha mbanoea.
4Latimba zi noemana, ba lala: saminiʼõ jaʼira dozi seboea famakao ba danõ.
5Hiza, hoelõ gõrõbao ndroeʼoe ba danõ si mate weʼamõira ba halõw̃õra, mangaloei gõ; ba danõ si mate lasõndra gõ nonora. (Moz. I. 16, 12).
6Ba nowi latataba gõ goerifõ, ba ba kaboe zeboea horõ laʼozaragõ woʼoewoʼoe.
7Mõrõ manõ lõ baloebaloe, lõ noecha ba lõ ambala ba waʼoafoe.
8Oi hamboenõ ira, ba deoe ba hili, ba laʼolembai gara ba hili, lõ ose. —
9Laraboe zi lõ ama, ba mbagi zoesoe nina, ba lahalõ gade nibajabaja zeboea famakao.
10Mowaõwaõ manõ lõ baloebaloe, lõ noecha, ba olofo, wangohoë basitõ.
11Barõ gõli [chõ zochõ jaʼira] lalazi wanicha, lahoendragõ wolazi nagoe, ba sowõchi tõdõ ira.
12Moroi ba mbanoea misa terongo wangarõngarõ zi mate, moeʼiraʼira niʼõʼõtõ, ba iʼosilõmilagõ zi lõ atoelõ andrõ Lowalangi.
13Ba so õsa, ba zi fatoewoe haga; lala andrõ chõnia, ba lõ laʼila, lõ latõrõ zinõrõ andrõ chõnia.
14Na ogõmigõmi ná ifazaw̃a ia sangeʼe, iboeboenoe zeboea famakao ba si noemana, ba ba zi bongi, ba amaedola zanagõ ia.
15Ba si mõi mohorõ, ba ibaseʼõ waʼabongi, imane dõdõnia: ’Lõ sangila jaʼodoʼ, ba ifobaloebaloe mbawania. (Sin. 10, 11).
16Ba zi bongi manõi jomo, ba ba zi maʼṍchõ, ba labiniʼõ ira, lõ omasi ira haga.
17Chõra fefoe, ba no timba daloe mbongi waʼamoloeo, ba gametaʼoeõ ba zi bongi, ba no toʼõlõ ira.
18II. Hoelõ zihombo ba goeli nasi ia; niʼelifi dána chõra tanõ; lõʼõ saʼae itõrõ lala ba kaboe nagoe. (F. 5, 3 b. t.).
19Na lõchõ ba na aoechoe zino, ba ogoʼõ daw̃a deoe, ba si manõ wemanga mbanoea tooe si no mamazõchi horõ.
20Olifoe ninania ia, inania sadono jaʼia: koekoeõ zi mangamanga jaʼia; lõʼõ saʼae itõrõ tõdõ niha bõʼõ ia, ba hoelõ waʼafatõ geoe waʼafatõ wanao horõ andrõ.
21Jaʼia andrõ, si anagõi si lõ ono, ba si lõ irai manolo si no mate ira matoea.
22Ba itolo zi faitoisi awõnia, faʼabõlõnia andrõ; ifoeli abeʼe zi manõ, na noa saʼae idõnadõna waʼamate.
23Ifaʼema chõnia wa lõ hadia ia, ba teʼabeʼeʼõ ia, ba ihõrõhõrõgõ lalara.
24No alaw̃a jaw̃a ira — ba lõ ararā, ba lõ jaʼira saʼae; sahõndrõ ira — nitoetoejoe, si mane tánõ bõʼõ fefoe, nitataba, si mane ngalai wache.
25Ba na tenga si manõ, ba ha niha zangoemaʼõ solaoe faja ndraʼo; ha niha zameʼe si lõ boto niw̃aʼõgoe?”
Currently Selected:
SOERA JOBI FAZA 24.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.