SOERA GESITERA FAZA 9.
FAZA 9.
I. Lalaoe mbalõra Niha Jehoeda. II. Lahonogõi owasa ”Foerimi” mbaw̃a daʼõ.
1I. Ba ba zi me 13 ba mbaw̃a si 12, — baw̃a Adara — ba nifaloea enaʼõ niw̃aʼõ razo, oroisania andrõ, loeo nidõnadõna zi fatioe tõdõ ba Niha Jehoeda, ba wolaw̃a jaʼira, ba zi no tobali, ba nilaw̃a Niha Jehoeda si fatioe dõdõ chõra: ba laʼowoeloi ira, 2ba mbanoeara, ba danõ barõ mbawa razo Ahasiwero, ba wamoenoe samoenoe jaʼira enaʼõ. Ba lõ solaw̃a jaʼira, me no dozi soi ihawoei faʼataʼoera Niha Jehoeda. 3Ba latolo Niha Jehoeda dozi salaw̃a ba danõ, ba he nifataro razo ba koemandroe ba koemandra, me no ihawoei ira faʼataʼoera Morodochai. 4No seboea ae Morodochai, ba genoni razo, ba itõrõi danõ fefoe toeriania, me itoegoe tedooe manõ waʼeboea Morodochai andrõ. 5Ba teʼala sibai zi fatioe tõdõ chõra fefoe labeʼe Niha Jehoeda, lafafahõ ba laʼõʼõtõ, laboeboenoe; somasi ira lafatõrõ ba zi fatioe tõdõ chõra. 6Ba ba hati ba Zoesa, ba 500 niha laboenoe Niha Jehoeda, lafakiko. 7Fabaja Farasandrata ba Dalafono ba Asafata, 8ba Forata ba Adalia ba Aridata, 9ba Faramasa ba Arisai ba Aridaʼi ba Wajesata, ono Hamano andrõ, 10si dafoeloe, ba ba laboeboenoe, ono Hamano ono Hamedata, oedoe Niha Jehoeda, ba si so chõra, ba lõ lababaja. 11Ba me loeo daʼõ, ba irongo razo waʼato niboenoe ba hati ba Zoesa. 12Ba imane razo chõ woʼomonia Esitera: Ba hati, ba Soesa, ba no 500 niboenoe Niha Jehoeda niha, fabaja ono Hamano, si dafoeloe, ba taʼila he wisa wolaoera ba nõri bõʼõ barõ mbawa razo! Ba hadia niʼandrõoe, enaʼõ latehe chõoe? Ba hadia zomasiʼõ, enaʼõ latõrõ chõoe? 13Ba imane Esitera: Na atoelõ chõ razo, ba enaʼõ mahemoloe gõi latehe ba Niha Jehoeda ba Zoesa nilaoera maʼõchṍ; ba ono Hamano andrõ, si dafoeloe, ba enaʼõ na lataw̃i ba gatoenga. 14Ba ibeʼe li razo, laʼoʼõ daʼõ; ba tebeʼe goroisa ba Zoesa, ba ono Hamano andrõ, si dafoeloe, ba lataw̃i. 15Ba owoelo zoei Niha Jehoeda ba Zoesa, ba zi me 14, ba mbaw̃a Adara, ba 300 laboenoe niha ba Zoesa. Ba si so chõra, ba lõ lababaja. 16Ba Niha Jehoeda ba nõri bõʼõ barõ mbawa razo, ba owoelo, ba latimba zamoenoe jaʼira enaʼõ, wolaoe balõra ba noedoera andrõ, ba 75,000 laboenoe si fatioe tõdõ chõra, ba si so chõra, ba lõ lababaja.
17II. Ba zi me 13 ba mbaw̃a Adara lalaoe daʼõ, ba ba zi me 14, ba molombase ira, ba labaliʼõ baw̃a gowoeloa ba baw̃a waʼomoeso dõdõ. 18Ba Niha Jehoeda ba Zoesa, ba no faoma owoelo [ba wamoenoe oedoera], he ba zi me 13, ba he ba zi me 14, ba tobali ba zi me 15 molombase ira, ba loeo daʼõ labaliʼõ baw̃a gowoeloa ba baw̃a waʼomoeso dõdõ. 19Andrõ wa si me 14, ba mbaw̃a Adara, labaliʼõ baw̃a waʼomoeso dõdõ ba baw̃a gowoeloa, si no amaedola gowasa Niha Jehoeda ba danõ, ba mbanoea si zaewe ba danõ misa, ba faoma lafaʼoheʼõ chõ nawõra goeracha. (Neh. 8, 10). 20Ba itanõ ba zoera daʼõ fefoe Morodochai, ba ifaʼoheʼõ zoera ba Niha Jehoeda, idozigõ õri barõ mbawa razo Ahasiwero, he sahatõ, ba he sarõoe; 21ifachoi hoekoe daʼõ chõra: ero rõfi, ba labeʼe baw̃a si sõchi zi me 14 ba si me 15, ba mbaw̃a Adara, — 22laʼohiaʼõ mbaw̃a andrõ mege, ba nitimba Niha Jehoeda si fatioe tõdõ chõra, ba baw̃a si tobali faʼomoeso dõdõ faʼatosasa, ba sitobali loeo gowoeloa faʼaboe dõdõ — wamaliʼõ baw̃a gowoeloa ba baw̃a waʼomoeso dõdõ, ba zi faoma lafaʼoheʼõ chõ nawõra oeracha, ba ba nibeʼebeʼe boeala ba zi noemana. 23Ba labeʼe hoekoe [ba chõra Niha Jehoeda] zi no lafobõrõ andrõ, awõ nisoera Morodochai chõra. 24Me no tõdõ Hamano andrõ, ono Hamedata, maʼoewoe Agagi, oedoe Niha Jehoeda fefoe, wamoenoe Niha Jehoeda, ba me no ifalaoeʼõ ”woeri” — dahõdahõ —, ba wamakiko jaʼira ba ba wangohori, (F. 3, 7), 25ba me no iw̃aʼõ razo — me no fahoehoeo chõnia Gesitera — me no ibeʼe zoera, alacha chõnia tofana mangawoeli dõdõnia famakiko andrõ ba lataw̃i ia ba gatoenga, fabaja iraononia. 26Andrõ wa labeʼe tõi mbaw̃a andrõ ”woerimi”, bõrõ ”woeri” andrõ, ba õsi zoera no mege fefoe, awõ zi no faloecha ira, ba he nirongora. 27Ba lahonogõi hoekoe daʼõ Niha Jehoeda, ba chõra ba ba ngaʼõtõra dania, ba he ba zi mõi banoeara, hoekoe si tebai awoeʼa: laʼamoniʼõ mbaw̃a andrõ, si doea ngaloeo, dali zi no moebeʼe ba zoera ba fangohonogõi jaʼia. 28Ba fa bõi olifoe ira mbaw̃a daʼõ ba enaʼõ latõrõ, gõtõgõtõ waʼara dania, dozi omo ba dozi õri ba dozi banoea, fa bõi taja ba Niha Jehoeda mbaw̃a ”woerimi” andrõ, bõi manõ olifoe ngaʼõtõra mitooe. 29Ba labeʼe ba zoera foʼomo razo, Esitera, ono Gabihailo, ba Morodochai, Niha Jehoeda andrõ, labeʼe fangaronia waʼasalaw̃ara andrõ, ba wameʼe soera ”woerimi” andrõ si samboea. 30Ba ifaʼoheʼõ zoera ba Niha Jehoeda fefoe ba nõri andrõ si 127, amatõrõw̃a Gahasiwero maʼasagõrõ ihaogõ linia chõra, soroi ba dõdõ, 31ba wameʼe hoekoe mbaw̃a ”woerimi” andrõ, ba ginõtõ nihonogõi, dali wa no labeʼe hoekoe Morodochai Niha Jehoeda ba foʼomo razo Esitera, awõ wa no labeʼe hoekoe chõra ba ba ngaʼõtõra mitooe gamachoita andrõ ba wamoni ba gõ ba ba wangarõngarõ. 32Ba tobali hoekoe nifachoi ba ”woerimi” andrõ ba goroisa Gesitera; ba tetanõ ba zoera.
Currently Selected:
SOERA GESITERA FAZA 9.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.